طيب اهدا بس بالراحة ، نتكلم بالعقل ، وانت واضح انك عاقل ومتفهم وخبير ، شوف معاليك ، اولا انا عايزك ماتحلفش بالله في الموضوع ده ، علشان يمكن انا صح او انت صح ، محدش عارف ، ثانيا انا عارف ان فيه محفور عليه وفيه مطبوع ، وعندي صور كتيــــــــــــــــر لكل نوع منهم ، ولكن بالعقل كدة وواحدة واحدة ، طبعا احنا قلنا كتير ان الموضوع ده موضوع اصدرات ، زي ما المسدس ده فيه منه اللون الأسود بالكامل وفيه منه الأسود × سيلفر ، وفيه السيلفر المط وفيه السيلفر اللي بيلمع ، وفيه منه نسخة لونها أزرق × أسود ، ده انا حتي عندي صورة لنسخة لونها بينك (وردي) وطبعا فيه منه طباعة وفيه منه حفر ، والاتنين كانوا بالفعل عند فتح الله ، ولكن مش معني كدة ان المطبوع عليه يبقي مقلد ، ولو افترضنا انه مقلد طيب مين البلد اللي قلدته ، مش الصين ولا مصر لأن لو بلد قلدتو لااااااااااازم تكتب عليه اسمها وماركتها الجديدة اللي هتنزل المسدس باسمها ، مثال بسيط شركة كيمار وبروني الاتنين مقلدين البريتا 92 والكولت 1911 ولكن مينفعش يكتبوا عليه بريتا ، وبردو كيمار ماينفعش تكتب عليه بروني ولا العكس ، وبما أن الروم أصلا نسخة صوت من الهكلر الحي يبقي روم قلدت الهكلر ، طيب لما تيجي شركة أو بلد تقلد الروم يبقي هتعمله ماركة جديدة واسم جديد وهتكتب عليه صنع في كذا ، لكن ماينفعش تنزله زي ما هو علشان طبعا حقوق الصناعة وحقوق الملكية وبراءة الاختراع والحاجات دي ، وتركيا لما نزلت الايكول السريع كتبت عليه ايكول ماكتبتش مثلا بروني ولا كيمار ولا طبعا بريتا ، وبعدين مافيش حد سمع قبل كدة ان المسدس ده اتقلد ولا عملو منه نسخة مضروبة ومش أصلية ، اه كلنا عارفين حكاية الوالتر بي 88 لأنه كان مسدس هايل عملوا منه مصري وكان من انتاج فتح الله ، ولكن كان معروف ومكتوب عليه انه مصري لانه مايجرأش يكتب عليه أنه ألماني ، وبعدين لو كان متقلد كان يبقي باين عليه لكن فيه كذا دليل في المسدس اللي حضرتك بتقول انه مضروب تثبت انه أصلي 100 % :
أولا : هاتلي دليل تاني غير موضوع الحفر والكتابة يثبت انه متقلد ، طبعا مافيش ، يعني المسدس متقن في التلقليد (لو افترضنا يعني انه متقلد) في كل شئ مطابق تماما للأصلي ، طيب يا راجل الي هيقلد المسدس كله بالملي كدة هايغلب في موضوع الحفر ده ، ولا هينسي او مش هياخد باله ؟ اكيد طبعا استحالة ، يبقي لو كان متقلد بالطريقة دي اكيد كان هيتم جميله ويحفر عليه (طالما هو جامد كدة وبيعرف يقلد بالملي)
ثانيا : في علامة دائرية علي المسدس مكتوب عليها PTB 699 والعلامة دي موجودة بردو علي الوالتر ، يعني طبعا دي تعتبر قرينة من القرائن
ثالثا : خامات المسدس لا توحي بانه سلعة مقلدة ، ولا علبته ولا الاسفنج الحافظ له ، وقطعة كأس اطلاق الصواريخ محفور عليها موديله rg96 يعني فيه حفر اهو إلي جانب بردو العلامة الدائرية السابق ذكرها بردو محفورة عليها زي ما هي محفورة علي المسدس ، العلبة الكرتون بتاعته عليها من الخلف لرقم المسلسل وعليها made in germany بارزة وتتحس باللمس
رابعا : الكتالوج اللي جاي معاه ، واللي عليه صورة المسدس مكتوب عليه وليس حفر
خامسا :الصور اللي علي النت والفيديوهات اللي عاليوتيوب واللي فيها ناس بيتكلمو ألماني وبيشرحوا طريقة عمل المسدس وبيجربوه وهو مكتوب عليه وليس حفر .
سادسا: أهم شئ بقي وهو موقع الشركة نفسه واللي مسئول عن انتاجه بالنسبة للمسدس الأصلي وطبعا عليه لينك products المنتجات والمسدس اللي معروض علي الموقع مكتوب عليه وليس محفور يعني الحاج فتح الله مش هيفهم أحسن مش الشركة اللي عاملاه والرابط أهو
http://www.roehm-waffen.de/core.php?...m_no=701.02.00
سابعا : ودي أهم ما في الموضوع اني قبل ما اشتري في واحد قاللي كلام شبه كلام سيادتك وانا لما شكيت سألت أستاذ بدر هنا في المنتدي وقاللي مافيش الكلام ده ، وقاللي ان اللي عنده مكتوب عليه وليس حفر ، وطبعا الاستاذ بدر عمره ما هيشتري حاجة مضروبة لأنه مش تلموذ
ولكن الموضوع موضوع اصدرات وليس مضروب ومقلد ، ومش لاقي دليل تاني اقدمه اكتر من كدة علشان اثبت ان الكلام ده غير صحيح ، ولكن اخر ما تبقي عندي هو رابط فيديو يثبت كلامي ، ولكن انت لو تقدر تساعدني وتقوللي اي حاجة تاني تثبت ان المسدس مقلد (غير موضوع الحفر ده) يبقي ساعتها ممكن نبحث ونشوف ونتكلم ، لأنه مش معقول هيقلد بالمنظر ده ويغفل موضوع الحفر او يستصعبه ، دي اي ماكينة ليزر تعمل الشغل ده ، يعني سهلة
رابط الفيديو اهو :
وطبعا مش فيديو معمول في مصر خالص يعني واضح ان حتي المسدس المضروب والمقلد ده مش عندنا في مصر بس لا ده عمل انتشار واسع وبيتقلد في جميع أنحاء العالم حتي في ألمانيا ..
ههههههه ، لأ طبعا انا ماعتقدش ان الكلام ده صحيح .
خالص تحياتي للجميـــــــــــــــــــع