استفسار عن شراء بندقه صيد

[ellebodey]

السلام عليكم ورحمه الله وبركاته..
اخواني اعضاء المنتدي المميز هذا ... جزاكم الله كل خير علي المجهود اللي انتو عاملينه في المنتدي
كنت بسأل عن افضل انزاع بنادق الصيد في مصر اللي ممكن اجيبها وما توجعش دماغي بعد كده .. ويكون سعرها معقول ..
انا عندي بندقيه رمسيس 2 بس انتاج قديم.. كانت بتاعه والدي بس حالتها جيده..
تنصحوني بأيه..
وجزاكم الله عني خيرا :)

[ashraf_f]

امكانياتك المادية ايه

[sniperman89]

الكرال عاملة 1200 وشديدة وسعرها معقول على قوتها بس ظبطها الاول
والله اعلم :)

[محمود محمد حمزة]

ياريت تكلمنى يا باشا وان شاء الله تسمع اخبار حلووووووه بالنسبة ليك 01001998759

[ellebodey]

السلام عليكم .. طبعا جزاكم الله خيرا ..
اخي محمود حمزه .. ان شاء الله هكلمك ..
وبالنسبه للامكانيات الماديه ففي حدود 1300 جنيه مصري..
بس للعلم انا عمري نا اصدت ببندقيه قبل ذلك..
لكم مني وافر الاحترام والتقدير..
اخوكم عبدالله نبيل ..
مهندس ميكانيكا انتاج جامعه حلوان

[ellebodey]

انا اسمع عن الكرال التركي ..ايه رايكم تنصحوني بيها ولا ايه
وسعرها كام دلوقتي ؟؟

[ellebodey]

اه وعايز اعرف هيه الكرال ديه فعلا صناعه تركي ..وبينزل منها نمره 1 ولا نمره 2 والافضل اجيب ايه 1 ولا 2
ده لو انتو ترجحوهالي يعني ان شاء الله
جزاكم الله كل خير

[ِAhmedAlaa2007]

اه وعايز اعرف هيه الكرال ديه فعلا صناعه تركي ..وبينزل منها نمره 1 ولا نمره 2 والافضل اجيب ايه 1 ولا 2
ده لو انتو ترجحوهالي يعني ان شاء الله
جزاكم الله كل خير

طبعا اكتر واحد يفيد حضرتك الكبير عادل عبده استاذنا ومعلمنا وملك الكرال
بس علي حد علمي
الكرال فعلا صناعة تركي
نمرة 2 احسن بكتير من نمرة 1 لان نمرة 1 بتسرق الطير (( بما انك عمرك ما اصطدت فاكيد هتقول يعني ايه بتسرق الطير سؤال كنت بسأله زيك من شهرين بص يا سيدي معناه ان الرشة تدخل جسم الطريدة وتخرمه وتعدي من الناحية التانية وغالبا الطريدة هتطير بعدها وهي غارقة في جرحها ))
البندقية دي بشهادة ناس كتير تحفة وعاملة مع الناس احلي شغل بس هتحاج تغيرلها سوستة عشان الاصلية منها شكاوي كتيرة زي انها بتكسر بسرعة وكلام من هذا القبيل وممكن تغيرها بسوستة جامو شادو 1000 او جامو هنتر او تقريبا ديانا 52 (( محتاج للتأكيد )) وتغيرلها الجلبة والقاعدة الفبر بوحدها حديد وهتلاقي معاك بسم الله ما شاء مدفع يملالك البيت طيور هههههههه
بالتوفيق وفي انتظار رأي الخبير عادل باشا عبده
تحياتي

[ellebodey]

الله اكبر ..ما شاء الله ..تسلم اخي احمد..
طيب عقبال ما ننتظر اخونا عادل ممكن حضرتك تقولي هيه سعرها كان حاليا .. والتعديلات ديه تكلف كام...الف شكر :)

[ellebodey]

واكيد حضرتك نقصد اني اجيب الخشب مش الفبر ؟؟
عشان بتقول ونغير القاعده الفبر .. صح

[ellebodey]

وعايز اعرف بين الكرال الفبر والخشب والرمايه !!

[ellebodey]

ايه الفرق بين الكرال الخشب والفيبر والرمايه

[omarara]

ايه الفرق بين الكرال الخشب والفيبر والرمايه

مفيش فرق شكل فقط وانتظر رأيى الخبراء بس انا جربت الرماية وعندى الفيبر الاسود ومفيش فرق
التعديلات فى حدود 160 جنيه ده لو لقيت السوسته الاسبانى

[ellebodey]

تمام.. يعني الرمايه او الخشب الفرق بينهم في الشكل بس ..صح

[omarara]

تمام.. يعني الرمايه او الخشب الفرق بينهم في الشكل بس ..صح

هناك عيب واضح جداً فى الفيبر الاسود العادى مش الرماية المسامرين بتوع الربط الامامين كل طلعة لازم تربطهم لأنهم بيتفكوا وبيأثروا على الدقة مش عارف بقى عاملين إزاى فى الرماية والخشب

[ellebodey]

طيب ايع بس الفرق بين الفيبر والرمايه

[NEW_Year]

ايه الفرق بين الكرال الخشب والفيبر والرمايه


اولا بالتوفيق في شراء اي بندقية تناسبك
الفرق بين الكرال الخشب والفيبر والرماية هو شكل الدبشك بس
الرماية بيكون الدبشك فيها مفرغ الشكل
والفيبر بيكون فيبر وفي منها لونين اسود وبني غامق
اما الخشب فهي خشب
والافضل خليك في الخشب افضل من الفيبر لان الفيبر سمعت انو بيتشرخ بعد فترة
خليك في الكرال نمرة 2 خشب بس هتختاج بعد لما تجبها انك تغيرلها شوية حاجات
والافضل انك تجبها مستعملة مش جديدة
بالتوفيق ياباشا

[مصطفى ابواسماعيل]

عليك بأستاذ عادل عبده طالما هتختار الكرال

[ellebodey]

ان شاء الله ...بس اتوكل عاي الله يعني بندقيه نضيفه.؟