زملائي الأعزاء في المنتدي
بعد السلام عليكم
الموضوع بإختصار إن في عدد كبير جدا من محلات بيع الحيوانات الأليفة
بدأت تبيع بعض الكلاب علي إنها كلاب سايبيريان هاسكي
و هو نوع مشهور جدا من الكلاب و نادر الوجود في دول مناخها زي مناخ مصر
لأنه بيعيش في المناطق الباردة فقط
لكن بعض التجار إستغلوا رغبة الكثيرين من الشباب في المنظره الفارغه و التفاهة
و عملوا عملة مهببة
بيعرضوا حاليا كلاب للبيع علي إنها هاسكي
لكن الحقيقة إنها كلاب مهجنة بين الجرمان شيبارد و الذئاب الجبلي المصرية
التهجين لم يتم طبيعي لكنه إتعمل بحقن في الرحم
و النتيجة كانت كلب يشبه شوية الهاسكي
لكن سلوكيات و صوت الذئب
و النتيجة الأسوأ إن صديق عزيز مقرب مني جدا
جاره شاب متهور إشتري واحد
و كانت النتيجة إنه عض إبن صديقي عضة بشعة جدا
تسببت في خدش عضم الساق و تهتك في غضروف الركبة
و بعد خناقات بسبب الكلب
عرضوه علي دكتور بيطري في المعادي
و الدكتور هو إللي إكتشف المصيبة دي و فضل يصوت ساعة أول ما شافه
و كان عايز يبلغ الشرطة
أنا شفت الكائن ده مرتين و بالفعل هو يستحيل يكون كلب
لا صوت و لا شكل و لا سلوكيات
برجاء الحذر الشديد جدا جدا جدا
الهاسكي لا يعيش في المناطق الحارة
و لو عاش بيكون عمره قصير جدا
النصب و قلة الضمير وصل لمرحلة العبث في ميزان وضعه الخالق عز و جل
و للعلم الكائن ده منتشر جدا في محلات كتير أوي في مناطق راقية كتير في القاهرة
زي مدينة نصر و المعادي
ربنا يرحمنا جميعا
شكرا لسعة صدر حضراتكم