هاى بور ( طب اشرحلى)

[lilkapo]

الواحد من كتر مسمع الكلمة دى وبيسال نفسو سؤال واحد
هوا انا كنت بصطاد بالرمسيس زمان ازاى؟؟؟؟؟؟؟؟؟؟؟؟
فى حاجة نفسى اتكلم معاكم فيها
الوقت لو على افتراض مثلا ان الكرال 240 متر / الثانية اقل او اكتر مش موضوعنا
بس دة لية معنى واحد بالنسبالى وهو ان سرعة الرشاية بتوصل 240 متر فى الثانية صح كدة ولا كلامى غلط؟
طب يبقى معنى كلامى برضو ان الطلقة فى ثانية واحدة هتوصل لحد 240 متر مش دة برضو منطقى؟؟؟؟؟؟
طيب لما الرشاية بتوصل فى ثانية واحدة ل 240 متر يبقى لو فى طريدة على بعد 240 متر الرشاية خلال ثانية هتوصلها الموضوع دة مش غريب حبتين ؟؟؟؟؟؟؟؟؟؟
طب الرشاية بعد الثانية الاولى مصيرها اية ؟؟؟؟؟؟ مهو مش معقولة حتى ان البندقية بتضرب بيها الرشاية وبعد ثانية واحدة تقع ولا اية؟على الاقل كدة وعلى اقل تقدير هتقعد فى الجو 5 الى 10 ثوانى
خلينا نقول انها هتقعد فى الجو بس 5 ثوانى وتقع ودة طبعا مش صح وخلال ال5 ثوانى هتفقد سرعتها وتبقى 200 متر بس فى الثانية
يبقى بحسبة بسيطة وعلى قد فهمى الغريب 200 x ال5 ثوانى = 1000 متر
طب مدة يخلينى برضو نقول ان لو الرشاية اصابت هدف لحد 300 او 400 متر هتبقى برضو بقوتها؟؟؟؟؟؟؟؟؟
لا انا تقريب بخرف وحسباتى غلط واكيد هلاقى الى يفهم ويركز فى كلامى ويفهمنى بمنطق ان كلامى غلط
بس اتمنى الاول بس تركز اوووووووووووى فى الكلام وتفكر فية بالطريقة الى شرحتها
وجاوبنى بدون نقل عن كلام اى شخص
يا رب تكون رسالتى وفكرتى وصلت وانا مقصدش الكرال لا انا بعطى مثال بس
واشكر الجميع على رحب صدرهم للاستفسار الغريب دة
اخوكم
ابو ابراهيم

[mr-a]

السلام عليكم ورحمة الله وبركاته

الاخ الفاضل
تحيه لحضرتك اولا ويارب تكون بخير

لما يكون البندقية مداها مثلا 240 متر زى الكرال دا مش معناه ان الطلقه بتفضل بنفس القوة لغاية 240 متر

ولكن في مدي مؤثر مثلا لدرجه معينة دا بيتوقف على نوع الرش الى بتضرب بيه مثلا

ولكن المقصود ب 240 متر انها بتوصل الى كدا لكن مش بالضرورة انها لما توصل لغاية 240 متر تكون قاتلة

اكيد طبعا الطلقة بتفقد قوتها بعد مدي معين

لكن الفايدة فى الهاى بور ايه ؟؟؟؟

يعني مثلا لما تكون بتصطاد حاجه كبيرة مش زى لما تكون بتصطاد عصفورة مثلا

يعني مثلا لو انت بتصطاد بطة ببندقة هاى بور مش زى لما تكون بتصطادها ببندقية رمسيس مثلا او صيني

حاول تجرب انت بنفسك وانت تعرف

يعني مثلا مثال بسيط

هات مثلا قالب طوب وحطه كهدف وهات بندقية صيني او رمسيس مثلا واضرب بيها وشوف مدى التأثير هيكون عامل ازاى

وهات بندقية هاى بور زي الكرال مثلا واضرب بيها وشوف مدى التأثير

ساعتها هتعرف يعني ايه هاى بور ويعني ايه استندر

يارب اكون قربت لك الموضوع شوية

[hesham[MaFya]a]

السلام عليكم و رحمة الله...

بدايةً اشكر اخى العزيز Mr-a على شرحه الوافى ..


ثانياً ليس بمقتضى ان سرعة البندقية 240 متر فى الثانية فالرشة توصل لتلك المسافة..

اسمحلى اشرح لسيادتك و هذا الكلام عرفته من خبراء فى هذا المجال و ادعو الله ان يكون كلامى صحيح,

معنى ان السرعة 240 م/ث اى ان سرعة خروج الهواء لدفع الرشة 240 م/ث و ليس سرعة الرشة كذلك.

و هكذا فى جهاز مثل الكومبروسير بيكون موجود فيه السرعة انها سرعه الهواء ... فى الثانية.

ارجو ان تكون وضحت الفكرة...تحياتى.

[SALE7]

240/sec دى ال untial velocity السرعة اللى بتخرج بيها الرشاية
ذى مابتشوط الكورة بسرعة 30م/ث بالرغم من كدة بعد 30 متر ممكن الكورة تقف

[lilkapo]

والله يا جماعة انا سعيد جدا بمرورك والاهتمام بالرد عليا
بس محدش فهم سؤالى صح تقريبا
اتمنى تقرو الموضوع تانى وتحاولو تفهمو دماغى
ولو على ردى انا فاهم ان السرعة اول متطلع الرشة من البندقية 240 تمام
والى اعرفو ان كلمة 240 م / ث بتقول ان الطلقة توصل لحد 240 متر فى ثانية واحدة
هدى انا مثال
وانا سايق العربية مثال لو لقيت عداد السرعة 160 / الساعة
يبقى انا خلال ساعة هقطع 160 كيلو ولا رايكو اية
ولو قولنا زى مبتقولو الطلقة بتبقى اضعف وبتقل مع المسافة وهنقول مثلا هتوصل 150 متر بس او 120 او 100
يبقى 100 x ال5 ثوانى يبقى 500 متر بلاش الف صح ولا برضو غلط
يعنى على اقل تقدير او متوسط تقدير يبقى تصيب على بعد 200 متر

[فوزى السيد]

يا سيدى الفاضل مفيش شركة انتجت بنادق ضغط هواء وحددت لنا المدى الكلى للرش هما بس حددو السرعة معنى السرعة هو سرعة الرش عند خروجة من فوهة الماسورة اى اقصى سرعة هى لحظة خروج المقذوف من طرف الماسورة كلما بعدت امتار بسيطة قلت السرعة يعنى مثلا على بعد 10 متر هتكون السرعة قلت وعلى بعد 20 تقل اكثر فنقول مثلا ان على بعد 100 هتكون السرعة اقل من نصف السرعة الفعلية وهنا تتدخل عوامل الطبيعة فى الحسابات مثل الجاذبية الارضية والرياح معنى ذلك ان بعد مسافة 100 تكون قد فقدت قوتها الفعالة وايضا فقدت المسار الصيحيح لها اما سرعة السيارة فى الساعة انت تتحكم بها من خلال الاشباع بالوقود فتظل الحركة على قوتها او تزداد كلما زاد الدوس على الوقود اما هنا الوضع مختلف فالحركة معتمدة على الدفع مرة واحدة بمثال بسيط انت لو بتحدف توبة لو جات فى حد على بعد مترين هتعورة اما لو على بعد 15 متر مثلا هتقع قدامة من غير ما تصيبة كذلك الوضع فى بنادق ضغط الهواء انما يوجد هنا مقياس اخر وهو البعد المؤثر هذا هو المقياس للبنادق وليس السرعة والبعد لة علاقة اكيدة بالسرعة فنقول مثلا ان بندقية متوسطة السرعة 170 متر البعد المؤثر لها هو من لاقصى حد 40 متر اذا مع بندقية عالية السرعة فلتكون 280 فيكون هنا البعد المؤثر هو الضعف اى 80 نفهم من هذا البعد ان بعدة تكون القذيفة فقدت قوتها وتاثيرها فى اقل من الثانية يعنى هنا مقياسنا الامتار وليست الثوانى والا اذا كانت تستمر على قوتها لفترة 5 او 10 ثوانى مثلا لكانت حلت محل الاسلحة النارية واستعملت فى الحروب هذا والله اعلم ولك تحياتى

[lilkapo]

اشكر الافادة جزاك الله خير

و وفعلا ونعم الاخوة

[blow c06]

اخى العزيز
انت الى مدايقك فى حسبتك الوقت
الرشه مش بتكمل ثانيه فى الهواء و بتكون وقعت لان الرشه الى بتخرج بسرعه 240 مش بتكمل 240 متر اصلا و هى فعلا بتقع قبل ثانيه واحده بعد الانطلاق..
قوانين المقذوفات احنا درسناها و ممكن بوزن الرشه و سرعة انطلاقها احسبلك بالظبط هتقع على بعد كام متر و بعد وقت اد ايه.. طبعا السرعه بتختلف بوزن الرشه و مسافة وقوعها هتفرق بشكل الرشه كمان عشان مقاومة الهواء.. على فكره ثانيه ده وقت كتير مش قليل.. يعنى انت لو ضربت يمامه قدامك بتلاقى اليمامه اتصابت قبل مانت تنزل البندقيه من على كتفك و دى زمن اقل من ثانيه.. طب انت عارف ايه الفرق بين بنادق ضغط الهواء و النارى و تاثير رد الفعل؟؟؟
بنادق ضغط الهواء بتعمل رد فعل على كتفك قبل ما الرشه تخرج من الماسوره.. يعنى لو اتحركت مع رد الفعل يمين او شمال الرشه هتيجى فى مكان تانى خالص,, النارى عشان الطلقه اقوى و اسرع فالمقذوف بيخرج قبل مرد الفعل ياثر فى كتفك و بالتالى الحركه نتيجة رد الفعل مش بتاثر فى مسار المقذوف ( النيشان )
الرمسيس اخرها 20 او 30 متر و ساعات بتموت من غير متعور عشان ضعيفه و كده يبقى اكل الصيد ده حرام لانه مجابش دم الا لو لحقته عايش و زكيته.. الهاى باور بتموت من على بعد 60 و 70 متر..
انا كسرت ازازة بيبسى على بعد حوالى 60 متر.. الرمسيس مش بتكسرها من على بعد 15 متر
الرمسيس لا يمكن تموت بطه حتى لو جت فى مكان القلب من على بعد 20 متر مثلا... انما الهاى بور تموت بطه و تعلب كمان

[dr mohamed kamal]

أخوانى الاعزاء موضوع السرعة للرش تحسب عندخروج الرشة من فوهة الماسورة يعنى 240 م/ث دى عند فوهة الماسورة ثم تتناقص تدريجيا يعنى على بعد 100 م من فوهة الماسورة ستكون السرعة 120 م/ث و هكذا تتناقص السرعة تدريجيا بفعل الاحتكاك بالهواء يعنى ممكن الرشة تصل إلى سرعة صفر م/ث عند مسافة 250 م وممكن تصل هذه المسافة فى 3 ثوانى ,و بمعنى أخر لوحضرتك راكب سيارتك وماشى على سرعة 120 كم/س ثم عندهذه السرعة مورت فتيس السيارة وتركتها حتى تقف بفعل مقاومة الهواء و الاحتكاك بالارض بدون إستخدام الفرامل سوف تقف السيارة على بعد400 متر من مكان ما حضرتك مورت الفتيس ,إذا السرعة تتناقص تدريجيا حتى تصل إلى الصفر عند لحظة الوقوف ومن هنا نستنتج أن هناك عجلة تناقصية تحسب بالمعادلة الاتية العجلة= 2 مضروبة فى المسافة المقطوعة مقسومة على مربع الزمن وبمعرفة العجلة يمكن حساب السرعة فى أى لحظة بشرط تكون الحركة فى خط مستقيم ,مثال توضيحى بفرض أن الرشة ستقطع مسافة 360 م ثم تسكن فى 3 ثوانى وسرعة الانطلاق 240 م/ث إذا العجلة = 2ف÷ن2 = 2×360 ÷9 = 80م/ث2 من هنا يمكن حساب السرعة بعد ثانية واحدة,,,,, بطرح العجلة من السرعة 240 نحصل على السرعة بعد ثانية واحدة وهى 240- 80 =160 م/ث وهكذا بعد 2 ثانية ستكون160-80 =80م/ث و هكذا , وشكرا للجميع

[lilkapo]

اخى العزيز
انت الى مدايقك فى حسبتك الوقت
الرشه مش بتكمل ثانيه فى الهواء و بتكون وقعت لان الرشه الى بتخرج بسرعه 240 مش بتكمل 240 متر اصلا و هى فعلا بتقع قبل ثانيه واحده بعد الانطلاق..
قوانين المقذوفات احنا درسناها و ممكن بوزن الرشه و سرعة انطلاقها احسبلك بالظبط هتقع على بعد كام متر و بعد وقت اد ايه.. طبعا السرعه بتختلف بوزن الرشه و مسافة وقوعها هتفرق بشكل الرشه كمان عشان مقاومة الهواء.. على فكره ثانيه ده وقت كتير مش قليل.. يعنى انت لو ضربت يمامه قدامك بتلاقى اليمامه اتصابت قبل مانت تنزل البندقيه من على كتفك و دى زمن اقل من ثانيه.. طب انت عارف ايه الفرق بين بنادق ضغط الهواء و النارى و تاثير رد الفعل؟؟؟
بنادق ضغط الهواء بتعمل رد فعل على كتفك قبل ما الرشه تخرج من الماسوره.. يعنى لو اتحركت مع رد الفعل يمين او شمال الرشه هتيجى فى مكان تانى خالص,, النارى عشان الطلقه اقوى و اسرع فالمقذوف بيخرج قبل مرد الفعل ياثر فى كتفك و بالتالى الحركه نتيجة رد الفعل مش بتاثر فى مسار المقذوف ( النيشان )
الرمسيس اخرها 20 او 30 متر و ساعات بتموت من غير متعور عشان ضعيفه و كده يبقى اكل الصيد ده حرام لانه مجابش دم الا لو لحقته عايش و زكيته.. الهاى باور بتموت من على بعد 60 و 70 متر..
انا كسرت ازازة بيبسى على بعد حوالى 60 متر.. الرمسيس مش بتكسرها من على بعد 15 متر
الرمسيس لا يمكن تموت بطه حتى لو جت فى مكان القلب من على بعد 20 متر مثلا... انما الهاى بور تموت بطه و تعلب كمان

جزاك الله خير شرح وافى بجد وانتا لمست النقطة الى انا بتكلم عليا
بارك الله لك اخى الغالى

[omarara]

حضرتك معلش مقدرتش اقرأ كل التعليقات ولكن فيه علوم اعتقد بالعربى اسمه المقذوفات او شئ من هذا القبيل
او Projectile بما إنى كنت دارسه بالانجليزى
اولاً : سرعة خروج الرشه من الفوهه بيكون 240 متر فى الثانيه ديه سرعة لا علاقة لها بالمدى لأن فيه عدة متغيرات تؤثر فى السرعة والمسافه ويكفى العجلة وفى الحالة ديه عجلة تناقصية وعجلة الجاذبية الارضيه واتجاه الريح والاهم زاوية خروج الرشه وفيه بقى الرطويه وحجات كتيير كده المهم فى الموضوع ان الرشه ممكن فعلياً توصل لمسافة الكيلومتر طبعاً ده نظرياً Theoretical ولكن ده يعتمد على المتغيرات اللى كاتبتها فوق معلش نسيت حاجة مهمه هو وزن المقذوف وشكل السطح عشان قوة الاحتكاك