المساعد الشخصي الرقمي

مشاهدة النسخة كاملة : واقع فى ورطة و ارجو المساعدة ( من وكيل نيابة خصوصا )


koko22m
12-01-02, 08:41 AM
اشتريت سيارة بتاريخ 26 - 2 -2011 بموجب توكيل موثق بمكتب الشهر العقارى فرع نادى الشمس من مالكها الاصلى و هى تابعة لأدارة مرور النزهة و طبعا استلمت شهادة المخالفات و رخصة سارية و التوكيل و قد تم نقل ملكيتها بعقد مسجل منى لنفسى بمكتب الشهر العقارى فرع عين شمس التابع لمحل اقامتى بتاريخ 13- 8 - 2011 حتى استطيع تجديد الترخيص و نقلها الى مرور مدينة السلام التابع مع الاسف لمحل اقامتى ايضا و طبعا قمت بأستخراج تصريح مؤقت لحين ورود ملف السيارة من مرور النزهة الى مرور السلام و مدة التصريح ثلاثة اشهر و ذهبت لاستخراج رخصة السيارة بعد انتهاء التصريح فقالوا لى ان اذهب الى نيابة المرور لاستخراج شهادة المخالفات و قد فوجئت ان السيارة عليها مخالفات قيمتها 1500 جنيه و قال لى الموظف ان كنت ارغب فى بيان تفصيلى بقيمة خمسة جنيهات لمعرفة تفاصيل المخالفات فوافقت على الفور و كانت المفاجأة ان كل المخالفات ابتداء من تاريخ 12 - 1 - 2010 حتى تاريخ 26 - 10 - 2010 و عددها 6 مخالفات و هى كالتالى

1- 12-1-2010 طريق القاهرة - شرم الشيخ و نوع المخالفة استخدام التيفون المحمول يدويا اثناء القيادة و قيمة الغرامة 100 جنيه
2- 4-2-2010 طريق القاهرة - شرم الشيخ و نوع المخالفة و الغرامة نفس السابقة
3- 20-6-2010 طريق القاهرة - ج سيناء و نوع المخالفة و الغرامة نفسها
4- 5-7-2010 طريق القاهرة - شرم نفس المخالفة و نفس قيمة الغرامة
5- 18-9-2010 القاهرة - ج سيناء الانتظار فى الممنوع و قيمة المخالفة 20 جنيه
6- 26-10-2010 القاهرة - ج سيناء تعمد السير عكس الاتجاه و قيمتها 1000 جنيه

و طبعا جميع المخالفات المذكورة على طرق صحراوية فأين يوجد هذا الضابط ( اللهو الخفى ) الذى يراقب سائق يتحدث فى التليفون اثناء القيادة و هو على طريق سفر و يقود بسرعة فوق ال 100 كم على الاقل و اين يوجد مكان انتظار فى الممنوع فى طريق صحراوى و اين يوجد سائق معتوه يقود عكس الاتجاه فى طريق سفر لعدة كيلوات حتى يصل من فتحة فى الجزيرة الوسطى للطريق حتى يصل الى الاخرى و التى يفصل بينهم بحد ادنى اكثر من 10 كيلومتر و اخيرا اين اجد من باع لى السيارة حيث انه هاجر خارج البلد و نهاية الموضوع ان كل تواريخ المخالفات سابقة لعملية السراء بحوالى ستة اشهر فأين كانت ادارة مرور النزهة او نيابتها من هذه المخالفات ؟؟؟ و اخيرا ارجو من اى وكيل نيابة بهذا المنتدى محاولة مساعدتى لرفع هذه الغرامات التى مجموعها يعادل حوالى 4% من اجمالى قيمة السيارة و التى لم ارتكب اى مخالفة منها و بالأثباتات بتواريخ الشراء وعموما تليفونى 01001005620 لو فى حد يقدر يساعدنى لانى هنزل مرور النزهة الان و هحاول اشوف ايه اللى ممكن يتعمل بس انا محتاج حد يقدر يسرع لى بالاجرءات اللازمة لانى كدا ماشى برخصة منتهية و مش عارف اجدد التصريح ولا استخرج رخصة و لن استطيع دفع مبلغ الغرامة لكبره اولا و لانى لم ارتكب هذه المخالفات ثانيا

Timo Jean
12-01-02, 08:44 AM
خير ان شاء الله

وبإذن الله حد يفيدك

وعسى ان تكرهوا شيئ وهو خيرا لكم

kefafy
12-01-02, 09:40 AM
ربنا يعينك يا اخى الفاضل
اتحطيط فى موقف مطابق تماما زى حضرتك
وقمت بعمل اعتراض على القيمه ودخلت للسيد المحترم وكيل النيابه
وبعد مراجعة تواريخ المخالفات مع تواريخ التوكيل وعقد البيع تم تخفيض قيمه المخالفات من 1000 جنيه الى 100 جنيه
علما انى كنت واخد شهادة برائه زمه قبل شراء السياره ب 5 ايام واكتشفت ان المخالفات تمت بتاريخ مابين انتهاء شهادة برائة الزمه وتاريخ تحرير التوكيل فيارب يوقفلك واحد ابن حلال ابن ناس محترمين يتفهم المشكله ويحلهالك
وربنا معاك

hogan
12-01-02, 11:06 AM
عادى ياباشا انا عندى نقل تقيل رخصت ووقفت فى الجراج 8 شهور وطلعت اشتغلت فى الجبل شهر مخرجتش على الطريق لقيت عليها 22000جنيه رحت لوكيل النيابه اديته المفتاح وقلتلو عايز اسم الظابط الى كتب المخالافات لانى هخلص عليه الوكيل اتفاهم الموضوع ودفعت 500 جنيه وبصراحه الوكيل بنادم محترررررررررم جدااااااااااااا

قناص الظلم
12-01-02, 11:25 AM
مضبوط الكلام ولكن الموضوع فى ايد وكيل النيابه وازا لم يتفهم الوضع فالحد الدنى لهزا المبلغ300 جنيه والحكايه دى بتحصل كتير لان المخالفات بتروح نيابه المرور بعد شهر من تحريرها والافضل نقل الملكيه فى اسرع وقت ويعوض عليك ربنا

farouk
12-01-02, 12:01 PM
ادخل لوكيل ا لنيابه في المرور واعمل قضيه معارضه وهو هياشر علي الورق يمشي عادي ويحدد ميعاد لنظر المعارضه وان شاء الله يتخفض المبلغ

mibrahem
12-01-02, 01:02 PM
الموضوع كله فى ايد وكيل النيابة وعلى حسب رؤيته للموضوع

ahmedmh_ali
12-01-02, 02:22 PM
لا حول ولا قوة الا بالله ..

محمد ياقوت
12-01-02, 02:40 PM
بص يا سيدى هتعمل اللى هقولك عليه بالحرف الواحد هتعمل تظلم فى المخالفات استنادا لعدم ملكيتك السياره اثناء تحرير المخالفات وملكيه السياره ولوحتها المعدنيه للغير المتسبب فى المخالفات وما يثبت صحه كلامك تاريخ تحرير توكيل البيع وان المخالفات من شآن المالك القديم للسياره هتعمل الكلام ده اما فى مرور الدراسه او مرور عين الصيره لو اشتغل لانو كان اتحرق ههههههههههههههههههههههههههههههههههه على فكره كان حصل نفس الكلام ده معى كنت اشتريت سياره ماهندرا زيرو 2008 ولما روحت اجدد الرخصه فى 2009 لقيت مخالف بتاريخ 2006 ههههههههههههههههههههههههههههههههه فقولت ازاى يعنى العربيه عامله مخالفه وهيه لسه بتتصنع ومخرجتش من المصنع العربيه موديل 2008 والمخالفه 2006 ده ممكن ماكنتش اتصنعت من اصلو هههههههههههههههههههههههههههههههههههههههه المهم عملت تظلم واتضح ان اللوحات المعدنيه هيه اللى عليها المخالفه والنيابه دورت ووصلو لصاحب اللوحات الاصلى واضافت على عربيتو الجديده كل المخالفات

ahmedragab
12-01-02, 05:13 PM
هوة من قليل الناس عملت الثورة دة ظباط او امناء اواى ذفت منهم عايذ الحرق والضرب بالجذم القديمة وكل دة علشان حصيلة الغرامات دة ليهم فيها نسبة كبيرة وتوذع عليهم دة اخى اشتري عربية ذيرو وكان متعلم السواقة لسة جديد وكان من خوفة اول حاجة بيعملها انة يركب الحذام وطبعا العربية كانت قسط ولما راح بعد سنة لقى عليها مخالفات ب1500جنية بسبب الحذام بس

lilkapo
12-01-02, 10:07 PM
مش هطول واعلق على اى كلمة من كلام اخونا اخرك وعلشان متتعبش قلبك هتروح تعمل تظلم فى نيابة المرور وانتا ونصيبك بقى لو وكيل نيابة ابن حلال هيخفضلك المبلغ لكن لو تيت هتدفعهم هتدفعهم هيقولك مجبتش براءة زمة قبل الشراء لية ولو منك اروح لصاحب العربية واقولو ولو ياست اووووووووووووووووى ولقيت نفسك اتدبست اطلب من وكيل النيابة تقسطهم على فكرة الكلام دة بيمشى والله هيقسطهملك وهيديك ورقة ترخص عادى مهيش مشكلة اوووى يعنى

koko22m
12-01-02, 11:54 PM
خدو عندكم بقى الخبر دا و دا طبعا بعد ما قضيت ليلة محروق دم اللى جابونى و منمتش فيها و قلبت الموضوع يمين و شمال و مالقتلوش اى مخرج و كنت عشمان انى ( هلاقى متبرع و لو بجنيه ) اقصد وكيل النيابة الشهم المنتظر اللى هيخرج من وسط اعضاء المنتدى و يقولى هخلصلك الموضوع بس طبعا نأبى طلع على شونة - المهم خدت بعضى و رحت على مرور النزهة و دخلتلكم على وكيل النيابة زى الاسد ( انا طبعا مش هو ) و اديتله صورة شهادة براءة الذمة اللى معايا و اللى خارجة من ادارة المرور التابع ليها ( اقصده هو ) و قلتله ازاى بقى تجيبولى مخالفات بعدها بأثر رجعى من سنة فاتت ؟؟؟ الراجل بص فى الشهادة و برأ عنيه و و قام وقف و قام باصص فى شاشة الكمبيوتر اللى قدامه و كاتب رقم العربية و لقى المخلفات التفصيلية اللى انا داخله بيها بتواريخها صحيحة و لقيته مرة واحدة قال ( يا نهار اسود !!!! ازاى دا ) و قام منادى بأعلى صوته على موظفة فى النيابة بتاعت المرور و قام راميلها الورق و قالها شوفيلى الاستاذ دا حصل معاه كدا ازاى لما نشوف اخرة العك اللى احنا فيه دا ايه و قامت الموظفة مستأذنة منى انى اروح معاها عند الكمبيوتر بتاعها و قعدت تراجع كل الاوراق اللى معايا و تراجع المخالفات و طبعا بتضرب كف على كف و فى الاخر لقيتها ابتسمت و قلتلى الموظف المسطول اللى كتب نمرة العربية كان كاتبها غلط بدل ( ل ق أ ) عملها ( ل ف أ ) يعنى المخالفات دى مش بتاعتك اصلا و طبعا الموظف دا كان من مرور السلام مش من مرور النزهة و اتنفخت اوى اوى بعدها و قالتلى احنا مستحيل يحصل عندنا غلطة زى دى ابدا ابدا و قامت واقفة و قالتلى نرجع تانى لوكيل النيابة علشان نوضحله ان الغلطة مش من ادارتنا و دخلت عليه مبتسمة اوى اكنها جابت الديب من ديلة ( و هى فعلا جابت الديب من ديله بصراحة ) ووضحتله الموضوع و قلها اديله شهادة مخالفات بتاريخ النهارده و فعلا ادتنى شهادة بتاريخ النهارده و روحت مرور السلام و استلمت الرخصة فى اقصر وقت ممكن ( اربع ساعات انتظار + ساعة اجرائات الورق ) هههههههه و اخيرا مسكت رخصة سيارة لمدة سنة بعد ان مضى منها ثلاث شهور معاناه و ارجو من الجميع الدعاء لمرور السلام و موظفينه و سماسرته النصابين و الناس الحرامية اللى بيقفوا فى اماكن الانتظار حول الادارة علشان نركن عربياتنا و ندخل و يقلبوها على ما نخرج ( الله يخربيت ابوهم ) مع الاعتذار لأن دى اقل حاجة اقدر اقولها - و اقفل المحضر فى ساعته و تاريخه

امضىلى هنا :)

dr mohamed kamal
12-01-03, 12:31 AM
تصدق إن شاء الله حتصدق أنا كنت هقولك كده ههههههههههههههههههههههههههههه ,حمدالله على السلامه تعيش وتأخذ غيرها ,الحروف بتاعة اللوحات دى كارثة من كوارث النظام السابق نقطة كانت حتجبلك بعيد عنك وعن الاعضاء نقطة , إنشاء الله يجى لكل ظباط و أمناء المرور نقطة جميعا ما تخلى منهم أحد ,قولوا أمين

Ahmed El Sarky
12-01-03, 12:36 AM
أميـــــــــــــــــــــــــــــــــــــــــــــــ ــــــــــــــــــــــــــــــــــــــــــــن

ahmedmh_ali
12-01-03, 12:37 AM
باشا متقلقش 25 يناير جاى ان شاء الله و المرور تولع بأذن الله و المخالفات تروح ..

ahmed6394
12-01-03, 12:49 AM
باشا متقلقش 25 يناير جاى ان شاء الله و المرور تولع بأذن الله و المخالفات تروح ..

انت مصيييييييييييييبة و الله العظيم

ahmedmh_ali
12-01-03, 12:49 AM
انت مصيييييييييييييبة و الله العظيم

من زمان و الله يا عم ..

loverlover
12-01-03, 01:04 AM
انا عن نفسي ماقدرش اساعدك باي حاجة الا اني ادعيلك يارب يكرمك ويفك عليك كربك يارب ويوقفلك وكيل نيابة ابن حلال زي اللى الاخوة الكرام حكوا عنه وان شاء الله طول مانت مظلوم ربنا مش هيسيبك

elexlns1
12-01-03, 03:46 PM
خيرها فى غيرها
لسة شايف الموضوع ولو كنت شوفته قبل كدة كنت خليتك رفعت قضيةعلى الموظف دة وخدت حقك بزيادة
يللا حصل خير والحمد لله واتمنى الموظفين تتعدل

koko22m
12-01-03, 04:16 PM
باشا متقلقش 25 يناير جاى ان شاء الله و المرور تولع بأذن الله و المخالفات تروح ..

بس امانة عليكم يا جماعة لو حد سمع ان مرور السلام بتولع تقولولى انى انزل اولعها مع الناس و يا سلام لو الموظفين جواها اكون ممنون جداجدا منكم

kefafy
12-01-03, 04:49 PM
يباشا خلاص الحمد لله وربنا ديما مع الحق حتى وان طالت المدة حتظهر حتظهر باذن الله
وبروك الرخصة يباشا وعقبال التلات سنين انشاء الله