رغم كل شئ ، سأظل أعشق بندقيتي !!

[البورسعيدي]

السلام عليكم ورحمة الله وبركاته
إزيكوا يا جماعه وأخباركوا ايه ؟ يا رب دايما بخير وصحه إن شاء الله
أنا عايز أعبر عن حبي وإعتزازي الكبير بالبندقيه اللي بصطاد بيها من حوالي 14 سنه ولغاية دلوقتي وهي صيني بعتله وكانت هديه من والدي مع دخولي مرحلة الثانويه العامه ، وبصراحه هي قويه جدا وكل فتره بغيرلها السوسته ، ونشانها مضبوط والحمد لله ، والبندقيه دي إتسببتلي في حادثه في طلعه من طلعات الصيد ، وطبعا كان الكلام ده في الصباح الباكر وحصل إني وأنا بعمر البندقيه ومستعجل علقت البندقيه وراحت العتله راجعه لوحدها فجأه وقفل الترباس اللي في الجمب علي إبهامي وقطعه ، بالإضافه إلي كسر طرف العظم ، وبالرغم من هذا ، قمت بإصلاح البندقيه وعدت أصطاد بها والغريب هو شعوري حتي الآن بإعتزازي بها أشد الإعتزاز ، وعدم تفضيل أي بندقيه أخري عليها مهما كانت ، وستظل عندي هي الأولي حتي لو إصطدت بغيرها
آسف إني أطلت عليكم في كلامي ، لكن أحببت أن أشرككم معي في هذا الشعور الجميل بالموده بين إنسان وجماد ، وأكيد بعضكم عنده نفس الإحساس والحساسيه لبندقيته !!

[BooGY]

السلام عليكم اخ حازم ..... احب احييك على شعورك الجميل ده وده ان دل فانما يدل على اصالة وطيب معدنك وربنا يبارك لك فيها ويرزقك خيرها ويكفيك شرها وتقبل تحياتى اخوك محمود برعى

[hassan_11176]

السلام عليكم
انا حصل معايا موقف نفس الى حضرتك بتحكى فيه بس كانت بندقيه رمسيس نمره 1 وانا الى كسرت البندقيه وحطيت اصبع السبابه الشمال داخل البندقيه فى اعتقادى لما اضرب هشوف الضغط الى طالع من البستم على طول ولكن حدث مالم اتوقع وهو رجوع الماسوره على اصبعى وعينك متشوف الا النور والله ماكنت قادر اكسر البندقيه لتحت عشان اطلع صبعى من الالم ولكن عدت والحمد لله على خير والى يضحك انى قعدت اخبط بالبندقيه من النرفزه بعدها لما تنيت الماسوره طبعا ده كان فى مرحلة الاعداديه والبندقيه بقت فى عداد الاموات ولكن الصيد فى دمى سواء كان صيد السناره او البندقيه الرش مع العلم فى السناره بالزات لا اقتنى الا الماركات العالميه المشهوره ولكم جزيل الشكر .........................اخيكم /حسن

[rock]

السلام عليكم ورحمة الله
_ أحيانا يبقى الشعور ناحية شئ جماد افضل من الشعور ناحية بنى آدم او حيوان _انا عارف شعوركم
بس ياجماعه احنا صيادين ولازم نستحمل فى نظير اشباع الهوايه _ احييكم اخوانى (بوجى _ والف سلامه عليكم_ البورسعيدى_ حسن) اعتذر للاطاله

[خط الصعيد]

الله عليك شى جميل ان يكون فى حب واخلاص حتى لو كان لجماد او حيوان دة دليا على ان الانسان دة و فى و جميل و انشاء الله ربنا يباركلك فيها

[البورسعيدي]

أشكر إخواني الإعزاء علي هذا المرور الجميل المشرف لي
شكرا للأستاذ Boogy علي الإطراء والدعوه الجميله الجميله ولك مثلها إن شاء الله
شكرا يا أستاذ حسن وألف سلامه علي حضرتك والحمد لله علي كل حال ، وعلي فكره أنا هاوي صيد سمك برضه وإن شاء الله أستفيد من خبرات حضرتك في الصيد البحري كمان
شكرا يا أستاذ rock علي المرور والتعليق ، وكلامك صحيح فعلا ، ومادام الإنسان غاوي شئ وعاشق له أكيد هيستحمل في سبيله أي شئ ، وشكرا علي التحيه ولك مني أجمل تحيه وإحترام
شكرا ليك يا أستاذ الصعيد علي هذا التعليق الرقيق وذوقك الرفيع وربنا يباركلنا فيك

[Oonyx]

والله انا لو مكانك كنت ولعت في سنينها البعدة

[البورسعيدي]

طيب الحمد لله إنك مكنتش مكاني وربنا يعطيك العافيه ويسلمك دائما ، وربنا يحفظلي بندقيتي ويبارك فيها

[هشام سمير]

احساس ناتج من شخص حساس وصاحب معدن طيب جزاك الله خيراً

[البورسعيدي]

جزاك الله خيرا يا أستاذ هشام علي تعليقك الجميل الرقيق وذوقك الرفيع

[asdmkh]

علي فكره المشكله دي حصلت معايا في البي اس يعني مش موضوع صيني
و انت لازم تحبها لانك اصيل

[ayman22]

موضوع بجد جميل انه يكون الواحد فى حاجة عزيزة عليه ايا كانت بشر او حيوان او حتى جماد ... وده ان دل فيدل على اصالة معدن هذا الانسان وايضا هذا الانسان بيكون اخلص واوفى صديق لاخيه الانسان....
وانت قولت ان البندقية دى اشتراها لك والدك .. هدية من اعز انسان لقلبك .. طبعا ازاى تفرط فيها ده اللى جابهالك اعز انسان الى قلبك وهو والدك......

على فكرة انا حصل معى موقف مشابه ... وهو بعد وفاة والدى ( رحمه الله ) اعطتنى والدتى خاتم مصنوع من الاسانلس ستيل وقالت لى الخاتم بتاع ابوك ( هدية من واحد من اصداقاء والدى ) ولبسته فى اصبعى حتى تغير لون للاحمر وبرغم ان اهلى فى البيت قالو لى اخلعه وارميه ده خلاص باظ .. مع ذلك لم استطع التفريط فيه لانه جاى من ريحة اعز واغلى انسان الى قلبى......

[البورسعيدي]

الله يبارك فيكم وجزاكم الله كل الخير علي هذا الكلام الجميل والإحساس المرهف ، أنا أشكرك يا دكتور أحمد وأشكر الأستاذ أيمن وأحييك علي هذا الشعور الجميل ورحمة الله علي والدك تدخله فسيح جناته إن شاء الله

[محمود5555]

شعور جميل من انسان وفى .... حمد لله على السلامة ... وتقبل مرورى