طلعه متواضعه لمده ساعتين بالجامو

[قناص المنوفيه]

صباح الخير عليكم

ازيكم يا احلى قناصين وصيادين حبيت احكيلكم احداث الطلعه الصغيره دى
أولا انا طلعت لوحدى ودى ارخم حاجه فى الطلعه بصراحه ضربت اهداف كتيره
والغريب ان معظمها للاسف ضاع منى ومعرفتش اجيبه ولا اصوره حتى
غراب فوق عمود مسلح لبيت لسه مبنى جديد والحمد لله نزل مقفول مكانه بين اسياخ الحديد
تانى غراب كان فوق مسجد بقيت متردد اضربه ولا لأ عشان حرمه المسجد بس توكلت وضربته
نزل مقفول على سطح المسجد (حاجه تغيظ) طبعا فى الوقت ده مش عايز اقولكم كميه الغربان
طايره فوقى وعماله تنبح يجى حوالى خمسين غراب بلا مبالغه كبرت دماغى وكملت ضربت أول
يمامه على سلك كهرباء جت فى جناحها ودى الافتتاحه بالنسبالى الغربان ما بتتحسبش
فضلت ماشى والدنيا مطينه من اثار المطر طبعا امبارح ضربت تلت يمامات من مسافات بعيده
من حوالى 30 متر ل 40 متر ونزلوا مقفولين ودول جبتهم ضربت تلاته كمان غيرهم واحده اتعلقت
على شجره معرفتش انزلها ولا بالطبل البلدى واتنين وقعوا جوه مزرعه سورها عالى وصوت الكلاب
فيها الله ينور ده غير اللى ضربتهم من مسافات بعيده وجت فيهم بس نزلوا ريش وطاروا طبعا معظمهم
واقفين بزاويه ومسافات بعيده فالتلسكوب هو اللى كان ينفع فى الاهداف دى لانه ادق
الغريب بقى انى ضربت غراب تانى حجمه ولا دكر البط وقع وجت فى صدره المفروض مات
ببص لقيته طار تانى بس باين عليه هيقع بعيد بصراحه زهلت من قوته وتحمله الضربه

كانت طلعه شيقه لكن ينقصها الصحبه الطيبه والحظ او التوفيق من عند ربنا

الحصيله فى النهايه اللى رجعت بيها بعد الحكايه دى كلها ست يمامات طبعا ضئيله لكن
انا راضى عنها لان هى الظروف اللى ضيعت منى الباقى اسيبكم مع الصور