استغلال التجار

[محمد مصطفى عبدالرءوف]

السلام عليكم أعضاء المنتدى الأفاضل

حبيت أعرض عليكم تجربتي في شراء مسدس صوت لأكشف بها التجار المستغلين الذين قابلتهم في البداية ذهبت إلى المنتدى الدولى للصيد والغطس اللي عند تقاطع شارع شريف مع صبري أبو علم بجوار وزارة الأوقاف، أخويا كان اشترى من عنده مسدس صوت بروني 85 يوم 29 يناير بـ1500 جنيه ومعاه علبة طلق تركي بـ 250 جنيه .. ولأنه مكانش عارف الأسعار فاعتقد ان دا سعر المسدس العادي.. المهم لما رحت لقيت البروني 85 وصل 1800 ، والبروني p4 وصل 2000 والطلق وصل 400 جنيه وبعدين نزله تدريجيا على مدار كذا يوم لغاية لما وصله 250 تاني.. والايكول جاكول دول السريع سعره كان 3000 وبعدها بيوم واحد كان 3200 جنيه .. أه والله 3200 جنيه، دا بالاضافة إلى المعاملة السيئة من أصحاب المحل وهم 3 أخوات على ما اعتقد.. فلما سألته ليه 3200 دا انا اعلى سعر سمعته للمسدس دا كان 2000 وفي ناس لسه بتبيعه 1200 و 1500 .. شد المسدس من ايدي وقال روح اشترى من عندهم دي الأسعار اللي عنده لو مش عاجبك مع السلامة
وعملت جولة على المحلات علشان اشترى فزادت حيرتي.. منسي عنده الكيمار الايطالي وهو نوع محترم بس سعره بين 2500 - 3000، والبروني P4 عامل 2000 ومش عنده، والايكول السريع عامل 2500 .. زائد أنواع تركي وايطالي تانية اسعارها من 1500 وانت طالع ..
فتح الله اللي في عبد الخالق ثروت .. المعاملة جافة تماما وبيدخل الناس بالدور اتنين اتنين.. وساعات مش بيرضى يدخل حد وبيبيع من على الباب ويديك المسدس في كيس بلاستيك من غير علبة ولا أي حاجة معاه.. وحجته في دا انه اتسرق في الأحداث.. ومش بيشتغل في الايطالي اساسا.
محلات بوندي أبو ضيف .. عنده أنواع تركي مش منها الايكول السريع .. والبروني p4 كان عامل عنده 1500
ميشيل عازر اللي في العتبة .. رغم ان المحل صغير وزحمة إلا أنه كان أرخص الأسعار في الأول.. مبدئيا هو مش بيشتغل في التركي بس البروني عنده انا جبته يوم الخميس اللي فات ب1200 بعد الفصال لأنه كان عاوزه بـ 1300 والطلق الألماني بـ200 جنيه العلبة .. لكن النهاردة الاثنين 7 مارس رحت مع واحد صاحبي علشان يجيب البروني p4 من عنده وصل 1750 ومش بينزل فيه جنيه .. والبروني الجاب عنده بـ 1500
المهم أدركت أن أخويا اتضحك عليه، لما دخلت على المنتدى دا ، وبفضل الله والاستاذ بدر أكرمه الله عرفت الفرق بين الأنواع وأسعارها الحقيقية ، واتصلت بالاستاذ هشام سمير لأشتري منه البروني والايكول السريع بسبب بسبب بعد المسافة وعدم توفيق المواعيد لم يكتب لي لقاء هذا الشخص المحترم جدا .. وإن كنت مصر على لقائه لأشكره، انا جبت بروني p4 ب1200 من عازر زي ما قلت.. وجبت الايكول السريع ب 1400 بعد فصال من فتح الله والكلام دا الأسبوع اللي فات ..
النهاردة نزلت مع صاحبي فتح الله مش عنده ايكول سريع خلاص .. وعازر والمركز الدولي للغطس زودوا الأسعار بشكل جنوني
أرجو من كل من تعرض لاستغلال من التجار الجشعين كشف أسماءهم حتى يستفيد أعضاء المنتدى من التجربة ومحدش يشتري منهم ..

[fidodido]

بجد و الله ان البرونى وصل ل ١٧٥٠ ؟؟؟؟؟

[صياد بطبنجة]

الاسعار ضخمة جدا...بس الاهم واضح ان عندك خبرة فى المسدسات انا بحب جدا اشكال المسدسات لكن فى نفس الوقت مبفهمش فيها يا ريت تعرفنى ياترى استخدامها بيكون فى الصيد وللا ف ايه
وايه معنى الخرطوش والفرد والرش و الهوا واستخدامهم والفرقبينهم وهل ليهم ترخيص وللا ايه الوضع
ولك جزيل الشكر

[محمد مصطفى عبدالرءوف]

للاسف مش هاعرف افيدك في موضوع الرش والخرطوش والفرد دا لأني لسه جديد في عالم السلاح .. لكن كل الأنواع اللي اتكلمت عنها دي مسدسات صوت فقط مش للصيد يعني.. اعتقد ان الاستاذ بدر ممكن يفيدك أفضل مني

[kefou]

السلام عليكم.. انا لسه جديد فى الموضوع بس انا ليه رأى, الأسعار اكيد مش هتكون زى الأول لأن سعر الجنية نزل و ممكن ينزل اكتر.. فا مسلن الBruni P4 بحوالى 180 دولار بره يعنى بعد ما يوصل مصر ممكن يكون سعر التكلفة حوالى 1300 جنية فاكيد الأسعار بعد كدة مش هتكون زى زمان.

[mahmoud el masry]

والله اصحاب محلات السلاح دول ابشع ناس ومعملتهم تقرف كلب

[akhater]

انا جبت من 3 أسابيع البرونى p4 هو كان بـ 1250 من غير ما اتكلم خلاه 1200
و عليه رصاص ألمانى 50 طلقة بـ 250 جنية مرضاش ينزل تانى فأخدت منه جراب وسط و كتف مجانا

[moh3377]

ال p4 كان امبارح عند عازر و شاهين ب 1500 و النيكل بتاعه ب 1650

[محمد مصطفى عبدالرءوف]

صديقي العزيز .. امبارح جايبين ال p4 من عازر اللي في العتبة الساعة 12 الظهر وكان ب 1750 ومرضاش ينزل جنيه وقال لو جيتوا بليل هاتلاقوه زاد

[kefou]

سوال.. هو ازاى اعرف الطلق ده تركى والا المانى؟؟ اللى عندى لونو فضى وجبتو ب 5 جنيه الطلقة.. لما لاقيتو غالى جبت 10 طلقات بس

[lastworld]

hat2ate3 meen ola meeen maho kol el m7elat bet3`ale el 2yam de
3alek o 3la a3da2 el montada nas mo7tarma m7adesh menhom zaoed fel as3ar
rbna ye3de el ayam de 3la 5eer
tqbal mrore

[moh3377]

الأسعار دي كانت الساعة 11 هههههههه

بس والله هو ده اللي حصل و انا اساسا كنت رايح علشان اسئل علي البي 29

1750؟؟ ده استغلال بشع


انا كنت جايب ال p4 من عنده من 3 اسابيع ب 1250 + جراب هدية + زيت هدية, مش عارف همه ازاي بيرفعو الأسعار كده

[belover3]

عندك حق انا اشتريت امبارح من فتح اللة من على الباب blow c06 1200 و الطلقات 150 و المعاملة كانت وحشة جدا و من غير علبة و لا فاتورة و لا اي حاجة مع انى كنت رايح لفتح اللة عشان سمعتة الكويسة بس استغربت جدا لان المفروض يعامل الزبائن افضل من كدة مهما حصل

[صياد بطبنجة]

اناعرفت من التعليقات ان كل الانواع دى مسدسات صوت...............يعنى انا لما ادفع مبلغ كبير واجيب مسدس صوت يا ترى ايه فايدته او استعماله للى بيجيبه

[eltenen101]

السجلابى اسكندريه محطه الرمل الايكول السريع والبى 4 الواحد ب2500 حرام كفايه استغلال بقى هيه فرصه وخلاص حسبى الله ونعم الوكيل

[Ahmed kouta]

يا شباب الطبنجات الصوت لا تصلح للحماية اطلاقا ولو اتحولت باي طريقة من الطرق لانها تبقي حية فية خطورة شديدة علي حاملها بمنتهي البساطة اسلحة الصوت للزينة والديكور نبطل نشتريها دلوقتي خالص وهنلاقي بمنتهي السهولة اسعارها رجعت للوضع الطبيعي لازم نبقي ايجابيين في الموضوع دة .

[osha966]

يا جماعة السعار بدأت تنزل الحمد لله بالذات فى اسكندرية أكتر لأن فيه شحنات جديدة وصلت الميناء -بس فى القاهرة النزول أقل بسبب التهافت على المحلات .بس هينزل أكتر اليومين الجايين وكلهم بي}كدوا ان فيه بضاعة كتير نازلة آخر الشهر

[osha966]

يا جماعة الأسعار بدأت تنزل الحمد لله بالذات فى اسكندرية أكتر لأن فيه شحنات جديدة وصلت الميناء -بس فى القاهرة النزول أقل بسبب التهافت على المحلات .وقلة عدد المحلات بالنسبة لعدد السكان.بس هينزل أكتر اليومين الجايين وكلهم بي}كدوا ان فيه بضاعة كتير نازلة آخر الشهر

[silver_5000]

انا نزلت سالت على الايكول فيرت ماجنوم و لقيته ف محل ف الجيزة اسمه البارودى , و حسب ما كنت عرفت من منتداكم الكريم ان سعره تقريبا 1100 او 1400 مش فاكر السعر اللى قريته كان كام , المهم انى لقيت ف المحل ده المعاملة مش وحشة بصراحة بس زحمة شويتين , و لقيته سعره 2500 بس السيلفر منه , حاولت انزل معاه مرضيش ينزل فيه جنيه , كنت ناوى اشتريه بس بصراحة استحرمت انى اكون عارف انه سعره الحقيقى اقل من النص و اشتريه بالسعر المبالغ فيه ده

[lastworld]

ادى الاسعار بدات تنزل
اصبرو محدش يشترى دلوقتى
شكلها هترخص تانى

[ahmed-zayed]

المشاركة الأصلية كتبت بواسطة silver_5000

انا نزلت سالت على الايكول فيرت ماجنوم و لقيته ف محل ف الجيزة اسمه البارودى , و حسب ما كنت عرفت من منتداكم الكريم ان سعره تقريبا 1100 او 1400 مش فاكر السعر اللى قريته كان كام , المهم انى لقيت ف المحل ده المعاملة مش وحشة بصراحة بس زحمة شويتين , و لقيته سعره 2500 بس السيلفر منه , حاولت انزل معاه مرضيش ينزل فيه جنيه , كنت ناوى اشتريه بس بصراحة استحرمت انى اكون عارف انه سعره الحقيقى اقل من النص و اشتريه بالسعر المبالغ فيه ده

اعتقد السعر دا كتيييييييييير قوى انا شارى المسدس دا يوم الثلاثاء اللى فات 8-3-2011 وكان سعره 1200 جنيه بالعلبة وبس وعلى العموم ممكن تكلم ا/ هشام ف المنتدى هنا وعلى حسب ما الناس كلها بتقول ف المنتدى ان اسعارة كويسة وربنا معاك
اما عن المسدس انا لسة مجربتهوش عملى ولكن الكلام اللى عليه حلو

[ماجد عادل]

فعلا انا رحت محل صيامكو للاسلحة من عشرة ايام وباع ادامى الطبنجة ekol firat magnum عيار 9مم عادة بمبلغ 3500 جنيها والطلقات العلبة 25 طلقة بـ 250 جنيه والجراب 100 جنيه والله على ما اقول شهيد ومعاملة فى منتهى السوء وبيطلع الطبنجات فى كيس بلاستيك اسود ومن غير اى مشتملات
مؤسسه صيامكو للاسلحه
1 أ فؤاد باشا منشيه البكرى م ج محل رقم 2
ودى صورة السلاح

[بدر]

المشاركة الأصلية كتبت بواسطة ماجد عادل

فعلا انا رحت محل صيامكو للاسلحة من عشرة ايام وباع ادامى الطبنجة ekol firat magnum عيار 9مم عادة بمبلغ 3500 جنيها والطلقات العلبة 25 طلقة بـ 250 جنيه والجراب 100 جنيه والله على ما اقول شهيد ومعاملة فى منتهى السوء وبيطلع الطبنجات فى كيس بلاستيك اسود ومن غير اى مشتملات
مؤسسه صيامكو للاسلحه
1 أ فؤاد باشا منشيه البكرى م ج محل رقم 2
ودى صورة السلاح

لا حول ولا قوةة الا بالله
بس كان واجب تنبة الاخ اللى اشتراها لان دى سرقة علنى
تحياتى

[AMR ALY]

فين المحلات المحترمه الأن؟

[AizO]

السلام عليكم اولا
انا جديد بالمنتدى هنا
اسمى / ايسر
كنت حابب ارد على الزياده المتوقعه فى الاسلحه دا شئ طبيعى
بسبب الحال الحالى بالبلد وكل شخص عايز مسدس الصوت مش لأحتياجه العادى
فى ناس كتير عايزينه للحمايه " أقصد مظهر من مظاهر الحمايه "
انا عايش بالعريش بلد السلاح كله
وهتجنن ومش عارف اجيب اى سلاح بسبب الاسعار الوهمه الحاليه
المقصود من كلامى ان الزياده دى للاسلحه متوقعه ولازم ننتظر ونقول " يارب " ...

[Hazem]

فعلا الاسعار نار

[mr vigo]

بالاضافة إلى المعاملة السيئة من أصحاب المحل وهم 3 أخوات على ما اعتقد.. فلما سألته ليه 3200 دا انا اعلى سعر سمعته للمسدس دا كان 2000 وفي ناس لسه بتبيعه 1200 و 1500 .. شد المسدس من ايدي وقال روح اشترى من عندهم دي الأسعار اللي عنده لو مش عاجبك مع السلامة

أقسم بالله العظيم
لو تاجر عمل معايا كده لمسحت بكرامته الارض
انا زبون والمفروض يتعامل معايا بإحترام وذوق
ولا عشان بنفهم في الاسعار حيستهبلو علينا ؟؟؟
اللي بيصعبو عليا بجد هما الناس اللي مالهاش في الاسعار والاسلحه وبيضحك عليها

[اسر2]

فعلا محل صيامكو للاسلحة دة استغلالى لابعد الحدود وبجد مش طبعين وبيبيعو باسعار خيالية يعنى بيضرب سعر المسدس فى 2
وعلى فكرة كان عامل اعلان فى الوسيط كـــــذب بيقول انة عندة مسدس 9 ملى 700 جنية ولما تيجى تتصل بيهم يقولو خلص بس فية حجات تانيا كتير عندنا ولما واحد صاحبى راح عرفت انهم كذابين جدا وحرامية كمان واقل سعر مسدس 1500 جنية وهو اخرة 700 -8ملى والمعاملة زى الزفت بس كان نفسى اكون انا معاة عشان اعلمهم يعملو العملاء باحترام ازاى بس للاسف

[mahmoudalaa]

يجب مقاطعة هؤلاء التجار الجشعين

[T.A.R.E.K]

عن تجربة .. صيامكو من ازبل و اقذر الشخصيات و المحلات .. فعلا هما ناس مش طبيعية .. تحس انه مكان مشبوه .. اسف على الالفاظ لاكن بصراحة دة مكان زبالة بلى فية ...

[اسر2]

واللة انت عندك حق فى كل كلمة انت قلتها على ( محل صيامكو امام مترو ماركت ) طبعا خصوصا انة مكان مشبوة فعلا وكل الناس الــ بتشتغل فية شكلهم مش طبيعى

[waleed2000s2]

له الزعل دى فرصة للطمع والاستغلال وموسم اظنة لن يتكرر لذلك يجب مقاطعة هؤلاء التجار الجشعين

[golden_scorpion]

يا جماعة الاول السلامو عليكم انا اشتريت من حوالى 3 اسابيع من الاسكندرية مسدس 9 ملم تركى 16 رصاصة اتوماتيك وعادى ب 1500 اولا عاوز اعرف منكم النوع دة كويس والمفروض سعرة كام والراجل بعهولى فى كيس مش شنكة ومرضاش ينزل اى جنية من محل حلمى محطى الرمل ش الكنيسة اما فيطر ارجو الرد للعلم وشكرا

[اسر2]

انت مقولتش نوعة اية لان التركى اكتر من نوع بس اكيد p 29 او جاكل دول او فرات ماجنيوم بس على العموم لو الاول كان قبل الكلام دة 600 جنية ولو واحد من التانين دلوقتى ب 1100 وكتيرة يبقى 1200

[g.fawzy]

يا جماعة لو سسمحتم انا عاوز اعرف سعر ال EKOL Jakal Dual جديد و مستعمل بكام انا محتاج واحد ضروري