[المايستروو]

[size="6"]أبسط القواعد المتبعه عند الصيد

1- لازم نعرف إزاى نمسك البندقيه صح ودى خطوه بيهملها كتير منا :-
أ‌- الأول لازم نحدد نوع الشخص هل هو أعسر ولا أيمن (يعنى شطلاوى ولا عادى) لو كان عادى يبقى يمسك البندقيه من الأمام بإيده الشمال ومن الخلف بإيده اليمين وينشن بعينه اليمين.ولو كان شطلاوى زيي كده يبقى العكس فكل حاجه. بس أنا عاوز أسأل عن حاجه محيرانى هو ماينفعش يبقى فيه من الساند اللى على الدبشك يمين علشان الشطلاويه اللى زيي؟
ب‌- تانى حاجه لازم قاعدة الدبشك تستقر بين الدراع والصدر ويكون الدبشك عامله مع الجسم زاويه 90ْ درجه .
2- أما تنشن لازم يبقى ذهنك مركز على الهدف بس وعينك تبقى عليه (يعنى عينك تبقى على النشان الخلفى على سن نملة الدبانه ثم الهدف )
3- لازم نتأكد إن مفيش حد فى مرمى الهدف وتحاول تصداد فى أماكن مافيهاش ناس كتير.
4- بعد كل رشه تضربها لازم تتأكد إن إنت قفلت الأمان كويس وتكون إيدك بعيده عن الزناد علشان فى ناس أما بتيجى تعمر الرشه إللى بعدها بتضرب والبندقيه مكسوره(وهى فى وضع التعمير) وده خطر جداً من نحيتين على إللى ماسك البندقيه (ممكن تعمل رد فعل قوى وترد فى وشه أو لاقدر الله تتسيب من إيديه فى الهوا وتعوره) من نحيه تانيه على البندقيه (رد الفعل القوى هيمتصه الدبشك وغالبا هينكسر مكان المسك لليد الخلفيه وممكن والماسوره أو العتله وهى بترتد بسرعه تنخلع)
5- بعد كده لازم تنشن على مكان قاتل فى الطير عشان ماتعذبوش زى الصدر أو الرأس أو القلب.
6- وطبعاً إختيارك لنوعية الرش ليها دور كبير فمثلاً فيه أنواع لو وصلت للهدف مابتموتهوش زى (الانواع إللى أول مره تسمع عنها والرخيصه <زى برص مان> وهى مره واحده اللى ضربت بيه وقلت توبه من دى النوبه كان بيتحشر فى الماسوره ومابيطلعش إلا بعد أما تسخن الماسوره على النار وتسيحه لأنه قصديربس إوعى تعمل كده أنا كنت مستغنى عن البندقيه وبرده فيه عين شمس والأنواع السَكَه دى)وكمان بتبوظ الماسوره والجلبه وفى أنواع ساعات ساعات طبعاً مش أغنية صباح بس بحالات زى المارسمان وعلى إيه وجع الدماغ خليك في المضمون.طبعاً عرفت أنا قصدى إيه الألمانى طبعاً(جامو-ديانا....الخ) وفى نوعية رش بلاستيك دى بتزود السرعه يعنى ممكن تصطاد بيها أنواع صيد أكبر بس فى شك إنها مضره للبندقيه وكمان على الصحه فالأحسن نخلينا فى الألمانى لحد مايعملولنا رش مصرى زى الناس.
7- فيه بقى حاجه إضافيه لو إنت عاوز تصطاد طيور من إللى بتنزل على الأرض الأول التمويه للبندقيه ومش لازم تشترى بندقيه لونها مموه لأن فيه شرايط لاصقه بتلصقها على البندقيه باللون إللى إنت عاوزه طبعاً مش بمزاجك يعنى مش علشان إنت بتحب اللون الفسفورى تقوم ضارب وش فسفور كده مش هتلاقى طيور علشان تصطادها أصلاً ولو للسنه الجايه لأ بنختارها حسب لون المنطقه اللى أنت هتصطاد فيها وممكن نستغنى عن الشرايط دى وهو يعنى إحنا داخلين حرب ! بس أعتقد هاتلاقي الشرايط دى فى محلات الأسلحه وتانى حاجه الفخ يعنى الطيور البلاستيك إللى بتحطها فى مكان معين فتقوم الطيور تنزل عليها وطبعاً الكلام ده وإنت مستخبى فى الدره وأول ماينزلوا تشوف شغلك ودى برده هاتلاقيها فى محلات الأسلحه.
اعذرونى إذا كنت قصرت لأن دى أول مشاركه ليَّه فى المنتدى وأتمنى تكون عجبتكم...........ومستنى الرد...........
[/size]