السلام عليكم ورحمة الله وبركاته
اريد ان اعرف رأيك يا استاذ جلال في هذه المشكلة…
اشتريت مسدس لتعليم الرمي من شخص ما واشتريته علي ما قال ان حالته جديدة وقال في حدود 80٪ او 90٪ حسب كلامه عندما ذهبت اشتري هذا المسدس وجد ان حالته اقل من ذلك بكثير كان متخربش من الأعلي ومن الأسفل وكان شكلة قد استخدم لسنوات ، بعد ذلك اتفقنا علي سعر علي حسب حالته الخارجية مع انه اقسم ان حالته الداخلية انها جيدة جداً وما زالت جديدة وليس فيها اي مشاكل وقال انه ليس مفتوحاً ، وخطئي الكبير *هو انني لم اجربه عند شرائي له لأنني لم تكن لدي أنبوبة الغاز ولا الطلقات المستخدمة فيه ، واخذته بعد ان اقسم ان حالته جيدة جداً وقال لي انه لو هناك اي شئ بيننا اتصال وبيننا المنتدي ،
في نفس اليوم اشتريت أنبوبة الغاز والطلقات وجربتة فلم يضرب كان الهواء بدلاً من ان يندفع في اتجاه الطلقة كان يندفع من الاعلي فذهبت به الي محل ميشل عازر قال لي ان هناك مشكلة في البلف الداخلي للمسدس وذهبت به الي محل إصلاح الاسلحة فقال نفس الشئ وقال ان المسدس فتح قبل كده ( مع انه باعه علي انه لم يفتح من قبل) ، فكلمته علي الموبايل وقلت له ماحدث فقال السبب تركه لمدة طويلة (الركنة) ، وقال لو احببت ان ترجعه ليس عندي مانع فقلت له هذا افضل لأنني لم اكن اريد ان اشتري مسدس مفتوح ولا حتي فاضي اروح أصلحه ، فاتصلت به حتي اتفقت معه علي معاد لنتقابل فلم يرد نهائياً وكررت المحاولة لفترات طويلة ، فاتصلت بنمرة مختلفة فرد من اول اتصال واتفقت معه علي معاد لنتقابل فيه بعد ساعة بالضبط من الاتصال، مع ان المشوار بعيد جداً عني وذهبت وانتظرته طويلاً هناك واتصلت به حوالي عشرين اتصال بدون رد، وفي المرة الاخيرة رد عليّ وقال ( الو الو ) ثم اغلق الخط كأنه لم يسمعني وان هناك خطأ في الشبكة ، فكررت الاتصال كرر نفس الكلام كانه لا يسمعني ، انتظرت قليلا واتصلت وجدته قد اغلق محموله…
ولم يأتي في النهاية بعد ان اتفقت معه علي المعاد بالساعة واتصلت به وهو مسجل نمرتي ورد عليّ وهذا يعني انه سمع المحمول وعرف انني اتصل علي الاقل …
هذا يدل دلالة واضحة انه باع المسدس وهو يعرف انه لا يعمل ونقول انه أتنصب عليّ فيه…
هذا الاخ هو معنا في المنتدي فإن كان عنده كلام فليراسلني علي الخاص.

وأريد ان اعرف رأيك يا استاذ جلال بعد إذنك .*

لا حول ولا قوة إلا بالله.
لسه المصريين بينهم ناس بالشكل ده ..
والله الدنيا مش مستاهله ,
ولا تسوى عند الله جناح بعوضة .
أيا كان الشخص ده .
أدعوه أنه يراجع نفسه ويتق الله.

قال تعالى (يَا أَيُّهَا الَّذِينَ آمَنُواْ لاَ تَأْكُلُواْ أَمْوَالَكُمْ بَيْنَكُمْ بِالْبَاطِلِ إِلاَّ أَن تَكُونَ تِجَارَةً عَن تَرَاضٍ مِّنكُمْ وَلاَ تَقْتُلُواْ أَنفُسَكُمْ إِنَّ اللَّهَ كَانَ بِكُمْ رَحِيمًا (29) ) النساء


==========================================
قُلْ مَا عِندَ اللَّهِ خَيْرٌ مِّنَ اللَّهْوِ وَمِنَ التِّجَارَةِ وَاللَّهُ خَيْرُ الرَّازِقِينَ
==========================================


قال http://www.alminbar.net/images/salla-icon.gif: ((من غشنا فليس منا)) وقال http://www.alminbar.net/images/salla-icon.gif: ((ثلاثة لا يكلمهم الله يوم القيامة ولا ينظر إليهم ولا يزكيهم ولهم عذاب أليم ثلاثاً، قال أبو ذر: خابوا وخسروا يا رسول الله من هم؟ فقال: المسبل والمنان والمنفق سلعته بالحلف والكذب)) [مسلم].

يااااااه هما المصريين لسه فيهم الداء ال......... ( عفوا لسانى لايستطيع نطقه ) .....

زمان كانت الكلمة اللى تطلع من فم الرجل... وانا باركز على كلمة ( الرجل).... بمثابة العقد الذى يتفق عليه المتعاقدين ويكونوا ملزمين بتنفيذه واللى يخالف يكون خان العهد او العقد بينهم.....

وفيه كلمة احب اقولها للشخص ( ولا اقول انه رجل ) ان فيه مقولة شهيرة او حكمة وهى :

( اذا دعتك قدرتك على ظلم الناس فتذكر قدرة الله عليك ) ...

اتقى الله فى نفسك وتذكر ان الفلوس اللى اخذتها منه بدون وجه حق سوف تنكوى بها فى نار جهنم فى يوم لاينفع فيه مال ولابنون الا من اتى الله بقلب سليم.....

اخى حمزة ربنا يعوض عليك وتذكر دائما ان المال الحلال لايضيع ابدا وهذا الكلام اقوله عن تجارب شخصية لى....

اعتذر عن الاطالة ........... والسلام

رجاء ياجماعة من الأخ الي فعل هذا إرجاع الحق لصاحبة
فقد أبلغنا الرسول الكريم أنه : شخص ما ظل يعزب في النار بسبب قشه أخذها من أرض ليست ملكه.
فما بالكم بمسدس مرتفع الثمن
وليعلم هذا الأخ أنه إذا لم يردها في الدنيا سيقتص منه يوم القيامة وأنت في أمس الحاجة ولو لحسنه واحدة
وأعلم أن ثمن هذا المسدس دين وعند موتك لن ترتاح وستظل تعذب إن لم ترد هذا الدين.
وأعلم أن الدنيا حقيرة والأخرة خير وأبقي
وأعلم أن الدنيا لاتساوي جناح بعوضة(فعندما أرسل الله بعوضة لعذاب أحد الظالمين وفقدت جناحها خيرها الله بين ملك مثل الدنيا أو إعاده جناحها فإختارت جناحها لأنه حقا بالنسبة لها لاتساوي جناح بعوضة كما أنها لاتساوي جناح بعوضة عند الله) .
وأعلم أن الظلم ظلمات يوم القيامة .
وأعلم أنه ويل للمطففين كما قال الله تعالي (ويل للمطففين الذين إذا أكتالوا علي الناس يستوفون وإذا كالوهم أو وزنوهم يخسرون ألا يظن أؤلائك أنهم مبعوثون ليوم عظيم يوم يقوم الناس لرب العالمين ).
وأعلم أن دعوة المظلوم ليس بينها وبين الله حجاب
فقال الله في الحديث القدسي بشأن دعوه المظلوم (وعزتي وجلالي لأنصرنكي ولو بعد حين)
فأحرص أخي من دعوة المظلوم .............. ولا تبيع الأخرة بعرض من حطام الدنيا.

تسلم ياخ عمرو غلى الكلام قوى الحجة اللى انت قولته ....
ياريت هذا الشخص يلحق ضميره يصحا قبل فوات الاوان لانه لاتقبل التوبة وقت الغرغرة ( وقت خروج الروح )...

اوصيك ( واصى نفسى قبلك) يا اخى بالحذر... الحذر... من غضب الله وعذابه لان حرارة نار الدنيا جزء من 69 جزء من نار جهنم .........

الاخ العزيز حمزة انا سبت الناس تكتب علشان لما اكتب ما اكونش متحيز لك ضد الاخ الي باع المسدس علي الرغم اني شبة عرفتة بس خلينا نتكلم منطقيا انت غلطان طيب لية لانك لما اشتريت المسدس ما جربتوش ولكن انت كان عندك حسن النوايا اما الاخ الي هو باع المسدس فهو بدون زعل مني شخص غشاش مش علشان باع المسدس بالحالة الي عليها لا في ناس كتير بتعمل كدا بس لانة كدب عليك وقال انة لو عايز ترجعة ماشي وبعدين تهرب منك بطريقة غير لائقة ودا مش من شيم الصيادين الصيادين الصح يكون دايما صادق مؤتمن واذا وعد اوفا واذا تكلم صدق وهناك صفات للمنافق الجميع يعلمها عن ظهر قلب يتطبق منها اثنين علي الاخ العزيز صاحب المسدس ويمكنك الذهاب الي 100 شارع شبرا عند شريف واتصل بيا وان شاء الله كل شئ هايكون تمام اما الاخ المحترم صاحب المسدس فالاكرم لة ان لايكون عضو معنا في هذا المنتدي لان الاعضاء جميعا علي قدر عال من الاحترام ففيهم مهندسين واطباء وضباط وجامعيين
ويا اخ حمزة لاتحزن علي النقود لان النقود لاتصنع الرجال بل الرجال هي التي تصنع النقود

خلطتك انك
اشتريت دون تجربة فا نت في مصر يا اخي
المسدسات الغاز عيوبها كتيررر جدااا تا الجديد منها في مشاكل ما بالك بالمستعمل السئ
الاخ الذي باعهولك تا حسابة عند ربنا وان المال الحرام عمرة ما يدوم وتا شئ اكيد يا باشا
وبالنسبة للمسدس طول ما انت مع استاذ جلال اخونا الكبير هيتصلح هيتصلح متقلقش
وفي النهاية تا تحزير لجميع اعضاء المنتداء عند شراء شئ لبد من التجربة الاكيدة والكشف المفصل علي القطعة
واخير الانسالن لا يتعلم مجانااااااااااا

احسنت با استاذ جلال
المفروض ان المنتدى ده منتدى للصيد والصيادين والصيد هو هوايه الامراء والنبلاء
والمصريين هم ملوك الجدعنه والرجوله والشهامه ولكن للاسف اصبحت هناك عادات واشياء دخيله وبعض الاشخاص بيفتكروا ان الفهلوه شطاره ونصاحه
وطالما ان حضرتك عرفت الشخص ده المفروض انك والاستاذ حمزه تعلنوا عنه حتى يعرفه اعضاء المنتدى ويجب على الاداره شطب عضويته حتى لا يسئ للمنتدى

او يقوم بارجاع المسدس ورد ثمنه لاثبات حسن نواياه

الموضوع يا وائل مش موضوع انة يرجع المسدس الموضوع موضوع مبداء انة تكلم فكذب ووعد فأخلف هو ممكن يكون مش عارف او مقدر الي هو عملة اعتقد انة شطارة منة او انة اتضحك علية فلازم يتخلص من المسدس باي شكل.
وانا عايز اذكر موقف حصل من العزيز طلعت بخيت ان في احد الاعضاء اشتري بندقية وبعدين ما عجبتوش وكلمني لاني انا الي كنت جبتها من طلعت ولما الراجل اتصل بطلعت قال بالحرف فلوسك زي ماهي تعالي وعنيا لك ولما رحنا فعلا لقينا الفلوس بنفس اللفة والعدد ورجع البندقية وهو دا المتوقع من شخص محترم بل اكثر من محترم زي طلعت معلش انا بكتب من غير اللقاب لاني وطلعت كل الناس عرفة علاقتنا لانة صياد ولة شيم واخلاق الصيادين والمفروض من الاعضاء ما يستغلوش عدم معرفة البعض بالحالة او الاسعار دا يجماعة منتدي يهدف الي تنمية الهواية
والحب والتعارف بين الصيادين انا شخصيا كل يوم بستقبل اكتر من 20 مكالمة من الاعضاء ولما بكون في مكان قريب من حد في المنتدي بتصل بية وعلي سبيل المثال انا ذهبت الي احمد شوقي واحمد كمال في المنوفية وكانوا في منتهي الكرم والجدعنة وقول زي مانت عايز . وايضا الحبيب الغالي محمد انور دائما يتصل من ايطاليا مش بيا لوحدي لا بناس كتير وبيعرض مساعدة علي الاعضاء بدون مقابل وايضا الشيخ مجدي لما بكون في اسكندرية واحمد فكري وعاصم الشبراويني بيجي القاهرة ويقعد معانا بكل حب وغيرهم وغيرهم وبنتعامل مع بعض علي اساس الصراحة والصدق والمحبة ياجماعة الموضوع في حاجة غلط .
وانا اناشد الاخ العزيز الي باع المسدس ان اما ان يقوم باصلاح المسدس علي حسابة اما ان يرجعة ويرد الي الاخ العضو فلوسة ولا يوجد حل ثالث فالاعتراف بالخطأ هو من شيمة الرجال وانا علم ان من باع المسدس رجل محترم وان كان اخطأ فهو عن غير قصد ونحن في انتظار ما سيحدث وخيرا ان شاء الله

السلام........يااخي بعد كل هالكلام ومافي رد !!!!العوض بالله
لكن ارجوا ان تكشف اسمه حتى لايغش احد اخر
والسلام

انا مش عارف انتم مكبرين الموضوع لية ؟
على ما افتكر العضو كان عارض المسدس بمبلغ زهيد وحضرتك قلت انك نزلت معاة يعنى تقريباخلص على 150 او 175
وبعد كدة لقيت الجلدة بتسرب
الجلدة بتتغير بسهولة وممكن تعمل واحد على ايدك وتركبها
وكان المفروض انك تجرب المسدس قبل متشترية
انا كنت هشترى المسدس دة وكلمت صاحبة وقالى انا ببيعة علشان بمر بازمة فممكن مبيردش عليك علشان محروج انة يردلك الفلوس انا مبدفعش عنة
بس بفترض حسن النية

السلام عليكم ورحمة الله وبركاته…
جزاكم الله خيراً علي هذه الردود الكريمة
والحقيقة أن المنتدي ده من احسن المنتديات الي اشتركت فيها بجد والله بقولها بكل صراحة كفاية فيه الاشخاص المحترمة الي فيه والأخلاق الطيبة والمساعدة للغير وافضل ما في هذا كله هو وجود الدين الذي به تضمن صاحبك في كل شئ
وجزاك الله خيراً يا استاذ جلال بالخصوص…
وبالنسبة للأخ العزيز (ابو الشوق) أنا عندما اشتريت المسدس واشتريت بعدها أنبوبة الغاز ، ركبت جلده بنفسي ودي مفهاش اي مشكلة ، لكن المشكلة ان الهواء عندما اضغط علي الزناد ينطلق من الفتحة الموجودة بأعلي المسدس ، ولا تتحرك الطلقة من مكانها مطلقاً ، وذهبت به الي محل ميشل عازر فقال ان هناك مشكلة في (الجيوان) وقال لي اذهب الي محل (زكي عوض) الموجود بغمرة فذهبت الي هناك وقلت لا داعي ان اكلمه (صاحب المسدس) ان كان الامر بسيطاً ولكن الغريب ان صاحب المحل قال لي ان هذا المسدس اتفتح قبل كده واتلعب فيه ( وكانت المسامير واضح عليها انها (متآكلة) وقال انه محتاج بلف تقريباً وقال هيتصلح ب 125 جنيه…
فالخطأ يكون في التالي :
• انني اشتريت المسدس علي انه لم يفتح وحالته جديدة (وهو مفتوح )
• أني اشتريته والمفروض يكون شغال ومش محتاج لأي تصليح ( وهو مش شغال تماماً ويحتاج لتصليح قدره 125 جنيه)
وأمنا مش لنتكلم علي السعر الي اشتريت به المسدس ولاكن بنتكلم علي (اتفاق وبيع) وهناك اصول للبيع يجب ان تؤخذ في الاعتبار *

الاخ العزيز حمزة سلام الله عليك ورحمتة وبركاتة
ارجو منك الاتصال بالاخ الي باع المسدس انا تكلمت معاة وهو ها يروح معاك عند شريف وتكلموني من هناك وفي حالة عدم ردة ارجو منك الرد السريع .
يا ابو الشوق انت راجل زي حالتنا عارف معني الكلام الي يطلع من الناس لابد ان يكون قدها ويبدو ان الاخ حمزة ليس علي دراية بالسلاح وهو دة بيت القصيد واحنا مش مكبرين الموضوع احنا بنتعامل اخوان ليعني لازم نخاف علي بعض

السلام عليكم ورحمة الله
جزاك الله خيراً علي الاهتمام يا أستاذنا العزيز استاذ جلال
أنا اتصلت بيه وقال لي أني اذهب الي شريف في شبرا كما ذكرت، وهيتصلح علي حسابه (الاخ صاحب المسدس)…*

ربنا يعوض عليك

بسم اللة الرحمن الرحيم
مش هقول اخوانى طبعا عشان محدش منكوا يزعل
لكن اولا انا صاحب المسدس
ثانيا الناس اللى بتتكلم على عدم دراية
انا مش بنصب على حد لانة مش دفع فلوسة وانا هربت برة البلد
وثالثا المسدس كان سليم وهو اللى بوظة
والمسدس كان لم يفتح
وهو للعلم بالشئ بيفهم فى السلاح اكتر منى بمراحل
وانا مجرب المسدس لية وكان شغال
وكان واحد صديقى عايز يشترية بس بمبلغ زهيد وانا رفضت
وكان هناك ناس كتيرر من المنتدى عايزة تشترية
ولبالنسبة للناس اللى عمالة تقول المصريين
مالهم المصريين
ومش هعيب فى اى فرد
لكن انا مش هلتزم مع الاخ حمزة باى شئ
لانى اللى انا اعرفة فى نظام البيع والشراء
عين بتشوف وعين بتدفع
ياريت يا جماعة اكون وضحت الصورة
وعلى فكرة انا اشتريت بندقية من احدى الاعضاء من المنتدى
وبعد طلعتين بالظبط وبشهادة كاريزما قالى عايزة جلبة وسوستة
مش قولت انا واخدها بايظة والا دى عايزة سوستة اسبانى ب كذا
اتمنى كدة اكون وضحت الصورة
لكن للعلم بالشئ انا كدة خلاص بعد ما تم من عملية التشهير
انا لن التزم معة باى شئ
واذا كان لة حق فعند اللة
واللة ولى المتوكلين
وشكرا

اخ سام جميل اوى الكلام ده.....

انا ليه سؤال... طالما هو كتب عنك الكلام ده وشهر بيك ليه مردتش على الكلام ده بسرعة قبل ما المنتدى كله ينقلب عليك؟حتى يكون الحكم عليكم عادل ....
وعلى حسب كلامه انك بتتهرب منه ومكنتش بترد على تليفوناته حتى تعرف ماذا حدث؟
وايه مصلخته فى انه يشهر بيك طالما انه جرب المسدس ولقاه تمام؟

انا لا اوجه لك اى اتهام ولا اتحيز لاى منكم لكن هناك علامات استفهام وشكوك تحوم حولك بعدم ردك بسرعة!!!!!!
اوعى تفتكر انى وكيل نيابة بيحقق معاك لكن اعتبرنى اخ ليك يخاف عليك.....

ارجو ان كلامى يكون خفيف عليك وان كان ليك حق فتاكد انه مش حبضيع ابدا......

لا تعليق لاتعليق لاتعليق

لا حول ولا قوه الا بالله

السلام عليكم ورحمة الله
كفاية اعترافه لي في التليفون بأنه قال ( انت كنت كاتب _ تقريباً أتنصب عليّ _ الي أنا كنت أناكاتبها في بداية الموضوع ، فقال لي أنا بتصل بيك وبأكد عليك انك أتنصب عليك ، قلت له اذاً الفلوس الي أخذتها حرام وانا مش مسامح فيها ، قال لي الحرام والحلال ده عند ربنا…) وقبلها عندما كلمته عل سعر تصليحها قال لي ( مبروك عليك الفلوس اتصرفت )
• والبنسبه لقولك أني أخذت المسدس وبوظته : أنا في اليوم الذي اشتريت فيه المسدس وانا راجع اشتريت أنبوبة غاز في وقتها حتي اجربه فلم يعمل في يومها ، في اليوم التالي ذهبت به لأعلم ما الذي فيه وعلمت وقتها من محلين بأنه فيه المشكلة واليوم ذهبت به الي محل شريف كما قال لي استاذ جلال وقال أيضاً ان هناك فيه مشكلة بعد ان تحدث معه استاذ جلال.

• وبالنسبة للبندقية الي اشتريتها من الاخ فهي كانت شغالة علي الاقل ولو كنت كلمت صاحبها لم يكن ليمانع ان ترجعها له لو كان بينكم اتفاق علي ان حالتها ٩٠٪ او ٨٠ ٪ وليس فيها اي شئ ولو فيها اي شئ بيننا اتصال وبيننا المنتدي… هذا هو الكذب بعينه والاصل في البيع ان يكون الشئ المباع شغال. *

• وبالنسبة انك بتقول انك جربت المسدس لية وكان شغال : أنا مش فاهم قصدك إيه لو كنت تقصد انك جربته لنفسك فدي حاجة لا تخصني لأني في النهاية اخذته مش شغال ، وان كان قصدك انك جربته لي أنا فإننا لم يكن معنا اي طلق ولا أنبوبة الغاز …
وحسبنا الله ونعم الوكيل فيه ولا حول ولا قوة الا بالله.
واستاذ جلال عارف كل حاجة…
وانا آسف جداً جداً يا استاذ جلال اني تعبتك معاية ومتشكر افضالك (كنت في افضل من حسن ظني فيك )
وانا اكتب هذا الكلام حتي لا يقع احد فيما وقعت فيه ، فالحمد لله جت في حاجة بسيطة والإنسان بيتعلم كتير في مصر…
*

سبحان الله هو الذى بيده ملكوت كل شىء.......

ا/حمزة .. ا/سام انا غير متجيز لاى منكما لكن احب اقول كلمة واحدة :

الاستاذ جلال اتكلم عن المنافق وصفاته وانا احب اضيف على هذا الكلام ان منزلة المنافق عند الله هى الدرك الاسفل من نار جهنم بل وانه يلقى به فى بئر يسمى (جب الحزن) :(جب : بضم الجيم و الحزن : بفتح الحاء والزين لانها اعم واشمل من الحزن : بضم الحاء) لان هذا البئر تنزل فيه عشارة اهل النار من صديد وقيح ... الخ
وان هذا البئر تتعوذ منه نار جهنم فى اليوم 100 مرة وهى اصل العذاب ... فما بالنا نحن البشر.......

ارجو منكم ان تتذكروا هذا الكلام جيدا وربنا يهدينا جميعا ........ والسلام

الموضوع خلص وأنتم زي مانتوا شايفين الواحد بيشتري الراجل مش فلوسه ولازم للإنسان إنه يتعامل بصدق سواء كان البائع أو المشتري.بصراحة سواء كان الباع أو المشتري غلطان تذكرو كلمة الرسول "ربح البيع أبا الداحداح"
على فكرة الرسول (ص) قال إن أغلب التجار فالنار لانهم بيزينو السلعة في عين المشتري حتى لو على باطل!
أوصيكم بتقوى الله
وكل الناس فالمنتدى تراجع نفسها والا هنلاقي نفسنا في داومه ملهاش آخر وبعدين نزعل من حالنا وحال بلدنا.ولكل الناس: "كما تقولون يولى عليكم" ربنا يوفق الجميع وكلنا اخوة لما في الصلاح والمحبة.

"اذا دعتك قدرتك علي ظلم الناس فتذكرة قدرة عليك "

والله اللي بيحصل ده حاجة تزعل
اذكركم اخواني ونفسي بحديث الرسول صلي الله عليه وسلم
( رحم الله رجلا سمحا اذا باع واذا اشتري واذا اقتضى )

أنا رأيي إننا نطرد الأخ الي يصدر منة أي فعل مشين للحفاظ علي سمعة المنتدي لأن الذي يربطنا حب وتعاون
ولا إية رأيكم ياجماعة

بسم اللة الرحمن الرحيم

واذا كان لة حق فعند اللة
واللة ولى المتوكلين
وشكرا


لأ متدين بصراحة !!!

بسم الله الرحمن الرحيم
ايه اللي بيحصل ده يا جماعه هوه الواحد يغيب عن المنتدي شهر يلاقي العمليه كده
عموما انا شايف ان الموضوع اتعدي 100 وله 200 جنيه الي موضوع الاخلاق وكلام الرجاله وحاجات كده بس اللي انا اعرفه ان المشكله تتحل بخد فلوسك وهات المسدس وخلصت !!!!!!!!!!!!!!!!!!!!!!!!!!
ده انا مره كنت اخد قطع غيار اسبير لبندقيه من الشيخ مجدي تمنها 1000 جنيه مش 100 ولما قررت بيع البندقيه بعتها وبعدين حطيتهم في العربيه من غير ما اتصل بيه روحتله وقلتله انا بعتها وماعدش يهم لازمه قالي ارجهملك وطلع المبلغ في ساعتها وهوه هوه نفس المبلغ مخصمش مليم بالرغم انهم قعدوا عندي لمده سنتين
اعتقد ان دي الرجاله اللي مش بتتربط من لسنها وبس دي الرجاله الجدعانننننننننننننننننننننننننننننن اوي كان ممكن يقول انا بعت من سنتين بس هوه لما عرف اني بعت البندقيه قالي وماله خد الفلوس ونشوف ليهم بيعه سبحان الله

بسم الله الرحمن الرحيم
ايه اللي بيحصل ده يا جماعه هوه الواحد يغيب عن المنتدي شهر يلاقي العمليه كده
عموما انا شايف ان الموضوع اتعدي 100 وله 200 جنيه الي موضوع الاخلاق وكلام الرجاله وحاجات كده بس اللي انا اعرفه ان المشكله تتحل بخد فلوسك وهات المسدس وخلصت !!!!!!!!!!!!!!!!!!!!!!!!!!
ده انا مره كنت اخد قطع غيار اسبير لبندقيه من الشيخ مجدي تمنها 1000 جنيه مش 100 ولما قررت بيع البندقيه بعتها وبعدين حطيتهم في العربيه من غير ما اتصل بيه روحتله وقلتله انا بعتها وماعدش يهم لازمه قالي ارجهملك وطلع المبلغ في ساعتها وهوه هوه نفس المبلغ مخصمش مليم بالرغم انهم قعدوا عندي لمده سنتين
اعتقد ان دي الرجاله اللي مش بتتربط من لسنها وبس دي الرجاله الجدعانننننننننننننننننننننننننننننن اوي كان ممكن يقول انا بعت من سنتين بس هوه لما عرف اني بعت البندقيه قالي وماله خد الفلوس ونشوف ليهم بيعه سبحان الله