مسلسل البلطجة اليومى

[Ebrahim Al Ansari]

السلام عليكم
خالد باشا ربنا يحفظك ويحفظ أهل بيتك ويستركم، انا كنت متابع موضوعك الأول بتاع الخناقه الأولى ومش عارف اقولك ايه أكتر من اللى الأخوه الأعضاء الكرام قالوه.. ربنا يصبرك على هذا الإبتلاء ويعينك على المنطقه اللى انت ساكن فيها دى، وبضم صوتى لصوت اخواننا اللى نصحوك بانك تقفل على نفسك دول لعده اسباب اولا الناس دى مش عاوزين حاجه من السكان وبيتخانقو مع بعض ثانيا انت بتقول انهم مسلحين فلو لا قدر الله حصل حاجه لا صوت ولا رش هياكل معاهم ثالثا لو افترضنا انك ربنا رزقك برخصة سلاح انت واحد.. وهما كتير.. ففي كل الاحوال للأسف ليس امامك إلا إنك تاخد بنصيحه اللى قالو إنك تلجأ إلى الله فى هذه الشده.. ومتاخدش الكلام على انه كلام محفوظ والناس بتقوله، لا بجد حط فى دماغك انك انسان فى كرب وقول يا رب احفظنى انا واهلى وادعى ليل نهار وأكثر من الإستغفار ( مَنْ لَزِمَ الِاسْتِغْفَارَ جَعَلَ اللَّهُ لَهُ مِنْ كُلِّ ضِيقٍ مَخْرَجًا ، وَمِنْ كُلِّ هَمٍّ فَرَجًا ، وَرَزَقَهُ مِنْ حَيْثُ لَا يَحْتَسِبُ )
وربنا يكون فى عونك ويصبرك على اللى انت فيه ده