اخيرا .. تم طلاء الانتي مونيا وحل المشكله نهائيا والنتيجة قدامكم

[Eng Badran]

السلام عليكم
بقالنا سنين واحنا بنحاول في طلاء الانتيمونيا وجربنا كل حاجة ولكن للاسف كل المحاولات بائت بالفشل بسبب شدة نعومة معدن الانتيمونيا وعدم ثبات اي طلاء عليه .
حاولت محاولات كثيرة
وسألت ناس كتير ولكن الاجابة دائما كانت يا اما سلبية ( وانت عايز تطليه ليه ؟؟ مهوا زي الفل اهو حلو ) ويا اما كانت الاجابة المعتاده هات سبراي دوكو ورش عليه . واما كانت اجابة تحتوي علي فتوي جميلة بصراحة
بصراحة بدات افكر واسال وادور علي النت ولكن دون فائده
واخيرا قلت انا لازم اجرب بنفسي . مش هينفع افضل كده وشكل المسدس كان زي الزفت بصراحة ومكسوف اشيلة اصلا
قلت طالما هدهنه . يبقا لازم يطلع بعدها تحفة وبدأت افكر في طريقة تفنيش من اول وجديد ليه
اول حاجة فكرت فيها الخزنة . الخزنة بتاعتة القاعدة بتاعتها صغيرة . طبعا لاني مهندس وراجل حرفي جبت بلاستك وشكلته بالتسييح لحد وخلقت حته اطول بيها قاعدة الخزنة عشان تبان ان الخزنة كبيرة زي المسدسات الحية

تاني حاجة فكرت فيها النقط الحمرا الموجوده في الامان دي هعملها ازاي ؟ فكرت طبعا في الواني المفضلة في الرسم علي كفرات الموبايل ( من هواياتي الرسم برضو ) اللي هيا المنوكير . ولكن عيب المنوكير انه لو اتدهن علي اللون الاسود هيبقا غامق مش هيبقا باين قوي . ولو خففت الاحمر هيتحول لبمبي . طبعا لقيت الحل اني ادهن بمونكير ابيض الاول وبعدين ادهن الاحمر فوق الابيض

تالت حاجة فكرت فيها النيشان كنت عايز اعمله فسفوري . رحت جايب بنطة 2 ميلي وحفرت في النشان نفسه تلات نقط عشان انزل فيهم المنوكير ويبقا كده النشان زي البريتا بالزبط

رابع حاجة طبعا الطباعة عليها . وده لقيته هيكلفني 200 جنية عشان تطلع زي ما انا عايز فرحت منفضلها خالص وقلت 200 جنية ؟؟ لا في داهية

طبعا بعدها سالت والعضو الفاضل المهندس احمد مصطفي eng.amg اخبرني انه في في جنبه مصنع بيطلي بالاليكترو ستاتيك . وان التكلفة بسيطة . طبعا مصدقتش خبر رحت طالع علي واحد بتاع سلاح عندنا في الزقازيق - بدون ذكر اسماء مع العلم ان مفيش غيرة في الزقازيق - وسالته عندك اليكترو ستاتيك ؟ قالي اه عندي حوض . قلتله طب ما تدهنلي الطبنجة دي ؟ قالي نعم ؟؟ يا بشمهندس دي تسيح لو حطيتها في الفرن ده الفرن 200 درجة . قلتله تسيح ؟ طيب ماشي - وطبعا قلت في سري علي اساس انها حتت زبده ؟ ورحت سايبة وماشي
قررت بقا اني اروح المصنع ده واعملها بنفسي . ولكن انا كل يوم في العاشر . والعاشر مليانة مصانع . وانا معدي رحت معدي علي ورشة صغيرة قلتلهم في حد هنا بيطلي اليكترو ستاتيك ؟ قالي اه علي نفس الصفة بعد محلين
رحتله قالي ينفع طبعا . بكام ؟؟ مكانش راضي ياخد فلوس بصراحة . قالي دي حاجة بسيطة قوي بس فككها وهاتها
طبعا المهندس احمد قالي مشكورا انه لازم تفكك الطبنجة حته حته قبل ما اروح . وطبعا كلامة صح تماما لان السوسته ليها وضع طبيعي برة المسدس .ووضع غير طبيعي جوا المسدس . واللي بيخلي الاجزاء تشتغل بالطريقة اللي احنا شايفنها دي هوا سعي السوسته انها ترجع لوضعها الطبيعي .
المهم رحت لبتاع السلاح اللي في الزقازيق تاني عشان اخليه يفككها لان في سوست هعرف افكها بس مش هعرف اركبها . رحتله قلتله هفك الاجزاء دي كلها وهيبقا في عندي تلات سوست مش هعرف اركبهم
قالي ليه هتفككها ؟ قلتله هديها اليكتروستاتيك . راح شاخط فيا وقايلي يا عم هتسييييح . قلتله مش مشكله انا عايزها تسيح . المهم هتعرف تركبها ؟ قالي اه فككها وهاتها واحنا نجمعهالك . قلتله ماشي هتكلف كام ؟ قالي حاجة بسيطة بس هاتها . قلتله كام بس عشان اعمل حسابي
قالي 200 جنية ان شاء الله .. 100 جنية تركيب و100 تنضيف . قلتله يااااه لا دي بسيطة يا عم انا افتكرتك هتقول الف جنية ولا حاجة . خلاص انا هجيبهالك ان شاء الله ورحت سايبه وماشي
طبعا روحت فككتها مليون حته وشلت كل السوست وانا مركز جدا ولقيت تكنيك المسدس كويس ومش محتاج اي عدد خاصة في التركيب .
ورحت وديته يتطلي . وطبعا طلع تحفة فنية رائعة . ومكلفش حاجة تقريبا
ولكن للاسف . لاني اول مرة اعمل كده فكان لازم يكون في تمن لكده .. فعشان كده لازم ارصد التجربة بتاعتي بالنقط عشان محدش يغلط الغلط اللي انا غلطته
1- يجب تفكيك الطبنجة حته حته .. سوسته سوسته .. زنجة زنجة .. متسيبش حتتين لازمقين في بعض مهما كانوا . لو سبتهم هيلحموا في بعض لان الاليكترو ستاتيك طبقة معدنية
2- لازم تكون خبير في فك السلاح .. متقدمش علي حاجة زي دي الا وانت فعلا راجل حرفي وعندك عده . واوعي تستخدم شواكيش حديد في فك البراشيم او تدق علي الطبنجة نفسها
3- المسمار البرشام الموجود خصوصا في المقبض من ورا مسمارين . يتفكوا ويترموا بعدها .واستبدلهم بمسامير برشام عادية خالص لان اللي فيه مسامير مفرغة وغبية جدا وهتبوظ بعد اول فكة ومتقاوحش معاها خالص
4- طبعا وانت بفتك لازم يكون جنبك علبة محكمة الغلق . كل حته تفكها تحطها في العلبة . وجبنك علبة تانية عشان تحط فيها القطع اللي هتتدهن
5- خليك لطيف ورقيق ورومانسي وانت بفتكها . متتعافاش ابدا علي الانتيمونيا لانها بتتلكك
6- هتجيب الحتتت اللي هتتدهن تحطها في طشت مية دافية وبالصابون السايل او التايد او اي مسحوق وبسلك مواعين ناعم وتغسلها غسلة محترمة وتنشفها عشان كل الزيوت الي فيها تروح
7- التركيب ليه تكنيك خاص جدا . وهو اصعب من الفك . لو مش هتعرف تعمل الحاجة متعملهاش ومتفتيش فيها .. الا في حالة واحدة بس لو لقيت كل اللي حواليك بيفتو .. ساعتها افتي انت احسن
8- الطلاء هو طبقة سميكة من المعدن . فالاجزاء الداخلية اللي بتحصل فيا احتكاك لازم تتسنفر تماما من الطبقة دي قبل ما تتركب . ودي الغلطة اللي انا وقعت فيها وكسرت بسببها الامان اللي ماسك الابرة ودراع نقل الحركة
طبعا بعد كل ده اتركبت وللاسف قلت بعد ما تتزيت واحركها كذا مرة الاجزاء هتاخد وضعها الطبيعي ولكن حصل اللي حصل وقدر الله وما شاء فعل .. لازم يكون في واحد ضحية للتجربة الاولي وانا ضحيت بنفسي من اجل عيون المنتدي لاني استفدت كتير منه ولازم افيد حبايبي فيه
انا سالت علي الاجزاء اللي اتكسرت وشريف 100 قالي ب 300 جنية بس انا مستغليهم قوي . ياريت لو حد عنده الاجزاء دي يقولي او يعرف حد اشتريهم منه باقل من السعر ده يعرفني

ودلوقتي صور الطبنجة قبل الدهان





صورها بعد الدهان








ملـــــحــــــــــــــق 1
يوجد في المرفقات صورة مأخوذه من الاسكانر بوضوح عالي جدا يوضح الحفر علي المعدن ( الحفر اللي راح ) قبل الدهان ظنا مني ان الدهان هيزل في الحفر والكتابة هتبان . متوقعتش وصول جوده الدهان للطبقة السميكة دي .. للناس اللي عايزة تكتب علي السلاح . مع العلم انه يجب الكتابة عليه بعد الدهان . مع ملاحظة ان الكتابة هتبقا لونها فضي بلون الانتي مونيا الاصلي .
ملحــــــــــق 2
نسيت اقول . الدهان ده بسم الله ما شاء الله عليه . بيداري كل عيوب السلاح من تجاريح وخدوش حتي لو كانت عميقة وبيخليها سمووث خالص .. فعلا ده اختراع جامد قوي والدهان ثابت جدا والطبنجة اصلا بتتعالج قبل ما تخش الفرن عشان يثبت عليها وانا تعبت قوي وانا بشيل الدهان من جوا عشان الاجزاء المتحركة ترجع لطبيعتها

[khaledabofaid]

و الله إنك راجل محترم و موش بتبخل على إخواتك بخبراتك و تجاربك ربنا يحميك بجد


موش عارف اقول شكرا

بس شكرا موش كفاية بجد

ربنا يكرمك

[khaledabofaid]

عارف هاقولك

طالما إنت بتفيد إخوانك و الله ربنا هيباركلك و انا تعاملت مع إتنين من أعضاء المنتدى و طلعوا ناس فعلا فوق الوص و متعاونين جدا جدا و أكيد هتلاقى بدل القطع اللى تلفت منك و بسعر كويس مناسب


و ربنا يكرمك يا اخى

[Eng Badran]

المشاركة الأصلية كتبت بواسطة khaledabofaid

و الله إنك راجل محترم و موش بتبخل على إخواتك بخبراتك و تجاربك ربنا يحميك بجد


موش عارف اقول شكرا

بس شكرا موش كفاية بجد

ربنا يكرمك

ههههه الله يكرمك يا رب .. بس لو الشكر مش كفاية ممكن تجيبلي الاجزاء اللي اتكسرت وهكون ليك شاااااكر جدا وهيكون انت بقا اللي فعلا الشكر قليل عليك هههههههه
الله يكرمك يا باشا وانا موتي وسمي اللي يكون عارف حاجة ويكتمها عشان يتاجر بيها او عشان ميكونش حد احسن منه

[سعددد]

ماشاء الله شغل ممتاز والله يكافيك الشر وانشاء الله معوض

[محمد بيه صابر]

الله ينور يا بشمهندس وانا هشوفلك القطع دي عند كذا حد من اصحابي ولو لقيتها هجيبهالك فورا

[Eng Badran]

المشاركة الأصلية كتبت بواسطة محمد بيه صابر

الله ينور يا بشمهندس وانا هشوفلك القطع دي عند كذا حد من اصحابي ولو لقيتها هجيبهالك فورا

ياريت يا اخي الكريم والله فعلا انا مستغليهم جداااااا وبعدين بصراحة مش وقت مصاريف خالص دلوقتي .. لو فعلا لقيتهم بجد هينوبك فيا ثواب كبير قوي
وهدية مني للمنتدي ان شاء الله .. لو حد جابلي القطع . فيديو تفصيلي لفك الطبنجة الايكول حته حته وتركيبها . الناس محترمة ليه منعلمهومش ؟ وعشان الناس المستغلة امثال اللي قالي هركبلك السوستين ب 100 جنية وانضفلك المسدس ب 100 كمان يقعدوا ينشوا ان شاء الله ويحترموا عقلية اللي جاي .
يا راجل حرام عليك 200 جنية في فك الطبنجة وتركيبها ؟ دنا يا راجل بفك الموتور في المصنع وبعملة صيانة وبركبه تاني ويوميتي مهيش ب 200 جنية كلها . وانت عايز تاخد 200 جنية في نص ساعة ؟

[Eng Badran]

وانا مستعد لاي استفسارات ان شاء الله .. ارقام التليفونات والايميلات ظاهرة علي الشاشة ونرحب بحضراتكم

[ĴΘĶЄЯ]

الله يبارك لك يا باشا
وان شاء الله يرجع احسن مسدس فى الدنيا
وربنا يزيدك يارب
تقبل خالص تحياتى

[omarmagic]

بجد ربنا يباركلك على خبرتك وعلى افادتك لاعضاء المنتدى بجد الف شكر ليك
وانشاء الله هدورلك على الاجزاء واديك خبر

[mazenger]

تحياتى اخى الكريم مجهود تحسد عليه ممكن حضرتك تصل بى وتقلى قطع ايه الى اتكسرت لان على مااظن ان القطع دى متوفرة عندى تقبل تحياتى اخى الكريم

[Eng Badran]

المشاركة الأصلية كتبت بواسطة mazenger

تحياتى اخى الكريم مجهود تحسد عليه ممكن حضرتك تصل بى وتقلى قطع ايه الى اتكسرت لان على مااظن ان القطع دى متوفرة عندى تقبل تحياتى اخى الكريم

تم ارسال البيانات في رسالة علي الخاص .. تقبل تحياتي وليا تعامل معاك قريب ان شاء الله عشان الطبة اللي كل الناس بتشكر فيها وعشان اخلاقك اللي كل الناس بتحلف بشرفها

[amin hegazy]

ههههههه خلصنا من المسدس ودخلنا على الطبه
اولا الف شكرا على نقل التجربة وربنا يباركلك فيه يارب
بس حضرتك قولت انك عملت النشينكان بالشنيور ورسمت بمنكير يعنى شلت اللون الاصلي كده
اعتقد كده ممكن تحط اي لون انت عايزة
وان شاء الله أ/ أحمد هيضبطلك الدنيا في موضوع الطبة دي وربنا يباركلك فيه ويكفيك شره

[Eng Badran]

المشاركة الأصلية كتبت بواسطة amin hegazy

ههههههه خلصنا من المسدس ودخلنا على الطبه
اولا الف شكرا على نقل التجربة وربنا يباركلك فيه يارب
بس حضرتك قولت انك عملت النشينكان بالشنيور ورسمت بمنكير يعنى شلت اللون الاصلي كده
اعتقد كده ممكن تحط اي لون انت عايزة
وان شاء الله أ/ أحمد هيضبطلك الدنيا في موضوع الطبة دي وربنا يباركلك فيه ويكفيك شره

اللون الاصلي اتشال من نفسه من قبل ما اشيلة
وانا عملت الحفر في النشان قبل ما ادهنها وكان حفر عميق شوية . وبصراحة بعد الدهان لقيت حفر النشان بالذات اتزبط بطريقة فظيعة مكنتش اتوقع انه يبقا كده . كان في نقر حوالين الحفر وحاجت كده لقيت النقر دي كلها اختفت وبقا الحفر دقيق اكنه معمول بالليزر
وبالنسبة للطبة .. لما اصلحة بقا الاول ابقا اشوف موضوع الطبة

[Compact]

مجهود رائع و موضوع مفيد جدا و يستحق التثبيت فى المنتدى لتعميم الافادة العامة

[michohat]

موضوع رائع ومرجع لكل من يريد اعاده إحياء المسدس مره تانيه بعد ما الدهان يكون اتشال من عليه
تحياتي لك ونرجو متابعتنا بالتحديثات ان وجدت

[عبووود]

مجهود رائع و مفيد جدا

[mr vigo]

بجد انت فنان

وانسان محترم وكلك ذوق

وكفايه انك عاوز تفيد الاعضاء عشان محدش يغلط في حاجه

ربنا حيكرمك بجد

[mohamed salah hassan]

حقيقي حقيقي انت برنس وربنا يباركلك على افادتك للاعضاء وربنا يعوض عليك في الاجزاء اللي اتكسرت وان شاء الله تلاقيهم بارخص من كده

[elsayed elghitany]

انسان معطاء للخير
ربنا يباركل استاذنا

[majo]

الورشة دى فين فى العاشر من رمضان؟
اصل انا من العاشر

[aly406]

فكرة جميلة يا هندسة

[M.SHADY]

تسلم ايدك على المجهود الجبار ده

[esaam]

برافو عليك بجد تجربة ناجحة ممتازة

[MBadr]

ما شاء الله المسدس اصبح شكلة تحفة تسلم ايدك يا باشا وجزاك الله خير على نقل التجربة