انا اتضحك عليا

[khaled_shams]

يا جماعه انا الأسبوع اللى فات اشتريت بندقيه من عند فتح الله و حصللى الأتى
اولا انا اتصلت بالمحل و قلت اسأل قبل ما اروح لأنى كنت عامل حسابى ان الميزانيه ما تزيدش عن 2000 جنيه و كان فيه كذا بندقيه كنت بقكر قيهم اولهم نوريكا جت و جامو شادو
المهم كلمت المحل و سألته على الأسعار و بدأت بالنوريكا جت نمره 2 الراجل قاللى 1650
جيت اسأله عن الباقى قاللى انا مش حافظ الأسعار تعالالى و شوف اللى انت عايزه.
انا قلت مش مشكله انا هاخد معايا ال2000 كده كده

رحتله فى نفس اليوم و يادوبك وصلت عنده قبل ما يقفل بنص ساعه سألت عن النوريكا جت قالولى موجوده نمره واحد
قلتلهم انا عايز نمره 2 قالولى مافيش
طب الشادو قالولى نمره واحد برضه
قلتلهم طب ممكن اشوف البنادق اللى فى حدود نفس الأسعار و تكون نمره 2 قالولى فىه التركى و نوريكا 56 قلتلهم لأ أنا عايز اسبانى و مش عايز ال56
قالولى مفيش .
قلتلهم طب ممكن اتفرج على البنادق اللى عندكم
قالولى عايز تتفرج تعالى بكره !!!!!! و للعلم انا ساكن فى 6 اكتوبر

طبعا الكلام ده غير طريقة المعامله الزباله (الست اللى قاعده على الكاشير كانت شبه بتشخط فيا)
انا طبعا اتعصبت جدا وصوتى على و قلتلها انا جى من 6 اكتوبر و اتصلت قبل ما اجى وسألت على النوريكا جت نمره 2 و قلتولى موجوده
الست قالتلى ازاى مين قالك كده قلتلها فيه واحد رد عليا قاللى الكلام ده
لقيت راجل كبير كده و شكله محترم قاعد على مكتب جوه قاللى ايوه يابنى انا اللى رديت عليك
تعالى قوللى انت عاوز ايه قلتله على المواصفات و السعر
قاللى طيب انا هوريك شوية حاجات و جابلى بندقيه نوريكا توين (كانت اول مره اسمع عنها)
و قاللى دى بتشتغل نمره واحد و اتنين (ليها ماسوره من جوه بتتبدل حسب العيار)
سألته على سرعتها قاللى 170م\ث قلتله لأ عايز حاجه احسن و بعدين طلعلى جامو هنتر 440
و قاللى دى بنبيعها ب 2000 بس عشان انت زعلان مننا هديهالك ب 1800
قلتله خلاص هاخدها
و اشتريت علبة رش Gamo master point 250 رشه قالولى ب45 و بعدين الست اللى على الكاشير قالتلى هنعمللك تخفيض و ادتهالى ب 40 :mad:

طبعا كنت فرحان جدا ان انا جبت البندقيه دى بالسعر ده (طبعا انا كنت بفكر ان الراجل ما ادهاليش ب 1800 عشان كنت زعلان و الكلام ده بس قلت يمكن الأسعار نزلت)

المهم يا جماعه اليوم اللى بعدها كنت باتأمل فى البندقيه لقيت ستيكر اصفر كده و شكله ظريف على المقبض بتاع البندقيه من تحت و صورته موجوده قدامكو



طبعا الكلام اللى مكتوب بالأسبانى ( Control De Calidad) اكيد يعنى quality control و قلت اكيد 2 يعنى فرز تانى , بعدها بيومين قريت الموضوع بتاع الفرز على المنتدى كان عنوانه "نخلي بالنا من فرز البندقيةعند الشراء"

http://www.egypthunt.net/showthread....C7%E1%E4%D9%D1

و اخدت بالى بس بعد الشراء :mad:
رحت فليت البندقيه زى ما مكتوب فى الموضوع لقيت الخرم بتاع الماسوره مش مضبوط مع السيل

و الصوره قدامكم



Uploaded with ImageShack.us
طبعا انا دلوقتى مش عارف اعمل ايه
مبدئيا موضوع ان مكان السيل مش مضبوط مع خرم الماسوره مش هيعمل مشكله على ما اعتقد المهم انه يكون بيحكم الهواء كويس.

المشكله انى حاسس انى اتضحك عليا المفروض لو انا ببيع لحد حاجه اقوله على عيوبها مش البسهاله و احسسه انى مديهاله بسعر لقطه .

و على فكره لو حتى سعر الفرز التانى 1800 المفروض كان يفهمنى انها فرز تانى

ايه رأيكم يا جماعه اعمل ايه فى الموضوع ده

على فكره انا بطلب من الأداره انها تثبت الموضوع بتاع الفرز ده لأنه مهم جدا

[Consul]

مبروك عليك أخي الحبيب وربنا يديك خيرها ويكفيك شرها...لا تضايق نفسك أخي الحبيب إن شاء الله بسيطة ولا توقف نفسك من البندقية...البندقية جميلة وقوية ودقيقة وهذا السيل من المستهلكات المهم لا يوجد تنفيس وباقي البندقية سليم وليس به عيوب أو كسر أو شرخ...جرب بدون تعمير البندقية وقم بشفط الهواء من فوهة الماسورة من الأمام وسدها بلسانك وإنتظر قليلا...لو لسانك فك يبقي في تنفيس...ولو فضل مشفوط يبقي مافيش تنفيس...وجرب إطلاق الرش على لوح خشبي سميك وشوف مدى تأثيره عليه...لتعرف مدى قوة البندقية...بيرشق أو يؤثر بعمق أو سطحي...وهكذا...وجرب مدى دقتها في إصابة الهدف...هي عموما بندقية قوية وممتازة وكثيرين بيعشقوها...ولعلمك هي سعرها في حدود 2200-2300 جنيه...والذي يباع منها مستعمل ( بين الأعضاء طبعا وحسب حالتها ) بـ 1800 جنيه...فلا تضايق نفسك ومبروك عليك...خالص تحياتي...

[osama2011]

السعر كويس جدا لهنتر 440
وزي ما قال سيادة القنصل الاويل سيل يتغير عادي
ولو انت مش مقتنع بالكلام ده يبقي تروح ترجعهاله ده حقك

[mohamed_esm]

الف مبروك اخى الكريم ولا تضايق نسك انا بصراحه لسه مبتدا بس استذتنا الكبار قالولك مش مشكله يعنى متعقدش نفسك مبارك عليك البندقيه ولازم اول طلعه ليك بيها تورينا صورها هنا والف مبروك مره تانيه

[rock]

السلام عليكم ... هو السعر كويس ... بس انا عايز اسالك سؤال ... حضرتك مجبتش ليه شادو او نوريكا جيت نمره 1 ؟ ... ( انا عندى الهنتر ) بس انا شايف ان نمره 1 احسن فى الصيد ... وبالنسبه للبندقيه مبروك عليك لو انت مقتنع انما لو حضرتك حاسس انه اتضحك عليك ... روح رجعها وهات اى حاجه مكانها ... الواحد مش بيجيب كل يوم بندقيه ... وانا مش هجيب بندقيه جديده واقعد اغير فيها ... امال شاريها جديده ليه ... وده حقك ...تحياتى .

[mohd_wafik]

اللف مبروك يا المدفع و انشاء الله خير ... ممكن تقولي انته روحت فتح الله إلى في القاهره و لا اسكندريه ؟

[rock]

المشاركة الأصلية كتبت بواسطة mohd_wafik

اللف مبروك يا المدفع و انشاء الله خير ... ممكن تقولي انته روحت فتح الله إلى في القاهره و لا اسكندريه ؟

اكيد القاهره ... طالما الست الكشره يبقى اكيد مدام ليلى ... فرع ش رمسيس ... تحياتى .

[khaled_shams]

استاذ قنصل و اسامه و محمد و روك و mohd wafik متشكر جدا على ردودكم فى الوقت القياسى ده (بس شكلكم بتحبوا تناموا متأخر)
هو كان فرع رمسيس فعلا
بالنسبه للبندقيه بقى
انا بشفط الهواء و اسد الماسوره بلسانى ما بيكملش 5 ثوانى و احس ان الشفط راح
و انا فكيت السيل النهارده و حاسس ان مكان السيل مضبوط .
مكان الخرم بتاع الماسوره شكله هو اللى مرحل يمين شويه.




Uploaded with ImageShack.us


و لما ركبت السيل تانى لقيته ابتدا يتقطع لما قفلت البندقيه (هو كان مقطوع اصلا من ناحيه و بعدين لما ركبته لف و ابتدا القطع يظهر فى حته تانيه)



Uploaded with ImageShack.us

انا هاخدها معايا الشغل النهارده ان شاء الله و اقيس المسافه بتاعة الخرم بالبوكليس


و لو هبدلها بحاجه فى حدود نفس السعر او اغلى شويه (فى حدود 2000)
تنصحونى بأيه سواء نمره 1 او 2
و هل النوريكا جت احسن ؟

و ليه نمره واحد احسن من 2 فى الصيد

و برضه انا بطلب من الأداره تثبت موضوع الفرز

[smsmn8888]

اولا الست دي اسو بياعة قابلتها في حياتي وانسان معقدة جداااا
محلات فتح اللة معروفين انهم اسوء معاملة من باقي المحلات خاص بنادق الرش _ مش عارف لية)
ثانيا بلنسبة لسعر البندقية كويس جداااااا
ثالثا فتح اللة بيرفضو نهائي الاسترجاع وبيقولك قبل ما تشتري لو خرجت برة الباب مش هترجع تاني اصلااا اكنك بتشتري من الشارع مش محل محترم
جرب البندقية لو عجبيتك خلاص انس الفتح والكلام تا والتسريب تا اكيد بسبب التخزين عندهم
عايز تجرب ترجعها ياليت يوفقو بس متروج للولية دي اصلا ادخل علي صاحب المحل علاطول وقولة انا اضحك علية والبندقية معيوبة وانا بشتري من محل كبير مش الشارع
موضوع الفرو التاني الحمد اللة انة فرز تاني تا في 5 كمان واحنا عارفين ان اغلب البنادق التي في مصر بتكون فرو تاني وتالت وخامس فلا تضايق نفسك

[هشام سمير]

لا ياجماعه انا عندى تحفظ على كلمكم دا بعد اذنكم طبعاً الفرز الثانى معناه ان البندقيه مكونه من اشياء معابه اصلاً مش مجرد عيب واحد
يعنى كل جزء من اجزاء السلاح بيكون خاضع لمواصفات قياسيه لو كان غير موافق للمواصفات دى بيدخل الفرز والاشياء المعابه بيتصنع منها بنادق وبتكون فرز تانى او تالت كمان
اما الشركات المحترمه بتعدم الاجزاء المعابه ويعاد تصنيعها
ربنا يعوض عليك خير ب هى اكيد يعنى حتكونافضل من التركى ومن 56 ومن حجات تانيه كتير

[mlikhunter]

السلام:مبروك اخ خالد على البندق وهي جيده
جرب قوتها واذا شفت انها جيده انسى الموضوع واذا كان فيها تسريب (انا لا اعتقد هذا)حاول ترجعها
بالنسبه سوالك ليه نمره واحد افضل هو راي منهم يرغب نمره 1 ومنهم 2 لكن نمره 1 تكون اسرع دايما لانه الرشه اخف

[khaled_shams]

انا كلمت النهارده فتح الله و ردت عليا الست قلتلها الموضوع كذا كذا و البندقيه دى فرز تانى و عايز اغيرها
قالتلى مين الحمار اللى قالك ان فيه حاجه اسمها فرز تانى اصلا
قلتلها على الستيكر بتاع الquality control و قلتلها ان الخرم بتاع الماسوره مرحل ناحية اليمين (انا قست مكان الخرم لقيته متحرك ناحية اليمين 0.4 mm) قالتلى طالما بتضرب تبقى سليمه !!!!
و روح عند مش عارف مين فى الجيزه قوله اظبطلى البندقيه دى !!!!!!!!
قلتلها لأ انا عايز اغيرها قالتلى خلاص تعالالى بكره عشان انا مش فاضيه النهارده لبنادق الرش !!!!!!!!
و قالتلى انا جايالى بكره مجموعة بنادق نمره واحد و 2
المهم رحت النهارده فتح الله و أديتلهم البندقيه على اساس ان فىه نوريكا جت او جامو هنتر 440 جايين بكره و ربنا يسهل
انا ورتلهم العيب اللى فيها و ورتلهم الستيكر بتاع الكواليتى كونترول واضح زى الشمس و مكتوب عليه 2

لقيت الراجل بيقوللى انت مين اللى فتالك و قالك ان معنى كده انها فرز تانى (و بيقوللى هو انتو كل شويه حد يقعد يفتيلكم و يعمل فيها خبير) و الست بتقوللى طالما بتضرب يبقى خلاص

بعدين جه الراجل ياخد البندقيه عشان يجربها ( يشوفها بتضرب و لا لأ هو ده الأختبار بتاعهم !!!!!!!) و راح نده واحد يجيب كرتونه عشان يجرب فيها !!!!!!!!

رحت انا قلتله انى فاكك السيل بتاعها

قاللى ايه ده انت ايه اللى خلاك تفك السيل بس !!!!!!!!!!
(منتهى الأستخفاف بعقول الناس)
المهم و بعد المهاترات دى قلتلهم ان انا هبدلها برضه بنوريكا جت نمره واحد
و بعدين قالولى انت كنت دافع كام قلتلهم 1800
سألتهم على النوريكا الجت بكام الست قالت 2200 !!!!!!!!!!!!! :mad:
قولتلهم بس ساعة ما اخدت دى كنتو قايلنلى ان سعرها 1650
قالت اه ده تلاقى الأستاذ محمد قعد معاه و اداله سعر خاص
مع انى مشفتش استاذ محمد غير مره واحده فى حياتى و لما كنت بسأل على سعر النوريكا جت كان على التليفون يعنى لا اعرفه ولا يعرفنى مش عارف ايه اللى يخليه يدينى سعر خاص

المهم قلتلها طب انا هاخد النوريكا جت قالتلى الموجوده هنا بايظه و مبتضربش
تعالى بكره و انا جايلى مجموعة بنادق من اسكندريه
انا سبتلهم البندقيه هناك و قلتلهم جايلكم بكره

و هنشوف بقى اخرتها ايه معاهم
و نصيحتى للناس اوعى تشترى حاجه من فتح الله خصوصا بتاع رمسيس و متعتمدش على ان المحل كبير لازم تفلى الحاجه اللى انت هتشتريها كويس

[بدر]

الاخ الكريم
الحمد لله قدر الله وما شاء فعل .وشكرا على النصيحة ومعلش محدش بيتعلم ببلاش
وحسبي الله ونعم الوكيل فى الناس دى وفى كل واحد بينصب على الناس
لا تضايق نفسك وربنا ييسر لك الخير ان شاء الله

[khaled_shams]

و على فكره انا افتكرت حاجه تانيه
انا كنت ظبطت البندقيه على مسافة 8 متر و بعدين جيت اظبطها على 17 متر لقيت الرشه بتيقى يمين الهدف فوق
المفروض انها تيجي فى منتصف الهدف فوق
المهم ظبطتها على ال17 متر و بقت بتيجى الرشه فى منتصف الهدف بالظبط
بعدين جيت اجرب اضرب بيها على مسافة 8 متر تانى لقيتها بتيجى تحت ناحية الشمال و المفروض انها تيجي برضه تحت فى النص
معنى كده ان الخرم بتاع الماسوره مايل
و عمرها ما هتظبط معايا الا لو بضرب على مسافه ثابته انا ظابط عليها

[هشام سمير]

المشاركة الأصلية كتبت بواسطة khaled_shams

انا كلمت النهارده فتح الله و ردت عليا الست قلتلها الموضوع كذا كذا و البندقيه دى فرز تانى و عايز اغيرها
قالتلى مين الحمار اللى قالك ان فيه حاجه اسمها فرز تانى اصلا
قلتلها على الستيكر بتاع الquality control و قلتلها ان الخرم بتاع الماسوره مرحل ناحية اليمين (انا قست مكان الخرم لقيته متحرك ناحية اليمين 0.4 mm) قالتلى طالما بتضرب تبقى سليمه !!!!
و روح عند مش عارف مين فى الجيزه قوله اظبطلى البندقيه دى !!!!!!!!
قلتلها لأ انا عايز اغيرها قالتلى خلاص تعالالى بكره عشان انا مش فاضيه النهارده لبنادق الرش !!!!!!!!
و قالتلى انا جايالى بكره مجموعة بنادق نمره واحد و 2
المهم رحت النهارده فتح الله و أديتلهم البندقيه على اساس ان فىه نوريكا جت او جامو هنتر 440 جايين بكره و ربنا يسهل
انا ورتلهم العيب اللى فيها و ورتلهم الستيكر بتاع الكواليتى كونترول واضح زى الشمس و مكتوب عليه 2

لقيت الراجل بيقوللى انت مين اللى فتالك و قالك ان معنى كده انها فرز تانى (و بيقوللى هو انتو كل شويه حد يقعد يفتيلكم و يعمل فيها خبير) و الست بتقوللى طالما بتضرب يبقى خلاص

بعدين جه الراجل ياخد البندقيه عشان يجربها ( يشوفها بتضرب و لا لأ هو ده الأختبار بتاعهم !!!!!!!) و راح نده واحد يجيب كرتونه عشان يجرب فيها !!!!!!!!

رحت انا قلتله انى فاكك السيل بتاعها

قاللى ايه ده انت ايه اللى خلاك تفك السيل بس !!!!!!!!!!
(منتهى الأستخفاف بعقول الناس)
المهم و بعد المهاترات دى قلتلهم ان انا هبدلها برضه بنوريكا جت نمره واحد
و بعدين قالولى انت كنت دافع كام قلتلهم 1800
سألتهم على النوريكا الجت بكام الست قالت 2200 !!!!!!!!!!!!! :mad:
قولتلهم بس ساعة ما اخدت دى كنتو قايلنلى ان سعرها 1650
قالت اه ده تلاقى الأستاذ محمد قعد معاه و اداله سعر خاص
مع انى مشفتش استاذ محمد غير مره واحده فى حياتى و لما كنت بسأل على سعر النوريكا جت كان على التليفون يعنى لا اعرفه ولا يعرفنى مش عارف ايه اللى يخليه يدينى سعر خاص

المهم قلتلها طب انا هاخد النوريكا جت قالتلى الموجوده هنا بايظه و مبتضربش
تعالى بكره و انا جايلى مجموعة بنادق من اسكندريه
انا سبتلهم البندقيه هناك و قلتلهم جايلكم بكره

و هنشوف بقى اخرتها ايه معاهم
و نصيحتى للناس اوعى تشترى حاجه من فتح الله خصوصا بتاع رمسيس و متعتمدش على ان المحل كبير لازم تفلى الحاجه اللى انت هتشتريها كويس

اخى الكريم النوريكا جيت عندى الفرز الثانى 1500 جنيه والفرز الاول 1800 جنيه متدفعش اكتر من كده مليم واحد حسبنا الله ونعم الوكيل

[khaled_shams]

شكرا يا استاذ بدر و انا والله ما هاسكتلهم الا ما اخد حقى ان شاء الله

[khaled_shams]

شكرا يا استاذ هشام و انا لو عرفت اخد منهم فلوس هجيبها من حضرتك اضمن
انا بصراحه قلقان انهم لو بدلوها يدونى واحده تانيه بايظه برضو

[mohamed_esm]

استاذ خالد صاحب الموضوع انا بصراحه من ساعه لما قريته وانا شايط نار كده بالبلدى لانى اكتر حاجه بضايقنى النصب على الناس وخصوصا لما تبقى محلات كبيره قبل كده اخى الكريم انا لو منك اعملهم فضيحه بجد دول ناس يخافو مش يختشو على صوتك وقولهم لا مش عايز بنادق بس ادخل وهو المحل زحمه واتكلم بقلب جامد قولهم عايز فلوسى ومتخدجش بنادق من عندهم طالما وصل بيهم الحال لكده وانا عن نفسى كنت بفكر اشترى بس هشوف حته تانيه اجيب منها وابقى طمنى بالله عليك عملت ايه

[AMR EBID]

سلام عيكم يا استاز خالد
ربنا معاك ويخلص من الموضع دا علشان انا
اتحطيط قبل كدا فيه واكتر واحد حاسس بالموضوع
اما بالنسبه لرقم واحد او اتنين انصحك بواحد انا كانت
معايا ديانا 52 نمره اتنين وبعتها وجبت 54 نمره واحد
صراحه احسن بكتتتتتتتتتتتتتتير وبالتوفيق ان شا الله

[محمد يونس]

استاذ خالد بعد التحيه........
انا من رايى انك تاخد معاك واحد يكون خبير فى البنادق حتى لو هتديله فلوس وتخليه يتاكد من جوده البندقيه الاول وبصراحة انا اتعاملت مع الست دى واسلوبها زى ال............وكمان بحس انهم بيتنططوا على الناس اللى بتروحلهم
بص انا هقولك على حاجة ممكن تجيب نتيجة بص ده رقم استاذ جلال خليفة(0127717179 )وهو راجل محترم وخدوم جدا وبعدين هما فى المحل يعرفوه كويس جدا يا ريت تكلمه وتقوله على الموضوع واطلب منه انه يتصل بيهم وان شاء الله هيخلصلك الموضوع وانا عن نفسى متضايق جدا جدا من الناس دى وكان نفسى محلهم هو اللى كان اتسرق بدل محل اولاد ابو ضيف .
على العموم هو ده اللى انا اقدر اساعدك بيه وربنا معاك ان شاء الله وابقى طمنا جميعا وقولنا عملت ايه وان شاء الله خير.
والله ولى التوفيق ..................

[بدر]

وانا أويد رأى الاستاذ محمد يونس بوجوب ذهاب حد معاك .والله الموفق

[memo2224]

حسبنا الله ونعم الوكيل فى ناس كده
بجد بجد موضوعك ده فور دمى انا من المنيا بس لو انا حصل معايه كده كنت اشتغلتلهم اشتغالات على كيفك وظبطهم وخلتهم يقولو ان الله حق وعلى العموم متزعلش نفسك وربنا هيعوضك خير
انشاء الله

[khaled_shams]

يا جماعه انا معرفش حد خبير
هو اقتراح حلو جدا
بس اجيبه منين الخبير

و بالنسبه لأستاذ جلال خليفه انا قريت مشاركات و مواضيع كتير للراجل ده و واضح جدا انه راجل محترم جدا و خبره
بس بلاقى مكتوب جنب اسمه banned يا ترى ليه انا مستغرب جدا

عموما انا اتحرج انى اكلم واحد ماعرفوش و لا يعرفنى و اطلب منه خدمه

انا هروح بكره ان شاء الله لو قدرت و اشوف هيعملو ايه لو بدلوها بنوريكا جت يبقى تمام و مفيش داعى لأراقة الدماء.

[DR SNIPER]

السلام عليكم ورحمه الله وبركاته
انا شايف يا اخى العزيز ان استاذ بدر واستاذ محمد يونس قالو افضل الحلول بالنسبه لموضوعك ده وربنا معاك وينصرك ان شاء الله
اما بالنسبه لموضوع الرش رقم واحد ولا اتنين فبعد اذنك واذن الساده زملائى شايف ان رقم 2 افضل لان مش المهم السرعه بس لكن برده الطاقه الحركيه للرشه ودى بتزيد بزياده كتله الرشه وكمان الرشه الخفيفه بتنحرف عن مسارها ولا توثر بنفس مقدار نمره 2 فى الهدف وده لينك لحساب الطاقه المتولده من البندقيه
http://www.arld1.com/kineticenergy.html الموضوع ده اتكلم فيه الاستاذ جلال خليفه قبل كده
وربنا يوفقك وتقبل مرورى

[sky.line_2010]

السلام عليكم

استاذ خالد ليه حضرتك مروحتش لفرع ابو ضيف اللى فى 6 اكتوبر اللى عند ميدان الحصرى وياريت لو حضرتك تتكرم وتشوف لنا المعروض هناك وبالذات سعر الكرال التركى بعد الاحداث الاخيره ولك جزيل الشكر

[khaled_shams]

استاذ sky.line فرع ابو ضيف بتاع اكتوبر معندوش غير الكرال و نوريكا young و مش قاكر اذا كان فيه حاجه تانى و لا لأ
لكن انا طبعا سألت عنده على الحاجه اللى انا عايزها و كنت كاتبله ليسته كبيره بالبنادق اللى عايزها كلها نوريكا و جامو قاللى مش عندى.
و بكره بأذن الله ابقى اسألكم على الأسعار

[smsmn8888]

[QUOTE=khaled_shams;48491]انا كلمت النهارده فتح الله و ردت عليا الست قلتلها الموضوع كذا كذا و البندقيه دى فرز تانى و عايز اغيرها
قالتلى مين الحمار اللى قالك ان فيه حاجه اسمها فرز تانى اصلا
قلتلها على الستيكر بتاع الquality control و قلتلها ان الخرم بتاع الماسوره مرحل ناحية اليمين (انا قست مكان الخرم لقيته متحرك ناحية اليمين 0.4 mm) قالتلى طالما بتضرب تبقى سليمه !!!!
و روح عند مش عارف مين فى الجيزه قوله اظبطلى البندقيه دى !!!!!!!!
قلتلها لأ انا عايز اغيرها قالتلى خلاص تعالالى بكره عشان انا مش فاضيه النهارده لبنادق الرش !!!!!!!!
و قالتلى انا جايالى بكره مجموعة بنادق نمره واحد و 2
المهم رحت النهارده فتح الله و أديتلهم البندقيه على اساس ان فىه نوريكا جت او جامو هنتر 440 جايين بكره و ربنا يسهل
انا ورتلهم العيب اللى فيها و ورتلهم الستيكر بتاع الكواليتى كونترول واضح زى الشمس و مكتوب عليه 2

لقيت الراجل بيقوللى انت مين اللى فتالك و قالك ان معنى كده انها فرز تانى (و بيقوللى هو انتو كل شويه حد يقعد يفتيلكم و يعمل فيها خبير) و الست بتقوللى طالما بتضرب يبقى خلاص

بعدين جه الراجل ياخد البندقيه عشان يجربها ( يشوفها بتضرب و لا لأ هو ده الأختبار بتاعهم !!!!!

علي فكرة هما عملين معاك احلا واجب بجد اي واحد تاني ممكن ميرجعوش لية حاجة اصلااا

[khaled_shams]

و الله يا سمسم يا ريت يرجعوها بس

[mohd_wafik]

خالد صمم على فلوسك عادي جداا قولهم انا خلاص مش عاوز حاجه و عاوز فلوسي بس في الاول تعامل بكل ادب و احترام و بلاش تشد في الكلام ...

[ابو مروان]

سيدى الفاضل_طالما البندقية فيها عيب تصنيع فهم مجبرين على استرجاعها سواء ببندقية اخرى او اعطاءك نقودك_الحل القانونى1_يجب ان يكون معك فاتورة الشراء
2_الذهاب للمحل مرة اخرى ومحاولة الحصول على نقودك كاملة او تبديل السلاح
3_فى حال الرفض اذهب الى قسم الشرطة ومعك اصل الفاتورة المختومة بختم المحل مبين بة وقت الشراء
4_تحرير محضر بالواقعة ضد صاحب المحل او المدير المسؤل تشرح فية ان البندقية المباعة غير صالحة لوجود عيب خفى فى التصنيع كنت على جهل بة ولم يصارحك بة البائع
5_بعد تحرير المحضر ارسل انذار قانونى على يد محضر(عن طريق محامى) للمحل اشرح فية الضرر الواقع عليك جراء ذللك الامر سواء اضرار مادية او معنوية وهددهم فية باللجوء للقضاء للمطالبة بالتعويض اللازم
باذن اللة فلوسك هاترجع ويمكن زيادة شوية والمصاريف الخاصة بالاجراءات القانونية هاتكون بسيطة (قول يا سيدى 100 جنية بالكتير

[ابو مروان]

ارجو ان اكون افدت حضرتك وانا لو مقيم بالقاهرة كنت عملتلك الاجراءات دى مجانا

[khaled_shams]

المشاركة الأصلية كتبت بواسطة ابو مروان

ارجو ان اكون افدت حضرتك وانا لو مقيم بالقاهرة كنت عملتلك الاجراءات دى مجانا

ابو مروان جزاك الله خيرا يا باشا
المشكله انك حتى لو كنت موجود مكنتش هتعرف تعمل حاجه لأنى مأخدتش فاتوره

[AMR EBID]

باشا طمنا لما ربنا يخلصك من الناس دي

[khaled_shams]

يا جماعه الحمد لله النهارده رحت علشان ابدل البندقيه
وأخدت فلوسها
و الموضوع خلص بمنتهى السهوله من غير شد و لا اى حاجه و حتى انا ما طلبتش الفلوس هما اللى ادوهالى بنفسهم انا كنت هبدلها بنوريكا جت بس طلعولى واحده الزناد بتاعها ما بيلقطش جت الست تطلعلى واحده تانيه قلتلها بلاش انا ممكن استنى لحد ما تجيبو هانتر 440 تانى او ممكن اجيب حاجه اعلى و ادفع الفرق
قالتلى لأ الهانتر كانت اخر واحده عندنا و أتصلت و انا واقف سألتلى عليها فى اسكندريه مالقتش
قالتلى انت كنت دافع كام قلتلها 1800
طلعتلى الفلوس بمنتهى البساطه
بصراحه انا ماكنتش متوقع كده خالص و حاسس ان انا ظلمت الناس دى

هما مش نصابين او بيضحكو على الناس

انما ممكن يكون :
1- عندهم اهمال شويه فى البضاعه (يعنى لو كنت اخدت النوريكا جت و مشيت علطول من غير ما اكسرها كان اتكرر نفس الموضوع)
2- ماعندهمش اهتمام بالزبون يعنى طريقة معاملة الزباين وحشه و ده ممكن يكون ناتج عن الزحمه الرهيبه على المحل (أنا كل ما اروح اقف استنى على الباب لحد ما حد يطلع و الناس بتخش المحل بالدور)

و قيه حاجه تانيه انا عرفتها من ناس موثوق منها ان الستيكر بتاع الكواليتى كونترول مالوش دعوه بالفرز و الموضوع كان حصل عندى بالصدفه ان البندقيه كان فيها العيب ده و كان على الستيكر رقم 2

و rock ان شاء الله هايعمللنا موضوع عن الكلام ده

و انا احب اشكر الناس اللى تفاعلت معايا خصوصا
rock و محمد وفيق و عمرو عبيد و ابو مروان و محمد يونس كتر خيركم يا جماعه و الله

على فكره محمد وفيق كلمنى و قعد يشجعنى انى اروحلهم
انا حتى كنت ناوى ارحلهم بكره بس هو قعد يقوللى لا يا خالد كل ما تروحلهم بدرى يكون احسن و بتاع
و قعد يسخن فيا

و على فكره انا كلمت أ/جلال خليفه زى ما محمد يونس قاللى
بعتله رساله على الخاص و الراجل رد عليا علطول و قاللى روح لمدام ليلى و قولها انا من طرف جلال خليفه و هما هيغيروهالك.
و قاللى على موضوع الستيكر ده

انا على فكره حتى ما كنتش قلتلهم على موضوع أ/جلال بس الراجل, جزاه الله خيرا
ما ترددش انه يساعدنى رغم انه ما يعرفنيش.

بس خلاصة الموضوع ان انا اسأت الظن بالناس بتوع فتح الله هو الموضوع ماكانش غش او حاجه هو كان خطأ غير مقصود منهم.
بس برضو لما نشترى حاجه من اى محل مهما كان كبير لازم نتأكد انها سليمه.

بس

[بدر]

الف مبروك
والحمد لله
الموضوع مش ظن بس دى امانة فى عرض المنتجات. عموما الحمد لله ومحدش بيتعلم ببلاش. تحياتى

[khaled_shams]

الله يبارك فيك يا أستاذ بدر
و غالبا ما كانش الراجل عارف ان فيها عيب ساعة ما باعهالى
و الله اعلم

[ناصر-56]

طيب انا لسه شاري جامو cfx وعليها الكواليتي كنترول رقم 3 وفحصتها ولا فيها اي حاجه وكمان لسه كنت عند محل الهدف بالكويت وكمان كنت عند شخص تاني بيبيع جامو ولقيت بنادق كتير وكل واحده عليها كواليتي كنترول مختلف لدرجه اني شفت واحده عليها رقم 6 من تحت فهل يعقل انها تكون فرز سادس ؟؟

[khaled_shams]

المشاركة الأصلية كتبت بواسطة ناصر-56

طيب انا لسه شاري جامو cfx وعليها الكواليتي كنترول رقم 3 وفحصتها ولا فيها اي حاجه وكمان لسه كنت عند محل الهدف بالكويت وكمان كنت عند شخص تاني بيبيع جامو ولقيت بنادق كتير وكل واحده عليها كواليتي كنترول مختلف لدرجه اني شفت واحده عليها رقم 6 من تحت فهل يعقل انها تكون فرز سادس ؟؟

حضرتك ما قريتش اخر مشاركه ليا
انا كنت كاتب (و قيه حاجه تانيه انا عرفتها من ناس موثوق منها ان الستيكر بتاع الكواليتى كونترول مالوش دعوه بالفرز و الموضوع كان حصل عندى بالصدفه ان البندقيه كان فيها العيب ده و كان على الستيكر رقم 2
)

[ناصر-56]

انا فاهم وقريت موضوعك بالكامل وقريت كل الردود بالتفصيل علشان انا مهتم وعندي نفس البندقيه وانا فقط باستفسر طيب في مره لقيت موضوع مكتوب فيه ان رقم عشره ده يعتبر فرز اول ورقم ٩ يعتبر فرز تاني وقيس علي كده باقي الارقام طبعا قلقت وقلت علي كده بندقيتي تعتبر فرز سابع ههههههههههه انا استفساري علشان اطمن بس ههههههههه وارجو من الخبراء توضيح اكثر حول رقم الكواليتي كنترول

[khaled_shams]

و انا بندقيتى كانت فرز تاسع على كده

[ناصر-56]

المشاركة الأصلية كتبت بواسطة khaled_shams

و انا بندقيتى كانت فرز تاسع على كده

ولو عليها رقم 1 كانت بقت فرز عاشر وانته كنت بقيت مبسوط وفاكرها اول :d طيب بالعقل ممكن نمشي فرز اول وفرز تاني وممكن تالت طيب فرز خامس وسادس ازاي يعني هنلاقي البندقيه متكسره جوه الكرتونه ولا ممكن نلاقي جوه الكرتونه نبله مثلا :d

[BASiC]

اخواني أنا ليا رأي ..... أنا مهندس في مصنع ملابس وعندنا وفي كل مصانع التصدير بيتم فحص كل قطعة وبيتحط عليها استيكر مكتوب عليها qc يعني كولتي كنترول وجنبها بيبقى فيه رقم يعني مثلا qc 5 الرقم ده بيدل على عامل الفرز يعني كل عامل فرز ليه رقم ثابت
عشان لو فيه حاجة فيها عيب عدت منه نعرف مين اللي عداها عشان يتحاسب عليها .....
واظن ان ده هوه هوه اللي بيتعمل في البنادق يعني رقم الكوالتي كنترول على البنادق ده ملوش أي علاقة بفرز البندقية

مع احترامي

[rock]

المشاركة الأصلية كتبت بواسطة basic

اخواني أنا ليا رأي ..... أنا مهندس في مصنع ملابس وعندنا وفي كل مصانع التصدير بيتم فحص كل قطعة وبيتحط عليها استيكر مكتوب عليها qc يعني كولتي كنترول وجنبها بيبقى فيه رقم يعني مثلا qc 5 الرقم ده بيدل على عامل الفرز يعني كل عامل فرز ليه رقم ثابت
عشان لو فيه حاجة فيها عيب عدت منه نعرف مين اللي عداها عشان يتحاسب عليها .....
واظن ان ده هوه هوه اللي بيتعمل في البنادق يعني رقم الكوالتي كنترول على البنادق ده ملوش أي علاقة بفرز البندقية

مع احترامي

كلام جميل .... تحياتى .

[BASiC]

اشكرك ..استاذ روك

[mohd_wafik]

خالد هوه مين محمد وفيق ده ؟؟؟ هههههههههههههههه
الحمد لله ان ربنا كرمك في الموضوع ده ... وفعلا الواحد مش بيتعلم ببلاش ..

[khaled_shams]

خالد مين !!!!!!!!!! ؟؟؟؟؟؟؟؟؟؟

[hema777h]

بالتوفيق للجميع ........ليا استفسار بسيط في بندقية نوريكا فيها مشكلة انها مش بتعمر بمعني انك بتيجي تحط الرشة في الماسورة مش بتعشق معاي خالص عايز اوديها تتصلح اوديها عند مين وانا ساكن في ميت عقبة الجيزة وسط البلد قريبين ليا .....في انتظار ردكم

[hanitarek]

بشمهندس Basic , شكراَ جزيلاَ على المعلومة و ريحت بالى , لأن بندقيتى الجامو هنتر كانت حتبقى فرز خامس.