هل توجد أماكن لبيع الكركي والاوز العراقي بمصر
 

السلام عليكم

كان في واحد صاحبي قالي إن الاوز العراقي والكركي بيتباعو في سوق السيدة عائشة يعني الصيادين بيبيعوهم
وأنا نفسي كنت قابلت صيادين بيصيدوة وقالوا انهم بيبيعوة لكن أنا معرفش بيبيعوة فين؟

فممكن لو تكرمتم حد يقولي الحجات البرية دي بتتباع فين؟

والسلام عليكم ورحمة الله وبركاتة

رد: هل توجد أماكن لبيع الكركي والاوز العراقي بمصر
 

السلام عليكم
جميع انواع الطيور والحيوانات تباع في سوق الجمعة ( القلعة قديما ) ودة موجود اسفل كوبري التونسي طريق الاتوستراد قبل مدخل المعادي بحوالي 6 كم

رد: هل توجد أماكن لبيع الكركي والاوز العراقي بمصر
 

شكرا يا جلال باشا لكن أنا بردة معرفتش لسة الحجات دي بتتباع متصادة ميتة يعني وللا ةصحية وهل تمنها مرتفع يعني الاوز البري بكام مثلا وهل بيتباع في سوق الجمعة في مواسم واللا طول السنة يا ريت معاليك توضحلي أكتر. وبعدين كمان في بنادق ضغط هواء بتصيد الحجات الضخمة دي وشكرا يا باشا ومعلش أطلت عليك

رد: هل توجد أماكن لبيع الكركي والاوز العراقي بمصر
 

الأخ الفاضل النشنجي زى ماتكرم أخويا وحبيبي جلال وقال لك كل أنواع الطيور بتتباع فعلا في هذا السوق المسمي بسوق الأمام وطبعا بتتباع صاحية ولازم كمان تعرف أن الصيد مش باالرمي بالبنادق بس فهناك الصيد بالفخاخ والشباك وكمان لازم تعرف أنها بتبقي موجودة في السوق في مواسم تواجدها فى مصر (من نوفمبر حتى مارس )
وآخر أستفساراتك أن كان في بنادق ضغط هواء بتصيد الحاجات الضخمة دي فالآجابة نعم .
كل بنادق الهاي باور +كفاءة الصياد +مكان الصيد = صيد أى نوع من أنواع الطيور دي
أرجو أن أكون قد أفدتك ولك كل الشكر والأحترام

رد: هل توجد أماكن لبيع الكركي والاوز العراقي بمصر
 

شكرا يا حبيبي والله لم تغفل أي نقطة كنت أحب أسأل عليها وشكرا لمعاليك

رد: هل توجد أماكن لبيع الكركي والاوز العراقي بمصر
 

عمي الكبير المهندس طلعت وفيت وكفيت

رد: هل توجد أماكن لبيع الكركي والاوز العراقي بمصر
 

كل الطيور الي في السوق حية وكمان في صقور صغير ويمام
قمري يعني لو الواحد فشل في الصيد ممكن يشتري شوية طيور
ويعمل انة صايدهم ومرة زمان عملت كجة بس في السمك( طلغت رحلة للصيد في البحر لمدة يومين وكان الرزق قليل جدا كل الصيد كان حوالي 3ك وبعدين فكرت اعمل اية وانا راجع بالعربية ومعايا الايس بوكس دخلت سوق العبور وطبعا نوعت وشكلت في السمك زي ماانت عايز ورجعت للاسرة الكريمة
معايا خيرات كتييير وطبعا عملت فيها صياد وصائد قرش
ودة من المواقف الطريفة الي مرت بيا

رد: هل توجد أماكن لبيع الكركي والاوز العراقي بمصر
 

شكرا يا جلال باشا وللمناسبة الطريفة أنا عملت قصة السمك دي قبلك بس للاسف الراجل إللي نوعلي السمك حطلي سمكة غريبة بقها منفوخ كدة يعني مش سمكة من أسماك النيل خالص بس أنا مخدتش بالي انة حطها وكنت عامل اني صايد السمك دة وكنت جايبة لخطبتي وطبعا أول مخطبتي شافت السمكة المبقلشة دي عرفت اني شرية والحمد لله ان الخطوبة باظت بعدها بشهرين (طبعا مش بسبب السمكة المنفوخة) لانها أكيد كل ما كنا هنيجي نعمل مشكلة هتقعد تقولي يا كداب يا بتاع السمكة المنفوخة وتطلعلي لسانها

رد: هل توجد أماكن لبيع الكركي والاوز العراقي بمصر
 

الله ينور واحنا لازم نتصرف علشان المنظر والمظهر العام واقولك علي موقف تاني كنا في الفيوم شهر 7 يعني عز الحر الحر وماكنش في صيد وكان تاني سنة جواز لية وطبعا كنت قايل
اني احسن صياد في البر المصري ورجعنا نجر ازيال الخيبة
والاسي وانا راجع لقيت صيادين واقفين بسمك كوسي وما ادراك
علي حلاوة سمك موسي الي في الفيوم وقفت وخت كل الي مع الصيادين حوالي 10 كيلو ورجعت البيت وانا طبعا عنتر
وقلت لهم ان احنا غيرنا من صيد البر الي البحر وعدت عليهم ياريس وربك ستر