عملت جراب للبندقية بنفسي+الصور

[TELEBK]

السلام عليكم ورحمة الله وبركاته
الحمد لله إشتريت بندقية نمره 2 ، بس قابلتني مشكلة وهيه إنها من غير جراب بالكرتونه ، وكان صعب التنقل بيها لوحدها علشان ماتتبهدلش ، رحت عند أبو ضيف وسألت علي الجراب ، قالولي المحل إتعرض للسرقة وكل حاجة إتسرقت فيه ، وجابت ليه جراب قماش ووتر بروف أكنه طالع من تحت بلدوزر ومقطع ومبهدل ، وقالت ليه 100 جنيه وهوه مايستاهلش 30 جنيه علي بعض ، المهم إستخرت ربنا وقولت أعمل جراب جلد للبندقية ، وخصوصا إني الحمد لله بعرف أعمل الحاجات ديه ومدرب عليه نتيجة دراستي في الكلية وحبيت أنقل ليكم خطوات تصنيعة والخامات إللي إتصنع منها وأماكنها وأسعارها .
ملحوظة : آسف لعدم إدراج صور مراحل التصنيع لعدم توافر الكاميرا معي في هذا الوقت ، وقمت بإدراج صور الجراب بعد الإنتهاء منه فقط .
أولا : الأدوات :
1 - نصف متر جلد سكاي " اللون المفضل لديك " - السعر 11 جنيه - من عند بتوع الجلود في العتبه أو من عند أي حد بيبع جلد لكسوة العربيات وفرشها .
2- نصف متر جلد سكاي " لون آخر " - السعر 11 جنيه .
3 - فرخ سفنج للتبطين تخانة 0.5 سم " نصف سم " - السعر 6 جنيه - من عند بتاع الجلد .
4 - 5 متر حبل لعمل كردون أو حرف حول الجراب من الخارج - السعر 2 جنيه _ من عند بتاع الجلد .
5 - 2 علبه غراء سريع " كله " ربع كيلو - السعر 3 جنيه للواحدة - 6 جنيه لعدد 2 - من عند بتاع الجلد .
6 -2 متر سوسته عظم من عند العقاد + الجرارات بتاعتها - 8 جنيه .
7 - 5 متر شريط يد " حزام " أسود أو اللون المتوافر من عند العقاد - السعر 10 جنيه .
8 - بطانه قماش أو قطيفة - وديه ممكن تكون فضلة موجوده في أي بيت وفي حالة عدم وجودها نشتريها نصف متر من عند بتاع القماش وهيه مش غالية .
9 - أبلاكاش 4 مم لتقويه ظهر الجراب - من 8:10 جنيه - من عند أي نجار .
ثانيا : الخطوات :
1- تجيب البندقية وتحطها في الجلد الأساسي بتاعك وترسم شكلها وتزود عليه مسافة 10 سم داير مايدور " لزوم التني والخياطة " وتقصها .
2- تحيب الحبل وتحطه في الجلد اللون التاني وتقص شريط عرضة 5 سم وتلصق حروفه بالغراء وتنتظر 10 دقائق وتلصقهم مع بعض يديلك شكل الحزام .
3 - تلصق الحزام الجلد علي حرف الجراب الأساسي بالغراء السريع ثم تقوم بتبطين الجراب من الداخل بالأسفنج .
4 - ترسم وتقطع أشكال الجيوب إللي حضرتك محتاجها في الجراب من الخارج وتزود عليها 5 سم داير مايدور وبتطنها بالأسفنج وتغطيها بالقماش أو الكسوة الموجودة .
5 - تقطع الأبلاكاج علي أد نصف الجراب " الظهر " وده ممكن يبقي عند النجار علي طول وإنت بتشتري الأبلاكاج يقطعهولك ، وممكن ترسم الشكل إللي إنت عايز تقطعة علي قطعة ورقة جرنال وتديها له يقطع عليها .
ملحوظة : ممكن تعمل من نوع الجلد التاني إللي إتعمل منه الحزام تقويات في الجراب الأساسي من الداخل عند أماكن تثبت الأحزمة واليدات وما تراه مناسبا في الجراب الخاص بك .
**** كده وصلنا إلي إكتمال مراحل التجهيز وبكده نوصل إلي مرحلة التجميع .
ثالثا : التقفيل :
وده بيكون عند إي واحد بتاع تصليح شنط ومش جرمجي لازم بتاع شنط ، وبتسايسة وتمشي معاه واحدة واحده وتفهمة المطلوب بالضبط وتاخد معاك البندقية علشان كل شوية تقيس ويقيس عليها أثناء الخياطة ، وبعد الإنتهاء من الخياطة يقفلهولك ببرشام زياده في المتانة وتدي شكل جميل وأخد مني مقابل التقفيل والخطافات للحزام الخلفي 40 جنية .
***** تقريبا التكلفة الإجمالية بتكون في حوالي 100 جنيه ، يعني هيه غالية شوية بس بنعمل جراب علي أد البندقية بالظبط ، وبكون جلد وحاجة محترمة ولا جشع التجار وغلاستهم .
وبالتوفيق إن شاء الله
د / خالد
ودلوقتي مع الصور