[Khaled777]

شكرا على الموضوع الرائع ده. فعلا الأسلوب جميل وكل الخطوات و التفاصيل واضحة جدا وبالصور.
أنا عندي مشكلة وياريت تقدر تساعدني في حلها!!!!!!
البندقية كانت ضعيفة شوية فقلت أفكها و أعمل لها صيانة زى ما وضحت في موضوعك الجميل دة وكمان أشيك على السوستة وجلدة البستم.
فعلا وجدت الجلدة بها تأكل بسيط وكانت متيبسة (ناشفة) شوية وحاسس أنها ممكن تتفرول بسهولة فقلت يبقى لازم أغيرها علشان البندقية تبقى كويسة.
فعلا اشتريت جلدة من محل بالقاهرة الكل بيشكر في صاحبة وفي معاملتة وامانتة. الجلدة كانت شكلها مختلف عن اللي كانت في البندقية، كانت بلاستيك ناشف ولونها أبيض لكن القديمة كانت لونها بني ويبدو انها لما كانت جديدة كانت مرنه (شبه الاستيكة او المطاط). المهم ان الراجل كان ركب لي الجلدة على وش البستم اللي كنت اخذتة معايا علشان يتاكد انها نفس الجلدة المطلوبة للبندقية. ولما ركب الجلدة حسيت انها اكبر من القديمة شوية ولكن قلت يمكن علشان لسه جديدة.
المهم لما جيت اجمع البندقية تاني بعد التشحيم وجدت ان الجلدة مش راضية تدخل جسم البندقية. ضغطت عليها شوية فدخلت لكن محشورة جامد وشوية تدخل وشوية تقف وفي الأخر (عند الجزء الاخير المقفول في جسم البندقية اللي بينضغط فية الهوا) كانت اسهل شوية بس الحركة تعتبر لسة تقيلة. ركبت ذراع التعمير وفضلت احرك البستم في الجزء الأخير رايح جاى فبقت اسهل كمان شوية. فقلت اسيبها فترة لغاية ما تطبع على مكانها داخل البندقية فكملت تقفيل البندقية وتركتها لمدة يوم. بعد كدة عمرتها بالراحة وفكيت التعمير كذا مرة وبعدين جربت بيها رشتين تلاتة ولكن حاسس انها متحسنتش كثير. فقلت اختبر كده تسريب الهوا فلاقيت فية تسريب من عند جلدة البستم فحسيت بيأس وحيرة شديدة. فكيت البندقية تاني وطلعت البستم ومسحت الشحم من علي الجلدة كويس فلاقيت اثار خدوش على طرف الجلدة من فوق. ركبت البندقية تاني وسبتها ومن ساعتها مش عارف اعمل اية!!!!!
هل الجلدة كانت كبيرة ومتنفعش للبندقية ولا انا اتعاملت معاها جامد شويه فباظت ولا نوع الجلدة البلاستيك ده مش اصلي ووحش ولا في مشكلة في جسم البندقية من الداخل...... مش عارف!!!!!! ياريت لو عندك حل أو رأي قول لي علية.
أسف للتطويل وأولا وأخيرا شكرا لموضوعك الجميل