شراء بنادق الهواء من الخارج

[ahmedzz]

معلومة مهمة
اتصلت بجمارك مطار القاهرة الجوى وامن المطار وسألتهم عن احضار بندقية الرش من الخارج في الطيارة
قال ممنوع ممنوع ممنوع

تصادر منك ويتعمل محضر

قلت له طيب اصيد عصافير ازاي

قال ارجعوا للنبلة تانى
او حط لها شوية رز في مصيدة فيران

ثم اتصلت بشركة شحن قال ممنوع شحنها بصحبة المسافر او بعد المسافر او قبل المسافر او بدون المسافر
قلت له طيب والي بيدخل مصر قال زي الحشيش اسال عن اللي بتصنع في مصر
طيب والاسبانى اللي بيتباع في المحلات قال متهربة كميات وخلاص بتشطب

اتصلت بواحد في المصانع الحربية
اللي عاوز يشتري يشتري الرمسيس بندقية وطنية مخلصة وقريبا بندقية عز معاها هدية شكارة اسمنت وقصعة لجمع العصافير

عوضنا على الله

[الهاوي]

أخي الفاضل
انا سألت بمطار القاهرة سألت الجمارك وسألت مندوب المفرقعات فأخبروني أن بنادق الهواء مهما كان نوعها ليست بها مشكلة نهائيا ولا أدري أخي الفاضل من سألت انت ؟؟؟؟؟
تحياتي

[حمامة]

هههههه يادي الخيبة ههههه

[smsmn8888]

لو معاك معرفة في المطار هتدعدي هتعدي

[tiger_chan]

يعني يا اخواننا ممنوع ولا ممكن اجيب واحدة من الخارج و انا راجع مصر؟؟

[أبو أدهم]

والله أخي تايجر أنا بالخارج أيضا وكان نفسي أشتري بندقية وأجيبها وأنا جاي أجازة ، وسألت الاخوة في المنتدى قبل كده وكان الرأي مختلف على أن ممكن تتصادر أو الأحسن تجيبها مفككة .....إلى آخر آراء الأساتذة المحترمين على الموضوع ده ، وبالتالي فأصبحت عندي قناعة بأن الأحسن انك تشتري من مصر وتتنازل شوية في موضوع المواصفات وشكرا

[juba]

انا ممكن اقول لكم على الطريقه

[Pellet-Master]

طب ما تقول يا باشا =)

[أبو أدهم]

مازلنا في الانتظار .................................!!!!!!!!!!!!!!!!

[walther]

بسم الله الرحمن الرحيم
بيتهيالي صعب جدا مهما كانت الطريقه لان فيها مخاطره امن الدوله وامن المفرقعات في المطار مش بيرحموا وطبعا معمل جنائي لتحديد نوع السلاح وفي الخر يفرجوا عنه بس ممكن تكون جايبها ويبلي او ديانا تطلع في الاخر رمسيس
ده مش هزار حيدولك دي لو حد طمع في اللي انته جايبها

[galal khalifa]

الاخوة الاعزاء
علي حسب معلوماتي المتواضعة ان صعود الاسلحة علي الطائرة ممنوع ممنوع ياولدي وانا شرحت ازاي بتدخل مع
الاخوة من الخليج الي جايين مهاهم سيارة وعفش كتير
والي يقدر يطلع سلاح علي طائرة يجيب معاة بندقية
وعلي فكرة (الاخ والتر - عمرو ) يعرف في القانون اكتر مني بالف مرة وعلي فكرة الموضوع مش هزار لان الموضوع دة
خطير جدا جدا وبعدين ما البنادق مالية مصر

[walther]

بسم الله الرحمن الرحيم
استاذي جلال بك
هيه الموضوع مش قانون هيه بصراحه كوسه او لعبه زي الدومينو
ازاي اقولك تصريح بيع الاسلحه والذخيره ده بيطلع بعد دفه تامين 500.000 جنيه وانسي ان حد يطلعه دلوقتي بالعكس بيسحبوه فاكيد مش حيسمحوا لاي حد يجيب معاه بندقيه من الخارج والا كانوا سمحوا لاي حد عايز يفتح محل اسلحه انه يفتحه
الفكره كلها عايز جيب من جوه مصر وطبعا ده اللي مخلي كل بتوع السلاح ماسكين في البنادق ب 4 اضعاف التمن والا كنا كلانا اشتريناها من النت ده فيه حاجات تهبلللللللللللللل وبرخص التراب
يعني مثلا انا خطيبتي معاها جنسيه فرنسيه وكانت عايزه تجيبلي هديه بندقيه FX Timberwolf ولكن انا علي الرغم اني كنت حموت عليها بس قولتلها اوعيييييييييييييي لان في المطار انسسسسسسسسسسسيييييييييييييييييييي انهم يدخلوها كل اللي ممكن يدخل جلبه في جيبك سوسته او مع الاخوه اللي جايين بعربيات ودي حتدخل لو ما اتشافتش اما لو شافوها انسي برده
ولنااااااااااااااا الله

[Pellet-Master]

قريبا إن شاء الله أخبار حلوة من واسطة جامدة في شركة fedex لمحاولة كسر إحتكار القلة في مصر

[sokar_jax]

انا جيبت 5 بنادق قبل كدة وعدو مفيش اى مشكلة والاخ الى بيقول ما البنادق مليا مصر دى الديانا 54 فى السعودية بتعمل بالمصرى 2200 والحرامية هنا بيبعوها ب 6300 عايز اية تانى

[Gamo]

يا جماعه كل واحد ليه معرفه ممكن يعدى وعلى فكرة لو جاى من دولة عربية برى دى اكيد ممكن تعى ان شاء الله علشان بتعرف تتكلم وتقول يا جماعه دى بندقية ضغط هواء ما فى المطار مفيش تفاهم هتتصادر يعنى هتتصادر

واكيد طبعا اصحاب محلات السلاح فى مصر بيضاعفو السعر عشان عارفين ايه الى بيحصل فى المطار

وفعلا لنا الله

[galal khalifa]

الاخ العزيز الي بيقول ان اسعار البندقية في السعودية نصف السعر كلامة صح بس الشحن والاجراءات والتفتيش والعرض علي خبير المفرقعات وامن الدولة كل دة مش بفلوس
والمصيبة الاكبر ان ممكن البندقية تتصادر يعني لو بحسبة بسيطة ها تلاقي ان البندقية وقفت عليك اكتر من السعر في مصر
وعلي فكرة في ناس موجودة في مصر ومش محلات بتبيع باقل من السعر في المحلات واحنا اخدنا منهم وبعتنا ناس في النتدي
علي سبيل المثال النوركا 73 في المحلات واحد يقول
1300 وواحد 1200 وجبنها ب 1000 جنية ومعاها قطع غيار ورش هدية المارفك الجولد نفس الموضوع وغيرها كتير
ياجماعة الخير احنا ضد جشع التجار بس ما باليد حيلة

[galal khalifa]

استاذي الكبير عمرو بك
ياريس ماينفعش اني اتكلم في القانون مع واحد كل شغلة القانون
ولا يفتا ومالك في المدينة

[noricawy isa]

لا ياجماعه خدو نصيحه مجرب قبل كده اخدت بندقيه رمسيس وكنت عاوز انزلها السعوديه اتاخدت مني في المطار ولما نزلت السنه اللي بعدها بعت واحده برضو مع واحد صاحبي وبرضو خادوها منو في المطار مع اني قلت للظابط اللي بيفتش انها بندقيه رش يعني مفيش خطر منها بكتيرها تعور غراب هههه قالي ممنوع طالما تندرج تحت اسم سلاح تبقا ممنوعه - وخدو بالكو بجد دلوقتي بقو يدققو قوي علي الحكايه دي لدرجه انهم بيمنعو اي حاجه معدن تخش الطياره انا بجد بكلم والله - واحد صاحبي سافر السنادي وقولتلو هات معاك من السعوديه مقص زرع اتصل بيا في المطار وقالي اتصادر والله بكلم بجد انا حبيت انصحكم ولكم الحريه - نوريكاوي

[noricawy isa]

ياجماعه خدو بنصيحه مجرب وزي مابيقولو اسال مجرب ولا تسال طبيب - الموضوع ده مهم جدا انا في سنه من السنين نزلت اشتري بندقيه رش رمسيس طبعا مكنتش ساعتها بفهم في البنادق ولا الكويس منها ولا الوحش المهم لما كنت بقه مسافر اخدتها معايا وصادروها مني في المطار مع الرغم اني اقعدت اقنع في الزابط انها بندقيه رش يعني بيكتيرها تعور قطه قالي ده يندرج تحت اسم سلاح ومقدرش اجازف وعديك بيها وصادروها وكنت زعلان قوي يوميها - اللي انيل من كده ويؤكد ان الموضوع صعب اني بعد سنه اشتريت وحده تانيه وارسلتها مع صاحبي برررررضو اتصادرت منو ومفيش فايده واللي اسمها رمسيس لا هيا ديانا ولا حاجه جمده - فاخدو بالكو ياجماعه والله نصيحه محدش ياخد معاه حاجه الا اللي يكون له معرفه في المطار بتاع مصر والمطار بتاع البلد التانيه اللي مسافر لها - اي حاجه فيبر ولا نحاس ولا المنيوم علي طول ممنوع تطلع ع الطياره ممنووووع - ده حتي دلوقتي بياخدو السكاكين والمعالق من الشنط والموضوع ده حصل بجد وقدام عيني والله - وواحد ارسلت معاه مقص زرع من السعوديه عشان يوديه مصر برضو اتاخد منو حاجه تقرف هههه - معلش انا صدعتكو بكتر كلامي بس حبيت في الاخر اني انصحكو لوجه الله - تحياتي - نوريكاااااااااااااوي