طلعه حزينه ( انا اسف ياهدهد )

[القبطان المصرى 77]

السلام عليكم ورحمة الله وبركاته
طلعه ليليه سريعه
وبدون الدخول فى تفاصيل كتير
كان قاعد عندى واحد معرفه فى المنطقه اللى انا شغال فيها
صاحب توكتوك
كان جابلى بندقيه نوريكا قبل كده اظبطهالو
وفى وسط الكلام قاللى عاوز اطلع معاك طلعه صيد بالليل
وقاللى انو يعرف مكان حلو فيه شجر جزورين كتير
واقنعنى اننا نخرج سوا
وبالفعل خرجنا حوالى تلات ساعات صيد من بعد صلاة العشاء
اول امبارح
وبصراحه ودانى اماكن ماعرفش فيها حاجه
وخصوصا اننا كنا بالليل كمان ومش شايف السكك
لكن عموما هى كانت اماكن زراعيه برده
فى مدينة النوباريه
وبدأت صيد
انا كنت باضرب وهو ينضف ويرييش اليمام ورايا
والحمد لله ربنا كرم بحصيله حلوه
لكن اللى زعلنى وعكنن عليا اوى
انى شوفت يمامه واقفه على ارتفاع كبير
والرؤيه كانت ضعيفه شويه لأن الكشاف كان بدأ يضعف
نشنت وضربتها وبعد ماوقعت اتصدمت لأنى اكتشفت انها كانت هدهد مش يمامه
واضايقت جدااااااا لدرجة انى مارضتش اضرب حاجه تانى واستكفيت على كده
واللى زعلنى اكتر انو نازل صاحى
ومبقتش عارف اعمل ايه
وصعبان عليا اضربه طلقه تانى عشان اريحه
قمت واخده معايا وقلت يمكن اعرف اعالجه ولا حاجه
لكن مع الاسف معرفتش اعملو حاجه لأن الطلقه كانت جايه فى مقتل
ومكملش معايا شويه صغيرين ومات
http://www5.0zz0.com/2012/12/22/08/688621059.jpg (http://www.0zz0.com)
ربنا يسامحنى
ده الفيديو الاول
http://www.youtube.com/watch?v=jBZNn481V7k&feature=youtu.be
..
وده فيديو للحصيله
http://www.youtube.com/watch?v=YpUUBvDfJ2k&feature=youtu.be
..
وادى صور الطلعه
http://www5.0zz0.com/2012/12/22/08/409257419.jpg (http://www.0zz0.com)
http://www5.0zz0.com/2012/12/22/08/589512533.jpg (http://www.0zz0.com)
http://www5.0zz0.com/2012/12/22/08/810794946.jpg (http://www.0zz0.com)
http://www5.0zz0.com/2012/12/22/08/480303322.jpg (http://www.0zz0.com)
http://www5.0zz0.com/2012/12/22/08/110555314.jpg (http://www.0zz0.com)
http://www5.0zz0.com/2012/12/22/08/418771149.jpg (http://www.0zz0.com)
السلاح المستخدم/كرال
نوع الرش/رمايه مصرى
29 رشه تم ضربهم
3 خطأ
25 يمامه
1 هدهد بالخطأ
25 يمامه الحصيله النهائيه
وصدقونى
فرق كبير اوى بين انك تضرب حاجه ربنا محللهالك ومشروعه
وبين انك تضرب حاجه غير مشروعه
والسلام عليكم ورحمة الله وبركاته

[omarara]

مع الاسف الموضوع ده حصل معايا الاسبوع اللى فات بس مش انا اللى ضربته ابن عمى كان فاكره يمامه
ربنا يسامحنا بقى :(

[tarik el]

ربنا يبارك فيك
http://www.egyhunt.net/showthread.php?t=36721

[Hamo.Alex]

بسم الله ما شاء الله طلعة حلوة بس انت مش واخد بالك ان دة هدهد وانت من طبيعتك انك مش بتضرب حاجة مش عارفها او محرم ضربها !! يعني مش قاصد واكيد ربنا هايسمحك ................ انا ضميرك يا قبطاااااااااااااااااااااان هعهعهعهعههع

[moorey]

بسم الله ما شاء الله

طلعه موفقه كالعاده و اكيد بخصوص الهدهد ربنا هيسمحك علشان انت مش قاصد

[القبطان المصرى 77]

مع الاسف الموضوع ده حصل معايا الاسبوع اللى فات بس مش انا اللى ضربته ابن عمى كان فاكره يمامه
ربنا يسامحنا بقى :(
هو بينى وبينك انا كل ماطلع باشوف منهم كتير اوى وبالذات بالليل
وطبعا كنت باتجنبهم
لكن المره دى مكنتش شايف غير صدره بس وهو طبعا صدره شبه اليمام جدااااااااااااا
ماعلينا
ربنا يسامحنا زى مانت قلت

[القبطان المصرى 77]

بسم الله ما شاء الله طلعة حلوة بس انت مش واخد بالك ان دة هدهد وانت من طبيعتك انك مش بتضرب حاجة مش عارفها او محرم ضربها !! يعني مش قاصد واكيد ربنا هايسمحك ................ انا ضميرك يا قبطاااااااااااااااااااااان هعهعهعهعههع

ههههههههههههههههههههههه
اهلا بيييييييك ياضميرى
بس مع الاسف انا لما ضرته كنت مقتنع ملييييييييييون فى الميه انو يمامه
لان صدره شبه صدر اليمام بالظبط

[القبطان المصرى 77]

بسم الله ما شاء الله

طلعه موفقه كالعاده و اكيد بخصوص الهدهد ربنا هيسمحك علشان انت مش قاصد

حبيبى يامور
ايوه كده خليك جنبى وارفع من معنوياتى شويه
هههههههههههههههه

[القبطان المصرى 77]

ربنا يبارك فيك
http://www.egyhunt.net/showthread.php?t=36721
ربنا يكرمك يا استاذ طارق

[MBadr]

تسلم ايدك وطلعه موفقه يا قبطان معلش الخطأ وارد ومادام خطأ مش مقصود ان شاء الله ربنا يسامحك
قال رسول الله صلى الله عليه وسلم رفع عن امتى الخطأ والنسيان وما استكرهوا عليه

[tarekabasy]

ماتزعلش يا قبطان اكيد دا كان رزق قطة او فار او هوهو فامتزعلش يا باشا كل واحد بياخد رزقة.......

[القبطان المصرى 77]

تسلم ايدك وطلعه موفقه يا قبطان معلش الخطأ وارد ومادام خطأ مش مقصود ان شاء الله ربنا يسامحك
قال رسول الله صلى الله عليه وسلم رفع عن امتى الخطأ والنسيان وما استكرهوا عليه
صدق رسول الله صلى الله عليه وسلم
ربنا يباركلك استاذى الفاضل على نقلك للحديث
تحياتى

[القبطان المصرى 77]

ماتزعلش يا قبطان اكيد دا كان رزق قطة او فار او هوهو فامتزعلش يا باشا كل واحد بياخد رزقة.......

اكيد طبعا ياطارق بيه كلامك مظبوط
شاكر ليك مداخلتك الكريمه يابرنس

[tarekabasy]

صحيح يا ريت تبعتلى رقمك على الخاص يا قبطان عشان عاوز اسئلك على حاجة

[تامر نور الدين]

انا بدعيلك ان ربنا يغفرك خطأك الغير مقصود اخى القبطان .وهون عليك اخى لعل هذا الهدهد ارتكب جريمه ما وكان هذا عقابه . هههههههههه هون عليك اخى.
سامحنى على التطفل وانى علقت بدون اذن حيث انى حديث هنا.

[ابو مروان]

يا قبطان انت قلبك قلب خساية_ههههههه_باهزر طبعا.......الصيد رياضة الملوك لان الملوك يمتازون بالنبل والاخلاق العالية.......بمناسبة الهدهد هاحكيلك حكاية.....كان عندى بندقية رمسيس ييجى من عشرين سنة وقعدت معايا فترة طويلة....كنت باصتاد فى يوم وكل لما اضرب عصفورة الرشاية ماتجيش ناحيتها بمتر والاقيها تنفض ريشها وتطير الحكاية دى قعدت اكتر من ساعتين تلاتة ....الرش ما بيقربش من العصافير اظبط النيشان يمين وشمال واضرب مافيش فايدة حسيت ان الرشاية ما بتخرجش اساسا من البندقية ...جالى حالة ياس ورزعت البندقية فى الارض من الزعل......ززالمهم لقيت هدهد على سور على بعد 20او 25 متر ...عمرت وقولت اجرب علية وانا متاكد مليار % ان الرشاية موش جاية فية.....واضرب....بووووووم.....الرشاية تلبس فى دماغة وينزل مفرفر........يالهوى على الزعل يمكن كرهت الصيد.....وفعلا انت بتكون محتار تعمل اية ...تدبحة؟ ما ينفعش......تسيبة صاحى ..بيتعذب.......ما يجيلكش قلب تضربة رشاية الرحمة.......ومن بعدا لا يمكن اضرب على حاجة ما بتتاكلش ولو حتى على بعد 100 متر............بعد الموضوع دة بفترة كنت باصتاد وسط البيوت كدا ولقيت مكان فية هداهد طبعا استحالة اضرب اتعلمت من الدرس ...لقيت اتنين ستات جايين بيقولولى يا شاطر تعرف تصتاد الهدهد دة؟؟؟؟ انا استغربت وقولتلهم بس دة ما بيتاكلش.....قالو احنا عارفين بس شكلك ما بتعرفش تضرب ...نشن كدا؟.......انا ما رضيتش قالو هانديك فلوس بس اضرب واحد عشان احنا عايزينة.........سيبتهم ومشيت.........زوسالت عن الموضوع دة وعرفت ان بعض الستات بياخدو راس الهدهد ويعملوا بيها حجاب للمحبة...هههههههههه سحر يعنى...يا ولاد اللذينة

[the pest sniper]

صيد موفق و ان شاء الله ربنا هيسمحك

[Mohannad01]

احنا آسفين يا هدهد هههههههه
إن شاء الله ربنا يغفر لك خطأك لأن الأعمال بالنيات وانت زي ما قلت نيتك تضرب يمامة

وبالهنا والشفا بقية الصيد اللي مش هداهد :cuisin:

[القبطان المصرى 77]

صحيح يا ريت تبعتلى رقمك على الخاص يا قبطان عشان عاوز اسئلك على حاجة

تم ياطارق بيه

[القبطان المصرى 77]

انا بدعيلك ان ربنا يغفرك خطأك الغير مقصود اخى القبطان .وهون عليك اخى لعل هذا الهدهد ارتكب جريمه ما وكان هذا عقابه . هههههههههه هون عليك اخى.
سامحنى على التطفل وانى علقت بدون اذن حيث انى حديث هنا.
ههههههههههههههههههه
ياباشا ولا يهمك
انت دمك زى العسل
واهلا بيك بين اخواتك واهلك
صباحك زى الورد

[القبطان المصرى 77]

يا قبطان انت قلبك قلب خساية_ههههههه_باهزر طبعا.......الصيد رياضة الملوك لان الملوك يمتازون بالنبل والاخلاق العالية.......بمناسبة الهدهد هاحكيلك حكاية.....كان عندى بندقية رمسيس ييجى من عشرين سنة وقعدت معايا فترة طويلة....كنت باصتاد فى يوم وكل لما اضرب عصفورة الرشاية ماتجيش ناحيتها بمتر والاقيها تنفض ريشها وتطير الحكاية دى قعدت اكتر من ساعتين تلاتة ....الرش ما بيقربش من العصافير اظبط النيشان يمين وشمال واضرب مافيش فايدة حسيت ان الرشاية ما بتخرجش اساسا من البندقية ...جالى حالة ياس ورزعت البندقية فى الارض من الزعل......ززالمهم لقيت هدهد على سور على بعد 20او 25 متر ...عمرت وقولت اجرب علية وانا متاكد مليار % ان الرشاية موش جاية فية.....واضرب....بووووووم.....الرشاية تلبس فى دماغة وينزل مفرفر........يالهوى على الزعل يمكن كرهت الصيد.....وفعلا انت بتكون محتار تعمل اية ...تدبحة؟ ما ينفعش......تسيبة صاحى ..بيتعذب.......ما يجيلكش قلب تضربة رشاية الرحمة.......ومن بعدا لا يمكن اضرب على حاجة ما بتتاكلش ولو حتى على بعد 100 متر............بعد الموضوع دة بفترة كنت باصتاد وسط البيوت كدا ولقيت مكان فية هداهد طبعا استحالة اضرب اتعلمت من الدرس ...لقيت اتنين ستات جايين بيقولولى يا شاطر تعرف تصتاد الهدهد دة؟؟؟؟ انا استغربت وقولتلهم بس دة ما بيتاكلش.....قالو احنا عارفين بس شكلك ما بتعرفش تضرب ...نشن كدا؟.......انا ما رضيتش قالو هانديك فلوس بس اضرب واحد عشان احنا عايزينة.........سيبتهم ومشيت.........زوسالت عن الموضوع دة وعرفت ان بعض الستات بياخدو راس الهدهد ويعملوا بيها حجاب للمحبة...هههههههههه سحر يعنى...يا ولاد اللذينة
هههههههههههههههههههه
انت حبيبى يابو مروان والله
وعلى فكره الستات اللى تطلب حجات غريبه دى تعرف على طول انها بتعمل بيها اعمال
لأن قبل كده برده واحده قالتلى انا عايزه غراب اسود
بس انا كبرت دماغى لانى عارف هى هاتستخدمها فى ايه عشان ما اشيلش معاها ذنب

[القبطان المصرى 77]

صيد موفق و ان شاء الله ربنا هيسمحك

تسلم ياجميل
شرفنى مرورك والله

[القبطان المصرى 77]

احنا آسفين يا هدهد هههههههه
إن شاء الله ربنا يغفر لك خطأك لأن الأعمال بالنيات وانت زي ما قلت نيتك تضرب يمامة

وبالهنا والشفا بقية الصيد اللي مش هداهد :cuisin:

ياصبااااااااااح العسل يامهند
هو بالفعل تم اكل كل اليمام ومش باقى غير 6
اتفضل معانا بقى
هههههههههههههههههههههه

[ابو مروان]

اة فعلا يا قبطان................كانو عايزينة عشان اعمال وكا ولنا سالت الناس فهمونى انا كنت صفير 15 سنة كدا