كيفية مواجهة سطو مسلح

[the_air_devil]

سلام عليكم يارجالة

النهاردة قريت خبر عن حدوث سطو مسلح على محطة بنزين في شرم الشيخ...وشفت فيديو كاميرا الأمن ...وده اداني فكرة ان لازم أعمل موضوع ونحط فيه ملاحظاتنا كلنا عن كيفية التصرف في حالة التعرض لحادث مماثل لا قدر الله

الأول نشوف الفيديو

YouTube

YouTube

ثانياً: ما لاحظته من خلال الفيديو ومقترحات أرجو انها تكون نافعة لتجنب أي حوادث وإصابات:

صديقنا الشاب بدأ التصرف بحركة تلقائية بإبعاد فوهة الماسورة عنه....تصرف في بدايته سليم...لكن الخطأ الشديد الفادح انه فضل ماسك نهاية الماسورة...وفرد دراعه...وده أضعف من قدرته على إمساك السلاح وتحويل اتجاهه بعيداً عنه

كان الأفضل هو الإمساك بكلتا اليدين ...مش بإيد واحدة بس, ويفضل تكون أول إيد تمسك بيها هي إيدك الأقوى (اليمين لو كنت بتكتب باليمين والشمال لو كنت أشول زي حالاتي) ...الخطوة التانية السريعة كانت الوصول للمقبض الخشبي القريب من الماسورة (سيطر على قرب منتصف السلاح) علشان تقدر تتحكم فيه كويس ومايفلتش منك زي ماحصل مع صاحبنا

لاحظ ان ده سلاح آلي , رشاش روسي, بندقية AK 47 يعني مش أي سلاح, السلاح ضخم وطويل وبالتالي لن تجدي السيطرة على فوهته نفعاً معاك لو حاولت انك توجهه بعيد عنك....لازم تملك منتصف السلاح وإلا الموضوع هايخرج من إيدك, وأهمية امساكك بالمقبض الخشبي انه في حالة إطلاق النار الماسورة هاتبقى زي الجمر...هاتلسعك وغصب عنك إيدك هاتسيب في شعور لا إرادي..زائد القوة الارتدادية للسلاح والآي كي مايتوصاش في الناحية دي


ازاي تقدر تسيطر على السلاح؟ ضربة خاطفة من رجلك لقصبة رجل الخصم علشان تلهيه عنك لمدة نصف ثانية , تنجح فيها في الوصول لنصف السلاح..وتسبب فيها ألم للخصم وتشتت تركيزه عن ضربك بالنار خصوصاً ان ضربة قصبة الرجل بتكون مؤلمة جداً....يتبعها لكمة للوجه علشان تكمل عليه


الشاب صاحبنا ساب مسافة كبيرة بينه وبين العدو...وبالتالي مكنه من توجيه سلاحه تاني واستعادة توازنه....خلي المسافة بينكم دايماً ماتكونش كبيرة علشان ماياخدش وضعه للضرب...وفي نفس الوقت علشان تقدر تتعامل معاه برجلك أو بإيدك وتصيبه في أي مكان بجسمه وتفقده توازنه وتسحب منه السلاح....

في حالة فشل كل الجهود دي...ماقدامكش غير انك تسحب الخزنة من سلاحه وتجري تتدارى ورا أي حاجة صلبة وإلا هايدور فيك الضرب بلا رحمة...ربنا سترها مع صاحبنا اللي في الفيديو لأن واضح ان البدوي اللي حاول يسرقه كان ذخيرته محدوده ومخلي السلاح على وضع طلقة طلقة (مايضربش دفعة كاملة مرة واحدة) ...في حالات أخرى بتلاقي العدو بيضرب بهستيرية لما تكون ذخيرته متوافرة....لما يكون الخصم بيضرب عليك نار وبالذات من سلاح آلي , وبالتحديد البندقية AK 47...إوع تستخبي ورا حاجة خشب أو زجاج أو حائط خفيف...الطلقة من السلاح ده بتبقى طلقة مفترية وقوتها هائلة وتقدر تخترق نص متر من الخشب وتعدي الناحية التانية....وبعد ماتتدارى تحاول تحسب عدد الطلقات اللي طلع وتقدر العدد المتبقي داخل الخزنة....السلاح ده بيركب عليه خزنة 30 طلقة, أو 40 طلقة, أو 75 طلقة, وبيبان من شكلها هي أنهي نوع فيهم


دي كانت ملاحظات واقتراحات شخصية ...قابلة للتصويب طبعاً بواسطة وحوش القنص الموجودين في المنتدى هنا....وما أنا إلا بشر أخطئ وأصيب...وبانتظار مشاركاتكم وملاحظاتكم واقتراحاتكم...وربنا يحمينا جميعاً من كل شر وأذى وسوء وينصرنا على أعدائنا أجمعين