يــــــــــوم الحمـــــــــــــام العالمــــــــــي

[Orabi]

السلام عليكم ورحمة الله و بركاته

الموضوع طبعآ باين من عنوانه لأنه كان يوم بفضل الله حمام ثم حمام ثم حمام لدرجة إننا كنا بنسأل هو اليمام راح فين

من فتره هشام سمير قالي يابني أنت بطلت تنزل مواضيع رحلات صيدكم ليه قلتله كسل و الله يا هشام فقالي يابني الناس كده هتفتكركم مبتعرفوش تصتادوا و أنا عارف إن أنتم ما شاء الله معدين أوي و هذا بفضل الله فوعدته إن أول طلعه هنزل صورها.

المهم إتقابلت أنا و محمد محمود و أبو شمس بعد صلاة الفجر مباشرة يوم الجمعه و سمينا و توكلنا علي الله. بداية اليوم كان الجو أكثر من رائع و بدأنا الضرب فوق و تحت و مسافات و يمين و شمال و كان يوم ترزيع ترزيع يعني و بفضل الله تعالي بعد 3 ساعات كان معانا 63 فرد ده غير 5 فرده وقعوا و معرفناش نجيبهم الحصيله 54 فرد حمام و 9 يمام مش بقلوكم يوم الحمام العالمي
أحلي موقف حصل إن محمد محمود ضرب فرد يمام في صدره فالفرد طار و دخل علينا العربيه و كأنه جاي يضرب محمد

المهم الجو قلب مره واحده تراب و رمل وهواء يطير بني أدمين قومنا لمينا بعض و نطينا جوه العربيه و صوت الرمل و التراب بيخبط في زجاج العربيه و لا كأننا في عاصفة الصحراء

المهم غلط و قلت لمحمد طيب ننزل نتصور علشان أنا وعدت هشام أنزل الموضوع ... مش لازم تسمعوا الشتيمه اللي شتمهالي ما هو فعلآ اللي كان هينزل كان هيتردم

المهم أول ما رجعنا قسمنا الحصيله و كان نصيبي بفضل الله 21 فرد صورتهم أهم بعد ما نظفتهم علشان أكون وفيت بوعدي إني نزلت الموضوع.



يا رب الموضوع يكون عجبكم و عايز بقي تقيمات كتير كتير كتير

وإلي رحلات تانيه الأسبوع الجاي إن شاء الله .. و خليكوا فاكرين دايمآ

مع عرابي مش هتقدر تغمض عينيك