طائر موجود وبنسمية الزرزور طلع موش زرزور

[ابو مروان]

السلام عليكم
فى الشرقية عندنا طائر ما عنديش صور لية بس على قد ما اقدر هاوصفة احنا بنسمية الزرزور بس ما طلعش زرزور_هههههه(كبير الحجم اقل من حجم الغراب قليلا_بطنة لونها برتقالى والظهر والراس والاجنحة اسود_بطىء جدا فى الطيران وبيطير منخفض وبيتنقل من شجرة لشجرة_الزيل طويل ومفرود_وشفتة مرة واخد عصفور فى منقارة وطاير بية_بيعمل صوت زى دوران الماكينة مرتفع جدا _ودودودودودودود_الطائر دة يا جماعة اسمة اية ؟ افيدونا
ملحوظة متواجد طول العام فى مصر

[ahmed2101]

أيوة بالظبط هو دة اللى انا كنت بسئل علية انا بردو من الشرقية من منيا القمح وعاوز اعرف اذا كان الطائر دة بيتاكل ولا اية ظروفة

[طلعت بخيت بسكالس]

أن لم أكن مخطئ لأن الموضوع صعب شوية بدون صورة ده وصف يشبه وصف الموك أو غراب الغاب وهحاول أشوف لكم صورة وأرفعها

[هشام سمير]

رجليه طويله شويه

[ابو مروان]

شكرا استاز طلعت على الاهتمام_فعلا هو الطائر دة رجلية طويلة شوية_اعتقد انة ما بيتاكلش لانى شفتة مرة واخد عصفور ميت فى منقارة وطاير بية

[محمدعماد]

انا كمان من منيا القمح
انتى من اى مكان فيها

[gsober]

ده اسمه كناريا البر
او الكناريا البرى
وهو منتشر فى مصر وبيبنى عشه بخلط الطمى ومواد بناء العش بلعابه
ويبنى اعشاشه قرب اسقف البيوت والجبال ممكن تلاقيه على السلم او فى اوضه مهجوره على السطوح

[msa_79]

تقريا انا كمان شفته في الفيوم وضربته بس هو جري واختفي وسط الزرع
هو حجمه تقريبا قد الغراب وبطنه لونها برتقالي وبيجري علي الارض وبيقفز علي الاشجار بخفه من فرع لفرع

[ابو مروان]

كلامك مظبوط يا باشا هو قد الغراب كدة وبيقفز على الاشجار بسرعة وخفة وبطىء فى الطيران بس اسمة اية ما اعرفش_وهو موش الكناريا المصرى دة انا عارفة بيبنى عشة فى ركن بالاخشاب والطين_لا موش دة اللى قصدى علية

[msa_79]

أيه ياجماعة محدش عارف ايه الطائر ده يعني كلنا شفناه وده معناه انه منتشر ومحدش يعرف هو إيه بظبط

[ابو مروان]

لغاية دلوقتى ممكن نسمية الطائر الخفى على وزن اللهو الخفى

[gsober]

منا قولتكوا اسمه هو محدش قرا المشاركه بتاعتى ولا ايه؟

[طلعت بخيت بسكالس]

المشاركة الأصلية كتبت بواسطة ابو مروان

لغاية دلوقتى ممكن نسمية الطائر الخفى على وزن اللهو الخفى

أنا قلت لك من غير صورة يبقي الموضوع صعب شوية ومع ذلك قل لي هو اللي في الصور دي ؟؟

[msa_79]

فعلا هو ده الطائر ياتري اسمه ايه وياريت أي معلومات تانيه عنه

[طلعت بخيت بسكالس]

المشاركة الأصلية كتبت بواسطة msa_79

فعلا هو ده الطائر ياتري اسمه ايه وياريت أي معلومات تانيه عنه

الطائر ده زي ماقلت أسمه الموك أو غراب الغاب وهو من فصيلة الغراب ومنتشر في مصر كلها خاصة الريف وهو طائر منخفض الطيران وسهل الصيد ولا يأكل وألوانه جميلة جدا وكل الصيادين يعرفوه كويس ومحدش بيصطاده إلا هواة التحنيط.

[msa_79]

شكرا جزيلا أستاذ طلعت علي المعلومات القيمة

[ابو مروان]

الف شكر يا استاز طلعت هو فعلا دة الطائر اللى قصدى علية_وماعدش اسمة الزرزور خلاص اسمة_(غراب الغاب)الف شكر يا موسوعة

[طلعت بخيت بسكالس]

المشاركة الأصلية كتبت بواسطة ابو مروان

الف شكر يا استاز طلعت هو فعلا دة الطائر اللى قصدى علية_وماعدش اسمة الزرزور خلاص اسمة_(غراب الغاب)الف شكر يا موسوعة

ربنا ياخليك يابو مروان أخجلت تواضعي وأحنا كلنا بنتعلم من بعض

[Oonyx]

باشمهندس طلعت أنا كنت اتكلمت مع حضرتك قبل كده على الطير ده قبل كده
وهوا بيتاكل وصيده مش سهل قوي كده
وبنسميه بالبلدي فرخة غيط --غير فرخة المية-- ومفيهوش أي مشكلة لانه مالهوش مخلب ولا ناب

[القناص2010]

يا جماعة الطائر دا ما بيتاكلش انا اصطته مرة قبل كدة وعشان اتاكد انة بيتاكل او لا فتحت فتحة بالطول فى جسم الطائر زى التشريح وبحثت عن حوصلة ما لقتش لقيت عندة معدة على طول وعملت شق فى القناصة لقبتها كلها نوع من الحشرات شبة الخنافس لونها اخضر يعنى ما بيتغذاش على الحبوب فهوا حرام والله اعلى واعلم وشكرا

[ابو مروان]

واللة انا شفت الطائر دة اللى اسمة زى ما الاستاز طلعت قال غراب الغاب ماسك فى منقارة عصفووووووووووور وطاير بية وكان الوقت قبل المغرب وكانت اعداد العصافير رهيبة_اكيد هذا الطائر لا يؤكل_واللة اعلم

[ابو مروان]

(الوقواق السنغالى)هو الاسم العلمى لهذا الطائر وصورتة موجودة بالموضوع الموجود فى انواع الطيور فى مصر_واتاكدت انة لا يؤكل

[egyptian coptic]

المشاركة الأصلية كتبت بواسطة ابو مروان

(الوقواق السنغالى)هو الاسم العلمى لهذا الطائر وصورتة موجودة بالموضوع الموجود فى انواع الطيور فى مصر_واتاكدت انة لا يؤكل

بالفعل اخي الصورة الي واضعها استاذ طلعت و المواصفات الي سيادتك حاطتها هي للوقواق السنغالي و هو مقيم في مصر و انواع هذا الوقواق 3 واحد في شمال افريقيا في مصر فقط و واحد في وسط افريقيا و واحد في جنوب افريقيا و احيانا ينسب للدولة المقيم فيها يعني ممكن نقول وقواق مصري لانه مقيم في مصر

و بالطبع ياكل الحشرات و الفقاريات الصغيرة يعني سحلية ,عصفورة, فار, ضفدع و بالطبع ليس له حوصلة وله شبه مخالب و هذا لا يؤكل

و يوجد موضوع مفصل اسمه الوقواق في مصر عن انواع الوقواقيات المتواجدة في مصر في هذا القسم

خالص احترامي و تقديري

[صائد البوم]

الكلام ده سليم دي فرخه الغيط كما نسميها نحن وبصراحه انا معجب بالاهتمام الملحوظ باستفسارات الاعضاء ودا شيء جميل بجد

[صائد البوم]

في عندي استفسار بخصوص طائر شبيه بابو قردان ولاكن بني شويه مش ابيض ورقبته مش طويله ذي ابو قردان اسمه ايه وهل يؤكل ولا لا شكرا للجميع

[ابو مروان]

لا دة موش فرخة الغيط دة غراب الغاب ولا يؤكل_الطائر اللى حضرتك بتشوفة دة ممكن يكون ابو قردان وهو لسة صغير لونة بيكون مائل للبنى ولنا بيكبر بيكون ابيض او نوع طائر تانى بنقول علية بلشون بس دة لا يؤكل وبيكون على جسور الترع والانهار واعتقد انة بياكل اسماك صغيرة

[talha]

معلومات قيمة جدا