علشان السردين طرى فله طريقة معينة عشان يتعلق

[kefafy]

السلام عليكم ورحمه الله وبركاته
هذة هى الطريقة التى يتم تعليق السردينة على السن
ولكم منى جزيل الشكر وائلكم بصالح الدعاء

[Ahmed kouta]

يا باشا يارب دايما تدوخني وراك كدة من موضوع لموضوع بجد انا سعيد جدا ان قسم صيد السمك بدا يشتغل ويشد معانا مواضيع اجدع من الانش والدراج........... سوال بقي يا باشا السردين دة طازة ولا مملح السوال التاني اوقات مش بنلاقي في القاهرة جمبري ولا كليماري طازة للصيد واحنا طالعين السخنة ينفع نشتغل علي الجمبري المجمد المقشر والكاليماري المجمد ولا مينفعش .... اسكندرية اسهل بكتير في شرا الطعم 24 ساعة من اي حتة لكن القاهرة صعب جدا وبالحجز وممكن متلاقيش ومتشكرين يا باشا علي الافادة

[kefafy]

ده من زوقك يا استاذ احمد
بالنسبة للسردين ده ممكن تعلقة على سنين لو طرى وعاوز تحتفظ بيها على السن سليمة
وفى طريقة تانية
1- تجيب مصفى كبيرة وتحط تحتها صينية على قد المصفى
2- وبعد كدة تفرش طبقة ملح مجروش على الصينية
3- وترصص على طبقة الملح طبقة من السردين
4- ثم طبقة ملح ثانية
5- ثم طبقة سردين وهكذ
6- حتى امتلاء المصفى بالسردين
7- وتتركها فى الشمس
8- وبعد اول يوم تفضى المياه من الصينية التى تحت المصفى
9- واليوم الثانى ايضا تفضى الصينية من المياه
10- و تلم فى صباح اليوم الثالث السردين بتاعك
11- وبعد كدة كل 10 او 15 سردينة تلفهم فى ورق جرايد او كراسة
12- وبعد كدة تحط كل لفف الاوراق فى الفريزر داخل كيس بلاستك محكم الغلق
وفى كل طلعة صيد تاخد معاك العدد الى يكفيك من السردين
كدة هنستفاد ايه ؟
1- السردين هيكون صفى كل الميه الى فيه
2- مجرد السردينة مهتنزل الميه هتلاقيها شربت ميه البحر وبقت زيها زى الطازة بظبط
3- لو سمكة دخلت على السردينة وشدت حته هتلاقيه متقعش من على السن وتتلافى ضرر وقوع السردينة من على السن
4- ممكن تخزن السردين فى فترات السنة الى بيبقا شاحح فيها سردين

بالنسبة للجمبرى المستورد معتقدش انه له مفعول زى البلدى , ولكن لو المكان فيه سمك واكل كويس اكيد هتخش علي الجمبرى حتى لو مستورد ( صينى او يمنى )

ولك منى الف تحية