يللا نصنع بأيدينا !!!!!

[أسامه خطاب]

السلام عليكم ورحمة الله وبركاته
انا شايف في منتدانا ان فيه ناس عندها ابتكار وتطوير وبتعمل تعديلات زي ما قرينا موضوع الأخ جلال خليفة عن تركيب سوستة الديانا في أنواع اخرى و حدث تغيير في أداء البندقية
وكلام الأخ صلاح فريد عن التعديل في الرش المحلي ليكون بجودة المستورد
ومن هنا خطرت لي الفكرة
وهي كيف يمكن صنع الرشة ؟؟؟
هل يتم صناعتها عن طريق انصهار معدن الرصاص وصبه في قوالب ؟
أم انه عن طريق مكبس يقوم بتشكيلها ؟
ايه رأيكم لو نفكر مع بعض هنا اننا نصمم الرشة بنفسنا ونصنعها حسب المواصفات القياسية
والخامات طبعا رخيصة وهي معدن الرصاص ومتوفر
أعتقد لو كل واحد فينا وضع هنا أفكاره وكل واحد فينا وضع هنا محاولاته ويطرحها على الباقين ويتم مناقشتها ممكن نتوصل الى أفضل طريقة لصناعة رشة بمواصفات قياسية ويكون سبق لمنتدانا
أرجوكم لا ترفضوا الفكرة من بدايتها لكن حاولوا وفكروا وصمموا ونفذوا وأكيد ان شاء الله هيكون فيه فوائد كتيرة جدا

[احمد عواض]

السلام عاليكم احمد عواض مهندس ميكنيكة تخصص هندسة التصميم و الانتاج
معلش بس انا عايز اقول حاجة خطير ابخرة الرصاص (عملية انصهار معدن انصهار الرصاص ) تتميز بل السمية الشديدة و القاتلة احيان و تسبب شلل فى الاعصاب ورعشة بل الاطراف وعند دخول مقذوف الرصاص داخل جسم الكائن الحى يسممة فورا ارجو اقتراح ان نصنع الرش من الالمنيوم او القصدير او النحاس مع العلم ان معدن الرصاص يمتاز بدرجة انصهارة القليلة مقارنة ب النحاس و الالمنيوم و لكن يمتاز بسميته الشديدة
ارجو ان لا يؤخذ هذا الكلام على انة كلام يدعو لاحباط ولكن يدعو لحيطة و الحذر فقط و السلام عاليكم وكل سنة و انتم طيبين ( انا تحت امر اي حد عايز يصمم مكنة او تعديل او اداة صغيرة و ارجو المشاركة فى موضع التصميمات و شكران لكم ) سوال اخر من الناحية القانونية هل تصميم السلاح الصيد حتى لو كان ضغط هواء نمرة 2 مسموح بية فى مصر ام لا ؟ ولكم منى كل الحب
ahmed_awwad2007@YAHOO.COM

[ابو الشوق]

موضوع جميل يستحق الدراسة والبحث
بس يا ريت لو نركز على تعديل تقوية القوة الدافعة للبنادق
بالنسة لسؤال البشمهندس احمد
لا اعتقد ان القانون يجرم اسلحة ضغط الهواء
ولاكن يجرم السلاح الزى يستخدم البارود كقوة دافعة
والى الامام

[galal khalifa]

الاخ العزيز اسامة طبعا احنا كلنا عايزين المصلحة بس تكلفة ان احنا نصنع رش ها تبقا مكلفة وان احنا نشترية ها يكون اقل وكان في ناس في الاسكندرية عاملين مصنع صغير وقفلوة علشان التكلفة والخامات .
اما بالنسبة الي الاخ احمد عواض انت عندك حق بس الرش المستورد الخامات الي بتتعمل منة تحت المراقبة ونسبة التسمم فيها قليلة جدا وممكن دة يكون في الرش المصري والله اعلم

[el7oss]

فكرة جامدة جدا......أنا دورت شوية عنت لقيت إن فيه ناس عاملة بنادق فالبيت
يعني هم اللي صنعها بنفسههم مش بس لرش !!!

شوف كده وياريت حد يقولنا نعمل كده إزاي

http://www.youtube.com/watch?v=1n-EXv5lLbE&feature=related

[أسامه خطاب]

المهندس أحمد عواض - أشكرك على مرورك وردك ونصيحتك من ناحية ابخرة الرصاص وأهمية الاحتياط والحذر منها
ولو تلاحظ كلامي في الموضوع أني قلت عايزين نعمل رش يكون في مستوى المستورد أو أفضل وطالما معانا واحد زي حضرتك له خبره هندسية عملية أكيد هنوصل مع بعض لطريقة التصنيع وان شاء الله بشوية تفكير منك واهتمام للموضوع أكيد هتجيب لنا طريقة جيدة لصناعة الرش ومن هنا أدعوك للمشاركة معنا بتصميماتك
وهأرد على سؤالك من ناحية تصميم بندقية ضغط هواء نمرة2 - بالنسبة للتصميم أعتقد ان مافيش مشكلة لكن المشكلة في التنفيذ لان لابد له من تصاريح لان ماسورة البندقية ضغط هواء بها شخشخنات مثل البنادق النارية إلى حد ما - وكمان مشكلة توفير خامات الصلب , لكن أنا اعرف ناس عملت تعديلات على بنادق وركبت ماسورة دي بدل ماسورة دي - وخرط أجزاء بلاستيكية تم تغييرها الى صلب وهكذا
المهم انا عايزك تركز معانا في تصميم عمل الرش وأكيد هننجح وربنا يوفقنا جميعا

[أسامه خطاب]

أبو الشوق أشكرك على مرورك وردك موضوع القوة الدافعة من الموضوعات المهمة وتستحق الدراسة أيضا
الأخ el7oss أشكرك على مرورك وردك وأنت شوفت بنفسك ان فيه ناس فكرت وطورت وصنعت بنادق لنفسها وبتتفاخر بيها واحنا مش اقل منهم في اي شئ وانا باتكلم هنا على الرش يعني أسهل من بندقية بكتير واعتقد ان منتدانا في ناس تقدر تجيب أكتر من فكرة لتصميم الرش

[أسامه خطاب]

الاخ العزيز اسامة طبعا احنا كلنا عايزين المصلحة بس تكلفة ان احنا نصنع رش ها تبقا مكلفة وان احنا نشترية ها يكون اقل وكان في ناس في الاسكندرية عاملين مصنع صغير وقفلوة علشان التكلفة والخامات .
اما بالنسبة الي الاخ احمد عواض انت عندك حق بس الرش المستورد الخامات الي بتتعمل منة تحت المراقبة ونسبة التسمم فيها قليلة جدا وممكن دة يكون في الرش المصري والله اعلم

الأخ الغالي جلال خليفة - أنا مش قصدي ان نعمل رش ونتاجر فيه لا - أنا قصدي ان اعمل رش خاص بي انا بالمواصفات اللى انا عايزها في حدود المصرح به قانونا - يعني انا عايز مثلا رشة أتقل وأطول من الموجودة ( مش اختراع لان فيه زيها بيتباع بس مش عارف احصل عليه لانه مش موجود في محلاتنا ) هو ده الهدف من طرح هذا الموضوع وعندي احساس قوي اننا ممكن نجمع أفكارنا ونطلع بنتائج ممتازة , وأشكرك على مرورك وردك وننتظر أفكارك

[ابو الشوق]

والله يا جماعة موضوع الاستاذ اسامة خلانى افكر فى مشروع انا شايف انو ممكن يكون فوق الممتاز
الفكرة ببساطة شديدة اننا ناخد توكيل شركة محترمة للبنادق ولتكن مثلا جامو ونجيب الاجزاء مستوردة وتتركب فى مصر زى العربيات كدة ونكون الوكلاء والموزعين فى الشرق الاوسط
ومنها ننمى الهواية ويبقى كمان باب رزق لينا كلنا
انا عارف ان ممكن حد يقول دة بيحلم بس انا بطبعيتى بحب افكر فى اى حاجة بتجيب فلوس

يا ريت باقى الاعضاء يقولوا رايهم فى الموضوع دة

[el7oss]

والله يا جماعة موضوع الاستاذ اسامة خلانى افكر فى مشروع انا شايف انو ممكن يكون فوق الممتاز
الفكرة ببساطة شديدة اننا ناخد توكيل شركة محترمة للبنادق ولتكن مثلا جامو ونجيب الاجزاء مستوردة وتتركب فى مصر زى العربيات كدة ونكون الوكلاء والموزعين فى الشرق الاوسط
ومنها ننمى الهواية ويبقى كمان باب رزق لينا كلنا
انا عارف ان ممكن حد يقول دة بيحلم بس انا بطبعيتى بحب افكر فى اى حاجة بتجيب فلوس

يا ريت باقى الاعضاء يقولوا رايهم فى الموضوع دة

بس أعتقد إن التوكيل ده حيتكلف حبة حلويين اوي :d معاك فلوس؟:d

[ابو الشوق]

موضوع الفلوس لية حل
ان يتم تاسيس شركة مثلا براءس مال 100 الف جنية ويتم طرح اسهم للبيع مثلا 10 الاف سهم
قيمة كل سهم 1000 جنية وكل واحد يدخل على قد فلوسة الى عايز سهم ياخد والى عايز 10 ياخد وفى نهاية السنة الارباح بتتوزع على حاملى الاسهم كل فرد بعدد الاسهم الى شاريها
انا شايف ان الموضوع دة ممكن يكون مربح جدا علشان جديد ومتعملش قبل كدة وكمان بيكسر الاحتكار مش فى مصر بس لا فى الشرق الاوسط كلة
يا ريت الاعضاء لو عندهم اقتراحات يقولوها

[galal khalifa]

الاستاذ الفاضل اسامة خطاب
ان متفق معاك في الفكرة وهي رائعة وجبارة وانت عارف اني بحب الابتكار بس علشان نعمل الي انت عايزة لازم نتوحد في الافكار وفعلا ياباشا التلفة هتكون رهيبة لانك لازم تطلع تصريح تصنيع ذخيرة وتجيب الماكينة من الخارج فضلا علي المواد الخام ويارب الفكرة تكون حقيقة يارب يا اسامة بك

[أسامه خطاب]

الأخ أبو الشوق - فكرتك ممتازة ومحتاجة أولا موافقة الشركة المصدرة ثانيا تصاريح التصنيع والاتجار في بنادق ضغط الهواء وثالثا توفير راس المال اللازم لتكوين الشركة

[ابو الشوق]

اسامة بك
انا سعيد انك متحمس لفكرتى
بالنسبة لموافقة الشركة دى ممكن محمد بك انور يفيدنا فيها
اما بالنسبة للتصريح بالفلوس كل حاجة بتخلص والبنسبةلراس المال موضوع الاسهم ان شاء الله ممكن يحل الموضوع
لو الموضوع دخل فى الجد هتلاقى المهتم وغير المهتم فى الصيد هيدفع ويشترى اسهم علشان الموضوع لو تم صح هيكون مربح جدا

[أسامه خطاب]

جلال بك - أنا لا أقصد شراء ماكينة لتصنيع الرش ولكن ما قصدته هو عايزين نصمم أي تصميم نعمل بيه الرش حتى لو هنعملها واحدة واحدة وقصدت أيضا ان تكون للهواية وبعد ما نعمل تجربة ونلاقيها ناجحة نفكر ازاي نخليها مشروع تجاري
هل الرش يصب في قوالب ؟ لو يتم صب الرصاص المنصهر في قوالب , عايز اعرف ازاي اعمل التجويف الداخلي
هل الرش يتم عمله عن طريق مكبس
ياريت نفكر مع بعض ونوصل للطريقة

[أسامه خطاب]

أبو الشوق - الشركات الكبيرة واللى لها شهرة عالمية علشان تعطي الوكالة لحد أكيد بتحتاج أن يكون له وضع مالي معين وبتحتاج إلى تأمين
لكن أعتقد اللى ممكن نعمله شركة زي ما حضرتك اقترحت ونتفق مع الشركات على استيراد البنادق ونجمعها وكده تقدر تستورد من مجموعة شركات ويكون عندك تشكيلة من الشركات العالمية - لكن الموضوع محتاج استفسارات كتير لأنه بيدخل في نطاق أمن الدولة لانه سلاح .
فكر بس معانا نعمل الرش الأول , عايزين نشوف الابتكارات في المنتدى

[salahfareed]

اسامه بك خطاب اولا شكرا على رسالتك الرقيقه واهتمامك الشديد بالموضوع وانا موافق على كل الفكرة وطبعا انا فاهم ان الموضوع ليس شراء ماكينه لصنيع الرش بل اؤكد لك ان عملت رش من النحاس ومن الالومينيوم ومن الحديد ومن الرصاص طبعا وهى عمليه مش محتاجه عدة كتير لاكن تأخذ وفت كتير لانها طرق يدويه ومحتاجه طول البال وبعض الدقه
اما سؤال عن الرش وهل يصب من عدمه اقول الانواع الجيدة يتم تصنيعها بالمكبس فى قوالب حسب الشكل المطلوب والرشه اصلا تصنع من سيخ من الرصاص بالتخحانه المطلوبه(177 او 22 ) نمرة 1 او 2 ويقطع الى قطع متساويه فى الطول وتكبس على البارد وتخرج الرشه بالشكل الذى نراه
والفرق بين الانواع الجيدة من الرديئه هو فى نوع السيخ او العمود الرصاص وطريقه صنعه من البدايه فطرق صناعه عامود الرصاص مختلفه وهو موضوع يتكلم فيه المهندسين المتخصصين وانشاء الله لو تحب اشرح لك الطريقه خطوة بخطوة بس هى بطيئه ولكن عموما لما كنت اطلع للصيد بالرش زمان (كنت اصطاد بالرش المصرى العادى بس باكون مجهز معايا 10 او 15 رشه من اللى انا معدلهم علشان اضرب بهم المسافات البعيدة او الطيور الكبيرة ) ونكمل بعدين واشكرك مرة اخرى على رسالتك الرقيقه

[أسامه خطاب]

صلاح بك فريد - حضرتك بدأت تدخل معايا في الموضوع والجميل أن لك تجارب في هذا الموضوع وهو ده اللى أنا عايزة زي ما قلت بالظبط أصيد برش عادي ويكون معايا رش بمواصفات انا عايزها
وطبعا طالما بيتعمل يدوي أكيد بياخد وقت طويل ومحتاج طولة بال وصبر
وياريت تشرح لي الطريقة خطوة خطوة
وأشكرك على تفاعلك مع الموضوع

[wegdan12345]

اسمحولي اشاركم الحوار الجميل دة لاني فكرت في الموضوع دة
1 لو قلنا ان احنا اخدنا توكيل لشركة جامو يبقي هنصنع نفس الرش الجامو الي هو البرو ماجنوم والماتش وغيرة من انتاج الشركة يعني مش الرش المعدل زي اللي بنشوفة علي النت زي انواع طويلة وانواع تقيلة وانواع لها سن بلاستيك (polymers)
2 استهلاكنا هنا في مصر للرش قليل لان هوايتنا مش منتشرة فمش هيكون مشروع مربح
3 لو حبيتة تعرفوا طريقة التصنيع ممكن نسال في مصانع الرش الي في اسكندرية عن الطريقة مع تبديل المعدات واخامات بمعدات احدث وخامات افضل

بس هي فكرة حلوة

[أسامه خطاب]

منور يا وجدان وأهلا بيك واشكرك على مداخلتك
الفكرة ليست توكيل ولا شئ - الفكرة ازاي أصنع رش بنفسي واعمل التطويرات اللى انا عايزها
وياريت لو حد يعرف يسأل لنا في مصانع اسكندرية ازاي بيتعمل لان لو شفنا طريقتهم أكيد هتفيدنا ونكون عارفين نعمل الرش ازاي

[wegdan12345]

ده نورك يا ا اسامة
الحقيقة انا مش عايز احبطك بس انا بيتهيائلي ان الموضوع مكلف عموما خلينا نشوف اي حد من الاسكندرية يشوفلنا حكاية المصنع ويارب يطلع توقعاتي عن التكلفة غلط علشان انا زيك نفسي يكون عندنا انواع رش زي الموجود برة خصوصا انا بندقيتي بتحب الطلقات الثقيلة وانت عارف ان اغلب الرش الي فيه تعديلات وشغل من النوع الثقيل
اما بالنسبة لطريقة التصنيع فانا ارجح انها شغل مكبس مش انصهار وصب في قوالب خصوصا ان الرصاص من المعادن القابلة للتشكيل والتعديل بسهولة لانه ((طري)) طبعا متقسش طراوة الرش المصري لانة غالبا نسبة الرصاص اقل ما يمكن والباقي شوائب ((رش ابن .........)) .

[أسامه خطاب]

نفسي نصمم مكبس يدوي صغير بالمواصفات اللى احنا عايزينها انا عايز رشة تكون أطول وأتقل لان يكون لها تأثير قوي مع الديانا52
بصراحة انا حاليا بأصيد دايما بالمارسمان لأنه افضل رش مصري
وانا كنت اشتريت سنة1999 رش من عند نبيل فتح الله من اسكندرية كان ممتاز جدا لأنه تقيل وطري شوية
انا مش فاكر اسمه لكن العلبة بلاستيك ومرسوم عليها صورة ذبابة
وبأشوف أنواع جميلة جدا لشركات عالمية ومش عارف ليه مش موجود منها في مصر

[galal khalifa]

الله عليكم جميعا عضو عضو من اشتركوا في هذا الموضوع والله احنا علي الطريق الصح والسليم لتطوير المنتدي وان يكون الاعضاء كلهم في عون البعض شكر خاص لكل من شارك وان شاء الله انا هدور علي النت علي ماكينات تصنيع الرش واشوف ممكن نوصل الي الطريق ان شاء الله

[احمد عواض]

السلام عاليكم ورحمة الله وبركاتة كان فى سؤال عن الرش المصنوع من مادة الرصاص هو عبارة عن شرائح من مادة الرصاص ويتم كبسة فى مكبس به اسطمبة محفور على البارز شكل طلقة الرش
يعن باختصار شديد مكبس و اسطمبة ولو عايزين رائى اعملها من مادة القصدير لانه سهل التشكيل و درجة انصهار منخفض جدا بس ممكن مع قوة الانطلاق الخاصة ببندقية الديانة مثلا يحصل تشوة لطلقة الرش اثناء انطلاقها من ماسورة البندقية او احتكاكها فى الهواء

[احمد عواض]

معلش ملاحوظة من الممكن تصنعها من الالمنيوم او النحاس

[أسامه خطاب]

جلال بك - بارك الله فيك والله عليك وعلى حماسك انا عايزك كده على طول تفتح نفسي وعايزين نتحدى كلنا مع بعض وأعضاء المنتدى كلهم ونوصل لنتيجة جيدة
المهندس أحمد عواض ياريت تعمل لنا فكرة مكبس نقدر نعمل به رش - وهنستخدم الرصاص لان لين وسهل التشكيل
وبعد كده ممكن نطور الفكرة ونعملها بمعادن أخرى سواء ألومنيوم أو نحاس
والله ولي التوفيق

[أسامه خطاب]

انا زرت أحد محلات الصيد هنا في السعودية ولقيت عنده علبة رش وكانت هي اخر علبه عنده من النوع ده بصراحة عجبتني جدا لأني باحاول اصمم زيها هي فعلا أطول من الرشة العادية وكلها لها شكل اسطواني مافيش الضغطة اللى بتكون في النص وطرفها من الاخر تقيل وهاحط لكم صورة العلبة وهي نوعها نوريكا وجيبتها من على موقع نوريكا
http://www.norica.es/upload/catalogo/30721.jpg

ولو تلاحظوا الرشة مرسومة على العلبة

ودي صورة علشان نعمل مقارنة بين الرش ده وأنواع اخرى
http://up4.m5zn.com/9bjndthcm6y53q1w0kvpz47xgs82rf/2009/12/2/04/jh64uxkpx.jpg (http://www.tobikat.com)

[salahfareed]

انا زرت أحد محلات الصيد هنا في السعودية ولقيت عنده علبة رش وكانت هي اخر علبه عنده من النوع ده بصراحة عجبتني جدا لأني باحاول اصمم زيها هي فعلا أطول من الرشة العادية وكلها لها شكل اسطواني مافيش الضغطة اللى بتكون في النص وطرفها من الاخر تقيل وهاحط لكم صورة العلبة وهي نوعها نوريكا وجيبتها من على موقع نوريكا
http://www.norica.es/upload/catalogo/30721.jpg

ولو تلاحظوا الرشة مرسومة على العلبة

ودي صورة علشان نعمل مقارنة بين الرش ده وأنواع اخرى
http://up4.m5zn.com/9bjndthcm6y53q1w0kvpz47xgs82rf/2009/12/2/04/jh64uxkpx.jpg (http://www.tobikat.com)
على فكرة دا رش جميل جدا وهو كان موجود زمان فى مصر كتير وكان اسمه ؤش طربوش لانه زى الطربوش المصرى بتاع زمان وعلى فكرة من اسهل الانواع فى عمله يدويا فى المنزل باستخدام اسلاك الكهرباء بتاعه الضغط العالى فهى مصنوعه من نحاس او الومينيوم عالى الجودة والنقاء والاسهل استخدام مواسير النحاس التى يستخدمها عامل اصلاح الثلاجات واجهزة التكييف (موجود تخانه 5.5مم) وتحتاج لشغل بسيط قوى:):)

[galal khalifa]

الله علي الافكار لما تجمع بين الخبرة والعلم و الطموح والفكر الي عايز يوصل للي هو عايزة انا علي استعداد لاي حاجة
وعايز بصراحة ااقابل كل الي كتب في الموضوع الي تسمح ظروفة وانا علي ممكن اروح لاي حد واتعرف واتشرف بية
لكم مني تحياتي

[النسناس]

الأخ أسامه
السلام عليكم ورحمه الله وبركاته
بخصوص موضوع صيد السمك أذكرك بشيئ مهم جدا أن وضعيه صيد السمكه يكون من الجنب يعني من السهل جدا إنك تصطاد السمكه أما إذا حاولت أن تصطاد السمكه من الأمام فهذا جدا صعب لأنه لا تري سوي فتحه الفم فقط مع إنعكاس الضوء الذي لا يساعدك في صيدها .......
أما في حاله: الحصول عليها سهل إذا كانت علي وجه الماء لكن إذا ( غرقت ) صعب شويه مجايبها لأن ملمسها مثل ملمس الأرض من أسفل فهذه تحتاج إلي دقه عاليه للحصول عليها
أخوك ناجي :p

[أسامه خطاب]

الأخ ناجي النسناس بيرد علينا في موضوع صيد السمك بالبندقية عموما انا هارد عليك في نفس الموضوع
ياريت تدخل موضوع صيد السمك بالبندقية وهتلاقي ردي عليك

[أسامه خطاب]

على فكرة دا رش جميل جدا وهو كان موجود زمان فى مصر كتير وكان اسمه ؤش طربوش لانه زى الطربوش المصرى بتاع زمان وعلى فكرة من اسهل الانواع فى عمله يدويا فى المنزل باستخدام اسلاك الكهرباء بتاعه الضغط العالى فهى مصنوعه من نحاس او الومينيوم عالى الجودة والنقاء والاسهل استخدام مواسير النحاس التى يستخدمها عامل اصلاح الثلاجات واجهزة التكييف (موجود تخانه 5.5مم) وتحتاج لشغل بسيط قوى:):)
شكلنا كده قربنا نوصل لنتيجة
يعني انت شايف يا صلاح بك ان ممكن نجيب مواسير الفريون بتخانة5.5م ونقطعها بالاطوال المناسبة ونصهر رصاص ونملأ الجزء الأمامي وكده نبقى حصلنا على رشة كويسة

[أسامه خطاب]

جلال باشا أكيد ان شاء الله هنتقابل ويزيد التعارف بيننا أكثر وأكثر لانه هيكون شرف كبير لي

[النسناس]

الـأخ اسامه
السلام عليكم ورحمه الله وبركاته
انا أوافقك علي فكره التصنيع بأيدينا في هذا الرش
خصوصا انه فعال جدا وده بالنظر فقط ولكن تصنيعه محتاج ( واحد حريف ) أو عبقريه نظيفه
فهل ده موجود ؟

[salahfareed]

شكلنا كده قربنا نوصل لنتيجة
يعني انت شايف يا صلاح بك ان ممكن نجيب مواسير الفريون بتخانة5.5م ونقطعها بالاطوال المناسبة ونصهر رصاص ونملأ الجزء الأمامي وكده نبقى حصلنا على رشة كويسة

تمام كدة بس اصعب جزء فى المساله قص الرش بالمقاس متساوى وهو حوالى 8 او 9 مم على ما اذكر يعنى اقص الماسورة قطع بالمقاس دة وهنا لازم يكون عندك سكينه مواسير المهم يكون المقاس متساوى
بعد القص نقوم بعمل شقوق فى احد طرفى القطعه على شكل كروس ( +) وهى شقوق بطول 3 او 4 مم طوليه (نستخدم صفيحه منشار اركت) ثم نلم هذة الاطراف على بعض ليتكون مقدمه الرشه لتكون شبه مدببه ونستخدم فى ذلك نفس المنجله الصغير اللى بتكون مع عدة شحن الفريون علشان يكون اللم متساوى وطبعا تقوم بتلحيم المقدمه بسلك نحاس اسمه سلك لحام فضه وطبعا لحام خفيف خالص تصنع منهم مثلا 10 قطع ثم اختار افضل رشه فى شكل اللحام وتقوم بوزنها بالمسزان الحساس اليدوى طبعا تجد ان وزنها اقل من 1 جرام ونحن نريد ان يكون وزنها 1.2 جرام ونعوض نقص الوزن بالشمع المنصهر ونصعه فى التجويف الخلفى
بالتنقيط علشان نقدر نضبط الوزن صح
طبعا هناك اهم جزء قبل الشمع وهو عمل الشفه او الداير الخلفى للرشه ويتم عمله باستخدام (سومبك) مسمار مسلوب نضعه فى التجوف الخلفى ونقوم بالطرق عليه حتى تتسع الريشه لتكون اكبر من جسم الرشه الامامى ولعمل ذلك بدقه نستخدم منجله المواسير مع ملاحظه هامه جداااا وهى الا يزيد عرض الشفه عن 1.2 او 1.3 مم وهذا الجزء هو الذى سيحتك بالماسور والششخه ويؤدى الى عمل مقاومه تؤدى الى دوران الرشه حول نفسها بسرعه هذا يسبب اتزان الرشه فى الهواء
طبعا هناك شويه تفاصيل بسيطه اخرى سوف تكتشفها بالتجربه والخبرة مع الوقت
ارجو ان تكون الفكرة اتضحت واصبحت مفهومه وطبعا الفكرة قابله لتعديل المواد المستخدمه
واى خدمه يا اسامه بك
ملحوظه ///طبعا انا باتكلم من الذاكرة ولم اعد للموضوع سابقا فاذا كان فى اى سؤال انا فى الخدمه(الطريقه دى لها عيوب ممكن اذكرها فيما بعد)
اسف طولت عليكم ارجو ان اكون افدتكم:eek::eek::rolleyes::rolleyes:

[salahfareed]

هذة صورة رسم كروكى عملتها على الجهاز بس وحشه جدااا
لان حجمها كبير وقمت بتصويرها بالموبايل من على شاشه الجهاز
بس اعتقد مع الشرح حتكون مفهومه وقللى رايك:d

[ابو الشوق]

مدام انتم مصممين على موضوع الرش اية رايكم نتفق مع مصنع الانتاج الرش مثلا الى فى الاسكندرية ويعملنا رشة عادية بس مقدمتها يتم وضع رمانة بلى صغيرة والرمانة دة هتدى الرشة الوزن الطلوب والثبات والاختراق
ونتفق مع صاحب المصنع يعملنا كميات كبيرة ساعتها هتكون رخيصة وقوية

[salahfareed]

والله فكرة بس يبقى رجعنا نشترى رش غالى زى بتاع برة لان الرمانه او البليه اغلى من الرشه المصرى
وتبقى يابو زيت لارحت ولا جيت و لكن هل ممكن المصنع يعمل طلبيات خاصه حسب رغبتنا من حيث الوزن والشكل؟؟؟؟؟؟؟؟؟؟؟؟؟
هو دة السؤال وعايزين نجرب يمكن تنفع!!!!!!!!!!!!!!!

[أسامه خطاب]

صلاح بك - حضرتك بجد عبقري
وشرحك وافي وفي منتهى الدقة في اختيار الألفاظ والتعبيرات وبجد انت لما قلت المرة اللى فاتت على فكرة مواسير الفريون كانت عندي مشكله وهو الطرف الأمامي وحضرتك اليوم شرحتها ووضحتها بطريقة جميلة جدا
ربنا يحفظك
وعايز ارد على ناجي النسناس وأقوله إقرأ رد الاستاذ صلاح فريد وانت تشوف مين الحريف هنا
أبو الشوق حبيبنا - هل يا ترى ماكينات الرش اللى في مصانع اسكندرية ممكن تقبل التعديل عليها ويتم تركيب بليه في طرف الرشة - يا ريت حد من اهل المنتدى يقدر يروحلهم ويقنعهم بالموضوع

[salahfareed]

صلاح بك - حضرتك بجد عبقري
وشرحك وافي وفي منتهى الدقة في اختيار الألفاظ والتعبيرات وبجد انت لما قلت المرة اللى فاتت على فكرة مواسير الفريون كانت عندي مشكله وهو الطرف الأمامي وحضرتك اليوم شرحتها ووضحتها بطريقة جميلة جدا
ربنا يحفظك
وعايز ارد على ناجي النسناس وأقوله إقرأ رد الاستاذ صلاح فريد وانت تشوف مين الحريف هنا
أبو الشوق حبيبنا - هل يا ترى ماكينات الرش اللى في مصانع اسكندرية ممكن تقبل التعديل عليها ويتم تركيب بليه في طرف الرشة - يا ريت حد من اهل المنتدى يقدر يروحلهم ويقنعهم بالموضوع
شكرا على ردك الرقيق يا اسامه وفعلا اخجلتم تواضعنا وارجو ان تكون استفدت شىء ولو قليل اما ناجى هو لسه مش عارفنى كويس وهو لو سال عادل اخوة حيعرفنى اكتر وطبعا انا كنت اعرف والدة الله يرحمه وكان يحبنى جدااا وهو كان رسام فنان حقيقى
طبعا انا باهزر معاك يا ناجى واحب اسمع تعلقاتك انت واسامه على طول فى الصيد او اى شىء اخر وتقبلو تحياتى:d:d

[ابو الشوق]

أبو الشوق حبيبنا - هل يا ترى ماكينات الرش اللى في مصانع اسكندرية ممكن تقبل التعديل عليها ويتم تركيب بليه في طرف الرشة - يا ريت حد من اهل المنتدى يقدر يروحلهم ويقنعهم بالموضوع [/color][/b][/QUOTE]
بالسعر المناسب كل حاجة ممكنة

[أسامه خطاب]

تعرف لو الواحد عمل لهم زيارة وشاف طريقة عمل الماكينة ممكن يقدر يصمم حاجة قريبة منها

[m2_aa]

هو انتم ليه وقفتم الكلام في الموضوع ده ؟؟؟

[أسامه خطاب]

مازال الموضوع مفتوح لأي أفكار جديدة أو تصاميم

[ابوشعبان]

انا مع الاخ الكريم فى خطورة الرصاص لانه من المعادن الثقيلة المعروفة بسميتها وخطورة الرصاص يااخوتى ان الرصاص يتراكم فى جسم الانسان حتى يصل الى درجة السمية ويبدا تاثيرة على الكلى وفى بعض الحالات تفاعل مواد كميائية موجودة فى بعض الادية تودى الى هروب الرصاص المخزن فى العظم الى الدم ويؤدى الى تسسم حاد وهذا خلاف التسمم الاول وهو المزمن ارجوا الحذر فى التعامل مع الرش المسخدم من الرصاص ولا تستصغر الكمية فى مع الوفت فد تصل الى درجة السمية هذا للعلم حماكم الله.

[أسامه خطاب]

بارك الله فيك يا ابو شعبان
والله انا كنت متعود وانا باصيد اضع الرش في فمي لكن باكون حريص اني لا ابلع شئ من الرواسب اذا كان فيه طبعا هو كده غلط في غلط وحاليا اتعودت ان لا افعل ذلك لان فيه خظورة وفعلا سيئة جدا
ربنا ينجينا جميعا ويشفي مرضانا ومرضى المسلمين