رجاء المساعدة والإفادة بالرأى

[HKpro]

السلام عليكم ورحمة الله
أرجو من الاخوة الكرام أفادتى بالرأى حيث أننى أشترى الان بندقية ضغط هواء
ومعروض عليا 3 من اقوى بنادق الرش فى مصر
ديانا 54 , ديانا 46 , و ويبلى موديل باتريوت
بصراحة أنا جربت ال46 وعجبتنى قوتها ولكن لما جربت الويبلى لم أصدق نفسى وحسيت إنى ضربت ببندقية رصاص حتى أن الرشة عملت شياط فى النخلة اللى ضربنا عليها وطبعا كانت الديانا 46 كالكتكوتة جنبها , وهى بندقية كبيرة وثقيلة وجميلة شبيهة جدا بال350 ماجنوم بس أكبر وأعتقد أقوى . أول مرة فى حياتى أضرب ببندقية رش بهذه القوة.
بالنسبة لل54 ماضربتش بيها بس حتى لو هيه أقوى من ال46 فانا لا اعتقد ابدا إنها أقوى من الويبلى دى.
أنا عارف طبعا مميزات ال54 من حيث الشكل وميكانيزم الريكويل , بس القوة بالنسبة للويبلى همممم؟؟؟
بالنسبة للسعر : ال46 الأرخص: 5000 جنيه , تليها ال54 5500 جنيه ثم الويبلى الأغلى 6000 جنيه

أرجو الإفادة ممن عنده فكرة عن الويبلى والمساعدة فى الإختيار لأنى محتار جدا
وشكرا مقدما لكم

[steyr68]

الباتريوت لا غبار عليها وطبعا انصحك بيها هى سعرها جديد عند فتح الله 6000 جنيه بس اهم حاجه لو ناوى تشتريها لازم تجيب معاها الجلبه اتنين على الاقل وكمان سبرينج لانه مش متوفر فى محلات الاسلحه على حد معلوماتى وهو موجود عند فتح الله هى بتتميز بقوتها بالفعل والاسبرينج
الخاص بها هو الاكبر حجما بين بنادق ضغط الهواء انها احدى اقوى بنادق الاسبرينج فى العالم لا ينافسها سوى الجامو هنتر 1250 وديانا 350

[HKpro]

شكرا للرد Styre بس لو الجامو الهنتر 1250 والديانا ال350 بينافسوها فى نفس قوتها , طيب ما تنصحش أشترى إحداهما علما بأنهم أرخص فى السعر.....بس انت متأكد إن الهنتر بقوة الباتريوت لأنها فعلا قاتلة

[steyr68]

البنادق وهى جديدة بتكون قوتهم متقاربه الى حد ما مع زيادة ملحوظة للباتريوت اما بعد الاستخدام
هتلاحظ الفرق الباتريوت هتفضل محتفظه بقوتها لمدة اطول بكتير من اللى بينافسوها نظرا لقوة وسماكة وكبر حجم النابض الخاص بها عيوبها
ودة من اللى اتعاملو معاها بيقولوا احيانا بيحصل انكسار فى اجزاء من البار اكشن بسبب القوه المفرطه للنابض بس ده مش مقياس عموما للبندقيه لانى ممكن يكون سوء استخدام من المتعامل مع السلاح هى فى العموم هتكون فى منافسه مع الديانا 350 اكتر من الجامو هنتر
وانا ممكن ارتبهم من وجهة نظرىفى المقدمه الباتريوت تليها ديانا ماجنوم 350 واخيرا الجامو هنتر

[HKpro]

شكرا يابو حميد على المعلومات القيمة ومعلهش اسمحلى بسؤال أخير واللى حاشترى على أساسه:
إنت تفضل أيهما الباتريوت أو الديانا 54

وشكرا على وقتك

[steyr68]

انت سالتنى لو هختار بين الاتنين انا اكيد هكون زيك محتار بس هيتوقف الاختيار على اساس احتياجى الشخصى لو بالنسبه لى انا هختار الباتريوت . وخصوصا لو بشترى لاول مره
لانى بنادق البريك باريل زى الباتريوت عمليه جدا
ومشاكل تسرب الضغط فيها قليلة ويمكن حلها بسهوله ودى من اهم مميزاتها يعيب نظام البريك باريل انحناء الماسورة فى بعض الاحيان.
اما الفيكسيد باريل زى ديانا 54 من الصعب جدا تاثر الماسورة او تعرضها للانحناء لوجود ماسورة خارجيه تغطى الرئيسيه للحفاظ عليها ولكن المشكلة تعقيد نظام احكام غلق الماسورة دى مشكلة الديانا 54 .علشان ما تحترش توكل على الله واديها باتريوت وخصوصا انها نادره فى مصر
وهى بندقيه عظيمه وانا قلتلك الراى دة من منطلق شخصى وخصوصا انى امتلك الديانا 52 وهى صورة من الديانا 54 فيما عدا نظام ماص الريكويل
اللذى يميز موديل 54 ولكن باقى التصميم والقوة واحد فى الاثنين 1100 قدم ثانيه لعيار 177
و900 لعيار 22 اما الباتريوت 950 لعيار 22وممكن يزيد.

[HKpro]

شكرا جزيلا ليك يا أحمد على النصيحة المخلصة وانت قطعت الشك باليقين عندى
باتريوت وتوكلنا على الله
ألف ألف شكر على مساعدتك الرائعة وخبرتك العظيمة

[galal khalifa]

بس ياسيدي دور علي البندقية السهل في الاستعمل لان البندقيتين اقوي من بعض وهما اشهر بندقيتين بس وانت بتصاد مثلا ضربت حمامة او يمامة وجلت منك وعايز تلحق تضربها تاني اني بندقية اسرع البندقية الكسر هاتاخد منك حوالي من 15 الي 20 ثانية ام البندقية العتلة وخاصة الديانا ممكن تاخد منك 25 ال 30 ثانية دة الموضوع بالبلدي من غير تفكير

[mo7 faqih]

السلام عليكم ورحمة الله
اخوانى الكرام كم سعر الجامو هنتر
وايهما افضل النوركيا جيت والمارفك والا الهنتر 1250

[steyr68]

الجامو هنتر 1250 هى الافضل بالطبع من حيث التصميم والقوه وخاصه ان اسبرينج الهانتر اقوى بمراحل من اسبرينج النوريكا ولكن يبقى شيئ واحد من الممكن ان لا يتحمله البعض
فى الهانتر وهو وزنها الثقيل ويبلغ 4.5 كيلو جرام
كذلك التعمير عمليه تعمير الهانتر اكثر صعوبه بمرتين من النوريكا
الهانتر تحتاج 60 رطل بينما النوريكا مارفيك 22 رطل
والهانتر تعتبر الاثقل فى التعمير بين جميع بنادق الاسبرينج

[galal khalifa]

الاخ العزيز / faqif
صباح الفل وكل سنة وانت طيب طبعا السؤال بتاعك مهم جدا جدا بس انا هقول لك عن تجربة شخصية البندقية الجامو طبعا جامدة جدا وبردة المارفك عن تجربة شخصية بندقية مش ممكن لو استعملتها ها تغيرها الجامو دقة تجميع النشان فيها اعلي من النوركا بس النوركا لو تعودت علي استعملها مش ها تواجة اي مشاكل وبالنسبة للسرعة ها نلاقيهم قريبين من بعض لان الفرق في السرعة عبارة عن امتار ودة مش ها يفرق كتير بالنسبة لانواع الطيور الي في مصر ( يمام - حمام) انا استعملت المارفك و دية خبرتي فيها

[محمدالشكس]

بسم الله ماشاءالله ايه الاراء الجميلة دي الله ينوروكل عام وانتم بخير

[mo7 faqih]

وانت بالف خير وصباحك احلى من الورد شكراً لك اخى galal khalifaوجزاكم الله عنا خيراُ واشكرك على الرد

[mo7 faqih]

steyr68شكرا حبيبى هل يوجد معانى اخر لكلمة اسبرينج
واشكرك

[steyr68]

المقصود ببنادق الاسبرينج هى البنادق التى تعتمد على
النوابض او السوسته فى دفع المقذوف

[sokar_jax]

الويبلى دية مش صناعة تركى بردو معلشى معتقدش انها احسن من الديانا

انا ارجح الويبلى اكتر من الديانا ماجنوم 350 لأ بابا ضرب بيها قبل كدة يمامة من فوق عمود نزلت نصين وانا ارجح الويبلى
لأنها بندقية جامدة جدااااااااااااااااا

[galal khalifa]

الاخ العزيز سكر
علي فكرة لو راجعت مشاركاتي هاتلاقي ان كاتب عن الباترويت انها تركي من فترة وجاين شرحها بالكامل وللمعلومة ان تركيا متطورة في انتاج جميع انواع الاسلحة بدرجة مخيفة ومتطورة جدا وعندهم بندقية اسرع من الديانا علي مااعتقد هتسن
وسرعتها 305 متر في الثانية وفي اخ من سوريا مشترك
معتنا في المنتدي ومقيم في تركيا جربها وقال انها رهيبة