واأسفاااااااااااااااااااااااه على السمك

[أبو صفية]

السلام عليكم
النهاردة الصبح فات عليا واحد صحبى عشان نطلع طلعة بالبندقية و طبعا سمك كالعادة و طلعنا على واحد من المصارف الى بنروح لها و الحمد لله ربنا رزقنا شوية سمك كويسين
لكن المصرف الرئيسى الى كنت بصيد منه إتفاجئنا إن السمك كله عايم على وش المية ميت بكميات و أحجام كبيرة و الله مشينا يمكن فى حدود كيلو و نص و المية شكلها بصراحة يحزن من السمك الى ميت فيها و طول الطريق بيسألنى إيه الى حصل
قلتله إن مفيش غير سبب واحد يسبب الموت الكتير جدا دا و هوا إن أكيد المية مرشوش فيها مبيد كيماوى و الله أعلم و دا طبعا قضى على الأخضر و اليابس و الزريعة الجديدة كلها أول من يموت فلا حول و لا قوة إلا بالله و ألف حسرة على السمك أنا بصراحة كنت بزعل على السمك الى بضربه و يغطس بس بصراحة الى صدته و الى ما صدتوش ما يجيش نقطة فى بحر من الى شفته النهاردة
و للأسف أنا ما بخدش لا التليفون و لا الكاميرا معايا كنت وريتكم المنظر الحزين دا

و الحمد لله إنى لحقتلى شوية سمك و أدى صورتهم

[Angel]

ماشاء الله طلعة جميلة و صيد وفير

ربنا يجازيهم الى بيدمرو الدنيا بالسموم الكيماوية الى بيرشوها دى هنقول غير كدة

ربنا يصلح الحال

[NEW_Year]

طلعة موفقة وحمدله علي السلامة
وحسبي الله وهو نعم الوكيل فكل من ساهم في موت السمك بكمية كبيرة كدا
اكيد في حاجات رشنها

[القناص فليفل]

انا شفت الكلام دة قبل كدة ودة للان فية ناس بيستخدموا المبيدات والسموم للابادة الفئران والحشرات باسلوب غير علمى ودة طبعا بيموت السمك عموما طلعة جميلة يا ابو صفية وبالهناء والشفاء

[أبو صفية]

شكرا ليكم جميعا على ردودكم الجميلة
و ربنا يهديى الناس دى أو يجازيهم على أد نيتهم

[samraghost]

طلعه جميله والف هنا وشفا وربنا ينتقم من الناس دى بجد

[Karim Eid]

طيب خلي بالك من السمك ليكون فيه حاجة
ولو انا منك اخد عينات من السمك ده اروح احلله اشوف ميت من ايه
ممكن يكون مرض خطير

[mustafa-amer]

كنت تاخد واحدة و تروح بيها كليه الزراعة او معمل تحاليل يمكن في سم و هيضر الناس

ممكن تاخد واحدة او اتنين ماتو فرش او لسه بيموتو و تحلل امعائها و كبدها و التكاليف عليا بس لما ارجع مصر و ده تعهد مني
او على الاقل تعمل بلاغ في الشرطة او البيئة او الزراعة

[أبو صفية]

أنا النهاردة رحت أزور عمى و هوا فلاح و سبحان الله صدف إن واحد جاره بيرش مشتل الأرز كيماوى و كانت مادة ريحتها نفاذة جدا قلتله دا إيه قالى دا ساترين بيترش عشان يموت النباتات الغريبة فى مشاتل الأرز و قلتله ريحته وحشة ليه كدا قالى الراجل الي بيرشه دا فى الغالب حيتعب النهاردة
قلتله طبعا صرف الميه دى بينزل المصرف قالى طبعا و المية دى ما حتقابلش حاجة حية فى طريقها غير لما تموتها
قلتله على موضوع السمك قالى من دا أكيد مفيش إحتمال تانى قلتله طب ليه بتستخدموه قالى دا الدوا الوحيد الفعال و دا الى وزارة الزراعة موصية بيه

[ابو مروان]

لا حول والا قوة الا بالله _اهة السمك اللى مات دة كان يكفى كام عيلة محرومة من السمك ما فيش تخلف زى الموجود فى مصر عندنا اطول نهر وبحرين وكيلو السمك البلطى ب 20 جنية شوفتوا كدا؟ الواحد بيحزن على السمك دة بس الحمد لله ان المصرف دة بعيد عن الناس لان فيه ناس ما عندهومش دين والا ضمير بتاخد السمك دة وتبيعة فى الاسواق_والله ناس بتعمل كدا

[هشام سمير]

ياباشا احنا فى بلد متخلف ومسؤلين اغبياء والله انا بدأ يحصلى حاله من الحقن والكراهيه للبلد دى
حسبنا الله ونعم الوكيل

[mohamed2010habib]

حسبنا الله ونعم الوكيل

[مصطفى ابواسماعيل]

لاحول ولاقوة الابالله

[fendeka]

اليومين دول الصحه بتحط دوي علشان يقضي غلي قواقع البلهارسيا وهوه سام بيقتل حتي الحيوانات

[القبطان المصرى 77]

لا حول ولا قوة الا بالله
معلش يابو صفيه تتعوض ان شاء الله
وخلى بالك بقى احسن يكون السمك اللى انت جايبه ممكن يكون المبيد وصله لكن كان لسه مبانش تأثيره