مين بيخاف يشيل مسدسه المرخص ويمشى بيه ؟

[البنهاوى]

.
يا ترى كام واحد ترك مسدسه فى البيت بعد حادث قتل المحاسب للسواق ؟

فى تعليق لواحد صاحبى عنده مسدس برخصة .. قالى : المسدس ده يا إما يخليك جبان أوى .. يا إما يخليك جريئ أوى ..

وبيقولى هو طول الوقت سايب المسدس فى البيت فى علبته .. بيخاف يشيله لاحسن الشطان يغلبه

طب السؤال بقى هنا :

هو أنا شايل المسدس معاية فى الراحة والجاية ليه ؟

1- شعور بالأمان

2- علشان لو حد اتخانق معايا

3- علشان لو خشيت على نفسى الهلاك (أو توهمت الهلاك لنفسى)

4- علشان شايل معايا فلوس .. وبيحصل تثبيت كل 5 دقايق للناس اللى خارجة من البنك أو مكتب الصرافة ومعاها كيس نايلون اسود

5- علشان أتدرج فى استخدام القوة زى ما الحكومة بتقولى

..

طب يعنى إيه التدرج فى استخدام القوة ؟

1- يعنى أنا متحكم فى أعصابى فى المواقف الحرجة الصعبة

2- يعنى بأعرف أنشن كويس .. وأعرف أضرب فى مناطق تعجيز الشخص المهاجم لى

3- يعنى أنا متدرب كفاية على سرعة سحب المسدس من الجراب وسحب الأجزاء وفك زر الأمان والنظر بعين فاحصة على المهاجم ومحاولة معرفة تحديد نوع الهجوم ما إذا كان يستدعى التعجيز أم القتل .. والتنشين على منطقة تعجيزية وضرب رصاصة والانتظار قليلاً حتى أرى هل جابت نتيجة أم يحتاج المهاجم الى رصاصة ثانية فى مكان تعجيزى آخر .. طبعاً كل ده لو المهاجم جاي لى من مسافة 20 متر على الأقل علشان أخد وقتى فى تنفيذ كل الإجراءات دى

..

الكلام كده شكله صعب تحقيقه .. طب ماهو أنا ممكن أروح أتدرب على التنشين على المناطق التعجيزية فى الجسم بس .. وأبعد كل البعد عن المناطق التى تؤدى عادة للقتل .. وأتدرب كتير بحيث العقل الباطن يحفظ الكلام ده فى الموقف اللى تفكيرى بيتشل فيه من مفاجئة المهاجم لى أو من خوفى على نفسى عند الهجوم .. وأقعد أتدرب فى البيت على سرعة سحب المسدس من الجراب

يعنى الموضوع يستاهل منى التعب والتدريب ده كله ؟

- لو مش عايز تقتل إنسان وتتحمل ذنبه طول عمرك

- لو مش عايز أهل المقتول يقطعوا طريق جامعة الدول ونفضل واقفين 4 ساعات ما بنتحركش

- لو مش عايز يبقى عليك تار طول عمرك ..

فبعد أن كان البلطجى شخص يستاهل الحرق والقتل هو وعائلته .. فيصبح شخصاً كريماً شهيداً مجنى عليه ويجب الأخذ بثأره .. وتصبح أنت ملاماً مطارداً قاتلاً .. وممكن تتلب 3 سنين سجن بالميت .. دا لو المحامى بتاعك ماعرفش يقول الكلمة المشهورة .. (لما خشى موكلى على نفسه وتوهم الهلاك .. قام بدفع الضرر عن نفسه بإطلاق النار على المجنى عليه فأصابته دون قصد فى مقتل .. فأودت بحياته .. وموكلى غلبان يا بيه)

السؤال الأخير بقى علشان أروح :

هل نقدر ناستشف من الآية الكريمة (إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الأَرْضِ فَسَاداً أَن يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُم مِّنْ خِلافٍ أَوْ يُنفَوْا مِنَ الأَرْضِ ذَلِكَ لَهُمْ خِزْيٌ فِي الدُّنْيَا وَلَهُمْ فِي الآخِرَةِ عَذَابٌ عَظِيمٌ *)

أن نتدرج فى استخدام القوة على حسب الموقف .. حيث أن الله أمرنا بالتدرج فى استخدام العقاب على حسب الجرم الذى فعله هذا الفاسد ؟!

.