الصيد فى مصر - بنود عقد شحن(ميديل ايست)

السلام عليكم ورحمة الله وبركاته
طبعا كلنا عارفين شركة الشحن ميديل ايست وفى ناس كتير بتشكر فيها وفيه ناس برضو بتشتكى منها ومن اسعارها المرتفعه بأستمرار بلا داعى الحقيقه
انا النهارده جبتلكم بنود العقد الى بتبقى مكتوبه فى ظهر الايصال الذى يحصل عليه الشاحن(الراسل)
وبمجرد امضائك عليه من الامام تصبح مقرا ومعترفا بجميع ما يكون من بنود وشروط خلف هذا الايصال الى فالحقيقه نادر لما حد بيقراه وياخد باله منه كويس وتصبح للشركه جميع هذه الحقوق الموجوده فالبنود والتمسك بها عند حدوث اى شئ لا قدر الله
والعقد كما نعلم شريعة المتعاقدين
فحبيت اوريكم الشروط دى وارجو من حضراتكم قرائتها كويس وقراءة اى عقد او اى ورقه قبل ان يتم الامضاء عليه والنظر فيها جيدا من الخلف ومن الامام عشان سعات كتييير فيه بنود وشروط بتبقى فى ظهر الورق ومبناخدش بالنا منه كويس
اقروا بقى الشروط وقولولى ايه رأيكم فيها وبتخلى مسؤلية الشركه من اى شئ يحدث للبضاعه وطبعا عن طريق ارجاءها ووضعها تحت اى بند من البنود الى طبعا حضرتك مضيت عليها واقريت بيها مسبقا ومعاهم النسخه الاصليه الى فيها الامضاء
ووراهم محاميين جحافل يعنى لو حصل حاجه لاقدر الله نتيجة اهمالهم ولا حتقدر تاخد حق ولا باطل مع الجماعه دول بالشكل ده وحتروح طبعا الفلوس او البضاعه
وانا معملتش الموضوع ده عشان اخوفكم من الشحن او من التعامل مع شركات الشحن عشان محدش يدعى عليا وخصوصا ان انا مستفيد جدا من شركات الشحن لأنى من قنا واى حاجه بأطلبها من القاهره لا يوجد امامى الا ارسالها عبر شركات الشحن انا بس عايز انبه حضراتكم لحاجه واحده بس وهى (النظر فأى ورقه قبل الامضاء عليها جيدااااااا مهما كانت ايه وبتاعت ايه وفين)
ومستنى ردودكم وأرائكم
وتحياتى لجميع طاقم الاداره والقائمين على هذا المنتدى الرائع للخروج بهذه الصوره المشرفه
وتحياتى لجميع الاعضاء المحترمين الى استفدت منهم كثيرا وشرف لى انى اكون مع حضراتكم فى هذا المنتدى الشيق والمليئ بالمواضيع المفيده جدا والمحترمه ويعد مرجعا هاما ومفيدا لجميع هواة الصيد
اخوكم وليد

ده ظهر الايصال بتاع شحن شركة ميديل ايست
مش حيبقى واضح قوى كده فالقراءه غير لما تعملولوا save picture as وبالزووم حيبان كويس