الجامو و السمك 3

[أبو صفية]

النهاردة لقيت الجو حر و الشمس ساطعة مكدبتش خبر و رحت واخد البندقية و طالع على أحد المصارف الى برحها على طول و لله الحمد كانت الحصيلة مرضية بالرغم إنه غرق منى سمك كتير لأن لسة المية عالية برده بس الحمد لله رضا بارك الله فى مارزق

[hema777h]

انت بطلت تصتاد يمام وحمام وبقيت تخصص سمك بالبندقية

[mohamed2010habib]

انا قولتلك انتا صياد قرارى,,,
المره الجايه عايزين حنشان:),,,

[samraghost]

طلعه جميله وفعلا بقيت تخصص سمك ههه الف هنا وشغا بس ليه رجاء والنبى الحاجه الى مش هاتكون متاكد انك هاتجيبها يبقى ماتضربهاش والافضل انك تعمل غابه زى الى معاك دى بس تعمل فيها من قدام دايره من سلك وتحط فيها شبكه صغيره من قدام زى مصفاه يعنى وكده متهيا لى مافيش حاجه هاتقع منك فى الميه

[قناص المنوفيه]

طلعه جامده يا كبير تسلم ايديك
والجامو فعلا ملهاش حل اسأل مجرب

[أبو صفية]

أنا عارف إنى زهئتكم من السمك بس أنا فعلا ما بصدش بالنهار غير السمك و فى الليل فراخ المية
لكن فى الفترة الحالية ما بصدش طيور خالص لأن دى بداية فترة وضع البيض و التفريخ و أنا بحاول لأن فيه شباب كتتير حوالينا بتصيد و ما تفرقش حتى بيصيدو الطيور على العشوش و بصراحة أنا السنة الى فاتت صدت فى الفترة الى زى دى فراخ المية و كنت بلاقى فيها أثناء التنضيف البيض و دا زعلنى و فعلا لاحظت قلة عددها السنادى لأن معظم صيدى فى المصارف الى حوالينا و دى نسبة الطيور المهاجرة فيها شبه منعدمة و كنت بصيد كميات كبيرة لحد ما ظنيت إنى قضيت عليهم

و لكنى كنت بحاول أنسق مع صديق ليا صيدة يمام الصبح بدرى عشان بس ما أبنش صياد السمك

و بالنسبة للسمك أنا فعلا ما بأضربش غير الى بكون متأكد إنى حجبها لو ماتت بس دا سمك فى مية و صدقونى زعلى على السمكة الى بتموت و ما أجبهاش بيكون أكتر من فرحتى بالى جبته بس عزائى الوحيد إن حتى الى حيموت إذ أنا ما أكلتوش حيتاكل فى المية
و بالنسبة للشبكة الى فى ا لعصاية دى صعبة جدا لسببين
أولا أنا العصا الى فيها الهلب طولها فى حدود 3.5 متر دا بالإضافة للخيط نفس الطول يعنى بتدينى مجال7 متر لكن الشبكة حتكون طول الغابة بس
ثانيا السمك الى بيركز على القاع و يكون باين ليا متنفعش معاه الشبكة لأن بمجرد لمسه بيتحرك من مكانه و معنتش أشوفه لكن الهلب بمجرد ما يلمس السمكة بيشبك فيها

و عموما أنا طالع بكرة أصيد سمك و مش حنزل صوره لكم لو ربنا رزقنى عشان أنا حاسس إنى زفرت المنتدى

و شكرى لإهتمام الجميع

[مصطفى محمد]

طيب لو امكن اشرحلنا ازاى نعمل الهلب دة لانة مش واضح بالصور وشكرا طبعا على الموضوع الشيق وللعلم بجد احسن طعم سمك هوة اللى بيتم صيدة بالطريقة دى عن تجربة

[amr saber]

ما شاء الله تحفه يا باشا

طيب ما تسيبك من البندقيه خالص وتصطاد السمك الهلب والسناره علي طول يعني وهي السمكه واقفه هات الهلب من تحتها وارفعه بسرعه خاطفه هاتلاقي السمكه متعلق في الهلب بدل ما تضرب وتعمر وولسه برضو هاتجيبها باللهلب والطريقه دي اسمها في الصيد تشميط جرب وهاتدعيلي والصيد هايبقي اكتر لانك مش هاتهدر وقت كبير

وتحياتي يا باشا

[وليد سعد زغلول]

بسم الله ما شاء الله عليك صياد كبير وقناص رائع وبألف هنا وشفا وتقبل تحياتي ودمت في أمان الله

[Amiroz]

طب لو كان معاك شبكة بقي

الف هنا وشفا

وبالتوفيق ان شاء الله

[أبو شمس]

و الله احسن من السنارة

[أبو صفية]

بالنسبة للهلب هوا عبارة عن
غابة بلدى و تكون قوية شوية لأن النتش بيه قوى و بتربط فيها خيط بلستك من بتاع الصيد بس يكون من الأنواع السميكة يعنى ما يقلش عن سبعين و طبعا هتربط الهلب فيه و الهلب دا فيه ناس بتسميه شكام و دا حتلاقيه فى محلات صيد الأسماك بالإختصار كأنك بتعمل صنارة بس بدل ما بتربط سناره بتحط مكانها الهلب

بالنسبة للصيد بالهلب مباشر فعلا أنا كنت بعمله زمان بس ما يمشيش مع السمك العايم دالوقتى لأن السمك زى اليمام لو شافك بيغطس فما بالك لو شافك و شاف السنارة
و فيه عندنا طريقة صيد فى دمياط بنسميها التشكيم و دى بتحتاج صنارة ليها مواصفات خاصة أولا غابة تشكيم و دى بتكون قوية جدا عشان النتش أو الضرب بيها بيكون قوى و الغاب العادى بيتكسر تانيا مكنة كبيرة و قوية عشان السحب و الجر ثالثا برده خيط قوى و فى الغالب بيكون أكتر من 70
و الصيد بيكون فى المياه الجارية شديدة السرعة و عندنا فى دمياط بيكون عند السد لما بيفتحو المية أو بصفة مستمرة عند منبع ترعة السلام المية بتكون شديدة و بتحتاج رصاصة كبيرة عشان تركز
و دى بيتحطلها عنقود شكامات أو سنانير كبيرة كما فى الصورة و دى بيقع معاها السمك الكبير زى الحمير ( قشر البياض ) بأحجام تصل 10 كجم

http://img210.imageshack.us/img210/3859/dscf2237i.jpg


http://img803.imageshack.us/img803/7738/dscf2239q.jpg