كيفية فحص البندقية المستعملة***

[محمد حافظ بك]

السلام عليكم اعضاء المنتدي الافاضل .. انا حبيت اعرض للاخوة المبتدئين اللي بيفكروا يشتروا بندقية مستعملة بعض الخطوات اللي من خلالها ممكن يحكموا علي البندقية المستعملة اذا كانت ممكن الصياد ياخدها من عدمه و كمان الموضوع ده هيفيد اللي عنده بندقية و ادائها مش اوي او اقل من المعقول ... و انا هتكلم عن البندقية الكسر ماسورة و اللي هي موجودة عند غالبية الصيادين .. اول حاجة بيبان من شكل البندقية للمرة الاولي اذا كان صاحبها كان مهتم بيها او لا من الشكل العام هل في كسور في الدبشك و هل في خدوش جامدة في جسم البندقية نفسه و لا المعدن سليم و اللي بيبين مثلا البندقية وقعت من صاحبها وقعات جامدة ممكن تأثر علي الحالة الميكانيكية للبندقية .. علي العموم ندخل في المفيد اول حاجة تكسر الماسورة و لازم تلاحظ ان الكسر كان سهل و لا صعب فلو سهل ممكن تكون سوستة البندقية ضعيفة اما لو كان جامد فيبقي احنا لغاية كده حبيايب .. نكسر البندقية للاخر لغاية ما يتم التعشيق مع مجموعة الزناد و لازم تتأكد ان التعشيق تم بالكامل و بعد كده تبص في ماسورة البندقية من الداخل عشان تكشف علي ششخنة البندقية هل بها تآكل هل بها صدأ و بها اي اعوجاج انصح بعدم شراء اي بندقية بها ششخنة متآكلة لان كده هي متساويش اي سعر ..
طيب اطمنا علي السوستة و الماسورة نيجي بقي للجلبة و هي مسئولة عن دفع الهواء باتجاة الرشة فيجب عدم وجود تسريب بها و الا هيأثر علي قوة البندقية بنسبة كبيرة .. و يعتبر هذا الاختبار خطر شوية و عاوز حذر جامد .. البندقية في حالة كسر حاليا .. امسك البندقية بالزناد بايدك الشمال و الماسورة باليد الشمال جيد جدا جدا و اضرب الزناد فكده انت هتحرر البستم و السوستة من الزناد و لكن انت ماسك الماسورة كويس و سيب الماسورة ترجع لطبيعتها تاني ..كل ده احنا مختبرناش الجلبة بس خدوا بالكوا كويس عشان لو ضغط الزناد و انت مش ماسك الماسورة هترد جامد جدا و ممكن يحصل حاجة لا قدر الله.. نرجع للجلبة .. اكسر الماسورة بيدك اليمني براحة و ابدأ بوضع صوبع السبابة الشمال علي الخرم اللي بيكون قصاد الرشة لما بتكون البندقية مقفولة و هو اللي بيخرج منه الهواء للرشة مباشرة .. بعد كده كمل كسر الماسورة للاخر و انت حاطط الاصبع كويس و انتظر 5 ثواني مثلا و بعدين شيل صوبعك .. لو لقيت صوت هوا طلع و كان الصوبع (مشفوط لداخل الخرم)تعرف ان الجلبة بنت حلال و كويسة ... ملقتش اي رد فعل جرب المحاولة تاني بس من غير ما تستني الثواني و شوف ... لو مفيش برضه يبقي الجلبة رايحة و تحتاج تغيير و بناءا عليه تتكلم في سعر البندقية و ده بينطبق برضه علي السوستة لو لقيتها ضعيفة و مفيش مقاومة و انت بتكسر...
(البوسة ) ده اختبار انا مسميه البوسة مش عشان حبا في البندقية و بس... لكن ده لاختبار هل في تسريب بين الماسورة و البندقية ... يوجد جلدة مستديرة بتكون حول المكان اللي بيوضع فيه الرشة (بيت الرش) و دي عشان ميحصلش اي تسريب اثناء ضغط الهواء للرشة .. البندقية بتكون في وضعها العادي و غير معمرة .. و تقوم بوضع فمك علي فوهة البندقية من المكان اللي بيخرج منه الرشة و تشفط الهواء بقوة و تترك لسانك او شفتك العلوية علي الفوهة . فاذا كان هناك شفط للسان و تخرجه بصعوبة فلا يوجد تسريب للبندقية .. اما اذا المقاومة معدومة ففي هذه الحالة فان الجلدة حول بيت الرش تحتاج تغيير و دي مفهاش مشكلة خالص .. اما لو مع تغيير الجلدة كان هناك تسريب اذا فهناك مشكلة في جسم البندقية و فراغ حتي لو كان غير ملحوظ بين الماسورة و بين جسم البندقية و في هذه الحالة ايضا لا انصح بالشراء لانه مثل اعوجاج الماسورة ليس لها صيانة او حل ..
اختبار الزناد .. قم بتعمير البندقية و لكن بدون وضع رشة بها ... و قم بضرب الدبشك براحة علي اي ارضيه صلبة عدة مرات فاذا لم تضرب البندقية فحالة الزناد جيدة ان شاء الله .. و لو ضربت البندقية مع الطرق الخفيف فان الزناد تكون حالته مش قد كده و دي كارثة بالنسبة للزناد ..فلك ان تتخيل ان زناد بيضرب لوحده ...علي رأي الاسكندرانية ...ايووووووووووو
ملاحظات هامة ... السوستة و الجلبة امرها سهل ...زناد بيضرب لوحده نص نص... و تقدر تتكلم في سعرها بقلب جامد... لكن ماسورة معووجة او متأكلة او تنفيس جامد في بيت الرش ... يبقي الي اللقاء يا مدحت ...و ملهاش لازمة تصلا
ارجو الا اكون قد اطلت عليكم و ان اكون قد اضفت و لو معلومة واحدة لاي اخ لي علي قد خبرتي القليلة في الهواية دي ...و شكرا لكم و كل عام و انت بخير و يارب تكون سنة سعيدة علينا ان شاء الله ..