حقيقية المصارعة

[mman2005]

المصارعة تمثيل أه فى جزئية الصراعات والتحدى والعدوات بتبقى قصص وسناريوهات بهدف التشويق والإثارة، لكن من ناحية الضرب يا جماعة هو ضرب واقعى وعنيف بس هما بيراعوا حاجات أن الحلبة والسلم والكراسى والسور إلى حوالين الجمهور كل الحاجات دى مطعورشى الى يتخبط بيها إصابات بالغة، حتى الماتشات إلى من غير قوانين وبيبقى فيها ضرب بالعصيان والأسلحة، العصيان خفيفة بس بتلسع جامد، يعنى العصيان مش تكسر عضم، الجرادل بتبقى معدن خفيف، وبرده مبيمنعشى حدوث كسور وإصابات خطيرة، يعنى أيه خدع قدام آلالاف المتفرجين وكاميرات المحطات بتصور واحد يشيل واحد وينزله على السور إلى حوالين الجمهور ولا واحد يضرب واحد بالكرسى رغم أن الكرسى معمول بطريقة أن ميبقاش فيه مواد حادة لكن طبعا مؤلم جداً.

المصارعين دول يا جماعة من كثر الضرب والتدريبات قدرتهم على التحمل أكبر من الإنسان العادى عشرات المرات، وأنا كنت بلعب كونغ فو ودخلت ماتشات وكنا بنلبس كلابظات الملاكمة فى الماتشات، وأفتكر أول مرة واحد صاحبى بيهزر معايا وأدانى بنية فى وشى وهو لابس الكلابظات ساعتها شفت الدنيا الوان وكان هيغمى عليه، بعد كده بقيت أدخل الماتشات وأخد بنيات كثير فى وشى وأرد على الضرب وبقى قوة تحملى عالية فى تحمل الضرب فى وشى بالكلابظات وجسمى ككل.

غير الإنسان العادى لو أخد بنية واحدة بالكلابظات هيقع على الأرض، وأنا هحكيلكم حاجة حصلت معايا حقيقى كان المدرب بتاعنا بيعملنا ماتشات مع بعض ودخل قدامى واحد ما شاء الله أطول منى وفاتح حوض والأخ ده كان بيلعب ملاكمة قبل كده ولياقته البدنية عالية جداً لدرجة أنه لما كان بيلعب ضغط كان بيخلى طفل يقعد على ضهره المهم، المهم الأخ ده كل ما اضربه رجل أو بنية كأن نموسه بتضربه أستخدمت معاه أقصى أنواع الضرب وكانت أيدى ورجلى هما الى بيوجعونى، وبعدين بقى قلت مبدهاش أنا هضربه بأقوى حركة عندى القاضية علشان أخلص عليه وهى حركة أسمها خلفية بالجامب بدى خلفية وأنا بقفز فى الهواء المهم خليت الأخ جاى مندفع عليه بقوته ورحت بأقصى قوة رزعه خلفية برجلى فى وشه لدرجة أن رجلى طرقعت من قوة الضربة أنا قلت الأخ ده أكيد مات أو أغمى عليه ووقع على الأرض على ما لفيت ونزلت الأرض وكلى ثقة أنى قضيت عليه لاقيته واقف وأتنرفز جداً من ضربتى بس ما أصرتشى فيه الضربة وأنا بقى مش مدى خوانة أنه هيجم عليه بعد الضربة دى وألاقيه بسم الله ما شاء الله طار وضربنى بالرجل فى صدرى والله العظيم بدون مبالغة كأن مدفع أنضرب فى صدرى أنا كنت جوة البساط بتاع الماتش وبينى وبين خط الخروج منه مش يقل عن متر متر ونصف، لاقيت نفسى من قوة الضربة طرت وخرجت برة البساط ب 3 متر وأتقلبت فى الأرض بتاع 3 قلبات، والكلام ده حقيقى والله وفيه ناس مش هتصدقه إلا إلى مارست رياضة عنيفة، فأنا أصدق أن فيه ناس مصارعين عندها قدرة كبيرة غير عادية على تحمل الضرب.