|
الموضوعات العامه الموضوعات الغير متعلقه بالصيد. |
أدوات الموضوع | إبحث في الموضوع | انواع عرض الموضوع |
14-01-08, 06:08 PM | #1 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
سؤال عاجل - للساده الاعضاء
الساده الاعضاء - تحيه طيبه واعتذر عن ازعاجى لكم.
وصلت الى منتداكم الكريم وانا ابحث عن اسلحة الدفاع عن النفس فلم يسبق لى التعامل مع اى اسلحه من قبل ولكن ما حدث معى ومع اسرتى جعلنى ابحث بشكل عاجل عن اسلحة الدفاع عن النفس وارجوا منكم الرأى السريع. واسمحولى ان احكى لكم الحكايه من البدايه انا مهندس فى اواخر الاربعينات و لدى طفلين صغيرين و اسكن انا واختين ليا فى عماره فى حى هادئ فى الهرم - احداهم مطلقه من فتره طويله ولها بنتين والاخرى غير متزوجه. وآسف على المقدمه الطويله دى. فمنذ فتره وجيزه (اقل من عام) – بدأ شاب مدمن والده متوفى وليس له كبير يسكن فى العماره المقابله لنا يحاول ان يتحرش ببناتها اثناء خروجهم و نزولهم – مما دفعنا لتشديد التعليمات على البنات بالاسلوب التقليدى : ما تنزلوش من البيت الا للكليه او المدرسه – ما تفتحوش الشبابيك - الخ مما يقوله عادة الكبار فى مثل هذه المواقف. ومنذ اسبوع حوالى الساعه الثانيه عشره (منتصف الليل) - بينما انا فى شقتى اتهيأ انا واولادى للنوم – فوجئت بقرع (خبط) شديد على باب شقتى بشده اوقظنى من النوم –وسمعت صراخ بنات اختى الحقنا يا خالوا– وسارعت بفتح الباب فأذا بابنة اختى تدخل على وهى منهاره وتصرخ ان هذا الشاب المدمن كسر باب الشقه ودخل عليهم!!! لم استوعب الامر فى البدايه. وحتى لا اطيل عليكم - الحمد لله لم يصب احد بأذى و تم القبض على الشاب خارج العماره - واتصلنا بالنجده عشرات المرات دون مجيب - ثم انتهى الامر باخوته وقد حملوه لبيته عندما ذهبنا لعمل المحضر فى قسم البوليس. وتم تحويل المحضر للنيابه - لكن حتى اللآن لا يوجد جديد. وبالامس - فى الساعة الثانيه والنصف : ظهرا (نعم ظهرا) - سمعت رزع شديد و تصورت احد يكسر فى العماره المجاوره لنا ثم اصوات صراخ - وجريت ابحث عن اى شئ فى المنزل للدفاع عن النفس - فوجدت عتله قديمه - وفوجئت باختى الصغيره (الغير متزوجه وشقتها فى الدور الارضى) تدخل الشقه وهى منهاره وتصرخ بأن الواد المدمن حاول يكسر باب الشقه عليها و بيهددها ان اختها لازم تتنازل عن القضيه والا مش حيسيبها فى حالها ولما صوتت شباب المنطقه و البوابين اتلموا ومسكوه و هربهوها فوق عندى و مسكوه وهمه بيضربوه وحتى لا اطيل عليكم مره ثانيه - هذه المره - كنت مع شباب المنطقه و قالولى عنك انت يا باشمهندس و ضربوه ضربا مبرحا و لم يتركوه الا حينما جائت امه تبكى لهم و تركوا اخوته يحملوه للمنزل.. طبعا - روحنا القسم تانى و عملنا محضر تانى - الخ - الخ - وحتى الان - لا جديد ايضا المشكله ان كل من فى العماره (وهمه كلهم 6 اسر) مرعوب - احسن المجنون ده يفكر يقتحم شقته تانى - وابتديت افكر فعلا فى سلاح - اى سلاح : المهم يكون قانونى و موجود بسعر مناسب. وطبعا مش محتاج اقولكم ان فى سن الـ 49 و السكر - الواحد لياقته مش بتاعة شومه اوعصايه و الحاجات اللى زى دى - محتاج حاجه سريعه وفعاله علشان يدافع عن مراته واولاده - ياريت تفيدونى برأيكم ومتشكر جدا على ردودكم - مقدما |
sponsor links |
14-01-08, 08:54 PM | #2 |
مشرف الاقسام العامه&القسم الاسلامى
|
رد: سؤال عاجل - للساده الاعضاء
لو امكانيه حضرتك انك تجيب مسدس مرخص يبقي تمام
بس للاسف الدنيا بايظه دلوقتي وصعب اوي ترخص ممكن تجيب مسدس صوت مفتوح بس متنزلوش الا في اوقات الشده فقط وربنا يستر ويعدي الايام ديه علي خير |
14-01-08, 09:08 PM | #3 |
صياد قديم
|
رد: سؤال عاجل - للساده الاعضاء
في الحالة دي انا عن نفسي مش هقدر اقول غير ربنا يعينك
لان غالبا حضرتك مش هتقدر ترخص مسدس وفي نفس الوقت قانون الناس الي زي الواد ده هو النار بالنار وحاليا في اسلحة في ايد البلطجية بتكون صناعة محلية وبتعمل تاثير اكتر من المسدسات البلي مليون مرة وفي نفس الوقت لو اتضرب بمسدس بلي ساعتها هتبقي مشكلة والحكومة عندنا مش بتعترف بحاجة اسمها مسدس بلي بيكون اسمه مسدس صوت مقلوب ودي مصيبة سودة وتودي في داهية حضرتك ممكن تشوف محامي كويس او لو تعرف حد في القسم الي انت تبعه ممكن يقرف الواد ده في عيشته ويمضيه علي محضر عدم تعرض وساعتها لو عمل حاجة يبقي هو الي جابه لنفسه وربنا يعينك يارب علي انت فيه
__________________
المهارة تصيب هدفاً لايمكن لأحدٍ أن يصيبه..أما العبقرية فتصيب هدفاً لايمكن لأحدٍأن يراه ツ |
14-01-08, 09:30 PM | #4 |
مشرف الاقسام العامه&القسم الاسلامى
|
رد: سؤال عاجل - للساده الاعضاء
ماهو للاسف يا جوكر الناس عشان كده بتتجه للحمايه بالطرق الغير شرعيه
فيه ناس تقولك بقي الصاعق او السيلف ديفنس او الكلام ده والكلام ده طبعا مش بيأثر خالص او بيعمل اي حاجه حسبي الله ونعم الوكيل في الي خلي البلد والناس مرعوبه كده |
14-01-08, 09:39 PM | #5 |
مشرف قسم الصيد البرى
|
رد: سؤال عاجل - للساده الاعضاء
لا ولا اي كلام من دا
الواد دا يتروق ترويقه حلوه و يتعمل عليه حفله تمام كل ما يدخل الشارع لحد ما يطفش خالص دا حله ولا حد بقى يعمل حساب لعييط امه الي اصلا معرفتش تربيه ولا اخواته الي مش عارفين يلموه و لو حد لسعه ضربه موته في الزحمه يبقى احسن عارف ان الكلام الي بقوله صعب على ناس كتير تقبله بس دا الحل الوحيد لكلب زي دا انا بقرف اصلا لما بسمع عن حد زيه
__________________
لئن فغر الخطر فاه ، فأدخل رأسك فيه .. لئن غزا الخطر قلبك ، فأغز قلبه .. لئن جرى الخطر ، خلفك فلتتوقف .. انتظره .. |
14-01-08, 10:26 PM | #6 |
Banned
تاريخ التسجيل: Dec 2012
المشاركات: 360
معدل تقييم المستوى: 0 |
رد: سؤال عاجل - للساده الاعضاء
الحل من وجهه نظي انك تاجر بلطجيه دمام يعجزوه _ اه والله يعجزوه_ طالما بقي ملوش كبير واكيد الشرطه مش هتعملك حاجه وهتستني لما الفاس تقع ف الراس _احنا في زمن القدوه بقي عبده موته
|
14-01-08, 10:30 PM | #7 |
صياد متقدم
تاريخ التسجيل: Feb 2012
المشاركات: 715
معدل تقييم المستوى: 31 |
رد: سؤال عاجل - للساده الاعضاء
يا فندم فيه اختراع اسمه بوابه حديد للعمارة ومفتاح مع كل ساكن ومحدش غريب يدخل العمارة
|
14-01-08, 11:41 PM | #8 | |
صياد قديم
تاريخ التسجيل: Mar 2011
المدينه: القاهرة , شبرا مصر
المشاركات: 2,982
معدل تقييم المستوى: 235 |
رد: سؤال عاجل - للساده الاعضاء
اقتباس:
__________________
وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ |
|
14-01-09, 02:42 PM | #9 |
مشرف قسم الصيد البرى
|
رد: سؤال عاجل - للساده الاعضاء
يا مورو لا يفل الحديد الا الحديثد
و دا عرض بنات و الراجل سنه كبير و مش هيقدر يمنه شاب لوحده و المعروف ان الاشكال دي مبتفهمش قانون غير القوه و بس دا حله من الاخر يتعجز او يموت مش حل تاني
__________________
لئن فغر الخطر فاه ، فأدخل رأسك فيه .. لئن غزا الخطر قلبك ، فأغز قلبه .. لئن جرى الخطر ، خلفك فلتتوقف .. انتظره .. |
14-01-09, 03:26 PM | #10 |
صياد متفاعل
تاريخ التسجيل: Jul 2013
المشاركات: 175
معدل تقييم المستوى: 8 |
رد: سؤال عاجل - للساده الاعضاء
اخى الفاضل
anwar شرفتنا فى منتدى الصيد فى مصر ومنور والله وكل عام وانتا بخير بص انا هقولك على راى المتواضع ويمكن ميعجبكش بس فكر فية الحل يا باش مهندس انك تجيب كلب وياريت يكون كلب غبى مرعب ومن غير ما تسال على مزارع والكلام دة انزل سوق السيدة عائشة يوم الجمعة وياريت تاخد حد معاك بيفهم فى الكلاب وتشترى كلب وتحطة فى مدخل العمارة عندك ولو الواد دة دكر يدخل تانى عندكم وبالنسبة للانواع الغبية عندك الروت فايلر _ دوبر مان _بيتبول _بوكسر غير كدة متسالش على اى انواع تانية وشكرا ملحوظة لو نويت فعلان تشترى يكون الكلب كبير طبعا وفية طرق كتير بحيث انك تعودتة عليك وياخد عليك وحتى ممكن تبيعة بعد كدة لما تشوفوا حل فى موضوع الواد الكلب دة |
14-01-09, 03:56 PM | #11 |
مشرف قسم الصيد البرى
|
رد: سؤال عاجل - للساده الاعضاء
الكلب الكبير دا ممكن يعض حد من الي ه اصلا جاي يحميهم
دا غير ان الواد دا لو بلغ ما هيصدقو هيجو يا هيضربوه بالنار يا اما لو حلو الظابط هيطمع فيه و ياخده
__________________
لئن فغر الخطر فاه ، فأدخل رأسك فيه .. لئن غزا الخطر قلبك ، فأغز قلبه .. لئن جرى الخطر ، خلفك فلتتوقف .. انتظره .. |
14-01-10, 04:50 AM | #12 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
انا شاكر ليكم كلكم ولردودكم - ولكل واحد ساهم بالرد - فعلا البلد دلوقتى ما بقاش فيها حاجه اسمها قانون او داخليه
انا اول مره فضلت اتصل بالنجده من الساعه 12:30 لحد الساعه 2:30 ويقولولى همه جايينلك فى السكه و لاحد عبرنا بعد كده. - العماره فعلا ليها باب حديد مقفول وكل واحد من السكان عنده مفتاح - واللى واضح ان الواد ده بيستنى لما حد من السكان ينزل المفتاح لحد من الديلفيرى. وفعلا زى ما بتقولوا - انا رتبت انى اقابل واحد بلطجى كبير فى المنطقه وبيقولوا عليه جدع و ما بيغلطش فى اهل حتته - علشان احكيله و اتفق معاه انه يهدد الواد ده او يخوفه - وهوه فعلا ليه سمعه جامده وكان بيعتقلوه (جنائيا) ايام زمان. تفتكروا ان الحل ده ممكن ينفع. وفى نفس الوقت كلمت محامى كويس واتفقت معاه يتابع المواضيع دى - لأنى للاسف الشديد اكتشفت انك لو عملت المحضر بس - يبقى زى قلته و انك ممكن تعمل محضر و ما يروحش النيابه او يتحفظ فى النيابه واكتشفت ان الواد ده راح تانى مره - امبارح - وعمل محضر ان احنا (كلنا) اجرنا بلطجيه و ضربوه - لكن المحامى طمنى وقالى ما تقلقش ده محضر كيدى عمله بعد ما اقتحم الشقتين والتواريخ بتثبت كده و دى حتى لو بقت قضيه حتاخدوا فيها براءه - طبعا ان قلت يا نهار اسود يعنى احنا اللى يكون لينا قضيه وناخد فيها براءه - و لاحول ولا قوة الا بالله. الواحد فعلا مش متخيل ان الحياه ممكن تمشى كده او ان فيه بلد ممكن الناس تعيش بالشكل ده - للاسف انا كنت ما بانمش قبل نور الفجر ما يطلع و ما روحتش الشغل يومين وبانزل بالليل اتطمن ان باب العماره مقفول !! لكن فهمت من كلامكوا ان مفيش حاجه سلف ديفنس - حتبقى فعاله ولو لدقيقتين او تلاته - مظبوط كده ؟ على العموم - انا متشكر جدا على ردودكوا و اهتمامكوا و دعواتكوا |
14-01-10, 05:27 AM | #13 |
مشرف قسم السوق
تاريخ التسجيل: Sep 2011
المشاركات: 1,518
معدل تقييم المستوى: 63 |
رد: سؤال عاجل - للساده الاعضاء
انا بجد مش عارف اقول ايه على الاشكال الوسخة الى عايزة الحرق بالنار دى
فى حل من وجهة نظرى وقانونى وهى انك تجيب بندقية ضغط هواء هاى بور وهى قانونية وقوية جدا وربنا يعينك |
14-01-10, 08:23 AM | #14 |
المشرف العام
تاريخ التسجيل: May 2013
المدينه: القاهره
المشاركات: 2,690
معدل تقييم المستوى: 353 |
رد: سؤال عاجل - للساده الاعضاء
اخي الكريم / انور
بامكانك ان تضع بابا من الحديد علي شقتك بعيدا عن باب العماره الذي يستطيع الدخول منه اذا حتي تم نسيانه وتركة مفتوحا .. علي ان يكون الباب صناعة جيده وثقيل ويتم اغلاقة من الداخل بقفل لا يفتح الا بواسطة من بداخل الشقة بخلاف المفتاح العادي الخارجي و كان لي احد الاقارب بحي شبرا في بيت العائلة الكبير يعاني ما تعاني انت منه تماما منذ فتره الانفلات الامني فقمت بالاتفاق مع احدي الورش وصنعت له بابا حديديا قويا جدا جدا لن يستطيع هذا الحيوان الذي تتكلم عنه ان يكسره او يتخطاه الي من بداخل الشقة وانا لا احبز فكره انك تشتري سلاحا لا يستطيع ان يجعلة يتراجع عن ما يفعلة بل سيكون بمثابة ازدياد غضبة وتحفيزه علي التربص بك او بالبنات عندك او باهل بيتك وهم في الشارع خارج البيت وفكرة انك تتفق مع احد المسجلين او البلطجية للتصدي له لا اوافقك عليها اطلاقا فلا تجعل بينك وبين هؤلاء البشر اي علاقة من قريب او من بعيد لانك بذلك تكون قد تستخدم سلاحا زو حديد الاول لك والاخر عليك اما فكرة تربية كلب في المنزل للحراسة او حتي لان يشعر من بداخل المنزل بالامان فانا اراها فكرة مناسبة لتلك الظروف طالما سيتم تربيتة للحراسة كما قال رسولنا الكريم وليس للرفاهية او التباهي وبامكانك ان تقتنية صغيرا بعض الشيئ لا كبيرا ليتاقلم مع اهل بيتك ولا تغفل موضوع الباب الحديدي ايضا فهو مفيد جدا في حالات كثيره ويستطيع كل من بالمنزل ان يتحدث مع من بالخارج من وراءة في امان كبير ولن يستطيع احد ان يتخطاه واخيرا اتمني لك السلامة والامان والخير انت واهل بيتك من كل شر وسوء |
14-01-10, 07:51 PM | #15 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
شكرا لك يا اخ وليد - انا فعلا باعمل كده دلوقتى - ودعواتكم
|
14-01-10, 09:26 PM | #16 |
صياد متفاعل
تاريخ التسجيل: Jul 2013
المشاركات: 175
معدل تقييم المستوى: 8 |
رد: سؤال عاجل - للساده الاعضاء
هقولك على حاجة يا anwar
ومتهيالى انتا مفكرتش فيها اية رايك لو تعمل بلاغ عن الواد الكلب دة للجيش شوف اقرب وحدة عسكرية او انزل مخصوص ودور على اى افراد شرطة عسكرية واعتقد ان الجيش غير الشرطة يعنى هيقوموا معاك بالواجب وهيخلصوك من هذا الصعلوك صدقنى وبنسبة 90 فى المية وبكرة تقول ابن الوطن قالى |
14-01-11, 05:17 PM | #17 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
سبحان الله - انا كنت لسه بافكر فى حاجه زى كده - يعنى انى اقدم بلاغ او شكوى لحاجه تابعه للقوات المسلحه - لأن اغلى حاجه على البنى آدم همه اولاده ومراته و اخواته كمان بنات - واولادهم بنات برضه بس فعلا ما كنتش عارف السكه و ياريت لو حد يكون عارف السكه بالظبط يبلغنى بيها.
والنهارده المحامى قالى بعض تفاصيل المحضر اللى عامله الواد ده - وفعلا التفاصيل كانت اشبه بفيلم هندى فاشل جدا جدا لدرجة انا مصدقتش وكنت حازعل و قلت للمحامى هوه المواضيع دى فيها هزار : المهم : المدمن ده بعد ما الناس فى الشارع ضربوه (علقه جامده) راحح عمل كشف طبى و تقرير و راح طالع على القسم يعمل محضر و قال فى المحضر كان عامل جمعيه مع اخواتى البنات و انه راح يطلب منهم فلوس الجمعيه - فطردوه ومرضيوش يفتحوله و واتخانق معاهم علشان فلوس الجمعيه و بعدين سلطوا اخوهم (اللى هوه انا) وجاب بلطجيه وضربوه و انا جرحته فى رأسه بآله حاده !!!! وبالمناسبه واعوذ بالله من كلمة انا - انا والله مهندس بيقولوا عليه مهندس محترم قوى - اشتغلت فى الامارات والسعوديه فى مكاتب استشاريه امريكيه و فى مشاريع كبيره وحتى فى مصر - رئيس قسم تصميم فى تخصصى فى مكتب استشارى كبير - والمحامى - قالى انه قال لرئيس النيابه - انا مستعد اجيب لحضرتك المهندس : انور - تشوف شكله الاول - وبعدين اذا كنت حضرتك شكيت فى انه ممكن يمسك آله حاده - غير سكينة المطبخ - ابقى حقق فى المحضر ده براحتك - طبعا ناهيك على المستوى العلمى والاجتماعى ليه ولاخواته و المستور بتاع الاخ اللى بيقول ان اخواتى عاملين معاه جمعيه !! ومدلهوش الفلوس !!! على العموم انا شاكر جدا جدا ليكم - انا يمكن بيقت باكتب هنا من باب الفضفضه - مكنتش اتخيل فى يوم من الايام ان ده يحصل - ومش قصدى ان يبقى فيه مجرمين بالشكل ده - لكن ان مصر اللى كنا بنمشى فيها الساعه 2 باليل بكل امان واللى لوكان حصل فيها حاجه زى كده - كان الواد ده مطلعهش عليه صبح - يكون فيها الحال بالشكل ده - وعاوزين السياحه و الاقتصاد يقوموا تانى والناس تحس انها فى بلد - خساره - خساره - خسارة الايام اللى وقفناها على رجلينا فى 30 يونيو و 1 و 2 يوليو علشان الاخوان يمشوا . وياريت محدش يقولى الداخليه ملخومه فى الاخوان - الداخليه ما بتعملش حاجه لا مع الاخوان ولا مع غيرهم - ولاحول ولا قوة الا بالله - ولا حول ولا قوة الا بالله |
14-01-11, 06:51 PM | #18 |
صياد متفاعل
تاريخ التسجيل: Jul 2013
المشاركات: 175
معدل تقييم المستوى: 8 |
رد: سؤال عاجل - للساده الاعضاء
اسمع اللى بقولك علية يا anwar
هو الجيش صدقينى هو اللى هجبلك حقك والحق دلوقتى بلغ عن الواد الكلب دة قبل الاستفتاء عارف لية لان الجيش دلوقتى بيتمنى يعمل اى حاجة للشعب عشان يسترضيهم للنزول للاستفستاء ودية حاجة كويسة جدا جدا دلوقتى الفرصة ذهبية بالنسبالك على اقرب وحدة عسكرية او اى افراد شرطة عسكرية خش عليهم بقلب جامد واحكيلهم الموضوع اية وهما هيتعاملوا معاة وممكن اوى تدخل موضوع الاستفتاء فى الحوار بتاع الواد الوسخ دة يعنى تقول مثلا للجيش ان اخوتك البنات عايزين ينزلوا يقولوا نعم للدستور واهل بيتك بس خايفين من الواد دة هتخلى بتوع الجيش اللى انتا بتبلغهم يتجننوا ويتعصبوا على الواد دة اكتر ههههههههههههههههه |
14-01-11, 10:02 PM | #19 |
تاجر مسجل بالمنتديات
تاريخ التسجيل: Jul 2010
المشاركات: 2,715
معدل تقييم المستوى: 22 |
رد: سؤال عاجل - للساده الاعضاء
...............................................ز
|
14-01-11, 11:02 PM | #20 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
الاخ هيما 777
ما معنى هذا الرد ؟ |
14-01-12, 12:19 AM | #21 |
صياد قديم
تاريخ التسجيل: Jan 2012
المدينه: alex
المشاركات: 2,004
معدل تقييم المستوى: 99 |
رد: سؤال عاجل - للساده الاعضاء
ربنا يعينك يا باشا
نصيحتي ليك : 1- ظبط المخبرين ( كام علبة سجاير مع 20 او 30 جنيه يوفو بالغرض ) اللي عندك في القسم و قولهم علي اللي حصل و هما حيعملوا الواجب و زياده 2 جيبلك طبنجه مفتوحه مع علبة طلق 9 ملي بلي 2 و خليها في البيت احتياطي و لو كسر بابك يبقي الدفاع عن العرض و الشرف مش محتاج ترخيص -- و اوعي تنزل بيها لأي سبب من الاسباب يعني خليها في البيت احتياطي تذكر دائما ان الحامي هو الله بالتوفيق و ربنا يحميك
__________________
كم من عين تبكي عند الوداع و كم من قلب ينجرح عند الفراق و كم من عروس زفت لغير حبيبها و كم من شاب لم يشب و لكن الزمان اجبره علي المشيب |
14-01-12, 01:09 AM | #22 |
تاجر مسجل بالمنتديات
تاريخ التسجيل: Jul 2010
المشاركات: 2,715
معدل تقييم المستوى: 22 |
رد: سؤال عاجل - للساده الاعضاء
|
14-01-12, 01:42 AM | #23 |
مشرف الصيد البرى والبحرى
|
رد: سؤال عاجل - للساده الاعضاء
بص حضرتك اتحرك فكذا اتجاه عشان تزود احتمال ان الواد ده يوقع الاول قوى دفاعات العمارة عندك انك هات كلب حلو زى الجيرمن بياخد على اهل البيت بسرعة وشرس انا عامل كده عندى فالبيت وعندى رونى الناس بتعدى من عند البيت عشان تتفرج عليه مع انى محبوب فمنطقتى واكد على اهل البيت فحكاية فتح باب العمارة حتى لو للدرافلى يبقى ينزلو هما ياخدو الحاجة وفنفس الوقت خلى المحامى يجرى على المحاضر وخلى لو تعرف نسخه منهم معاك بارقمهم ولو تعرف تجيب ارقام محاضر تانيه قديمه للواد او جديده يبقى كويس فنفس الوقت بلغ الجيش وحطلهم كمان ارقام المحاضر وياريت لو تعرف تجيب حاجة زى الاليكتريك او مسدس صوت وتخليه فالبيت من باب الحماية الاخيره ودى حاجات خفيفة فالاستخدام وعاليه فالتاثير وفى هنا تجار كتير محترمين جدا واسعارهم رخيصه وبالاخص لما يعرفوا انك من المنتدى
والنهاية الحامى هو الله يحميك ويحرسك انت واهلك معلومة انا رجل قانون ومومن جدا بان القانون هو الطريق الامثل لاخذ الحق لكن لما تضيع هيبه القانون بسبب المشككين فيه وفنزهته ويسود قانون الغاب يبقى مفيش حل تانى لازم تبقى حاجة من 3 يا ذئب ياكل يا خروف يتاكل يا قنفد لا بياكل ولا بيتاكل وتقبل مرورى اخوك الصغير عمرو
__________________
التعديل الأخير تم بواسطة عمرو الصياد ; 14-01-12 الساعة 01:55 AM |
14-01-12, 03:24 AM | #24 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
متشكر جدا - يا استاذ عمرو على كلامك و نصايحك - ويمكن تستغرب انى كنت بقول نفس الكلام وانا صغير - لكن الواحد لما بيكبر و صحته مبتبقاش زى ما كان فى العشرينات والتلاتينات مع مرض السكر ويبقى اضعف يمكن بيبتدى يخاف
وعلى فكره خوفك وقلقك بيبقى علشان مراتك و اولادك - لان بيبقى فيه ناس محتجاك اكتر بكتيير من الاول - وصدقنى كل اب فينا اليومين الصعب دول اللى الدنيا فيها غاليه ودخلك نقص للنص بقى كونه قادر يشتغل شئ مهم جدا - وخايف ليتعور او يحصله اصابه ويدخل مستشفى ويدفعله 20 او 30 الف و يتعطل عن اكل العيش( ده عملية المراره بالاسعار الاقتصاديه كلفتنى 8000 جنيه) . لكن يظهر ان احنا حنبقى زى زمان فى الصعيد - السلاح اهم حاجه : قبل البيت و مدارس الاولاد و العربيه و حتى نوع ومستوى الحياه اللى انت بتعيشها او اللى بتتمنى وتسعى ان اولادك يعيشوها - يعنى بدل ما تفكر تحوش 40 الف او 50 الف علشان تشترك لااولادك فى نادى احسن او تجدد عربيتك لواحده احسن - حيبقى كل همنا - ان احنا يبقى عندنا سلاح ندافع بيه عن اولادنا وشرفنا !! هوه مش ده معناه ان احنا بنرجع لورا قوى قوى وبسرعه جامده جدا انا عاوز اقول لحضرتك ان اختى اللى عندها البنات (واللى عمرها 45 سنه) بقت بتنام وحاطه سكينه جنبها على الكومودينوا - وبتقولى ان ما بيجلهاش نوم الا عند الفجر !! هوه فيه حياه ممكن تبقى كده. وتستغرب جدا لما تسمع ان فيه قانون للبلطجه وان واحد زى ده بيعمل كده والمنطقه كلها عارفه العيله دى وعارفه مصايبها و وكلهم مستعدين يشهدوا فى النيابه والمحكمه و مصايبهم اترجمت لمحاضر رسميه و معاينات - وفى النهايه - الواد ده النيابه خرجته على زمة القضيه (وان كان للحق المحامى لسه متوليها وابتدى يتابعها) هوه مش الاشكال دى مفروض تفضل على الاقل محبوسه علشان حتى يحسوا ان فيه قانون ؟ |
14-01-12, 03:38 AM | #25 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
النهارده حصلت حاجه غريبه جدا جدا - وانا راكب تاكسى فى شارع الهرم رايح مشوار و تقريبا قدام كايرو مول (يعنى حته عمار وفى نص شارع الهرم) كان فيه طلاب مدرسه اعداديه خارجين من الامتحان (يعنى اعمارهم 12 او 13 تقريبا)
الاولاد وقفوا الشارع و قعدوا يخبطوا على بعض العربيات و كان فيه واحد ست محجبه سايقه عربيه جديده وصغيره (تقريبا كيا الصغيره) - عيل طلع على كبوت العربيه وبعدين طلع على السقف و نزل يرزع على الزجاج الخلفى بايديه - الست ياعينى ما فتحتش بقها لحد ما العربيات اتحركت و مشيت وهيا شكلها بتعيط !! الحقيقه انا جالى الحاله اللى بيسموها وجوم - يعنى خرست و سرحت و معرفتش اتكلم - الحمد لله هما ما قربوش من التاكسى لان السواق كان شكله ضخم و صعيدى - وهمه عارفين ان السواق حيتخانق معاهم لان التاكسى ده اكل عيشه - لكن الست المحترمه الغلبانه - عيطت ومشيت (مع ان السواق قلى لو وقعولها السقف العربيه يخس تمنها 4 او 5 الاف جنيه) معلهش انا طولت - بس يمكن انا بكتب هنا علشان بارتاح انى بافضفض - وشكرا مره تانيه للى بيتكرموا ويدونى رايهم. |
14-01-12, 03:43 AM | #26 |
صياد جديد
تاريخ التسجيل: Jan 2014
المشاركات: 9
معدل تقييم المستوى: 0 |
رد: سؤال عاجل - للساده الاعضاء
بالمناسبه - فيه حد مره نصحنى بمسدس 9 مللى هوا وبلى كبير - بس طبعا اخليه فى البيت علشان يمكن مش قانونى (ولو انى عند الدفاع عن مراتى واولادى وانا فى بيتى مش هيهمنى ايه القانونى وايه اللى مش قانونى) هوه فعلا - ده فعال - يعنى لو حد واحد شاب مدمن - فى حالة هياج - لو اتضرب بالمسدس ده حيعجزه او يوقفه ؟ واذا كان ايوه - فى اماكن موثوق فيها بتبيع المسدس ده وما يكونش مضروب.
|
الكلمات الدلالية (Tags) |
سلاح دفاع عن النفس |
sponsor links |
|
|