المساعد الشخصي الرقمي

مشاهدة النسخة كاملة : موضوع شامل عن صيد البوري


الصيااد
10-12-06, 12:45 PM
اسماء البوري

البوري الصغير: جران

البوري المتوسط: بوري

البوري الكبير: كمبوت

اماكن تواجد البوري

البوري بيتواجد في المياة متوسطة العمق يعني من 3 ل 6 متر تقريبا

وأفضل الأماكن،،

شرق التفريعه

الحاجز الغربى

المواني و الحواجز بالاسكندرية

ميناء الدخيلة

ميناء ابو قير

ميناء الاسكندرية

الميناء الشرقي

حجر ستيفن ببورفؤاد

حجر سعيد ببورفؤاد

وطبعا كوبرى الجميل

معظم المواني و الحواجز بالبحر الابيض المتوسط

والبوري عادة بيعيش في مجموعات كبيرة

وعلى فكرة البوري من الاسماك اللي بتعيش في المية الحلوة والمالحة وفيه معلومة سمعتها ومش متاكد صحتها
ان البوري بيهاجر من النيل للبحر علشان يبيض
بس احنا حنتكلم عن صيد البوري في البحر لان عمري ما طلعت بوري من المية الحلوة
موسم صيد البوري
البوري موجود في المية طول السنة بس بيقل جدا في الصيف والشتا يعني لما المية تسخن قوي ولما تبرد قوي


طرق صيد البوري



البوري عادة بنصطاده بالبوصة العادية وده بيكون بطريقتين

الصيد بالفلة او الصيد بالربع (المشنقة)

صيد البوري بالفلة

البوري من الاسماك الحساسة جدا علشان كده لازم نختار وقت الصيد وعدة الصيد المناسبة بمعنى
صيد البوري لازم يكون بهدوء شديد ولو بتصطاد بالنهار لازم تختار مكان ميكونش فيه خيالك على المية يعني
ماتكوش الشمس في ضهرك علشان ضلك مايجيش على المية وعلشان كده انسب وقت لصيد البوري
بيكون من بعد المغرب لغاية الفجر
الشعر الاساسي مش اكتر من 25
شعر الفروع من 15 ل 20
السلاح 25 ل 20
صيد البوري بالفلة يكون طعمك عجينة ومش اي عجينة لازم تكون طرية وحقولكم ازاي بنعملها في الاخر
بالنسبة لشعر الفروع بيكون قصير يعني فرع 25 سم والتاني 15 او 20 سم
العمق اللي بتصطاد علية يكون نص عمق المية
اطعم العجينة وارمي xxxxxxxxxxxxxxx
غلط غلط غلط
احنا قلنا ان البوري حساس جدا لاي حركة غريبه
لو انت رميت زي ما بترمي يبقى مش حتلاقي ولا بوراية في المية
يبقى احنا لازم ننزل الفلة بالراحة في المية

توكلنا على الله
البوري مش بياكل زي باقي السمك
البوري فيه ناس بيقولو انه بيلحس الطعم وده طبعا مش صحيح لانه بياكل ولكن لان بقه فتحته لفوق وبقه
صغير جدا فبيسحب من الطعم حتت صغيرة جدا وعلشان كده لما بياكل بنلاقي ان الفلة مش بتغمز
بنلاقي ان الفلة بتتحرك حركة بسيطة احنا بنقول انه بيخنق الفلة
لما السمكة تاكل معاك اوعى ترد فيها جامد وده لسببين
اولا لاننا قلنا ان اي حركة غريبة حتخلي السمكة تفزع
وثانيا لان بق البوري ضعيف لو اديتة واحدة جامده شوية حتلاقي بقة بس هو اللي طالعلك

صيد البوري بالربع (المشنقة)

وهي بتكون
شعر اساسي 25
شعر فروع 15 ل 20
الصيد بدون فلة
الشعر الاساسي طولة نص عمق المية
السلاح كبير شوية يعني 6 او 5
وبيكون عدد من 5 ل 7 سنانير بنعمل 3 طولهم حوالي 10 سم والباقي طولهم حوالي 5 سم
ونحط رصاص شريط حوالين مكان توصيل السنانير
الصيد بيكون بعجينة ناشفة
وحنتكلم عنها بعدين
بتحط العجينة على الرصاص وبتنزلها المية بالراحة لغاية ما اللبلوب بتاع البوصة يوصل اول المية
في الطريقة دي البوري هو الي بيوقع نفسة وعلشان كده سموها المشنقة

وممكن نستخدم طعم تاني مع الطريقة دي وهو السردين
ايوه السردين

تشيل راس السردينة وتفتحها من بطنها وتعلقها على السناير يعني تخلي السنانير كلها جوة بطن السردينة
وتغرزها فيها من جوة
وربنا يكرمكم بسمكة بوري من اللي بياكل السردين
اقل سمكة تعدي الكيلو ونص

دلوقتي نيجي لصيد البوري بالبوصة والماكينة

محدش يستغرب
بنصطاد البوري بالماكينة وله طريقة واحدة اسمها السندويش

ودي بتكون كالاتي
الشعر الاساسي 40
شعر الفروع 30 او 35 وده لازم لان السمك اللي بيضرب عليك سمك تقيل
السلاح بيكون حوالي من 15 ل 25 سنارة نمرة 20 او ممكن 18
بنربط السنانير كلها طول واحد اللي هو حوالي 15 سم
وكلهم يتوصلو في الشعر الاساسي من نفس المكان اللي هو فوق الرصاصة بحوالي 30 سم
الطعم بيكون عيش بلدي اسمر
بنقطع الرغيف شرايط عرضها حوالي 5 سم وبنلفه على شكل اسطوانة بحيث يكون الجزء الداخلي للرغيف
هو اللي برة
ونجيب استيك عادي من بتاع الفلوس ده ونثبت بيه العيش على الشعر الاساسي جنب وصلة الفروع
ونجيب السنانير كلها ونغرزها في العيش بشكل عشوائي ونرمي ونسيبها
وان شاء الله حتلاقي البوصة دي بتعمل زلزال تعرف ان معاك بوراية لا تقل عن اتنين كيلو ونص او تلاتة كيلو


طريقة التحضير لصيد البوري

طريقة التحضير للبوري تنقسم لحاجتين

طرق عمل العجينة

اولا العجينة الطرية

كوب دقيق - مية حسب الاحتياج – سكر
حنحط الدقيق على النار ونقلبة لغاية ما يسمر ونضيف له معلقة سكر صغيرة مش مليانة وبعد كده نضيف المية
شوية شوية لغاية ما تلاقي القوام بقى متماسك بيبقى قوامها عامل زي قوام الشحم اللي بنشحم بيه المكن
سيبها تبرد وحطها في علبة
بس لازم لاحظ ان تطعيم العجينة الطرية عايز خبرة لانك لازم تطعمها ببقك بمعنى انك بتاخد حتة عجينة صغيرة
ببقك وتحط السنارة في بقك وتلف العجينة على السنارة بلسانك فالغلطة حتلاقي انك اصطدت نفسك في الاخر

ثانيا العجينة الناشفة

ودي بتكون للصيد بالربع وهي عبارة عن عيش بلدي عادي جدا وبنبلة ونعجنة بادينا ونسيبة جنبنا في السمش
او الهوا ولو احتاج مية تاني نديلة وده تطعيمة ساهل جدا لانك بتاخد حتة وتحط الرصاصة في نصها وتلف العجينة
عليها بايدك زتاكد عليها زي ما تكون بتعمل كفتة كده
تاني حاجة في التحضير لصيد البوري
تحضير المرمى
وهو انك لازم تجمع السمكة الاول وده بيكون بالتزفير
والتزفير بيكون بعيش مبلول في جردل مية لغاية نا يفرول وتعملة كور صغيرة وترمية في المية
والتزفير للبوري شئ اساسي لان البوري بيتجمع على ريحة العيش في المية
وكمان لازم تلاحظ ان مع كل سمكة تطلعها لازم ترميلك كورة او اتنين تزفر بيهم علشان تثبت السمكة تحت منك
التزفير بيكون قبل ما تبتدي تصطاد بفترة ممكن توصل ساعتين او تلاتة ويكون متواصل علشان تقدر تجمع اكبر
كمية من البوري


http://img580.imageshack.us/img580/3338/c863740d51tr21.jpg

Mo7a
10-12-06, 01:04 PM
مش بس التزفير بالعيش في طريقة تانية - بالكنسة بتاعت الفرن - تعجن بالرمل الاصفر - تعمل الكورة زي ما ذكرت حضرتك والطريقة المنشقة دي ممكن تفلت من سمك كتير لانها عبارة عن هلبين فوق بعض او سنارتين واسفللهم هلب - يستحسن الصيد بالفلة و سنار مقاس 8 ملوي - حيث يساعدك علي تتطليع السمك في اقرب وقت لان البوري يفزع في الماء عند طلعوة فبذلك بتكون السمكة باعلة السنارة وهذا يعطك براح في مسايسة السمك في طلعوعها

الصيااد
10-12-06, 01:19 PM
مش بس التزفير بالعيش في طريقة تانية - بالكنسة بتاعت الفرن - تعجن بالرمل الاصفر - تعمل الكورة زي ما ذكرت حضرتك والطريقة المنشقة دي ممكن تفلت من سمك كتير لانها عبارة عن هلبين فوق بعض او سنارتين واسفللهم هلب - يستحسن الصيد بالفلة و سنار مقاس 8 ملوي - حيث يساعدك علي تتطليع السمك في اقرب وقت لان البوري يفزع في الماء عند طلعوة فبذلك بتكون السمكة باعلة السنارة وهذا يعطك براح في مسايسة السمك في طلعوعها

مع كامل احترامي لكلامك الصيد بطريقة المشنقة من احسن الطرق لصيد البوري الكبير اما الصيد بالفله ينفع للبوري الصغير او الجران ثانيا احسن تزفير بالعيش البلدي لان السمك بيفضله كتير وايضا لازم تعرف ان احنا مبنستخدمش الهلب في طريقة المشنقه بنستخدم سنانير بتكون افضل مع كامل احترامي لرايك لكن انا صياد بوري من حوالي 25 سنة يعني ممكن تقول خبرة والحمد لله متخصص في صيد البوري لاني بعشق صيده ولا احب اكله

Mo7a
10-12-06, 01:29 PM
جربها - احنا بقطع لحمة في الموسم بالطريقة الي بقولك عليها - وكل واحد وكل بلد ليها طريقة - شكرا علي معلومات القيمة

الصيااد
10-12-06, 01:33 PM
جربها - احنا بقطع لحمة في الموسم بالطريقة الي بقولك عليها - وكل واحد وكل بلد ليها طريقة - شكرا علي معلومات القيمة

الله ينور كل شيخ وله طريقة لو انت من بورسعيد صحيح نسيت تقول طريقة التشليط كل البورسعيدية بيستخدموها من علي كوبري الجميل ولا ايه يا زعيم

super
10-12-06, 11:29 PM
الله ينور كل شيخ وله طريقة لو انت من بورسعيد صحيح نسيت تقول طريقة التشليط كل البورسعيدية بيستخدموها من علي كوبري الجميل ولا ايه يا زعيم

السلام عليكم
شكرا يا صياد على المعلومات القيمة واحنا فى بورسعيد اوقات بنستخدم الهلب فى البورى
مقاس 14 فرنساوى يبقى مناسب بالعجينة الطرية
سامح يقصد طريقة اخرى اسمها الشاكوش سنارتين تحتهم هلب كبير نوعا بنستخدمها فى صيد
السيجان وهى طريقة ناجحة جدا مع طعم الجمبرى الصغير والبعض بيستخدم فيها العجين لصيد البورى بس ما بتبقاش مجدية اوى
وهناك طريقة الهز بالدود لصيد الطوبارة
تحياتى لك .

هشام سمير
10-12-08, 01:54 PM
طبعاً يا باشا
مش غريب على غطاس وصياد محترف انه يطلع منه المعلومات الجامدة دى

الصيااد
10-12-08, 01:58 PM
طبعاً يا باشا
مش غريب على غطاس وصياد محترف انه يطلع منه المعلومات الجامدة دى

تسلم يا ايتش والله كلك ذوق يا جميل

عاشق القنص
10-12-08, 08:28 PM
بسم الله مشاء الله موسوعه متكامله
تسليم ياصياد على الطرح الرائع
واحب اضيف مكان مميز جدا فى صيد البورى وهو البحيرات المره(فايد ابوسلطان فناره الى ان توصل السويس)
واحنا بنصطاد البورى الكمبوت من المجرى بتاع السفن بسم الله مشاء الله احجام جامده
بشكرك للمره التانيه ولك من كل الاحترام والتقدير
تحياتى

الصيااد
10-12-08, 09:15 PM
بسم الله مشاء الله موسوعه متكامله
تسليم ياصياد على الطرح الرائع
واحب اضيف مكان مميز جدا فى صيد البورى وهو البحيرات المره(فايد ابوسلطان فناره الى ان توصل السويس)
واحنا بنصطاد البورى الكمبوت من المجرى بتاع السفن بسم الله مشاء الله احجام جامده
بشكرك للمره التانيه ولك من كل الاحترام والتقدير
تحياتى

شرفني مرورك الكريم يا باشا وشكرا علي استكمال المعلومات علي فكرة صيد البوري محتاج زكاء و صبر وحرص صيد البوري فن بجد ولو انت صياد بوري تعرف تصطاد اي نوع سمك اخر

الجزار
10-12-09, 09:03 PM
مع اني مش فاهم نص الكلام اللي قولته بس تسلم ياباشا ونبقي نخرج مع بعض في الاجازه

الصيااد
10-12-10, 12:39 AM
ياباشا انت تامر و يشرفني تزور اسكندرية وان شاء الله ننزل سوا انت تأمر

bassem nawar
11-03-07, 09:54 PM
موضوع ميه ميه يا باشا بس لو سمحت ممكن طريقة عمل الربع او المشنقة بالصور او بالفيديو ؟؟؟