نداء عاجل لكل الصيادين الخبراء هنا فى المنتدى

[ahmed_aly]

بسم الله الرحمن الرحيم
أرجو من إخوانى الخبراء والصيادين القدماء والقناصين مساعدتى فيما سأطرحه من كلام وجزاكم الله كل خير
1/أنا لسة هبتدى اصطاد يعنى لسة هشترى بندقية ولسة هبتدى امارس الهواية اللى من صغرى كان نفسى امارسها
2/ أنا قريت مواضيع كتير هنا عن البنادق وعن الصيد لكن بصراحة انا يهمنى سماع أراء الصيادين الخبراء لآنهم مارسو الهواية بطريقة عملية على الطبيعة ويقدرا يقدمولى النصيحة
3/انا مبعرفش حتى امسك البندقية واعرف أنشن بيها بقولكم لسة على بياض يعنى صياد ور ور بس ان شاء الله مع الوقت عندى احساس انى هدخل بيتى كل يوم بعشر يمامات وأديهم للولية مراتى تطبخهم وناكلهم
4/سؤالى بقى انا راجل بحب أشترى الحاجة التمام من أولها يعنى موش بحب اشترى حاجة واتخنق منها وابيعها واخسر فيها وارجع اشترى النضيف لاء انا زى ماقولت بحب الحاجة الكويسة اللى تعيش معايا ومتتعبنيش وتحببنى فى الهواية موش تكرهنى فيها وانا قريت كتير عن انواع البنادق وقررت اشترى الهاى باور ان شاء الله ومحتار بين تلات بنادق الآولى السلافيا 631 نمرة واحد.... التانية الجامو الموس(gamo cfx royal) نمرة اثنين ...الثالثة ديانا460 نمرة اتنين..ايه رأيكم مع العلم انى بفضل الصيد من مسافات بعيدة يعنى ممكن توصل 50 متر وبحب فى البندقة قوتها وخامتها النظيفة ودقتها المتناهية
5/هل اقدر اتعلم النشان لوحدى من غير ماحد يعلمنى ولة لازم حد خبير يعلمنى ماسكة البندقية ووضعيتها فى ايدى وطريقة النظر بالعين اليمنى او اليسرى عشان زى ماقولتلكم انا عمرى ما مسكت بندقية او ضربت بيها نهائى...ولو اقدر اتعلم لوحدى هاخد أد ايه وقت؟
ممكن واحد من الاخوة يدخل يقولى ياعم انت لسة هتبتدى وهتجيب حاجة هاى باور حرام عليك تبهدلها وتهينها فى التعليم هقوله انا زى ماقولت موش بحب اجيب حاجة رخيصة تخنقنى من الهواية وتتعبنى معاها واجى ابيعها اخسر فيها انا ان شاء الله عندى ثقة فى الله عزو وجل انى هتعلم على طول خاصة لما امسك بندقية تفتح النفس
وسؤال تانى معلش انا طولت عليكم انا من سكان القاهرة ايه انسب مكان (وطبعا يكون مجانى )أقدر امارس فيه هوايتى من غير ما ازعج حد او حد يتعرضلى أو حرامية يطلعو عليا وانا بصطاد وياخدو منى البندقية (على فكرة انا اصولى من الصعيد واللى يتاخد منه بندقيته أهون عليه ينتحر بعد كدة)
وأخيرا أتمنى من جميع اخواتى هنا فى المنتدى الجميل ده تقديم كل النصائح الممكنة لصياد مبتدئ وهو حاطط ايده على قلبه