طلعة اليوم ( كمين امن الدوله ) [الأرشيف]

مشاهدة النسخة كاملة : طلعة اليوم ( كمين امن الدوله )

القبطان المصرى 77

13-09-26, 04:48 PM

احم احم
السلام عليكم
ندخل فى الموضوع دوغرى عشان انا جعان وعاوز اقوم اكل
طبعا كل الصيادين الايام دى عاملين بيات شتوى بسبب ظروف البلد وقليل منهم اللى بيخرج للصيد
وبصراحه عندهم حق
لكن انا دماغ اهلى صعيدى ناشفه ومش باسمع الكلام
خرجت للصيد الايام اللى فاتت دى خمس طلعات خفيفه مابين ساعه وساعتين
يعنى ماتعتبرش طلعات كامله
واخر مره حصل معايا الاتى
كنت باصطاد فى مدينة النوباريه طريق مصر اسكندريه صحراوى
وحوالى الساعه 6.30 صباحا كنت ماشى فى الشارع ولقيت يمامه واقفه على عامود نور قدامى
والشارع فاااااااااااااضى خالص ومفيش حد
لكن فى نهاية الشارع كده بعد حوالى 30 متر كان فيه تقاطع شارع شمال ويمين
المهم عمرت ونشنت وضربت واليمامه اخدت الطلقه ووطارت شويه ووقعت فى التقاطع ده
رحت عشان اجبها
وطبعا انا لسه موصلتش للتقاطع ومش شايف لا الشارع اليمين ولا الشارع الشمال
واول ماوصلت للتقاطع باضرب عينى يمين التقاطع
وكانت الصدمه والمفجأه
لقيت موجود على يمين التقاطع كمين مدجج بالسلاح وحجات كده شكلها مرعب
اوبااااااااااااااااااااااااااا
لقد وقعنا فى الفخ
ههههههههههههههههههههه
انا قلت يا اما هالبس اسود بسبب المنظار
يا اما اقل الخساير هايطمعو فى البندقيه وياخدوها
وتقريبا كده كان معاهم عناصر امن دوله
لان كان معاهم اسلحه شكلها مخيف
ولقيتهم كلهم بيبصو عليا وانا شايل البندقيه بالمنظار وماشى باتمختر فى نص الشارع رايح اجيب اليمامه
واليمامه عماله تفرفر على الارض قريب منهم
وحسيت الجو متكهرب و انهم خلاص هاينادو عليا دلوقت وشكلى هاتبهدل النهارده
طبعا كل الكلام ده حصل فى حوالى خمس ثوانى
قمت انا بادرت بالهجوم عليهم وعملت حركه متهوره وقلت لنفسى زى ماتيجى بقى
كلامى باللون الازرق والظابط بالاحمر
قمت منادى على ظابط من اللى معاهم وقلتلو
لو سمحت ياافندم ممكن سؤال
بتهكم ..تعالالى ياحبيبى تعالالى
ولقيتو مكشر ومش طايق نفسه
قلت ده يوم كحلى باين كده
قمت ماشى ناحيتو وشايل اليمامه وهى بتفرفر فى ايدى الشمال وقلبى فى ايدى اليمين
بادرتو بالكلام وقلتلو بسرعه
ممكن حضرتك تظبطلى البندقيه
البندقيه مش مظبوطه وبتضرب يمين ومش عارف اظبطها
بطاقتك بس الاول كده
اتفضل
بص فى البطاقه واداها لعسكرى والعسكرى اخدها ومشى ناحية العربيه
انت ايه اللى جابك هنا وانت من اسكندريه
باصطاد يمام حضرتك
هو فيه حد بيصطاد الفجر كده
حضرتك ده بيبقى انسب وقت لصيد اليمام الصبح واخر النهار
كل ده هو ماسك البندقيه هو وكام واحد من اللى معاه وعمالين يقلبو فيها شمال ويمين ويلعبو فى بكر المنظار
وانا عمال اقول فى سرى هاتبوظو الظبطه الله يخرب بيوتكو
هههههههههههههههههههه
الظابط اللى جنبو سألنى البندقيه دى بكام
خوفت اقوله على تمنها الحقيقى يطمعو فيها
بــ 1500 ياباشا
وفين اللى انت صايده
اتفضل حضرتك الشنطه اهى
واثناء ماهو بيبص فى الشنطه وطلع الرش وشاف اليمام
العسكرى جه تانى ومعاه البطاقه وقال تمام ياباشا نضيف
قالى يلا خد حاجتك وروح
كنت عايز اقولو طيب حضرتك مش هاتظبطلى البندقيه بقى
هههههههههههههههههههههههه
لكن مسكت نفسى بالعافيه
وقمت واخد البندقيه والشنطه وماشى ومحطتش منطق
لانى لسه مش مصدق انهم سابونى بسهوله كده
وعلى فكره كان ممكن جدا لو مكانوش شافو اليمامه وهى بتقع فى نص الشارع كان ممكن يضربو عليا نار فى المليان على طول بمجرد مايشوفونى شايل البندقيه
لان ساعتها طبعا مكانوش هايلحقو يفكرو هى بندقيه رش ولا نارى
لكن الحمد لله على كل حال
واخدت بعضى وروحت طياره عالبيت طبعا
هههههههههههههههههه
تفاصيل الطلعات
البندقيه جامو رويال وكان عليها منظار بوشنيل 3=9=40 تيكتكال
http://www11.0zz0.com/2013/09/26/13/280826500.jpg (http://www.0zz0.com)
ودى حربايه لقيتها وانا باصطاد وقعدت العب بيها شويه وفى الاخر اطلقت صراحها
http://www11.0zz0.com/2013/09/26/13/683385234.jpg (http://www.0zz0.com)
http://www11.0zz0.com/2013/09/26/13/270276188.jpg (http://www.0zz0.com)
http://www11.0zz0.com/2013/09/26/13/460214790.jpg (http://www.0zz0.com)
الطلعه الاولى
31 سمكه
3 كيلو وشويه
http://www11.0zz0.com/2013/09/26/13/565628305.jpg (http://www.0zz0.com)
http://www11.0zz0.com/2013/09/26/13/567757710.jpg (http://www.0zz0.com)
http://www11.0zz0.com/2013/09/26/13/426800562.jpg (http://www.0zz0.com)
الطلعه التانيه
32 سمكه
3 كيلو ونص
http://www11.0zz0.com/2013/09/26/13/459165481.jpg (http://www.0zz0.com)
http://www11.0zz0.com/2013/09/26/13/451426702.jpg (http://www.0zz0.com)
http://www11.0zz0.com/2013/09/26/13/141647549.jpg (http://www.0zz0.com)
الطلعه التالته لتجربة المنظار
3 حمامه
1 يمامه
http://www11.0zz0.com/2013/09/26/13/441202890.jpg (http://www.0zz0.com)
http://www11.0zz0.com/2013/09/26/13/200603610.jpg (http://www.0zz0.com)
الطلعه الرابعه بتاعة الكمين
7 يمامه
2 حمامه
http://www11.0zz0.com/2013/09/26/13/117087301.jpg (http://www.0zz0.com)
http://www11.0zz0.com/2013/09/26/13/335440736.jpg (http://www.0zz0.com)
http://www11.0zz0.com/2013/09/26/13/980464579.jpg (http://www.0zz0.com)
الطلعه الخامسه
35 سمكه
4 كيلو وشويه
1 فرخة ميه
http://www11.0zz0.com/2013/09/26/13/458860627.jpg (http://www.0zz0.com)
http://www11.0zz0.com/2013/09/26/13/227005235.jpg (http://www.0zz0.com)
http://www11.0zz0.com/2013/09/26/13/415223259.jpg (http://www.0zz0.com)
ونصيحه منى لاصدقائى الصيادين بلاش الخروج للصيد الايام دى
وانا عن نفسى مش هاقدر ابطل خروج برده
هههههههههههههههههههههههههه
والسلام عليكم ورحمة الله

elmasrey123

13-09-26, 04:57 PM

هههههههههه كان بعد ده المفروض تسبلهم اليمام والحمام بالهنا والشفاء

ĴΘĶЄЯ

13-09-26, 05:07 PM

الحمد لله انها جت علي اد كدة
وبالهنا والشفا يا قبطان

TheLegnedkiller

13-09-26, 05:09 PM

بالهنا والشفا يا قبطان

وكويس انها جت علي اد كده والراجل ملطعشي رخم

القبطان المصرى 77

13-09-26, 05:22 PM

هههههههههه كان بعد ده المفروض تسبلهم اليمام والحمام بالهنا والشفاء
والله لو كانو طلبوه مكنتش هاتردد فى انى ادهولهم
هو انا كنت اقدر ارفض اصلا
ههههههههههههههه

القبطان المصرى 77

13-09-26, 05:23 PM

الحمد لله انها جت علي اد كدة
وبالهنا والشفا يا قبطان
الحمد لله ياجوكر
وانا عن نفسى لسه مستغرب ان الموضوع عدى بسهوله كده

القبطان المصرى 77

13-09-26, 05:24 PM

بالهنا والشفا يا قبطان

وكويس انها جت علي اد كده والراجل ملطعشي رخم
الله يهنيك ياباشا
هو بينى وبينك كان شكلو رخم ومش بشوش
بس هما تقريبا كانو مركزين فى حاجه تانيه خالص خارجين عشانها غير البندقيه الرش

big man

13-09-26, 05:31 PM

ربنا ستر هههههه بس انالو منك وهو قالي تعالالي يحبيبي كنت اتبليت ههههههههه

القبطان المصرى 77

13-09-26, 05:36 PM

ربنا ستر هههههه بس انالو منك وهو قالي تعالالي يحبيبي كنت اتبليت ههههههههه
مانا اتبليت ياريس
بس عملت نفسى مش واخد بالى
هههههههههههههههههههههههههه

ابو مروان

13-09-26, 05:45 PM

adel152

13-09-26, 08:01 PM

Hamo.Alex

13-09-27, 03:53 AM

امن دولة :) بص يا عم هاني انت تبوس ايدك شعر ودقن علي رأي اللمبي وتحمد ربنا انة وقعك مع ناس بتتفاهم مش بترمي في البوكس علي طول :) بس انت مالقتش حجة غير ظبطلي النشان يا باشا :) هههههههههه ربنا ستر الحمد لله

هشام سمير

13-09-27, 02:39 PM

وكان فضل الله عليك عظيم
وبعدين يا قبطان . سيماهم على وجوههم وانتا ابن ناس جداً
الف هنا وشفا يا كبير
ومليون تحيه لسمو الاميره :)

القبطان المصرى 77

13-09-27, 02:56 PM

ربنا سترها معاك يا قبطان...عارف لو فيه حد علية حكم وتشابة اسماء معاك كنت اتوكلت على اللة ..هما كشفوا على البطاقة كمبيوتر ودة اكيد امن دولة ......اللى عايز يصتاد يا اخواننا بلاش يمشى فى الشوارع ودة موش هزار ...ولا تلقوا بانفسكم فى التهلكة......تخيل ان اليمامة دى ما وقعتش قدامهم وشافوا وربطوا بينها وبين البندقية؟...تخيل انت داخل عليهم كدا ببندقية وسكوب ....ربنا سترها معاك والله.....احمد ربنا يا قبطان

كلامك كلو تمام يابو مروان
وبجد بجد المفروض فعلا محدش يخرج للصيد اطلاقا الايام دى
الا بقى لو هاتروح تصطاد فى منطقة ريفيه قريبه منك
لكن انا عن نفسى
مش هاقدر
ده ادماااااااااااااااااااااااان

الشمسى

13-09-27, 02:57 PM

حمدالله على السلامة . ربنا سترها معاك
بالهنا والشفا وربنا يباركلك فى سمو الاميرة :)

القبطان المصرى 77

13-09-27, 02:58 PM

حمد الله على سلامتك ياقبطان.
على فكرة مش شرط يكونوا أمن دولة فى الغالب دول من مباحث تنفيذ الاحكام وهما شغالين شغل جامد جدا اليومين دول.
المهم شكلك كده هتعمل شغل بالاميرة اكثر من كيداهم ياباشا.
تحياتى.
لا يا استاذ عادل كان معاهم امن دوله
لان كان فيهم ناس شايله اسلحه اول مره اشوفها مع الشرطه
ده زائد الاجسام الرياضيه واللياقه العاليه اللى كانت باينه عليهم
وبعدين هو انا كل ماحاول انسى كايداهم تيجى حضرتك وتفكرنى تانى بيها وتنكد عليا
هههههههههههههههههههههه

القبطان المصرى 77

13-09-27, 03:00 PM

احييييييييييية امن دولة :) بص يا عم هاني انت تبوس ايدك شعر ودقن علي رأي اللمبي وتحمد ربنا انة وقعك مع ناس بتتفاهم مش بترمي في البوكس علي طول :) بس انت مالقتش حجة غير ظبطلي النشان يا باشا :) هههههههههه ربنا ستر الحمد لله
هما شكلهم كانو مركزين فى نوعيه معينه من الناس ياكبير ومش فاضيين للى زى حلاتى
وبعدين الحته بتاعة ظبطلى البندقيه دى هى اللى جت على لسانى ساعتها
ملحقتش افكر فى حاجه تانيه
ههههههههههههههههههههههههه
وبعدين شكلها جابت نتيجه اهو

القبطان المصرى 77

13-09-27, 03:01 PM

وكان فضل الله عليك عظيم
وبعدين يا قبطان . سيماهم على وجوههم وانتا ابن ناس جداً
الف هنا وشفا يا كبير
ومليون تحيه لسمو الاميره :)
ده انت اللى كلك زوق ولسانك بينقط عسل ياهشام بيه
ربنا يخليك لينا يارب
صباحك زى السكر

القبطان المصرى 77

13-09-27, 03:02 PM

حمدالله على السلامة . ربنا سترها معاك
بالهنا والشفا وربنا يباركلك فى سمو الاميرة :)

الله يسلم حضرتك
ونتمنى الستر دايما من ربنا
تحياتى لحضرتك

محمد خلف

13-09-27, 11:25 PM

تصدق لسه بادئ ابطل ضحك
طبعا الطلعه جباره كالعاده
و الموقف مالوش حل كالعاده بردو
انا هرفع الموضوع عالبيدج عشان اسيحلك
ههههههههههههههههه
حبيبي يا هاني

M.SHADY

13-09-27, 11:55 PM

و الله انا مش عارف اقولك ايه يا قبطان . هو انت موعود يا ابنى . هاهاهاهااهاهاها
ربنا يحميك و يكفيك شر امن الدوله

القبطان المصرى 77

13-09-28, 06:18 PM

تصدق لسه بادئ ابطل ضحك
طبعا الطلعه جباره كالعاده
و الموقف مالوش حل كالعاده بردو
انا هرفع الموضوع عالبيدج عشان اسيحلك
ههههههههههههههههه
حبيبي يا هاني
هههههههههههههههههههههه
اضحك يامحمد بيه اضحك
محدش واخد منها حاجه
ربنا يديمها علينا نعمه
اللهم امين

القبطان المصرى 77

13-09-28, 06:20 PM

و الله انا مش عارف اقولك ايه يا قبطان . هو انت موعود يا ابنى . هاهاهاهااهاهاها
ربنا يحميك و يكفيك شر امن الدوله
قول لا اله الا الله ياباشا
وربنا يديمها علينا نعمه المواقف دى
بس اهم حاجه ماتكونش مؤذيه

Mohamed zeid

13-09-29, 10:51 AM

حمداً لله على السلامه ياجميل ،، والحمد لله ربنا سترها ربنا يحميك ويكفيك شرهم

القبطان المصرى 77

13-09-29, 08:59 PM

حمداً لله على السلامه ياجميل ،، والحمد لله ربنا سترها ربنا يحميك ويكفيك شرهم

الله يسلم حضرتك
وربنا يكفينا كل شر
سواء داخليه او غيره
احسن دول قرصتهم والقبر

Ahmedsaad68

13-10-02, 12:15 AM

هههههههه انت المفروض كنت قلت ليه فين الكارنيه اول ما يقولك فين البطاقة وآول ما يكشر قله فين البوكس ولا القسم قريب

shadymageed

13-10-02, 09:26 AM

القبطان المصرى 77

13-10-02, 03:27 PM

هههههههه انت المفروض كنت قلت ليه فين الكارنيه اول ما يقولك فين البطاقة وآول ما يكشر قله فين البوكس ولا القسم قريب
هههههههههههههههههههههههه
ماهو ده اللى كان ناقص بقى
ساعتها كنتو هاتنسو حاجه اسمها القبطان يظهر عالشاشه تانى

القبطان المصرى 77

13-10-02, 03:28 PM

ههههههههههههههههههه حمد الله على السلامه بجد اسلوبك فى الكلام حسسنى بسسبنس الموضوع وكنت بتخيل اللى حصل وكان قلبى بيدق هههههههههههههههه المهم حمد الله على السلامة وكفارة وبالهناء والشفاء واحلى صباح على اجدع رجاله رجالة اسكندرية
الله يسلمك ياباشا
وسلامة قلبك من الدقات العاليه ياكبير
ههههههههههههههههههههههه
مسائك زى العسل بقى

أبو معاذ

13-10-04, 05:32 AM

القبطان المصرى 77

13-10-04, 09:02 PM

الحمد لله على سلامتك يا قبطان ، نحن السابقون وأنتم اللاحقون

ومش شرط يكون أمن الدولة هما اللي شايلين أسلحة متطورة ، لأن غالبا اللجان دلوقتي بتكون خليط من جميع الأجهزة بما فيهم مخابرات حربية وتنفيذ أحكام ، ومباحث ..

سيبك انت .. أخوك خبرة .. وبالهنا والشفا
الله يسلمك يابو معاذ
تصدق والله كنت لسه هاتصل بيك بكره عشان اطمن عليك
لانك بقالك كام يوم مختفى
يارب تكون بخير

BAYADA

13-10-07, 08:32 AM

ربنا يسترها معاك اليومين دول ليهم حق يقلقوا

القبطان المصرى 77

13-10-07, 11:59 AM

ربنا يسترها معاك اليومين دول ليهم حق يقلقوا

الحمد لله على كل حال
مشكور لمرورك الكريم

محمد خلف

13-10-07, 05:19 PM

غيرت الاسم ليه يا هاني ؟

القبطان المصرى 77

13-10-07, 08:39 PM

غيرت الاسم ليه يا هاني ؟
زهقت من القديم ياكبير
والتغيير حلو ومطلوب برده
وخصوصا لو عليك تار
ههههههههههههههههههههه

ماجد مجدي

13-10-08, 06:14 PM

نفسى اكون صياد كبير زيك
ربنا يبركلك ويزيدك

محمد خلف

13-10-08, 06:41 PM

تار مين ؟
قوللي بس
حد يقدر يبصلك و احنا موجودين ؟

القبطان المصرى 77

13-10-09, 12:05 PM

نفسى اكون صياد كبير زيك
ربنا يبركلك ويزيدك
اشكرك جدا استاذ ماجد
بس انا مش كبير ولا حاجه انا على قدى
وباتعلم من كل الناس اللى هنا كل يوم حاجه جديده
واهمها الاخلاق

القبطان المصرى 77

13-10-09, 12:05 PM

تار مين ؟
قوللي بس
حد يقدر يبصلك و احنا موجودين ؟

هههههههههههههههههههه
حبيبى يامحمد ياساندنى ومقوينى

ماجد مجدي

13-10-09, 03:39 PM

تواضعك لوحده كفايه يا كبييير ما شاء الله عليك

صياد سورى

13-10-10, 05:00 PM

بالعافيه والهنا اخويا
ماكان ما يسرى يعفى ويشفى اخويا العقرب الاحمر

القبطان المصرى 77

13-10-10, 07:39 PM

تواضعك لوحده كفايه يا كبييير ما شاء الله عليك
تسلم يا افندم وربنا يوفقنى دايما فى انى اكون عند حسن ظنكم باستمرار

القبطان المصرى 77

13-10-10, 07:40 PM

بالعافيه والهنا اخويا
ماكان ما يسرى يعفى ويشفى اخويا العقرب الاحمر

الله يهنيك اخى الكريم
تحياتى للشعب السورى الحبيب