المساعد الشخصي الرقمي

مشاهدة النسخة كاملة : بجد انا حيران واية حل الموضوع دة


guns
11-06-07, 01:10 AM
دار حديث بيني وبين احد افراد الشرطة عن كيفية الدفاع عن النفس ضد البلطجية و فوجئت بالرد التالي اني لو ضربت بلطجي هجم عليا بمسدس صوت بيضرب بلي اتعرض انا المجني علية للمحاكمة لحيازتي لسلاح معدل لكم ان تتخيلوا كم كانت صدمتي يعني يا البلطجي هيموتني يا هتسجن يعني كدة كدة ميت طب الواحد يعمل اية البلد مش بتدي تصاريح حمل سلاح والمسدس اللعبة اللي الواحد بيحاول يقنع نفسة بية يودي في داهية والسلاح في ايد البلطجية والشرطة يعني ملهاش حل طب نعمل اية اي الحل لو الواحد تعرض لاعمال بلطجة هو واهل بيتة

pooforever_2010
11-06-07, 01:14 AM
انتحر احسن بيدى لا بيد عمر
هههههههههههههههههههههه
مهى دى خطه الحكومه الجديده
للزياده السكانيه
تحت شعار
خلى الناس تخف

the hacker
11-06-07, 01:17 AM
والله والواحد مش عارف يعمل ايه بس السجن احسن من الموت و حاجه كمان فى نازى اتسجن انا احسن ما البلطجى يسرقنى و يتعدى على اهل بيتى

guns
11-06-07, 01:36 AM
طب وانا عملت اية عشان دا كلة يعني الضربة تجيلك يا من البلطجية يا من الشرطة بالزمة دة كلام

mrasool
11-06-07, 02:16 AM
حسبى الله ونعم الوكيل فى العقول المتحجرة اللى بتحكم البلد دى
ربنا يرحمنا والتفكير المتخلف دا يتغير ويفهمو ان ارواح الناس واعرضها اولى بالحماية من الاطيان الزراعية اللى بيطلبو تكون عندك لو بتتقدم لترخيص سلاح

gamopt80
11-06-07, 03:04 AM
حاجه غبيه فعلا, بس الي سالته رتبته ايه؟ لو حاجه اقل من ظابط سيبك منه
وبرضه عايز اقولك حاجه هو يقصد لو انت في الشارع, لكن في بيتك الوضع بيختلف في القانون
وحتى لو الكلام دا صح هنعمل ايه انا عن نفسي اختار السجن حتى لو اعدام , لكن مسيبش حد يتعدى على بيتي

hema777h
11-06-07, 03:34 AM
الكلام الصح في الحالة دي انت بتكون في حالة دفاع عن النفس يعني بكل سهولة الي بيجي يهجم عليك دااا مفيش لية سوابق قبل كدااااااااااااااااااا يعني مالوش دية وان واحد محترم اشتبك معاة بكل سهولة المحامي هيطلعك لان مفيش وجه للمقارنة مابين واحد محترم وواحد بلطجي وانت بتكون ليك حق مشررررررررررروووووووووع في الدفاع عن نفسك

monismod
11-06-07, 06:27 AM
تعالوا نحلل الموقف واحدة واحدة

- لو البلطجى معاه مسدس حى .. يبقى مسدسك الصوت أبو بلى مش هايعملك حاجة .. ولو سبقته وضربته فى عينه وشليت حركته مثلاً وبعد كده يا هربت منه يا مسكته وسبته وأخذت منه المسدس الحى

وساعتها يا هرب منك وبالتالى ابقى ارمى المسدس الحى وامسح بصماتك من عليه
يا هاتبلغ عنه ويجوا يمسكوه وساعتها ابقى قول إنك بحركة لولبية خطيرة أخذت منه المسدس الصوت وضربته فى عينه ولما فتشته لاقيت معاه مسدس تانى حى .. وطبعاً كلامك مصدق عن كلامه

- الحل التانى لو البلطجى معاه سلاح أبيض وانت معاك مسدس الصوت البلى .. بردوا هاتضربه فى عينه وتشل حركته وتسبته وتبلغ عنه وهاتقول بردوا أنك قمت بالسيطرة عليه واستحوذت على المسدس الخاص به .. بردوا بطريقة لوزعية خطيرة .. وكلامك هيصدق عن كلامه .. مع الأخذ فى الاعتبار وجوة محامى يفبركهالك صح

- الحل الثالث .. وهو الشائع .. الحرامى جاى يسرق ويمشى .. ونفسه ما يتمسكش .. فا إديله اللى هو عايزه ومشيه .. علشان فيه مشكلة دلوقتى بقت أمر واقع

إن بالصدفة البحتة جميع السادة البلطجية أصبحوا ليهم أهل وعزوة وناس تاخد بطارهم لو حصلهم حاجة .. ودا طبعاً واضح فى الحوادث اللى بنسمع عنها .. إن فيه بلطجى اتقتل وراح مستشفى كذا وأهله جم على المستشفى بالمئات وضربوا كل اللى فيها وبعدين يروحوا يقتلوا اللى قتله ويضربوا الشارع اللى فيه القاتل .. اللى هو المفروض إنه حد شريف وكان بيدافع عن نفسه مثلاً

وبنسمع كمان عن البلطجية اللى اتمسكوا وأهلهم راحوا كسروا القسم المحجور فيه ابنهم وحرقوا السيارات بتاعت الأمن

وإخوانا اللى فى شبرا والمؤسسة والمطرية والمناطق الشعبية عارفين الكلام ده كويس

- الحل الربع .. وهو الحل الأمثل والأحسن .. إنك وانت خارج من بيتك بتقول "بسم الله آمنت بالله واعتصمت بالله وتوكلت على الله ولا حول ولا قوة إلا بالله" وتكون واثق تماماً أنه لو اجتمعت الإنس والجن على أن يضروك بشيئ فلن يضروك إلا بشيئ قد كتبه الله عليك .. وطبعاً كل حاجة بالمقاس وبالميزان .. يعنى إذا أصابك شيئ فهذا اختبار من الله يمتحن صبرك .. وتأكد إنه فى ميزان حسناتك .. وهايشيل من سيئاتك

ولا تنسى قول الله سبحانه وتعالي "لا يكلف الله نفساً إلا وسعها"

يونس
11-06-07, 06:42 AM
انا مش عارف اقول ايه لا حول و لا قوه الا بالله و حسبنا الله و نعم الوكيل

silver_5000
11-06-07, 07:43 AM
اولا حسبنا الله و نعم الوكيل
ثانيا و رب الكعبة انا لو اتحطيت ف الاختيار ده لاختار انى اضربه بالنار حتى لو هاخد اعدام بعدها ,
حد من السلف الصالح قال " العاقل الذي يعرف خير الشرين " اصل هما ف الحالتين شر , يعنى حد يتعدى على بيتى شر و اتسجن او اموت شر , ف كل واحد يختار اهون الشرين على نفسه

ahmadkader
11-06-07, 08:01 AM
تعالوا نحلل الموقف واحدة واحدة >>> ولا تنسى قول الله سبحانه وتعالي "لا يكلف الله نفساً إلا وسعها"

عجبنى ردك جداً ، أنا بحب الناس الراسية دى ،، و بعدين مش هاقول بعد كلامك غير كلمتين بس:

إضرب ،،، و إجرى

سواءاً بقى ضربت بسلاح مرخص ، مش مرخص ، بسلاح أبيض ب بلى ب شومة ب أى حاجة ، مش لازم تعمل فيها شجيع ، إضرب و إخلع يا معلم

moneey1975
11-06-07, 09:53 AM
يا باشا القانون بتاعنا قانون محترم يخليك للاسف تتخلي عن شرف امك واختك ومراتك وبناتك مقابل رخصه سلاح ولو حاولت تتصرف وتجيب مسدس بيضرب بلي يبقي انتا كده مجرم

koktal
11-06-07, 09:59 AM
عجبنى ردك جداً ، أنا بحب الناس الراسية دى ،، و بعدين مش هاقول بعد كلامك غير كلمتين بس:

إضرب ،،، و إجرى

سواءاً بقى ضربت بسلاح مرخص ، مش مرخص ، بسلاح أبيض ب بلى ب شومة ب أى حاجة ، مش لازم تعمل فيها شجيع ، إضرب و إخلع يا معلم

اجدع رد وكلام سليم يا أحمد باشا ..

silver_5000
11-06-07, 10:00 AM
يا باشا القانون بتاعنا قانون محترم يخليك للاسف تتخلي عن شرف امك واختك ومراتك وبناتك مقابل رخصه سلاح ولو حاولت تتصرف وتجيب مسدس بيضرب بلي يبقي انتا كده مجرم

الواحد عايز يقول كلام الرقابة هتحذفه , تييييييييييييييييييييييييت

tamer el-henawy
11-06-07, 10:55 AM
والله كلامكم صح 100% ومش لاقى كلام يتقال احلى من كده
بس ليا سؤال لفرد الشرطة الى كان مع الاخ guns ؟
1/ ليه ضباط الشرطه متكاسلين عن اداء عملها حتى الان ؟؟؟
2/ ليه ضباط المباحث وعربات النجده يمتنعون عن الدخول للمناطق الشعبية ؟؟؟
رغم علمهم " وخاصه المباحث " بأماكن البلطجية
تقبل مرورى

كريم الشامي
11-06-07, 11:09 AM
حسبنا الله ونعم الوكيل

smsmn8888
11-06-07, 11:12 AM
القصة بسيطة اضربة وبعد ذلك المسدس تا مش بتاعي تا بتاعة هو وانا راجل شديد اخده منة وضربت بية اة رايك بقييي تصدق مين مسجل ولا شخص ؟؟؟ موحترم

guns
11-06-07, 11:32 AM
انا بشكر كل اللي عملوا مداخلات في الموضوع لكن اولا اللي كلمتة كان رتبة ثانيا كل كلامكم صحيح لكن لو الهجوم عليك في البيت وفي شهود انك ضربت بالمسدس البلي هتعمل اية يا جماعة لازم صوتنا يوصل للحكومة عشان لازم المواطن المجني علية يرد علي الاعتداء دون محاسبتة ولكن اللي بيحصل دة تهريج مين هيجيلة دماغ وقتها يعور ويكتف ويبلغ مين الموضوع بيجي فجأة بيشل التفكير والواحد بيبقي عايز يخلص منة بأي طريقة وربنا اللي بيستر

mido axis
11-06-07, 02:36 PM
حسبى الله و نعمة الوكيل

gamopt80
11-06-07, 06:16 PM
الاخ monismod قال كلام مكنتش عايز اقوله وهو دا الصح ما دام الوضع كده

والاحسن تكون محتفظ بمسدس ضغط هواء (وهو طبعا مش ممنوع) وبعد ما تستخدم مسدس الصوت البلي وشليت حركته وكتفته مثلا لحد ما يجي حد ياخده, خبي الصوت في بيتك او في عربيتك من غير ما حد ياخد باله وطلع الجامو وفي القسم هيشوفه الظابط ومش هتاخد يوم واحد سجن,او اعمل زي ما قال الاخ monismod , هو هيتوقف على سرعة التفكير في حل, وفي النهاية هو بلطجي ومسجل وانت راجل محترم اكيد يعني القانون مش غبي للدرجة دي

mero1x
11-06-07, 06:31 PM
كلام سمسم سليم 100%

blow c06
11-06-07, 06:42 PM
ياسيدى حتى لو فى شهود انت ضربت بمسدس صوت و مافيش فيه اى مشكله و طبعا تتخلص من الطلقات البلى و تخلى الطلقات الصوت بتاعة بلدها و هو خاف و لو عندك مسدس صوت تانى تحطه فى ايده بعد متقتله ان شاء الله بس يكون فيه بلى و البلى الى فى نافوخه ده من المسدس بتاعه و هو بيعتدى عليا

braveheart
11-06-07, 06:58 PM
الكلام الصح في الحالة دي انت بتكون في حالة دفاع عن النفس يعني بكل سهولة الي بيجي يهجم عليك دااا مفيش لية سوابق قبل كدااااااااااااااااااا يعني مالوش دية وان واحد محترم اشتبك معاة بكل سهولة المحامي هيطلعك لان مفيش وجه للمقارنة مابين واحد محترم وواحد بلطجي وانت بتكون ليك حق مشررررررررررروووووووووع في الدفاع عن نفسك

أيوة دة في حالة أنك تكون قتلتة بيدك أو بعصا أو حتي بسكينة ... مش بسلاح معدل يضرب نار و بدون ترخيص ... ( دي وجهه نظر القانون طبعا ).

sherif agroody
11-06-07, 09:01 PM
الأخوة الأفاضل بعد التحية
بالنسبة لموضوع الدفاع عن النفس أحب أن أضع أمام حضراتكم بعض المعلومات الصحيحة من خلال عملى بالقضاء . حق الدفاع عن النفس مكفول قانوناً للجميع ولكن تطبيقه صعب لكونه محاط ببعض الضوابط مثل أن فعل الدفاع لا يحب أن يتجاوز فعل الإعتداء فمثلاً لايجب عليك إستخدام سلاح لرد إعتدء من شخص ما يستعمل يده وأيضا يجب فى حالة الدفاع أيضا وقف العنف فوراً إذا توقف فعل الإعتداء عليك وأيضا لا يجب إستخدام أى سلاح للضرب فى مقتل إذا كان هناك وسيلة ممكنة لرد الإعتداء دون القتل فكلها ضوابط عند إستخدام حق الدفاع عن النفس.
أما بالنسبة لمسدس الصوت المفتوح الماسورة لضرب البلى فلا يعد من الأسلحة النارية المعاقب عليها قانوناً حيث أن أجزائه لا تشكل أجزاء سلاح نارى حى وهو المعاقب عليه قانوناً فى قانون الأسلحة والذخائر والذى يحدد أنواع الأسلحة المعاقب على حملها بدون ترخيص والذى أنصح الأخوة بقراءته إنما وعلى وجه أخر إذا تم إستخدام مسدس الصوت مثلا فى الترويع و التهديد فهو يعرضك للمسائلة القانونية وإذا تم التجاوز بالإعتداء بمسدس صوت فيعرضك للمسائلة أيضا الى أن يثبت أنه مسدس صوت وليس من الأسلحة النارية وذلك بتقرير من جهة الأدلة الجنائية أما حيازة مسدسات الصوت بجميع أنواعها حتى مع فتح الماسورة فهى لا تخرجها من دائرة أسلحة الصوت . أرجو أن أكون أفدت حضراتكم ببعض المعلومات وتحياتى للجميع .

guns
11-06-07, 09:26 PM
اخي شريف مشكور جدا علي المعلومات القيمة دى ولكن عندي استفسار لو القانون لم يعاقب علي المسدس بكونة مسدس صوت هل سيعاقب علي الطلقات المعدلة بكونها اصبحت قاتلة ما هو رأيك

Vabreso
11-06-07, 09:47 PM
بسم الله الرحمن الرحيم
والله الواحد ما عارف الحكومة دي عاوزة تذلنا اكتر من كدة ازاي
احنا ربنا كتب علينا الاهانة والذل في البلد دي
بلد مش خايفة على أرواحنا ولا أعراضنا والشرطة عارفة أماكن البلطجية كلهم لانهم زي ما هربوهم يعرفوا يجيبوهم بس البلطجية اللي كانوا بيستعينوا بيهم في الانتخابات بيستعينوا بيهم دلوقتي في ترويع الناس وبكرة يمكن يدخلوهم علينا بيوتنا كمان عشان يكسروا رقبتنا ويذلونا انما البلطجية كلهم شايلين سلاح والحكومة والشرطة موافقين بجد شيء ما يرضيش ربنا حسبنا الله ونعم الوكيل فيهم

gamopt80
11-06-07, 09:56 PM
الأخوة الأفاضل بعد التحية
بالنسبة لموضوع الدفاع عن النفس أحب أن أضع أمام حضراتكم بعض المعلومات الصحيحة من خلال عملى بالقضاء . حق الدفاع عن النفس مكفول قانوناً للجميع ولكن تطبيقه صعب لكونه محاط ببعض الضوابط مثل أن فعل الدفاع لا يحب أن يتجاوز فعل الإعتداء فمثلاً لايجب عليك إستخدام سلاح لرد إعتدء من شخص ما يستعمل يده وأيضا يجب فى حالة الدفاع أيضا وقف العنف فوراً إذا توقف فعل الإعتداء عليك وأيضا لا يجب إستخدام أى سلاح للضرب فى مقتل إذا كان هناك وسيلة ممكنة لرد الإعتداء دون القتل فكلها ضوابط عند إستخدام حق الدفاع عن النفس.
أما بالنسبة لمسدس الصوت المفتوح الماسورة لضرب البلى فلا يعد من الأسلحة النارية المعاقب عليها قانوناً حيث أن أجزائه لا تشكل أجزاء سلاح نارى حى وهو المعاقب عليه قانوناً فى قانون الأسلحة والذخائر والذى يحدد أنواع الأسلحة المعاقب على حملها بدون ترخيص والذى أنصح الأخوة بقراءته إنما وعلى وجه أخر إذا تم إستخدام مسدس الصوت مثلا فى الترويع و التهديد فهو يعرضك للمسائلة القانونية وإذا تم التجاوز بالإعتداء بمسدس صوت فيعرضك للمسائلة أيضا الى أن يثبت أنه مسدس صوت وليس من الأسلحة النارية وذلك بتقرير من جهة الأدلة الجنائية أما حيازة مسدسات الصوت بجميع أنواعها حتى مع فتح الماسورة فهى لا تخرجها من دائرة أسلحة الصوت . أرجو أن أكون أفدت حضراتكم ببعض المعلومات وتحياتى للجميع .

يا سلام هو دا الكلام طمنتنا الله يطمنك
وبشكرك على الاستجابه لطلبي بخصوص الرد في الموضوع, ووالله الواحد سعيد جدا بوجود حضرتك معانا
--------
وبلاش بقى يا جماعة الناس تفتي في الموضوع دا من الناحية القانونيه كتير, حتى لو ظابط قال كلمه علشان يخوفك هو في النهاية مش شغلته الحكم والقضاء هو الي بيحكم ويقرر, والاستاذ شريف رجل قانون وقاضي وهو ادرى مننا , في ناس بتهول الموضوع زياده عن اللازم

mero1x
11-06-07, 10:36 PM
والله زى ما شريف بك ذكر ان مسدس الصوت حيازتة غير مجرمة ولا يستدعى حملة ترخيص وغير مدرج فى الجداول الاربعة الواردة فى قانون الاسلحة و الذخائر ومتعلقاتها.

بس ليا تعليقات بعد اذنة

فى حالة حيازة مسدس صوت ( يتم توجية تهمة حيازة سلاح بدون ترخيض ) وقرار النيابة تحويلة للمعمل الجنائى بعد اخذ السيريال وتشميعة لبيان مااذا كان حى من عدمة

وفى حالة استخدامة ( يتم توجية التهمة السابقة بالاضافة الى تهمة اطلاق اعيرة نارية فى منطقة سكنية فى غير الظروف المصرح بها)

دا لوصوت مش معدل بيضرب بلى

اما لومعدل وبيضرب بلى ( خرج عن نطاق اداة لا يستدعى حملها ترخيص ) الى سلاح قد يستخدم فى الاعتداء على الاخرين .

وعلى الرغم من كونة غير مدرج فى الجداول الاربعة
الا ان المشرع نوة عنة ضمنياً هوا واى اداة قد تستخدم فى الاعتداء فى
نص
المادة 25 مكرر من قانون 95 لسنة 45 المعدل بالقانون 97 لسنة 92 جرمت إحراز أي أسلحة أو أدوات مما تستخدم للاعتداء علي الأشخاص بغير مسوغ من الضرورة الحرفية أو الشخصية مما تشكل معها إحدي جرائم أمن الدولة طوارئ (ولا يوجد فيها استئناف علي الحكم) والعقوبة بالحبس والغرامة لا تزيد علي سنة وبالغرامة لاتقل عن 50 جنيها وتكون الأحكام مشددة في حالة استخدامها بدور العبادة.

وتقبلوا مرورى

guns
11-06-07, 10:42 PM
ياجماعة انا قصدي ان ما هوا حكم القانون علي انسان يرد اعتداء بلطجي علية بمسدس صوت بيضرب بلي وما هوا حكم القانون في الحالة دي علي الطلقات المعدلة لضرب البلي مع العلم ان الامر يتبع المجلس العسكري والنيابة العسكرية وما ادراك النيابة العسكرية

Ebrahim Al Ansari
11-06-07, 11:30 PM
الأخوة الأفاضل بعد التحية
بالنسبة لموضوع الدفاع عن النفس أحب أن أضع أمام حضراتكم بعض المعلومات الصحيحة من خلال عملى بالقضاء . حق الدفاع عن النفس مكفول قانوناً للجميع ولكن تطبيقه صعب لكونه محاط ببعض الضوابط مثل أن فعل الدفاع لا يحب أن يتجاوز فعل الإعتداء فمثلاً لايجب عليك إستخدام سلاح لرد إعتدء من شخص ما يستعمل يده وأيضا يجب فى حالة الدفاع أيضا وقف العنف فوراً إذا توقف فعل الإعتداء عليك وأيضا لا يجب إستخدام أى سلاح للضرب فى مقتل إذا كان هناك وسيلة ممكنة لرد الإعتداء دون القتل فكلها ضوابط عند إستخدام حق الدفاع عن النفس.
أما بالنسبة لمسدس الصوت المفتوح الماسورة لضرب البلى فلا يعد من الأسلحة النارية المعاقب عليها قانوناً حيث أن أجزائه لا تشكل أجزاء سلاح نارى حى وهو المعاقب عليه قانوناً فى قانون الأسلحة والذخائر والذى يحدد أنواع الأسلحة المعاقب على حملها بدون ترخيص والذى أنصح الأخوة بقراءته إنما وعلى وجه أخر إذا تم إستخدام مسدس الصوت مثلا فى الترويع و التهديد فهو يعرضك للمسائلة القانونية وإذا تم التجاوز بالإعتداء بمسدس صوت فيعرضك للمسائلة أيضا الى أن يثبت أنه مسدس صوت وليس من الأسلحة النارية وذلك بتقرير من جهة الأدلة الجنائية أما حيازة مسدسات الصوت بجميع أنواعها حتى مع فتح الماسورة فهى لا تخرجها من دائرة أسلحة الصوت . أرجو أن أكون أفدت حضراتكم ببعض المعلومات وتحياتى للجميع .

مع إحترامي الشديد لشخصك الكريم ولمعلوماتك القيمه

الحكمه فى التجريم مش عشان زي محضرتك قلت اجزائه لا تشكل اجزاء سلاح ناري حي
الحكمه فى تجريمه بسبب تحوله من سلاح صوت - أو بمعنى أصح مُحدث صوت - لا يمكن استخدامه فى ايقاع ضرر, إلى سلاح يمكن احداث ضرر به عن طريق اطلاق الأعيره منه

يعني مجرد ادخال تعديل على مسدس الصوت أو طلقه الصوت يخلي اى حاجه فيهم صالحه للإيذاء ده يخرجهم من صفتهم الاصليه الغير مجرمه قانونا..

يعني مثلا لو واحد جاب ماسورة حديد عادية ومسمار عادي وصنع بيهم شيء صالح إنه يضرب أعيره نارية.. هنقول ده لا يشكل أجزاء سلاح حي وبالتالي غير ممنوع؟؟؟ لا طبعا هيبقى ممنوع

ما هيا هيا لو واحد جاب مسدس صوت ماسورته مقفوله وفتحها وبقى صالح لإطلاق اعيره طبيعي انه ياخد حكم اصطناع سلاح ناري, بغض النظر عن اجزائه اللتي لا تشكل اجزاء سلاح حي وبغض النظر عن كون السبطانه مصقوله ولا مشخشنه.

وفى الاخر احب اقول لباقى اخوانى وزمايلنا فى المنتدى يتأكدو من أى معلومه من أكتر من مصدر قبل ما ياخدو اى قرار, لأن سواء كان الرأى اللي بيقول انه غير ممنوع قانونا أو الرأي اللى بيقول انه ممنوع, محدش فيهم هينفع حد ولا حد حيجي يدافع عنك فى المحكمه ولا حد هيجي يدافع عنك فى بيتك, فكر كويس وادرس الموضوووع صح وخد قرارك وكل واحد مسئول عن نفسه, ومن حقكم تدافعو عن نفسكم ومن حقكم تخافو على اهل بيتكم, بس اهدو شويه البلد لسه بخير ومبقيناش فى حرب, ايوه الوضع مش حلو وفى حاجات كتير غلط بتحصل, بس مش بالشكل ده لسه موصلناش لمرحله يا قاتل يا مقتول عشان ندافع على اهلنا, بلاش تقدروا البلا قبل وقوعو

انا اسف على انفعالى, وارجو ان لو حد مش مقتنع بكلامى يقبل تعبيري عن رأيي,
وجميع الاراء المخالفه لرأيي على راسي من فوق مع عدم اقتناعي بيها واحترامي لها

Ebrahim Al Ansari
11-06-07, 11:32 PM
والله زى ما شريف بك ذكر ان مسدس الصوت حيازتة غير مجرمة ولا يستدعى حملة ترخيص وغير مدرج فى الجداول الاربعة الواردة فى قانون الاسلحة و الذخائر ومتعلقاتها.

بس ليا تعليقات بعد اذنة

فى حالة حيازة مسدس صوت ( يتم توجية تهمة حيازة سلاح بدون ترخيض ) وقرار النيابة تحويلة للمعمل الجنائى بعد اخذ السيريال وتشميعة لبيان مااذا كان حى من عدمة

وفى حالة استخدامة ( يتم توجية التهمة السابقة بالاضافة الى تهمة اطلاق اعيرة نارية فى منطقة سكنية فى غير الظروف المصرح بها)

دا لوصوت مش معدل بيضرب بلى

اما لومعدل وبيضرب بلى ( خرج عن نطاق اداة لا يستدعى حملها ترخيص ) الى سلاح قد يستخدم فى الاعتداء على الاخرين .

وعلى الرغم من كونة غير مدرج فى الجداول الاربعة
الا ان المشرع نوة عنة ضمنياً هوا واى اداة قد تستخدم فى الاعتداء فى
نص
المادة 25 مكرر من قانون 95 لسنة 45 المعدل بالقانون 97 لسنة 92 جرمت إحراز أي أسلحة أو أدوات مما تستخدم للاعتداء علي الأشخاص بغير مسوغ من الضرورة الحرفية أو الشخصية مما تشكل معها إحدي جرائم أمن الدولة طوارئ (ولا يوجد فيها استئناف علي الحكم) والعقوبة بالحبس والغرامة لا تزيد علي سنة وبالغرامة لاتقل عن 50 جنيها وتكون الأحكام مشددة في حالة استخدامها بدور العبادة.

وتقبلوا مرورى

جزاك الله خير سبقتني وقلت اللى كنت عاوز اقوله بس بطريقه احسن وبشكل هادي
جزاك الله خير

واسف على انفعالى تانى وارجو استاذ شريف ميزعلش مني

mero1x
11-06-08, 01:48 AM
العفو يا ابراهيم باشا

انا مش عايزك تفهم كلام شريف بية غلط
لأن فى الاول والاخر هوا بيكلمنا على خلاصة الموقف
وعلشان اوضحلك

لو الاخ الفاضل شريف فى النيابة العامة او القضا فلازم تعرف انهم بيقدرو المواقف اللى بتتعرض عليهم ومن الاخر لو لقوا واحد ابن ناس استخدم سلاح صوت او بلى للدفاع عن النفس بيعدوها لو محصلش اصابات بين الطرفين

بس لازم على رأيك يتذكر مدى جرم حيازة اى اداة او سلاح من شأنها ان تسبب ضرر او تعدى على الاخرين لنشر الوعى والحد من تلك التجارة .

وشكراً ليك مرة تانية على مداخلتك

سرسور
11-06-08, 10:39 AM
جزاكم الله خيرًا

sherif agroody
11-06-08, 02:31 PM
ومع إحترامى الشديد لرأى حضرتك برضه أن محدث الصوت غير معد أصلا لإطلاق أى أعيرة نارية والبلى الجامو أو غيره من الرش لا يطلق عليه أعيرة نارية من الأصل وده يختلف عن الفرد الخرطوش المجرم قانوناً لكون الخرطوش من الأعيرة النارية .

sherif agroody
11-06-08, 03:05 PM
وأود أن أوضح أيضا أنى قلت فى المشاركة السابقة أن إستخدام محدث الصوت بطريقة خاطئة سوف يقع تحت المسائلة القانونية ولم أقل أنه غير مجرم على وجه الإطلاق لو حضرتك حبيت تراجع كلامى فسكين المطابخ فى الأصل غير مجرم ولكن إذا تم إستخدامه فى جريمة يصبح مجرماً قانوناً . وأنا أضع لحضراتكم جميعا ذلك من خلال خبرة متواضعة لعدة سنوات فى النيابة العامة ولم أقصد التفاخر

blow c06
11-06-08, 03:13 PM
طب ياشريف باشا متساعدنا ناخد ترخيص سلاح و نسيب الهم ده كله.. انا مقدم على ترخيصمن يوم 2/5 و لسه مردوش عليا بس انا معنديش غير ارض سكنيه و ببنيها فى التجمع و مرفق مع الطلب صورة تخصيص الارض و ترخيص البناء.. تفتكر هيدونى ترخيص؟ انا مهندس و عندى 40 سنه

بسام سعيد
11-06-08, 03:14 PM
شاكر جدااااااااا
ليك شريف بك لتعاونك مع الاخوة الاعضاء

sherif agroody
11-06-08, 04:52 PM
مسألة ترخيص الأسلحة إخوتى الأفاضل مسألة ترخيص الأسلحة ليها إعتبارات أمنية بوزارة الداخلية خصوصا فى هذه الأيام و أعتقد أنه لن يتم الترخيص لكل الناس ولكن بالنسبة للأخ الفاضل المهندس أقول لك أصبر شوية نظراً لأن إجراءات الترخيص ممكن تطول لأن لها دورة من القسم الى مديرية الأمن ثم الأمن العام ونظراً لظروف الداخلية الأن ممكن الموضوع ده يتأخر شوية لكن لو حضرتك مستوفى الشروط لن تكون هناك مشكلة إن شاء الله . وتحياتى للجميع .

the hacker
11-06-08, 05:11 PM
الأخوة الأفاضل بعد التحية
بالنسبة لموضوع الدفاع عن النفس أحب أن أضع أمام حضراتكم بعض المعلومات الصحيحة من خلال عملى بالقضاء . حق الدفاع عن النفس مكفول قانوناً للجميع ولكن تطبيقه صعب لكونه محاط ببعض الضوابط مثل أن فعل الدفاع لا يحب أن يتجاوز فعل الإعتداء فمثلاً لايجب عليك إستخدام سلاح لرد إعتدء من شخص ما يستعمل يده وأيضا يجب فى حالة الدفاع أيضا وقف العنف فوراً إذا توقف فعل الإعتداء عليك وأيضا لا يجب إستخدام أى سلاح للضرب فى مقتل إذا كان هناك وسيلة ممكنة لرد الإعتداء دون القتل فكلها ضوابط عند إستخدام حق الدفاع عن النفس.
أما بالنسبة لمسدس الصوت المفتوح الماسورة لضرب البلى فلا يعد من الأسلحة النارية المعاقب عليها قانوناً حيث أن أجزائه لا تشكل أجزاء سلاح نارى حى وهو المعاقب عليه قانوناً فى قانون الأسلحة والذخائر والذى يحدد أنواع الأسلحة المعاقب على حملها بدون ترخيص والذى أنصح الأخوة بقراءته إنما وعلى وجه أخر إذا تم إستخدام مسدس الصوت مثلا فى الترويع و التهديد فهو يعرضك للمسائلة القانونية وإذا تم التجاوز بالإعتداء بمسدس صوت فيعرضك للمسائلة أيضا الى أن يثبت أنه مسدس صوت وليس من الأسلحة النارية وذلك بتقرير من جهة الأدلة الجنائية أما حيازة مسدسات الصوت بجميع أنواعها حتى مع فتح الماسورة فهى لا تخرجها من دائرة أسلحة الصوت . أرجو أن أكون أفدت حضراتكم ببعض المعلومات وتحياتى للجميع .


ربنا يكرمك يا استاذ شريف على المعلومات الغاليه دى

gamopt80
11-06-08, 07:38 PM
استاذنا شريف بعد اذن حضرتك علشان بس نجمع الفكره ونوضح للناس بشكل مبسط

1- انا لو معايا مسدس صوت معدل لضرب البلي وماشي بيه رايح مشوار مثلا وحصل ان ظابط وقفني ولقاه معايا , هل هنا دي جريمة؟

2- هل لو دافعت عن نفسي بيه داخل بيتي وضربت حرامي معاه سلاح ابيض في رجله مثلا وبعدين سلمته, هل هنا دا حق مشروع وهل في جريمة لاستخدام الصوت المعدل في الحالة دي؟

3- هل القانون بيراعي في حالات الدفاع عن النفس الشخص ومستواه العلمي والعملي؟

وشكرا

sherif agroody
11-06-08, 08:39 PM
الأخ الكريم
بالنسبة للسؤال الأول حيازة وإحراز مسدسات الصوت لاجريمة بشأنها كما قلت سابقاً وإنما ممكن أحد الضباط يقوم بالتحفظ عليك بحجة أنه لا يعلم ما إذا كان سلاح نارى و لا لأ ويقوم بعمل محضر لعرضه على النيابة وده طبعاً بيبقى راجع لأمانة الضابط فى عمله و تعامله مع الناس .
بالنسبة للسؤال الثانى حق الدفاع عن النفس و المال و العرض حق مكفول قانوناً بغض النظر عن الأداة المستخدمة فى الدفاع عن النفس ولكن يجب أن يكون الدفاع لا يجاوز رد الإعتداء فإذا كان الشخص ينوى الدخول لمسكن للسرقة وقتل من يعترضه يحق لك الدفاع عن نفسك بأى طريقة ممكنة والقانون يراعى ذلك .
أما بالنسبة للسؤال الأخير فأى مواطن مسالم له حق الدفاع عن نفسه بغض النظر عن مستواه لأن ده مسألة قانون يطبق على الكافة ولكن كما ذكرت له ضوابط يظهره التحقيق وتتيقن منه المحكمة وكل حالة لها ظروفها التى تختلف عن غيرها من الحالات .
ويجب أن نفرق بين إحراز مسدسات الصوت وهى غير مجرمة قانوناً بدليل عدم حظر بيعها وتداولها بين الكافة حتى ولو كانت بتضرب بلى لأنها ليست أسلحة نارية بطبيعتها والبلى يخرج عن دائرة الأعيرة النارية . وبين سوء إستخدامها فى الإعتداء على الأخرين ومن ثم تتحول الى أدة إعتداء وليس سلاح نارى و لكن يجب الإنتباه الى إن تحويل مسدس الصوت الى حى عن طريق تغيير الماسورة بماسورة سلاح حى وتغيير إبرة ضرب النار وتغيير الأجزاء ليصبح سلاح نارى حى فإننا هنا بصدد تصنيع سلاح نارى يختلف عن مسدس الصوت ويدخله فى دائرة الأسلحة النارية التى يعاقب القانون على حيازتها بدون ترخيص .

osha966
11-06-08, 09:12 PM
- الحل الربع .. وهو الحل الأمثل والأحسن .. إنك وانت خارج من بيتك بتقول "بسم الله آمنت بالله واعتصمت بالله وتوكلت على الله ولا حول ولا قوة إلا بالله" وتكون واثق تماماً أنه لو اجتمعت الإنس والجن على أن يضروك بشيئ فلن يضروك إلا بشيئ قد كتبه الله عليك .. وطبعاً كل حاجة بالمقاس وبالميزان .. يعنى إذا أصابك شيئ فهذا اختبار من الله يمتحن صبرك .. وتأكد إنه فى ميزان حسناتك .. وهايشيل من سيئاتك

ولا تنسى قول الله سبحانه وتعالي "لا يكلف الله نفساً إلا وسعها"[/quote]

-بارك الله فيك هو ده الحل النافع فى حالتنا انشاء الله

sherif agroody
11-06-08, 09:18 PM
نعم فالله خير حافظ أولاً وأخيراً .

charbel bakhach
11-06-08, 09:21 PM
hi how are you ?

Ebrahim Al Ansari
11-06-08, 10:06 PM
ومع إحترامى الشديد لرأى حضرتك برضه أن محدث الصوت غير معد أصلا لإطلاق أى أعيرة نارية والبلى الجامو أو غيره من الرش لا يطلق عليه أعيرة نارية من الأصل وده يختلف عن الفرد الخرطوش المجرم قانوناً لكون الخرطوش من الأعيرة النارية .


المهم هوا الإحترام الجميل المتبادل بغض النظر عن إختلافنا فى الرأي, أو فى طريقه عرض المعلومه,

وكل ما كنت أقصد هو وجوب التنبيه على أنه بغض النظر عن الوصف القانوني فإنه قد يتسبب بنسبه كبيره لحامله فى مسائله قانونيه, وخصوصاً فى ظل المحاكمات العسكرية

ربنا يحفظك ويحفظ جميع إخواننا من أي سوء

ولك منى كل الإحترام والتقدير, ومقامك محفوظ




.

gamopt80
11-06-08, 10:21 PM
الصراحه يا شريف بيه استفدنا جدا بوجود حضرتك معانا وبشكرك على اهتمامك وردك
لان في ناس كتير كانت بتفتي في الموضوع ده لدرجة ان الواحد حس انه اغبى شيء في الدنيا هو القانون المصري!
الموضوع كده بقى واضح ومعقول عن الي الواحد كان بيسمعه
جزاك الله الجنه
--------
osha966 انا فعلا دايما بقول ادعيه وانا خارج خاصتا لما يكون وقت متاخر وربنا هو الحافظ في الاول والآخر
ولكن الاخذ بالاسباب واجب وحماية نفسك واهلك برضه واجب, وربنا يحفظنا

sherif agroody
11-06-09, 01:16 PM
شكراً أستاذ إبراهيم نحن جميعاً أخوة فى الله و الخلاف فى الرأى لا يفسد للود قضية .
وقد قمت بإرسال رسالة خاصة إليك . وتقبل تحياتى مرة أخرى

silver_5000
11-06-09, 02:37 PM
الأخ الكريم
بالنسبة للسؤال الأول حيازة وإحراز مسدسات الصوت لاجريمة بشأنها كما قلت سابقاً وإنما ممكن أحد الضباط يقوم بالتحفظ عليك بحجة أنه لا يعلم ما إذا كان سلاح نارى و لا لأ ويقوم بعمل محضر لعرضه على النيابة وده طبعاً بيبقى راجع لأمانة الضابط فى عمله و تعامله مع الناس .
بالنسبة للسؤال الثانى حق الدفاع عن النفس و المال و العرض حق مكفول قانوناً بغض النظر عن الأداة المستخدمة فى الدفاع عن النفس ولكن يجب أن يكون الدفاع لا يجاوز رد الإعتداء فإذا كان الشخص ينوى الدخول لمسكن للسرقة وقتل من يعترضه يحق لك الدفاع عن نفسك بأى طريقة ممكنة والقانون يراعى ذلك .
أما بالنسبة للسؤال الأخير فأى مواطن مسالم له حق الدفاع عن نفسه بغض النظر عن مستواه لأن ده مسألة قانون يطبق على الكافة ولكن كما ذكرت له ضوابط يظهره التحقيق وتتيقن منه المحكمة وكل حالة لها ظروفها التى تختلف عن غيرها من الحالات .
ويجب أن نفرق بين إحراز مسدسات الصوت وهى غير مجرمة قانوناً بدليل عدم حظر بيعها وتداولها بين الكافة حتى ولو كانت بتضرب بلى لأنها ليست أسلحة نارية بطبيعتها والبلى يخرج عن دائرة الأعيرة النارية . وبين سوء إستخدامها فى الإعتداء على الأخرين ومن ثم تتحول الى أدة إعتداء وليس سلاح نارى و لكن يجب الإنتباه الى إن تحويل مسدس الصوت الى حى عن طريق تغيير الماسورة بماسورة سلاح حى وتغيير إبرة ضرب النار وتغيير الأجزاء ليصبح سلاح نارى حى فإننا هنا بصدد تصنيع سلاح نارى يختلف عن مسدس الصوت ويدخله فى دائرة الأسلحة النارية التى يعاقب القانون على حيازتها بدون ترخيص .

بجد متشكرين جدا جدا يا شريف بك , انت طمنتنى اوى و حسستنى ان فى حل لازمة الامن اللى البلد فيها , انا كنت قلقان جدا من موضوع تجريم حيازة مسدس الصوت المعدل لضرب البلي و ناس كتير برضه بيتهيالى كانو قلقانين زيى , لدرجة ان كان فى رأى بيقول ان مدام المسدس الصوت المعدل مجرم حيازته و المسدس الحي اللى بدون ترخيص مجرم حيازته يبقى الافضل اشتري مسدس حي بدون ترخيص , انما اللى فهمته من كلام سعادتك انى كدة معايا المسدس الصوت المعدل ( حيازة فقط بدون استخدام ) يبقى مفيش مشكلة قانونية انما تظهر ابعاد المشكلة القانونية فى حالة استخدامه ( و اللى فهمته من كلام معاليك كمان ان لو استخدامه فى حدود ضوابط الدفاع عن النفس يبقى مفيش مشكلة إن شاء الله ) بس كنت عايز اتاكد من حاجة , هل من حالات الدفاع عن النفس انى استخدمه ف عربيتى فى حالة محاولة الاعتداء عليا و انا داخل العربية من قبل البلطجية لو حصل لا قدر الله يعنى ؟؟؟

sherif agroody
11-06-10, 09:50 AM
تمام هو ده المقصود فعلاً
أما بالنسبة لحالة الدفاع عن النفس فهى غير مرتبطة بمكان معين فيمكن للشخص الدفاع عن نفسه وعن بيته أو عن نفسه فى الطريق العام أو فى مكان عمله ولاكن دون إفراط أو تفريط وأرجو من الأخوة أن لا يأخذوا محمل الكلام أنه دعوة لإستخدام العنف لأن إذا كان بإمكان الشخص أن يلجأ للشرطة فهو الأفضل فى أى حال لأنهم المختصين قانوناً أولاً وأخيراً بمنع الجرائم وضبط المجرمين .

silver_5000
11-06-10, 10:07 AM
تمام هو ده المقصود فعلاً
أما بالنسبة لحالة الدفاع عن النفس فهى غير مرتبطة بمكان معين فيمكن للشخص الدفاع عن نفسه وعن بيته أو عن نفسه فى الطريق العام أو فى مكان عمله ولاكن دون إفراط أو تفريط وأرجو من الأخوة أن لا يأخذوا محمل الكلام أنه دعوة لإستخدام العنف لأن إذا كان بإمكان الشخص أن يلجأ للشرطة فهو الأفضل فى أى حال لأنهم المختصين قانوناً أولاً وأخيراً بمنع الجرائم وضبط المجرمين .

تسلملنا يا شريف بك على اهتمامك الغالى بالمنتدى و اعضاءه و على ردودك الجميلة المريحة

sherif agroody
11-06-10, 11:14 AM
شكراً و لكن أرجو أن يتفهم الأخوة الأفاضل الكلام جيداً حتى لا يتحول الموضوع ده لكوارث فليس كل موقف يعتبر حالة دفاع عن النفس فأى مشاجرة فى الشارع أو خلافات شخصية بين أحد لا تعتبر من حالات الدفاع عن النفس وهذا هو خلاصة الكلام وتحياتى للكل .

avokato
11-06-20, 02:01 PM
حاجه غبيه فعلا, بس الي سالته رتبته ايه؟ لو حاجه اقل من ظابط سيبك منه
وبرضه عايز اقولك حاجه هو يقصد لو انت في الشارع, لكن في بيتك الوضع بيختلف في القانون
وحتى لو الكلام دا صح هنعمل ايه انا عن نفسي اختار السجن حتى لو اعدام , لكن مسيبش حد يتعدى على بيتي

يعم شكله مش ظابط ولا دارس قانون والقاضي الجنائي فاهم وبيحقق في الموضوع وبينظر لظروف الحادثه والاشخاص وكل دا محل اعتبار

aly_kamal
11-06-20, 02:21 PM
واضح ان الاخ اللي اتكلم مش من افراد الشرطة ولا يعرف حاجة عن القانون لانه مفيش حاجة اسمها عقاب لانك بتدافع عن نفسك
يعني لا قدر الله لو انت قتلت واحد وانت بتدافع عن نفسك علشان هو بيهاجمك عمرك ما هتتشنق لانك في حالة دفاع عن النفس وبعدين السلاح اللي بيضرب بلي شأنه شأن اي بندقية رش بنصطاد بيها عصافير ولا يندرج تحت بند الاسلحة النارية لانه مش بيصرب اعيره ناريه
اما موضوع البلطجي ده التعامل معاه هيختلف من شخص لاخر وحسب الموقف وحسب السلاح ولكن لتفادي اي مشاكل نبعد باولادنا عن الاوقات الخطر والاماكن المشتبه فيها لحد ما ربنا يفرجها علينا وتنحل الكربه اللي احنا فيها دي وترجع الامور لطبيعتها
وبعدين ما هو من قبل القورة واحنا بنسمع عن مصايب وحوادث والمقدر هيحصل لو عملنا ايه بس احنا لازم ناخد بالاسباب وربنا يسترها علينا جميعا

avokato
11-06-20, 02:22 PM
والله زى ما شريف بك ذكر ان مسدس الصوت حيازتة غير مجرمة ولا يستدعى حملة ترخيص وغير مدرج فى الجداول الاربعة الواردة فى قانون الاسلحة و الذخائر ومتعلقاتها.

بس ليا تعليقات بعد اذنة

فى حالة حيازة مسدس صوت ( يتم توجية تهمة حيازة سلاح بدون ترخيض ) وقرار النيابة تحويلة للمعمل الجنائى بعد اخذ السيريال وتشميعة لبيان مااذا كان حى من عدمة

وفى حالة استخدامة ( يتم توجية التهمة السابقة بالاضافة الى تهمة اطلاق اعيرة نارية فى منطقة سكنية فى غير الظروف المصرح بها)

دا لوصوت مش معدل بيضرب بلى

اما لومعدل وبيضرب بلى ( خرج عن نطاق اداة لا يستدعى حملها ترخيص ) الى سلاح قد يستخدم فى الاعتداء على الاخرين .

وعلى الرغم من كونة غير مدرج فى الجداول الاربعة
الا ان المشرع نوة عنة ضمنياً هوا واى اداة قد تستخدم فى الاعتداء فى
نص
المادة 25 مكرر من قانون 95 لسنة 45 المعدل بالقانون 97 لسنة 92 جرمت إحراز أي أسلحة أو أدوات مما تستخدم للاعتداء علي الأشخاص بغير مسوغ من الضرورة الحرفية أو الشخصية مما تشكل معها إحدي جرائم أمن الدولة طوارئ (ولا يوجد فيها استئناف علي الحكم) والعقوبة بالحبس والغرامة لا تزيد علي سنة وبالغرامة لاتقل عن 50 جنيها وتكون الأحكام مشددة في حالة استخدامها بدور العبادة.

وتقبلوا مرورى

بس القانون والاحكا م صريحه في موضوع محدث الصوت وبنادق ضغط الهوا ء غير مجرمه وان كانت تطلق بلي

ابو مروان
11-06-20, 02:25 PM
السلام عليكم يا اخوانى الاعزاء_انا حزين لان الاخ مونيسمود بيقول فى الرد بتاعة واحد محامى يفبركهاللك صح؟؟؟ معظم المحامين وانا منهم والحمد للة لا نفبرك شىء والفبركة يعنى التزوير_ثانيا اخى العزيز الموضوع دة انا قمت بالرد علية اكثر من مرة ولن ابخال ان ارد مرة اخرى_سيدى الفاضل الدفاع الشرعى حق مكفول للجميع مع الاخذ فى الاعتبار مراعاة شروطة وقواعدة لان ذللك يدخل ضمن قانون العقوبات فى موانع العقاب والمسؤلية القانونية وملخصها هو وجود حالة من حالات الدفاع الشرعى من عدمة ؟ يعنى مثلا لو حضرتك فى الشارع وتعرض لك بلطجى بمطواة قرن غزال وعايز يسرقك وحضرتك معاك سلاح مرخص وضربتة وموتتة_تفتكر فية عقوبة والا لا؟؟ طبعا فية عقوبة وتكون جناية ضرب افضى الى وفاة_ما حدش يستغرب _لان فية عدم تناسب بين المطواة والمسدس يعنى كان ممكن يكون قدامك كذا حل غير انك تزهق روح مثلا انك تضرب طلقة فى الهوا او تهوشة او تهرب حتى _انما لو مثلا انك فى بيتك فى امان الللة ودخل عليك حرامى او اتنين او اكتر وكان معاهم مسدسات ان شاللة تكون مسدسات لعبة وانتة ضربت نار من سلاحك مرخص او غير مرخص تعافى من عقوبة القتل ولكن هناك عقوبة حيازة سلاح نارى وزخيرة بدون ترخيص_مثال اخر لو كان معاك مراتك او اختك وانتة فى الشارع وتعرض ليك حرامية او بلطجية ودافعت دفاع شرعى عن عرضك تكون احتمالية الافراج عنك وعدم وجود مساءلة قانونية كبيرة جدا_يا سادة الحالات تقاس كل حالة على حدى ظروفعا وملابساتها وكذا وكذا موش كل الحالات زى بعض_دة الظابط حتى لما بيموت بلطجى بيخش فى سين وجيم لبيان وجة الحقيقة لبيان المسؤلية حتى لانكون فى غابة وكلة يموت كلة بداعى الدفاع عن النفس_ارجو ان اكون افدت حضراتكم _اللهم استرها معنا جميعا امين

avokato
11-06-20, 02:25 PM
مع إحترامي الشديد لشخصك الكريم ولمعلوماتك القيمه

الحكمه فى التجريم مش عشان زي محضرتك قلت اجزائه لا تشكل اجزاء سلاح ناري حي
الحكمه فى تجريمه بسبب تحوله من سلاح صوت - أو بمعنى أصح مُحدث صوت - لا يمكن استخدامه فى ايقاع ضرر, إلى سلاح يمكن احداث ضرر به عن طريق اطلاق الأعيره منه

يعني مجرد ادخال تعديل على مسدس الصوت أو طلقه الصوت يخلي اى حاجه فيهم صالحه للإيذاء ده يخرجهم من صفتهم الاصليه الغير مجرمه قانونا..

يعني مثلا لو واحد جاب ماسورة حديد عادية ومسمار عادي وصنع بيهم شيء صالح إنه يضرب أعيره نارية.. هنقول ده لا يشكل أجزاء سلاح حي وبالتالي غير ممنوع؟؟؟ لا طبعا هيبقى ممنوع

ما هيا هيا لو واحد جاب مسدس صوت ماسورته مقفوله وفتحها وبقى صالح لإطلاق اعيره طبيعي انه ياخد حكم اصطناع سلاح ناري, بغض النظر عن اجزائه اللتي لا تشكل اجزاء سلاح حي وبغض النظر عن كون السبطانه مصقوله ولا مشخشنه.

وفى الاخر احب اقول لباقى اخوانى وزمايلنا فى المنتدى يتأكدو من أى معلومه من أكتر من مصدر قبل ما ياخدو اى قرار, لأن سواء كان الرأى اللي بيقول انه غير ممنوع قانونا أو الرأي اللى بيقول انه ممنوع, محدش فيهم هينفع حد ولا حد حيجي يدافع عنك فى المحكمه ولا حد هيجي يدافع عنك فى بيتك, فكر كويس وادرس الموضوووع صح وخد قرارك وكل واحد مسئول عن نفسه, ومن حقكم تدافعو عن نفسكم ومن حقكم تخافو على اهل بيتكم, بس اهدو شويه البلد لسه بخير ومبقيناش فى حرب, ايوه الوضع مش حلو وفى حاجات كتير غلط بتحصل, بس مش بالشكل ده لسه موصلناش لمرحله يا قاتل يا مقتول عشان ندافع على اهلنا, بلاش تقدروا البلا قبل وقوعو

انا اسف على انفعالى, وارجو ان لو حد مش مقتنع بكلامى يقبل تعبيري عن رأيي,
وجميع الاراء المخالفه لرأيي على راسي من فوق مع عدم اقتناعي بيها واحترامي لها

اختلف معك لان القانون يحدد الجداول الاربعه علي سبيل الحصر وليس القياس للي فاهمين قانون يعني ما هو خارج الجداول الاربعه لايشكل سلاح والماسوره الي اتكلمت عليها بينضرب منها اعيره ناريه حيه مش بلي حديد والمسدس الصوت اسمه محدث صوت غير مجرم الي مجرم في المسدسات المششخنه والمثقوله انما المحدث بالنص غير مجرم وتحياتي لك

aly_kamal
11-06-20, 02:33 PM
استاذ ابو مروان مشكوووووووووووور للتوضيح

mero1x
11-06-22, 01:53 PM
اختلف معك لان القانون يحدد الجداول الاربعه علي سبيل الحصر وليس القياس للي فاهمين قانون يعني ما هو خارج الجداول الاربعه لايشكل سلاح والماسوره الي اتكلمت عليها بينضرب منها اعيره ناريه حيه مش بلي حديد والمسدس الصوت اسمه محدث صوت غير مجرم الي مجرم في المسدسات المششخنه والمثقوله انما المحدث بالنص غير مجرم وتحياتي لك

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ


حبيبى افوكاتو

الجداول الاربعة والقانون الخاص بالاسلحة والزخائر ومتعلقاتها

ما هى الا :
تنظيم التعامل فى الاسلحة والذخائر ووضع قيود وشروط لحملها او استعمالها .

حضرتك بتقول ان اللى خارج عن الجداول الاربعة لا يعتد سلاح (غلط بكل المقاييس)
الصح ان اللى خارج عن الجداول الاربعة هوا (اداة او سلاح "لا يستدعى حملة ترخيص" ) ولا يسأل حاملها عن مسوغ للحمل الا فى اديق الحدود ولكن يسأل من استخدمها استخدام من شأنة الحاق الاذى بالاخرين.

لو حد ماشى فى الشارع وحصل خناققة وجاب طوبة ضرب بيها حد على رأسة وموتة
الطوبة تعتبر (اداة جريمة)
اما لو سكينة مطبخ " غير مدرجة فى الجداول الاربعة " تعتبر ( سلاح الجريمة)

معلش هنروح لشق اخر

"نوع المقذوف "
الذخائر بصفة عامة تتون من
ظرف , كبسولة , بارود , مقذوف

طلقات الصوت العادى (ذخيرة فيشنك) وذلك لعدم توافر الجزء الاهم وهوا المقذوف

طلقات الصوت البلى (ذخيرة حية)
لتوافر كافة مكونات المقذوف السابقة الذكر

لو حد قالى انها بلى مش حية هنتحر

انواع المقذوفات
رصاص (زى ال 22 المورس)- رصاص مغلفة نحاس (رى ال9مم) - صلب - صلب معلف نحاس - صلب برأس متفجر - صلب براس متفجر ومضىء - صلب مضىء (الخارق - حارق خارق - كاشف - حارق خارق كاشف)

واخيراً معلش طولت عليكم
بس والله الطلقات البلى تعامل معاملة الذخيرة الحية .

avokato
11-06-22, 02:20 PM
مختلف معاك لان دا برضه مينطبقش علي الطلقه البلي لانها مخصصه لصيد البط والغزلان واسمها في التعامل مع الداخليه مسدس عصافير ومش ممنوع فعلا
http://www.egypthunt.net/showthread.php?t=10814&page=6
دا البحث بتاع تجريم البلي

avokato
11-06-22, 02:24 PM
طلقات البلي مش منطبقه علي مواصفات الطلقه الحيه من حيث حجم البارود والحجم والمقزوف والسرعه ومعدل الدقه واختراق الهوا والتاثير يعني باختصار لو حد رخم اوي اوي قوله بصطاد كلاب بلدي في الشارع

عادل عبده
11-06-22, 02:27 PM
طلقات البلي مش منطبقه علي مواصفات الطلقه الحيه من حيث حجم البارود والحجم والمقزوف والسرعه ومعدل الدقه واختراق الهوا والتاثير يعني باختصار لو حد رخم اوي اوي قوله بصطاد كلاب بلدي في الشارع

ههههههههههههه
جامده قوى يا باشا حكايه كلاب فى الشارع ديه بصراحه ربنا مع ان فى ضباط شرطه شباب زى الفل ربنا يخليهوم لاهلهم ومراتتهوم وعيالهوم وكده بس فى منهم ماتقلعوش من رجليك

avokato
11-06-22, 02:29 PM
انا سالت في المباحث والقسم والنيابه والامن الوطني كله اكد انها مش ممنوعه بس الخوف من بتوع الجيش مبيهرجوش ومبيعرفوش والقضاه العسكريين مبيسمعوش ولا بيقدروا ولا بيفهموا سوري في اللفظ تدخل طالما دخلت هتلبلس حكم

عادل عبده
11-06-22, 02:51 PM
انا سالت في المباحث والقسم والنيابه والامن الوطني كله اكد انها مش ممنوعه بس الخوف من بتوع الجيش مبيهرجوش ومبيعرفوش والقضاه العسكريين مبيسمعوش ولا بيقدروا ولا بيفهموا سوري في اللفظ تدخل طالما دخلت هتلبلس حكم

بسيطه يبقى ندفن اللى معانا فى البيت اليومين دول وبلاش مجاملات فى الافراح لحد ما الحكم العسكرى يعدى على خير واللى عاوز يجامل بعد كده يجامل واللى شايل حاجه للدفاع عن النفس مايقعدش بقى يتفشخر بيها ويشمى بيها فى كل حته وحاططها فى الحزام ومطالعخها بره القميص

avokato
11-06-22, 03:10 PM
بالظبط انت كده جبت الي فيها ولو اضطريت تستخدمه وحد بيسرقك او بيعتدي عليك تبقي في حاله دفاع عن النفس ويكون الي قدامك عربجي يعني متتخانقش مع بتاع الامن في المترو تروح رازعه واحده بلي فهمت ممكن الظابط يعمل عبيط ويتخيل ان الي معاك حي ويروح رازعك واحده حي في نفوخك

عادل عبده
11-06-22, 03:16 PM
بالظبط انت كده جبت الي فيها ولو اضطريت تستخدمه وحد بيسرقك او بيعتدي عليك تبقي في حاله دفاع عن النفس ويكون الي قدامك عربجي يعني متتخانقش مع بتاع الامن في المترو تروح رازعه واحده بلي فهمت ممكن الظابط يعمل عبيط ويتخيل ان الي معاك حي ويروح رازعك واحده حي في نفوخك

الله ينور عليك ياريس وبعدين يا جدعان انا بصنف الناس ولو سمحتو اعذرونى فى التصنيف ده لكذا واحد
فى واحد بيحب يقتنى نواع السلاح المختلفه وهتلاقيه بيعاملها زى عياله وبيحطها فى سلاحليك فى البيت ومظبطها
وفى واحد عاوز حاجه يدافع بيها عن نفسه وبعيد عن وجع دماغ الحكومه والقرف ده مع انه لو جرى فى حوار الترخيص ممكن يرخص وده زى حالاتى كده
وفى عالم شغالها فى مخاطر عشان بيبقى غلط والحكومه مش هترصلهوم سلاح ودول مابيوجعوش دماغهوم وبيجيبو حى من بره بره ولو بعشرات الالاف
وفى عالم بقى عاوزه تعمل فيها نوره ومخلصه وديه بقى بتحب تتمنزر وبيودو نفسهوم فى داهيه
وشكرا ليك يا احمد بيه
وتقبلو مرورى وتعليقاتى ولكم منى جزيل الشكر

عادل عبده
11-06-22, 03:17 PM
بس صحيح يا احمد بيه هى ايه حكايه موظف المترو معاك هو انت بتتخانق معاهوم كتير ولا ايه؟؟؟؟؟؟؟

avokato
11-06-22, 04:05 PM
لا مش بتخانق معاهم كتير بس علي سبيل المثال

عادل عبده
11-06-22, 04:18 PM
ماشى يا احمد بيه انا بس قولت لما امزح معاك بس يعنى لو مش يضايقك