البيتبول المفترى عليه🙂🙂

[محمد خلف]

كلاب البيتبول من الأنواع الي بيتقال عنها كلام كتير جدا وبيطلع عليها إشاعات ملهاش اي اساس من الصحة، زي مثلا انها كلاب ممنوعة عالميا، انها اتهجنت مخصوص للمصارعة، انها بتتجنن لما تعدي ال٥ سنين، انها كلاب غدارة إلى آخر الكلام دا كله...

طيب عشان نتكلم عن كلاب البيتبول لازم الاول نعرف جت منين وليه وازاي😁

اولا: البيتبول مش نوع ولا فصيلة واحدة، لا هو مجموعة من الفصائل المختلفة في الصفات والطباع والأحجام في منها الانجليزي ومنها الامريكي ومن أشهر السلالات دي (ستافوردشاير بيتبول (ستافي) بيتبول تيرير، اميريكان بيتبول تيرير، بول تيرير، اميريكان بولي، xl.)

ثانيا: سلالات البيتبول عموما بدات بتهجين البريتيش بولدوج الي بيتكيز بجسمه العضلي وقوته مع الترير الي بيتميز بحجمه الصغير وسرعته ونشاطه، واتهجن بهدف انتاج كلب قوي، سريع، نشيط، قادر على الجري والمطاردة والحفر والقبض على الطرائد الكبيرة والمتوسطة، وكان الهدف منه اصلا استخدامه في صيد الخنازير البرية.

ثالثا: اي كلب في الدنيا طباعه بيحكمها حاجتين:
الاولى: الصفات العامة للسلالة.
وبالنسبة للبيتبول ككلاب مطاردة وصيد فهي كلاب نشيطة جدا وبتحتاج لتفريغ طاقتها بشكل مستمر، وهي كلاب ذكية جدا لكن بتحتاج من صاحبها لشخصية قوية عشان يقدر يفرض سيطرته عليها (عشان كده مش محبوبة هنا والناس بتفكرها مبتتدربش) لكنها كلاب ودودة جدا بطبيعتها إذا اتربت صح (ودا بردو مبيحصلش هنا) وعلشان كده مفيش حد بيفهم كلاب بيستخدمها للحراسة الا اذا كان مربيها للشراسة ومدربها على الهجوم بدون تمييز (ودا الي اكسب السلالة دي سمعتها والاشاعات الي بتطلع عليها)

التانية: التربية
يعني الكلب بيديك نتيجة تربيتك ليه ومعاملتك معاه، ربيته صح هتاخد منه طاعة وحماية وحب وكل حاجة ممكن تحتاجها منه، ربيته غلط، غالبا هتلاقي منه مشاكل ملهاش عدد غولها واهما عدم قدرتك على السيطرة عليه.

انا بربي بيتبول من حوالي ١٠ سنين دلوقت..

معايا چاك مولود عندي في ٢٠١٨

كان معايا ليزا أمه وفضلت معايا فترة طويلة لحد ما ماتت..

ال٢ طباعهم مختلفة تماما يعني جاك مرح جدا وبيحب يلعب وبيروح لاي حد يلاعبه ويطبطب عليه، لكن هوائي ومتقلب المزاج ولعبه عنيف جدا، في المقابل ليزا كانت هادية جدا ومطيعة ومبتحبش الزحمة ولا الدوشة (لما جت لي كانت بتخاف من العربيات والبحر ومع الوقت عودتها عليهم) وكانت ودودة جدا ومبتمثلش اي خطر على الناس فكنت بقدر اسيبها مفكوكة وانا بفسحها، على عكس جاك الي فضوله بيخليه يقرب من الناس الي اكترهم بيخافوا منه فبيطلع منهم ردود افعال تحسسه بالخطر فيحاول يدافع عن نفسه عشان كده لما بنزله بيكون دايما مربوط، مع انه بردو بيسمع الكلام ومبيكسرش امر المنع تحت أي ظرف.

الخلاصة ان الكلب بتاعك صديقك.. اتعامل معاه من المنطلق دا ومتتعاملش معاه على انه سلاح ولا اداة للترهيب او التخويف.. لأنك هتكون بتضر نفسك وبتضره.. كلبك صديق عنده استعداد يموت علشان يحميك من غير اي تفكير.. حاول تربيه صح عشان متشيلش ذنب اذى ممكن يسببه او يحصل ليه.