حصيله قليله بس طلعه جميله جدا

[قناص المنوفيه]

ازيكم يا احلى صيادين مصر اخباركم ايه
انهارده طلعت ساعتين بس كانوا زى الفل وحلاوتهم انى وانا بصطاد كل ما
أقابل عيال صغيره يقولولى عمو عمو فى واحد تانى بيصطاد قدام طبعا
انتم عارفين انا كنت هتجنن اد ايه والاقى حد اصطاد معاه لان الصحبه
فى الصيد ممتعه جدا وخصوصا انى متعلم الهوايه من صغرى على صحبه والدى وعمى
المهم مكدبتش خبر فضلت ماشى واقابل يمام اسيبه واللى اقف اضربه بسرعه
كل ده عشان احصل اخينا اللى قدام ده والطريق طويل لحد ما الحمد لله شفت اتنين
من بعيد اوى معاهم بندقيه كرال دبشكها اسود قلت بس لعبت ياريس وكل اما امشى
هم يمشوا ربع ساعه على كده ومش عارف احصلهم لدرجه انى فكرت اعمر واضرب عليهم:d
من الغيظ والحمد لله وقفوا شويه كتار كانوا بيجيبوا يمامه وقعت واخدوا وقت وحصلتهم
اتعرفت عليهم وفوجئت ان البندقيه بتاعتهم سوستتها متهالكه لدرجه انهم ما وقعهوش
الا يمامه واحده بيها ووقعوا كمان واحده ببندقيتى ووعدت الراجل انى اجبله سوسته من المنتدى
عرفونى اماكن جديده بس للاسف على ما مشينا كانت الشمس طلعت والجو رخم
بس ان شاء الله المره اللى جايه هنعمل طلعه جامده جدا معلش طولت عليكم
الحصيله يمامتين-حمامه بريه-طائر الغطاس-بومه صغيره ودى الصور

[عادل عبده]

ماشاء الله مش مهم الصيد المهم الجو واليوم الجميل اللى انت عيشته
بالتوفيق دائما

[mohamed2010habib]

جزاك الله خيرا ,,, فعلا الصحبه مهمه جدا

[amin hegazy]

أولا بالتوفيق ان شاء الله في الطلعة القادمة وتكون احسن
ثانيا ياريت بلاش صيد البوم لا بيتاكل ولا من الفواسق الخمسة يعنى ملهوش لزمه صيده
ثالثا بخصوص السوسته بفضل الله جبت واحده اسباني فعني واحده مصري زيادة جديدة

[مصطفى ابواسماعيل]

تسلم الايادى ياقناص وحنط البومه الاسكوبس شكلهاهيكون حلو لما تحنطها

[mohd_wafik]

ما شاء الله ... بومه الاسكوبس دي لازم تتحنط ولو مش عاوز هشتريها منك بسندوتشين شاوره هههههههههههههههه تقبل تحياتي

[عادل عبده]

ما شاء الله ... بومه الاسكوبس دي لازم تتحنط ولو مش عاوز هشتريها منك بسندوتشين شاوره هههههههههههههههه تقبل تحياتي

انا ماليش دعوه
انا عاوز حته من السندوتش ده
انا لسه مفتطرتش

[smsm saber]

ما شاء الله ... بومه الاسكوبس دي لازم تتحنط ولو مش عاوز هشتريها منك بسندوتشين شاوره هههههههههههههههه تقبل تحياتي

طبعا انت قريب من ابو مازن .............الشاورمة بتعتوا جامد جداااااااااا

[hesham[MaFya]a]

طلعات حضرتك كلها جميله ما شاء الله...و لو بأيدى ان الزمن يرجع كنت احب ان اتعرف على والدك عشان اتعلم منه الصيد و اتعرف على عبده بصلة :d ..بس التوقيع ده انا بشبه عليه :) ...تحياتى

[عبد.الرحمن]

الله ينوررر

[dr_mohasan]

مش مهم الحصيلة بقدر أهمية إنك تستمتع بالطلعة بتاعتك

بالتوفيق دائماً

[وليد سعد زغلول]

بسم الله ما شاء الله وربنا يباركلك في صيدك ومبارك على الطلعة الجميلة وتقبل تحياتي


أخرج الإمام البخاري ومسلم في (صحيحيهما) عن ابن عمر رضي الله عنهما : أن رسول الله صلى الله عليه وسلم قال : خمس من الدواب ليس على المحرم في قتلهن جناح : الغراب والحدأة والعقرب والفأر والكلب العقور وفي رواية : خمس لا جناح على من قتلهن في الحرم والإحرام وفي ( سنن أبي داود والنسائي ) : خمس لا جناح في قتلهن على من قتلهن في الحل والحرم . . الحديث .

ثبت -أيضا- في الصحيحين من حديث ابن مسعود: أنه-عليه الصلاة والسلام- خرجت لهم حية في منى؛ فقال: اقتلوها. فمرت، وذهبت؛ فقال: كُفِيَت شركم، وكفيتم شرها وكان ينزل عليه القرآن، فمرت به، فالمقصود: أنه يقتل هذه الدواب وهذه الفواسق؛ لأنها مؤذيات، تقتل في الحل والحرم، ويلحق بها كل مؤذ.
وعن ابن عباس قوله: والكلب العقور يشمل: كل ما عقر الناس، مثل: الذئب والأسود والنمور مما أشبه ذلك، مما يعقر، ويؤذي.
وفي بعض النسخ بدلا من العقرب ذكر الحية

[fadeel79]

اجمل حاجة فى طلعات الصيد بتكون الصحبة وبتكون الاستفادة اكتر لو الصحبة دى رجالة بجد اتمنى انك تكون عرفت الناس دى كويس ومتتسرعش فى الصحبة لمجرد الصحبة .

يا ريت متضربش على حاجة انت مش هتستفيد منها يعنى انت ضربت البومة ومأكلتهاش وهى مش من الفواسق وانا مش مع موضوع التحنيط ده يبقى من رأى عدم ضربها اصلا ارجوا ان المغزى من كلامى يكون وصلك .

تقبل مرورى وكلامى بصدر رحب

[Atb]

بالتوفيق فى المرات القادمه بأذن الله
عايزين اسد بقا مااشى ؟.؟؟؟

هههههههههههههههههههه

[راغب]

اخر حاجه يفكر فيها الصياد هى الحصيله المهم انه يكون استمتع بالطلعه وبالتوفيق فى طلعاتك القادمه

[راغب]

استفسار بسيط
انت ليه ضربت البومه الصغيره , لازم يكون فيه سبب والا كده ندخل فى باب الحرمانيه , تحياتى

[samraghost]

اكيد مافيش احسن من الصحبه بس يا ريت بلاش البوم لانه مفيد فى كل الاحوال واكله الاساسى هو الفئران

[3mad]

بسم الله ماشاء الله الله ينور يا قناص وربنا يكرم ونتقابل عن قريب بإذن الله :)

[sniper1]

بالتوفييق يا باشا

[ahmed yasser]

الله ينور يا باشا وفعلا بندقيتك ماشاء الله من احسن البنادق

[Mohamed Abdo]

ياباشا أهم حاجه ان الواحد يستمتع بالرحله ويكتسب خبره أكتر والله الموفق

[Orabi]

ما شاء الله.. مش مهم حجم الصيد بقدر الإستمتاع.. يعني ممكن تضرب ضربه أو أتنين جامدين جداً بمائة ضربة و مائة فرد حمام ..؛)

[well12m]

المتعه ليس فى العدد