رد: ҈ண ண҈ خواطــــــــــــــر يوميــــــــــــــــــــــة ணॐ
إعرف عدوك و علِّم عليــــــه
مبدئياً اعترف اني كنت غلطان لما دخلت في مباراة السلفيين ضد الليبرالين ، الاخوان ولا البرادعي ، صبحي صالح كخة ولا ساويريس مش حقبل اسفه
قد إيه قدرتنا هائلة على الشيطنة والتفرقة . الإعلام بيزيط وإحنا وراه ،، مع إن الإعلام ده مملوك لأصحاب المصالح ، اللى طول عمرهم متمرمغين تحت رجلين السلطة و ناسها ،، هى الثورة دي قامت ليه؟ هو إيه اللي كان مزعل ملايين الناس دي كلها؟
مصر ولا كانت إسلامية ولا مدنية ولا أي حاجة أصلاً. مصر كانت خرابة ، غابة ، منهوبة سنين طويلة و أهالينا مكانوش عارفين يربونا على إيه؟ امشي عدل يحتار عدوك فيك ؟ ... غلط : في مصر امشي عدل تلبس ف الحيط ، والناس إلي فهمت التيته عرفت إن العدل و المبادئ ميأكلش عيش. زبطت بوصلتها الأخلاقية على المكسب و بس ،، الناس دي وصلت و مسكت البلد ، و كلت بدل العيش جاتوه و عرفوأ إن ليهم مكان طول ما هما مع العصابة الحاكمة ،،، مش بس كدة، ربوا عيالهم على كدة، و دخلوهم مناطق السلطة و اللقمة الحلوة. أكتر من 4٠ سنة شبكة المصالح بتتربى ، و كلنا بقينا بندور على خيط من الشبكة يسندنا في الزنقة : وظيفة مرتاحة ، لجنة سخيفة ، حتة أرض حلوة ، سفرية ، مكافأة ، ترقية ... إنشالله حتى فشخرة فاضية انك قريب فلان ولا تعرف علان ،،، أخلاقنا بقت استك ، نشتم فى اللي سرقوا البلد نتباهى بصورنا معاهم و نعلقها فوق روسنا ، معلش المال السايب يعمل أكتر من كدة.
شبكة المصالح دي و النظام إلي مش عجبنا ده مش ناس تانية من المريخ دول أنا و إنت بس على كبير شوية ، الناس دي حتحارب علشان محدش يقرب منها أو يحاسبها . أغبى حاجة عملوها كانت يوم الجمال، و إتعلموا من ساعتها إن الشغل اللي بجد مش بالدراع ، الشغل اللي بجد بالدماغ : كنيسة ضد السلفين ، الاخوان ضد الليبرالين، الدستور الأول واللا الإنتخابات ، نعم ولا لأ، الستات حتقلع الحجاب ولا تتنقب غصب عنها ،،،،،، و لسة اللي جاي كتير ،،، اللي إتربو على الفساد لسة معهم السلطة و المال و اللي خرج يطلب بالعدل و إتقتل لسة دمه ضايع ،، و على رأي المثل إعرف صاحبك و علم عليه ،، ياريت قبل ماتهاجم حد بكلمة ولا فيديو ...فكر ،، و إعرف عدوك و علم عليه ،، إتحدوا يرحمكم الله
|