دعوه لمساعده الشرطه المصريه لاداء امنى افضل

[doos99]

المشاركة الأصلية كتبت بواسطة khaledabdelnaby

السلام عليكم ورحمة الله وبركاته

اولا احب اذكر بعض النقاط المهمة قبل المشاركة :

1- انا كان ليا مشاركة فى الموضوع ده اول ما بدا ودلوقتى مش لاقيها فاحب اعرف هى اتحذفت ولا مفيش حرية فى المنتدى ولا الثورة المضادة وصلت لحد منتدانا الجميل ولا ايه بالظبط

2- ملحوظة على اسلوب الحوار الذى يدور فى هذا الموضوع ولولا اهمية هذا الموضوع ورغبتى فى ابداء راى لما شاركت فى هذا الاسلوب السئ فى النقاش

3- ردا على بعض الاقوال التى قراتها وكل واحد يعلم ما قاله هناك كلمات اشعلت النار فى صدرى مثل
( الشرطة منتظرة الرئيس لانه هو اللى بيحميهم وبيحموه )
( والشرطة مش هتقدر تفرض الامن على الناس وتسيطر على الوضع اليومين دول )
( واللى بيقول ياريت تقولى على موقف واحد اتظلمت فيه من الشرطة )

ودى كانت ابرز العناوين اللى شدت انتباهى يعنى بصراحة كلمات تحرق الدم بجد

وقبل ما اعلق عليها احب اعلن موقفى انا ضد الشرطة الفاسدة

نيجى للكلام الجميل اللى اتقال اولا الشرطة مهمتها تحمى الشعب داخليا عشان كده الناس بتدفع ضرائب يعنى ضريبة مقابل خدمة اما كونهم حسين انهم ولاد مبارك وبيحموا بعض فمبارك راح واللى لسه الكلام ده فى دماغه يروح معاه اما اللى عارف انه ابن هذا الشعب العظيم فسيظل باقيا محمولا على الاعناق طالما يؤدى واجبه بشرف ونزاهة واللذى اقسم عليه اليمين يوم تخرجه

اما بالنسبة لعبارة الشرطة مش هتقدر فاللى مش قادر يقعد فى البيت ولا هما كانوا بيتدربوا فى الاكاديمية على ضبط الامن بين شوية ملائكة لا احب اعرف كل من يعمل فى الشرطة انه بينزل من البيت لازم يكون متاكد انه ممكن ميرجعش البيت تانى لان ده عمله والحرامى مهما بلطج فهو جبان حتى لو معاه دبابة واللى اسقط النظام شرفاء عزل من السلاح مؤمنين بفكرتهم مش بلطجية مسلحين ليس لهم عقيدة والشعب المصرى ذكى مش هيشوف واحد الناس كلها عارفة انه خارج عن القانون وهيقولوا للظابط سيبه ده مظلوم لان هما نفسهم عايزين يقتلعوا الجرثومة الادمية دى من وسطهم عشان يعيشوا بامان انما لو حب يتباهى بالدبورة اللى على كتفه على واحد شريف فساعتها سيحدث ما لا يحمد عقباه

واخيرا لانى عارف انى طولت ساحكى موقفين ثانيهم شائع جدا بين ملايين الشعب المصرى للى بيقول احكيلى موقف

1- قبل تخرجى من كلية الحقوق كنت سهران انا وزميلين لى واثناء عودتنا فى وقت متاخر وجدنا حقيبة نسائية على محطة اتوبيس امام القصر الجمهورى فى الشارع اللى فيه المخابرات وده يتبع قسم الزيتون ( كما علمنا فيما بعد ) فقررنا التوجه بها الى نقطة ارتكاز امنى بميدان المطرية لتسليمها واحنا كمان كنا رايحين المطرية عشان نركب ونروح فوجئنا بعد ما مشينا بخطوات بمجرد ما عبرنا ميدان السواح اللى عند البنزينة بعربية بوكس بها معاون مباحث وعدة افراد شرطة يتجهون نحونا فتوجهنا اليهم بسلامة نية لتسليمهم الحقيبة فوجدناهم يقومون بمحاصرتنا بوابل من السباب والشتائم وتفتيشنا بمنتهى العنف وقرروا اننا سرقنا هذه الحقيبة واصطحبونا الى قسم الزيتون برغم من ان القبض علينا تم بمنطقة تابعة لقسم المطرية ( مخالفة صارخة للقانون ) وراينا ليلة لن تنسى من ضرب واهانة حتى استطاع واحد زميلى من الاتصال خلسة بعمه ( مع ان ده حقه القانونى ) وهو محامى وساعتها قامت الدنيا ولم تقعد ولولا تدخل الواسطة والمحسوبية لكان الله اعلم بقدرنا الان

مفارقات بسيطة فى هذه القصة :

1- المحضر قيد عثور على مفقودات بدلا من محضر سرقة
2- حينما فض معاون المباحث ( هانى بيه ابو علم ) لمواجهتنا بمحتوى الحقيبة وجدنا بها ملابس داخلية نسائية ومبلغ نقدي كبير وعملات اجنبية ومصوغات ذهبية يعنى قضية متستفة
3- تم العثور على صاحبة الحقيبة تانى يوم الصبح وتم الاتصال بها لاستلام الحقيبة وابلغت المتصل انها فقدت ولم تسرق وازاى وصلوا لصاحبة الحقيبة فى 24 ساعة الرواية ان البوك بتاع صاحبة الحقيبة كان فيه صور ولادها واحد فيهم لابس ضابط شرطة وتصادف ( سبحان الله ) ان امين شرطة فى القسم يعرفه فاتصل بيه من اكتر من سبعين الف ضابط والاف من افراد الشرطة صدفة اقصد معجزة فى عصر انتهت فيه المعجزات
3- بعد خروجنا بفترة علمنا ان هذه الواقعة تتكرر كثيرا وطلع معاون المباحث بيعمل الحركة دى بالاتفاق مع صاحب سوبر ماركت امام محطة الاتوبيس ان اى حد ياخد الشنطة يتصل بيه ويقوله مشى ازاى وهو يمسكه متلبس ( عشان يعمل شغل مظبوط )
4- نهاية معاون المباحث احد الخارجين على القانون قام بطعنه عدة طعنات اسفرت عن استئصال ما يقرب من 12 سم من امعائه مما احاله للعمل المكتبى وذلك نتيجة تلفيقه لاخ المعتدى جريمة وتم سجنه بناء عليها فقرر الانتقام لاخيه



الموقف الثانى عشان نخرج من الاكتئاب ده بعد التخرج واصبحت محامى بعمل شغل فى قسم الازبكية وعايز اطلع شهادة والموظف عمال يلف حوالين نفسه رحت اشتكيه للظابط النوبتجى كان قاعد ساعتها ملازم تانى لسه دبورة واحدة ياربى حكيتله اللى حصل ام رد عليه بمنتهى الهدوء ( صبح عليه يا استاذ ) رشوة رسمى عينى عينك طب لما يبقى لواء هيحصل ايه

ولو عايزين مواقف تانى عندى كتير بسبب طبيعة عملى

اسف على الاطالة استرجاع ثقة الشعب المصرى ليست هينة ولكن ليست مستحيلة

ولو لزم الامر استبدال جهاز شرطة باكمله فالشعب المصرى قادر عليها مثلما استبدل نظام باكمله

لو تسمحلي اقول رايي
اظن حضرتك قولت رئيك بكل صراحه اذا في المنتدى حريه و لكن اظن ان حضرتك متحامل علي ضباط الشرطه شويه زياده يعنى و لكن اهلا بكل من يريد ان يقول رايه و لكن اطلب ان يكون شخص محترم مثلك و يحترم الاداب العامه في كلامه