حل اكيد و نهائى لطلاء معدن الانتى مونيا و نتيجة مبهرة اهداء منى لعباقرة المنتدى

[YOSSEF EL MASRY]

المشاركة الأصلية كتبت بواسطة koko22m

طبعا انا حاولت ميت مرة ادهن مسدسى الصوت و بعد تالت يوم او رابع يوم بيكون اتجرح و يبقى شكله باظ و طبعا مفيش غير حل من الاتنين يا اما دوكو فرن و برده هيتجرح بعد فترة اطول يا اما ورشة طلاء الكتروستاتيك و بعد معاناه من حرقة الدم انا و المسدس فى جميع محاولات الطلاء الفاشلة وصلت لحل عبقرى و هو حل ( الايبوكسى ) و هو مادة لاصقة قوية جدا بتمسك فى المعادن و غيرها و هو عبارة عن انبوبتين يخلطوا على بعض بنفس النسب و اليكم الشرح التفصيلى للطريقة على ما اقدر ارفعلكم الصور و النتائج

1- هنصنفر المسدس او المعدن بصنفرة خشنة حداداى علشان منخليش جسم المعدن املس
2- هنخلط نقطة من كل انبوبة بكميات صغيرة جدا و نوزعها بأيدينا على المكان المراد طلائه علشان بيجف بسرعة و عموما هو بيتباع عن بتوع قطع الغيار و الموانين و فيه منه كمان شفاف ( و ملحوظة لو لقيته هيبتدى يجف اثناء الاستخدام و كثافته هتتقل ارميه و متحاولش تدهن بيه المعدن لانه هيكلكع و استخدم نقطتين جداد من الانببوبتين )
3- بعد ما خدنا النقطتين و خلطناهم على بعض هندعك بيهم المسدس و هو مصنفر خشن و طبعا الطبقة هتكون رقيقة جدا زى ما نستخدم كريم الشعر مثلا
4- نتركه يجف لمدة حوالى نصف ساعة و نكرر فرد طبقات اخرى الى ان نرى ان الكثافة اصبحت مثل معجون الدوكو او البرايمر مثلا يعنى اكنك بتديه كذا وش لغاية ما تلاقى ان لون المعدن اختفى و اصبح رمادى مع الحرص على عدم الاستعجال و استخدام ايبوكسى طازة من الانبوبتين علشان يكون طرى و سهل فرده بطبقات رفيعة جدا جدا
5- بعد ما طلينا المسدس بالكامل بمادة الايبوكسى هنحاول ندى وش او اتنين زيادة على الاركان اللى بتبقى سهلة الخدش و الاماكن البارزة
6- هنجيب صنفرة دوكو ناعمة جدا و نصنفر بيها بدون اى ضغط عليها علشان منشيلش الطبقات اللى حطناها و دا لمجرد حذف اى اجزاء بارزة من اللاصق ( يعنى لو نقطة او نقطتين زادوا منك و انت شغال هتشيلهم و تخليهم فى مستوى السطح بتاع المعدن علشان الشكل العام )
7 - بعد الصنفرة الناعمة هنجيب اى نوع دوكو اسبراى اى لون عايزه و هنرش من بعيد علشان ميسيلش و يدينا شكل الماط و انا عن نفسى فضلت اللون الاسود الماط
8 - طبعا كل اللى انا كاتبه دا من الشكل الخارجى فقط ولا داعى لاستخدامه مع اى ميكانيزم داخلى علشان ممكن تلاقى الميكانيزم زى الخزنة او الساقية بعد كدا تعلق منك بسبب طبقة الدوكو او الايبوكسى
9 - سيب كل الدنيا دى تنشف لتانى يوم و رد عليا بعد ما تحاول تخربش المسدس و تجرحة و ادى دقنى اهه لو عرفت تخدشه
10- ملحوظة اللى هيعمل موضوع طلاء الايبوكسى دا لازم يعرف انه هيطلع من ايده بعد تلات او اربع ايام لانه مش بيتشال بسهولة و لو استخدمت جوانتى مش هتعرف تتحكم فى الطبقة الرقيقة اللى هتكسى بيها سطح المعدن
11 - هرفع لكم صور النتائج فى اول فرصة

واية اخبار الاجزاء المتحركة بعد الدهان هل يوج احتكاك ؟
هل ضربت بالمسدس وسخن معاك بعد الدهان واية اثر السخونة دى علي الدهان ؟
شكرا