نقدر نعمل كده ولا ؟!

[ِAhmedAlaa2007]

أولا كل عام وانتم بخير بمناسبة حلول شهر رمضان المعظم أعاده الله علينا بكل خير

من احلي خطب الجمعة اللي سمعتها في حياتي خطبة النهاردة عندي في البلد خطيب من الاوقاف بيجي كل فترة بس قال شوية كلام يفتح نفسك علي رمضان فانا قولت انقلكم شوية حاجات من اللي قالوه

1- ان صلاة السنة في رمضان كأنها فرض في غير رمضان
2- الفرض في رمضان بسبعين فرض في غير رمضان
3- الحسنة ب70 ضعف يعني مثلا لو زكيت او تصدقت ب جنيه في رمضان كأنه 70 في غير رمضان
طبعا والله يضاعف لمن يشاء

في أحلي من كده يا جدعان
ربنا عاملك اكازيون في رمضان يا اخي
عبد لئيم ورب كريم

دول اللي فاكرهم دلوقتي المهم اي حد هيقولي طب ايه العنوان الغريب ده واصلان هوا ملهوش دعوة بالموضوع
اقوله انا لسه في المقدمة

الشيخ قال " مثلا يعني الطالب الشاطر بيعمل لنفسه جدول يمشي عليه طب ليه بقا منعملش لينا جدول في رمضان ؟؟

الجدول كالاتي:

1- مطلوب منك كل يوم 5 فروض في المسجد جماعة ومفيش اعذار
2- كل يوم قراءة جزء قرآن متقولش بقا (علي حد قوله) اصلي بصدع ولا عيني بتوجعني ما انتا يا خويا بتقعد تقرا الجرنان ساعتين وتفليه والكتابة الحرف فيها قد السمسمة !!
3- قيام الليل (التراويح) كاملا مش تصلي العشاء وتطلع تجري ويا حبذا كمان ركعتين تهجد قبل الفجر حتي لو في البيت ميمنعش بردوا
4- إعتكاف العشر الاواخر من رمضان

وافتكروا كويس أنه خاب وخسر من أدرك رمضان ولم يغفر له وان الرسول صلي الله عليه وسلم آمن علي ذلك

الصراحة الحاجات دي كلها سهل جدا تنفيذها واكيد في ناس بتزيد عليها كمان

اللهم اعنا علي ذكرك وشكرك وحسن عبادتك