حكايتى مع اتنين بلطجية على الدائرى .. وأربع غرز فى رأسى [الأرشيف]

تاجر جملة

11-06-21, 06:39 PM

السلام عليكم

يوم الجمعة اللى فاتت كنت ماشى على الدائرى بعربيتى الساعة حوالى 2 ونص بالليل متأخر
وجيت عند محطة كدة عند شركة الكهربا لانى كنت جاى من الرماية وراجع بيتى
لقيت واحد ومراته وطفلين ومعاهم اتنين شكلهم مش ولابد روحت راكن بعديهم بشوية

وبصيت عليهم حسيت ان العيلين دول بيثبتوهم وبينى وبينكم عايز اعمل حاجة وقلقان والمهم توكلت على الله ورجعت بعربيتى وعملت عبيط وقولتلهم يا جماعة الوقت متأخر ولو عايزين اوصلكم
انا تحت امركم وراحت الست صرخت وقالت والنبى توصلنا ومتسبناش وببص لجوزها لقيته متنح على الاخر وعرقان اوى وكل دة وانا بجد خايف من جوايا
انا كان معايا اليكتريك والعصاية بتاعة اكسلنس حاططتها بين رجلى وخدت بالى بسرعة ان العيال
حاطين مطاوى فى جنب جوز الست وفى ضهر الواد ابنهم
قالولى امشى يا ك... ام... من هنا
ساعتها حسيت ان الواد الصغير دة ابنى وروحت فاتح باب العربية ونزلت بسرعة وكانوا هما الناحية التانية من العربية وانا ماسك عصاية اكسلنس باليمين والاليكتريك بالشمال
والله العظيم ضربت واحد بالعصاية فى دماغه ولقيته ساح فى دمه واترمى فى الارض
والتانى جرى وجريت وراه انا وجوز الست وروحت لايشه فى رجله بالعصاية من تحت وطبعا اتقلب
وجوز الست مسك ايده اللى فيا المطوه وطبعا اتعور وانا نزلت فى جسمه تكسير
واقسم بالله كان بيصوت زى المرة
وكل دة واحنا بنجرى ورا الواد اتارى معاهم واحد تالت معرفش طلع منين وضربنى بالمطوة فى دماغى وكان يوم
طبعا كلنا طلعنا على المستشفى والناس جابت الشرطة والعيال اتنفخت
والظابط حالف ياخد منى العصاية والاليكتريك وانا قولتله على جثتى ولولاهم كان الراجل واسرته ضاعوا

واقسم بالله واحد جاله ارتجاج فى المخ والتانى كسر فى القدم والتالت هرب
والحمد لله عدت بسلامة

hosam hamza

11-06-21, 06:43 PM

الله ينور
ادى الرجاله ولا بلاش
تسلم ايدك
المهم تكون ظبتهم

جنرال

11-06-21, 06:44 PM

سلامتك يا باشا بس ده منتدى صيد مش دفاع عن النفس.
ربنا معاك

Andria

11-06-21, 06:46 PM

rabena yekhaleek 3ala shaga3tak , walahy enta hatekaf2 fel gana

pooforever_2010

11-06-21, 06:47 PM

الله ينور حمدالله على السلامه تسلم رغم انه غلط ايه يمشى راجل ومراته وعياله بالليل كده
والله الناس بتستعبط وترجع تعيط
ربنا يسترها

koktal

11-06-21, 06:49 PM

ألف حمد الله على السلامة يا عم .. والله انتا راجل من دهر راجل .. وربنا إن شاء الله يجازيك كل خير على العمل العظيـــم ده ..

gamopt80

11-06-21, 06:50 PM

جدع والله ورجوله منك انك مسبتهمش, وربنا بعتك ليهم الله اعلم كان هيحصل معاهم ايه
والي يحصله حاجه في موقف زي ده يبقى شهيد

تاجر جملة

11-06-21, 06:50 PM

الحمد لله انها عدت على خير وبصراحة الناس والله وقفوا جنبى وكل يوم بيجولى البيت وكفاية ان الواحد يحس
ان عمل خير وان الناس دى بتحبه حقيقى فى زمن محدش عارف فيه نوايا الناس

sameer

11-06-21, 06:51 PM

الله ينور عليك يا باشا ربنا يشفيك يا رب

تاجر جملة

11-06-21, 06:52 PM

مشكورين يا جماعة ونسيت اقولكم ان العيال دى كانت بتقلع الست الدهب
والناس يا عينى بيحلفولى ان الدهب دة شايلينه لأى عوزة
وهما كانوا راجعين من عند حمات الراجل ومروحين

Andria

11-06-21, 06:53 PM

momken teb3atly el email beta3ak , lama 7ateet el mawdou3 3al facebook , kol el nass 3ayzeen esalemo 3aleek we ye3rafo meen el batal , Rabena ye7afesz 3aleek ya rab.

osama.oscar

11-06-21, 06:54 PM

الحمد لله و سلاااااااامتك يا باشا

اسامة

11-06-21, 06:54 PM

ألف حمد الله على السلامة وربنا إن شاء الله يجازيك كل خير

hogan

11-06-21, 07:07 PM

http://www.baramij-net.com/vb/storeimg/img_1303823005_910.gif

Android man

11-06-21, 07:12 PM

في داهية البلطجية المهم الحمد لله انك محصلكش مضاعفات ووالله يوم القيامة هشوف علشان الي حصل ده ربنا محضرك ايه في ميزان حسناتك
بس الظابط ده راجل مش تمام علي فكرة وكل يوم والله انا بيزيد اقتناعي بمسدسات البلي المعدلة وشكلي هشتري واحد

تاجر جملة

11-06-21, 07:14 PM

أشكركم جدا وبحمد ربنا وفعلا الواحد اللى بيعمل حاجة زى دى بيحس باحساس عظيم جدا

تاجر جملة

11-06-21, 07:16 PM

momken teb3atly el email beta3ak , lama 7ateet el mawdou3 3al facebook , kol el nass 3ayzeen esalemo 3aleek we ye3rafo meen el batal , rabena ye7afesz 3aleek ya rab.

أشكرك جداااااا وخليهم يتفضلوا المنتدى

هشام سمير

11-06-21, 07:20 PM

اخى افاضل الرجوله مواقف وانت راجل وراجل جداً كمان الانسان الشهم ميسبش حد فى الموقف دا ويمشى لك منى كل تحيه وتقدير

تاجر جملة

11-06-21, 07:23 PM

اخى افاضل الرجوله مواقف وانت راجل وراجل جداً كمان الانسان الشهم ميسبش حد فى الموقف دا ويمشى لك منى كل تحيه وتقدير

مشكور وبصراحة انا كنت خايف فى الاول لكن اكتشفت ان البلطجى جبان

sayedlabib

11-06-21, 07:27 PM

ربنا يشفيك اولا وان شاء الله تكون قدوة ومثل لينا كلنا لاننا محتاجين فعلا القلب الجامد اللى يخلينا مانخافش جدع وابن بلد وراجل مصرى اصيل يا عمنا وكله فى ميزان حسناتك وخلى بالك لو انتا نسيت فى يوم انك عملت خير ربك مش بينسى ابدا وهايردهولك خير اكتر منه

تاجر جملة

11-06-21, 07:29 PM

mahmoud11144

11-06-21, 07:36 PM

الف الف حمد الله علي سلامتك يا اجدع راجل
والله لو حد تاني كمانك كان خلع من اول ما اتشتم
بس انت عملت عمل بطولي وبصراحة ربنا يجازيك خير علي ما فعلت
وانت فعلا رااااااااااااااااااااااجل بمعني الكلمة لو في منك اتنين كمان
كانت البلد نضفت ..
تحياتي يا راااااااجل يا جدع..

كريم الشامي

11-06-21, 07:36 PM

الف حمد الله علي السلامة... الظباط بيهرجو يسيبوا الجاني و يمسكو في المظلوم ...

avokato

11-06-21, 07:38 PM

تمام ومتديلوش العصايه ولا الالكتريك

تاجر جملة

11-06-21, 07:43 PM

تاجر جملة

11-06-21, 07:50 PM

تمام ومتديلوش العصايه ولا الالكتريك

طبعا على جثتى يخدوهم بس هو كان هيتجنن ويعرف الايجيبشن ستيك جايبها منين
وطبعا توهته والمفروض الاخ اكسلانس يعمل معايا واجب لكن يللا ماهو بردوا هو عمل معايا واجب
بعصايته وانا اشتريت منها وبعتها لناس كتير ودلوقتى حاسس انهم متضحكش عليهم
مع انى استخدمتها شومة ونسيت حكاية الكهربا دى خالص لان كل دة حصل فى دقايق ومعرفتش افكر فى اى حاجة ومعتقدش الكهربا تنفع فى المواضيع دى
لان الاولانى لما دمه ساح التانى جرى وخاف ولو كنت فكرت فى الكهربا كانوا عورونى بالمطاوى
ودة رأى الناس كلها اللى عرفوا الموضوع

Hany Ekram

11-06-21, 07:51 PM

ألف سلامة عليك و دعواتي لك بالشفاء التام و عقبال ما يتم القضاء علي البلطجة تماما ان شاء الله

تاجر جملة

11-06-21, 07:53 PM

ألف سلامة عليك و دعواتي لك بالشفاء التام و عقبال ما يتم القضاء علي البلطجة تماما ان شاء الله

شكرا لدعائك ويارب ربنا يولع فيهم بجاز

تاجر جملة

11-06-21, 08:04 PM

عارفين انا اية اللى مجننى لحد دلوقتى
ان اللى عورنى فى دماغى هو اللى هرب وللأسف انا لقيت الدم نزل على وشى والدنيا اصفرت
وهمدت عن الحركة والحمد لله انى مفقدتش الوعى

عادل عبده

11-06-21, 08:09 PM

ربنا يجعله فى ميزان حسناتك يا استاذنا الفاضل ومتعرفش ممكن يكون ربنا قوى قلبكوخلاك عملت كده فعلا عشان بعد كده فى مقابل الثواب ده يرفع درجات او يفك عنك قرب او ضيقه وأسأل الله العظيم رب العرش الكريم ان يتقبل هذا العمل منك ويفرج عنك قربه من قرب يوم القيامه كما فرجت عن هؤلاء المسلمين كربه من كرب الدنيا
وتقبل مرورى

hesham[MaFya]a

11-06-21, 08:50 PM

الحمد لله انها جاءت على اد كدة!حمد اللـــــــه على سلامتك

elexlns1

11-06-21, 09:24 PM

الف حمدا لله على السلامة

أسف جت متأخرة ولسة عارف ويارب تكون بخير وانا فعلا استغربت لما كلمتك ولقيتك مبتردش
اليومين اللى فاتوا والحمد لله على سلامتك يا بطل

ahmadkhalaf

11-06-21, 09:55 PM

الف الف الف حمدلله على السلامة
وانتا فعلا راجل شهم وجدع لان الموقف دة صعب جدا
ولو كنت اتعرضتلة كنت هفتكر المثل اللى بيقول (الجرى نص الجدعنة ) ههههههههه
وعلى فكرة الظباط لسة فيهم حتة الغباء اللى هتوديهم فى داهية
وانا لو منك كنت عطيت الظابط 10 فولت يظبطوله دماغة شوية ههههههههههههههه

doos99

11-06-21, 10:01 PM

قدر الله وما شاء فعل علشان كده مصر هتفضل طول العمر بلد الامن و الامان طول ما فيها رجاله زيك
انت عملت الصح و ان شاء الله سوف يجازيك الله خيرا علي ما فعلته

walther p99

11-06-21, 10:01 PM

ربنا يديك على قد ضميرك و مساعدتك للناس

elexlns1

11-06-21, 10:06 PM

مصر بلد الرجالة وبلد الشجاعة واللى ميعرفش مصر يشوف رجالتها وهى بتحمى ناسها وممتلكاتها بنفسها
فى ايام الثورة
والكلام دة عمره ما حصل فى اى دولة فى العالم

khaledshareef

11-06-21, 10:23 PM

المهم ان الجكاية دي هاتشجع ناس كتير تواجه البلطجية
حمدالله على السلامة

tarek8003

11-06-21, 10:46 PM

بارك الله فيك, وأكثر من أمثالك.

احمد على

11-06-21, 10:53 PM

تسلم ايدك انك كسرت خوفك يا ريت مصر كلها زيك

smsmn8888

11-06-21, 10:59 PM

سوال
يعني مخوفتش ليكون معاهم مسدس ولا رشاش والبتاع اليكتريك تا هيعملك اة امام الرشاشات والمسدسات الحية
مخوفتش لية سوال
عارف لية علشان انت انسان كويس وتوكلت علي ربنا ولانك بتعمل خير للة وربنا مابيسيبش حد ابداااا
سوال تاني لو مكنش معاك السلاح هل كان ممكن تعمل كداا الاجابة معلش هجاوب عنك لا الموضوع مختلف
معني كدا ان السلاح البسيط التي معاك اعطي وسيلة مساعدة صح
معلش علي الاسلوب بس تا بسبب بعض الاعضاء التي هاجمة الموضوع تا بشدة و هاجمة اى وسيلة للدفاع عن النفس اقتناع ان الناس الي بتتهجم دول مش بشر دول كائنات من الفضاء وتملك من الاسلاح مالا نستطيع مواجهتة وشكراااا

koktal

11-06-21, 11:04 PM

elexlns1

11-06-21, 11:04 PM

يا جماعة انا أعرف الاستاذ حاتم وهو راجل محترم ومالوش فى المشاكل ودة حتى لما بنشغل الاليكتريك قدامه بيخاف ويبعد نفسه عنه لكن اللى عمله دة دليل على انه خرج من جلده وتخيل نفسه فى الموقف دة ومعاة اسرته
والحقيقة ان الواحد لما بيشوف او بيسمع حاجة زى دى قلبه بيجمد وفعلا مهما كان خوفنا لكن مصر بخير

Tarabeishy

11-06-21, 11:09 PM

Teslam edein el reggallah

guns

11-06-21, 11:22 PM

حمد اللة علي السلامة وبجد اللي انتا عملتة دا موقف راجل بجد وانسان محترم

waleedrahmy

11-06-21, 11:26 PM

راجل من ظهر راجل

kivok0

11-06-21, 11:37 PM

بسم الله مشاء الله ربنا يبركلك و يريت كل الناس محطرمه زيك بس عايز اسئل سوأل ؟ انت معاك سلاح علشان
كدة جمت قلبك و نزلت صح انا برضو نفسي يبقي معايا سلاح علشان ادافع عن نفسي وعلي اي حد في نفس الموقف و اشكرك علي شجعتك

gamopt80

11-06-21, 11:47 PM

Roshdy

11-06-22, 12:03 AM

ربنا يجعلكه في ميزان حسناتك

boody

11-06-22, 12:26 AM

بجد انت من ارجل الناس فى مصر وناس تانية كتير لو كان حصل معاها الموقف دة كانوا حيقولوا ملناش دعوة ولا اية
حمد الله على سلامتك وربنا يحفظك ويحفظ مصر من الاشكال ال....... اللى زى البلطجية

don'tshoot

11-06-22, 01:18 AM

ربنا يحفظك يا بطل ويشفيك وربنا ع الظلمة سواء كانوا البلطجية عديمي الدم والدين أو اللي سايبنهم عشان صعبان عليهم البلد تنضف!

ashraf_f

11-06-22, 01:22 AM

الف سلامة الجدعنة موجودة بس دى فايدت انك معاك حاجة تقوى قلبك السلاح لا يواجه الا بسلاح و سلاح الحق اقوى بكثير من سلاح الباطل

omarara

11-06-22, 01:36 AM

على فكرة يا جماعة عشان نجيب من الآخر الناس بتقول السلاح ومش عارف ايه الراجل استخدم العصاية على انها شومة يعنى لو نزل بالكوريك او اى حاجة كان عمل الصح برضه الفكرة مش فى السلاح والله الفكرة فى البنى آدم
يعنى مش اى حد بيعمل كده والله حط واحد تانى بمسدس حى فى الموقف ده مش هيعمل كده على حسب قدرة ربنا والشجاعة اللى بيدهالك فى الموقف ده
على فكرة الكلام ده مش للشباب اللى بيتخناقوا على طول واللى ماسكين مناطق وبينزلوا يتخانقوا على طول فى الكليات ممكن واحد طول عمره مش بيتخانق ولا بيعمل مشاكل ولكن ساعت لما بيتجيله بيعمل الصح وهى ديه الرجولة
تحياتى ياباشا انا لو فى موقفك ومشيت هربط نفسى فى السرير طول عمرى وهفضل كاره نفسى لغاية لما اموت يارب ما يضعف قلبى ابداً فى موقف زى ده يارب
طالما انت معاك الحق وبضاعف عن شخص ضعيف وكمان بتهاجم قاطع طريق ملوش ديه مش مشكلة لو حتى مت
هتموت شهيد بإذن الله

YOSSEF EL MASRY

11-06-22, 01:43 AM

حمد الله علي السلامتك

يونس

11-06-22, 01:52 AM

انا مش عارف اقول ايه بس بصراحه ربنا يباركلك

m777md62

11-06-22, 02:41 AM

ربنا يباركلك ويجازيك خير ,, وألف حمد لله على سلامتك ,,,,,,,,,,,,,,

سيدخالد

11-06-22, 02:56 AM

فعلا انت راجل بجد والتصرف ايلى عملته يدل على شهمتك ورجولتك ...............وحمد على سلامتك .........ويكون هذا الموقف فى ميزان حسناتك

the hacker

11-06-22, 03:39 AM

الف سلامه عليك يا باشا و جزاك الله خير على فعل الخير

محمود صالح

11-06-22, 04:53 AM

الف سلامة عليك
واهنيك على ان ربنا ثبتك فى موقف زى دة لان فى الاول والاخر ملهاش الا الله هو اللى بيقدر وبيثبت
ولولا ان ربنا اختارك واستخدمك فى نصرة الحق ومساعدة الضعيف
وطبعا موضوع السلاح دة سبب كان ممكن متعرفش تستخدمة لكن ربنا قدر انك تحمى الناس دى وانك تشفهم وتقف لهم والسلاح هو سبب ان اداك الثقة فى نفسك
وطبعا ربنا مبيخطرش ولا بيصطفى اى حد لينصر بية الحق ودة طبعا اكيد لانك راجل صاحب رجولة وخير وحق
بس حبيت افكر ان الفضل فى الاول والاخر من الله ليس الشخص ولا السلاح ولا النتيجة
طبعا دة ميقللش من شهامة ورجولة حضرتك
وبجد يا ريت كل واحد يعرف او يشوف او يحصل معاة موقف يؤل ويحكى لان الحكايات دية بتجرء وبطمن الناس
زى مبنسمع كتير العكس وبنخاف من كتر ما بنسمع عن البلطجية ونخاف منهم
الحكايات دية بتبين انهم اجبن خلق الله وهما احنا اللى خوفنا نفسنا منهم بالباطل
واسف على الاطالة

ramyhekal

11-06-22, 05:13 AM

ربنا يباركلك ويعوضك خير فى مالك واهلك

NSAA

11-06-22, 09:09 AM

بجد ... ربنا يكرمك و يردلك المعروف في الدنيا على أهلك و حبايبك و في الآخرة في الجنة إن شاء الله

NSAA

11-06-22, 09:10 AM

بس إيه حكاية عصاية الإكسلنس دي ... دى غير الإلكترك بتاعه و لا هوه نفسه الإلكترك

محمد احمد العنانى

11-06-22, 10:10 AM

هى دى اخلاق المصرى الاصيل الى شارب من مية النيل تحياتى يا بطل .

fendeka

11-06-22, 10:27 AM

قصه روعه تجسد بطوله الايجبشن ستيك :)

moneey1975

11-06-22, 10:31 AM

الف حمدله علي سلامتك يا باشا والغرز ديه هتبقي وسام علي صدرك وعلي راسنا كلنا من فوق لانك مصري بجد ومحترم بجد وربنا يكتر من امثالك

avokato

11-06-22, 10:36 AM

انا حصلي موقف قريب من دا في فبراير والاحداث شغاله واتنين ماتوا واتعملتلي قضيه عسكريه وطلع الاتنين واحد هربان من طره والتاني مسجل وسوابق وانا محامي وكان معايا دكتور صيدلي يومين وكنت بره وكانوا خاطفين واحده في مكروباص وحسيت اني عايش فيلم هندي

smsmn8888

11-06-22, 10:43 AM

كلامك سليم يا سمسم .. بس ممكن طلب .. ألا وهو تحسين الأخطاء الإملائية اللى فى كتاباتك .. لأن والله ساعات بيتعسر عليا قرائتها .. تحياتى لك وللجميع ..

تحت امرك يا باشا هدخل اخلاص نحو امية تاني بعد اذنك ههههههههههه

smsmn8888

11-06-22, 10:49 AM

كلامك صح يا سمسم انا بستغرب قوي من الناس الي بتعارض ان الواحد يبقى معاه اي حاجه يدافع بيها عن نفسه!, والاغرب ان هو يبقى معاه هو نفس الحاجه ومش عايز غيره يعمل كده
وهو لو اتعرض لموقف هيعرف قيمتها وقتها

هي دي النقطة فعلاااا انا كونت بختلف مع ناس كتير علي مسدس الصوت مثلاا وكان دائما ما يرفضو الموضوع تا لية لانهم ببساطة معاهم مسدس حي برخصة يعني الصوت تا لعبة طيب انا لم ربنا يعطيني كام مليون انشاء اللة وارخص سلاح واجيب مسدس حي صدقني مهمسك صوت ناني بس هجيب رشاش بعد كدا شكرااا

محمد صلاح الدين

11-06-22, 11:05 AM

فعلا معادن الناس بتظهر وقت الشدة

ربنا يباركلك

NSAA

11-06-22, 11:15 AM

هي دي النقطة فعلاااا انا كونت بختلف مع ناس كتير علي مسدس الصوت مثلاا وكان دائما ما يرفضو الموضوع تا لية لانهم ببساطة معاهم مسدس حي برخصة يعني الصوت تا لعبة طيب انا لم ربنا يعطيني كام مليون انشاء اللة وارخص سلاح واجيب مسدس حي صدقني مهمسك صوت ناني بس هجيب رشاش بعد كدا شكرااا

ههههههههه
بس يا خوفي لما تجيب الرشاش ... ماتكتفيش بس بمجرد رفض حمل الصوت ... انت ممكن ترفض حمل الصوت و الحي و تطلب قفل المنتدى أصلا .... رشاش بقى

smsmn8888

11-06-22, 11:25 AM

ههههههههه
بس يا خوفي لما تجيب الرشاش ... ماتكتفيش بس بمجرد رفض حمل الصوت ... انت ممكن ترفض حمل الصوت و الحي و تطلب قفل المنتدى أصلا .... رشاش بقى

الخطوة التالتا بقي ؟؟؟ f16 نفسي فيها اوي بس بسواق

avokato

11-06-22, 12:13 PM

هي دي النقطة فعلاااا انا كونت بختلف مع ناس كتير علي مسدس الصوت مثلاا وكان دائما ما يرفضو الموضوع تا لية لانهم ببساطة معاهم مسدس حي برخصة يعني الصوت تا لعبة طيب انا لم ربنا يعطيني كام مليون انشاء اللة وارخص سلاح واجيب مسدس حي صدقني مهمسك صوت ناني بس هجيب رشاش بعد كدا شكرااا
انا سهل ليا ارخص حي بس كل الي حوليا بيحزروني منه ومن شره ومن مشاكله ومن استخدامه فكبرت دماغي

smsmn8888

11-06-22, 01:11 PM

انا سهل ليا ارخص حي بس كل الي حوليا بيحزروني منه ومن شره ومن مشاكله ومن استخدامه فكبرت دماغي

لا مهلش انت غلطان خاص في الوقت الحالي

avokato

11-06-22, 01:24 PM

انا شغال في شركه اجنبيه ومعايا توكيل من شركه مساهم فيها البنك االاهلي بنسبه كبيره ومعايا باستمرار شيكات بمبالغ كبيره وساعات فلوس وشريك في شركه واخده عقد تحصيل مديونيات من بنك يبقي صعب ولا سهل

كفافى1

11-06-22, 03:38 PM

مصر كلها رجاله

NSAA

11-06-22, 03:42 PM

مصر كلها رجاله

أنا أسف للتعليق اللي هكتبه و مش قصدي بكده التعديل عليك أو مراجعتك ... بس بجد الكلمة استوقفتني ...
مصر لسه فيها رجالة ... إنما للأسف مش كلها رجالة و لا حاجة ... يمكن كان زمان ... بس دلوقتي ... معتقدش

كفافى1

11-06-22, 03:47 PM

ربنا قادر ويخليها كلها رجالة

tamer el-henawy

11-06-22, 03:47 PM

حمد على سلامتك
والله ينور عليك

hema777h

11-06-22, 03:48 PM

مشكورين يا جماعة ونسيت اقولكم ان العيال دى كانت بتقلع الست الدهب
والناس يا عينى بيحلفولى ان الدهب دة شايلينه لأى عوزة
وهما كانوا راجعين من عند حمات الراجل ومروحين

انا عايز افهم حاااااااااااااااااااجة واستحملوني شوية
1-هماااااااااااااااا لية سيبين البلطجية تبيع وتشتري في الناس بالطريقة دي .
2-لية لحد دلوقتي شيفين مناظر بس للشرطة ومفيش وجود حقيقي في المواقف
3-لية ان يكون معااااااااااك حاجة بتستخدمها في الدفاع عن نفسك عيزين يخدوها منك ودي تاني مرة تحصل وتاني موضوع يناقش في المنتدي واللة اعلم في قد اية علي ارض الواقع .
4- سوال بسيط هما البلطجية والمسجلين والاشكاااال القذرة دي مش حلال فيهم الاعدااااااااااام في ميدااااااااان عااااااااااااااااام وساعتها مفيش حس حيوان منهم هيطلع تاني لانهم هيبقو عارفين ان في رقبتهم هتطير
5-هما الاشكال القذرة دي مش كانو عارفين اماكنهم وعارفين هما بيلموهم ازاي لية مش بيلموهم
دااااااااااااااااا سوال بيطرح نفسو ولو كانو مش قدرين مش صاعب انهم يطلبو قوة من الجيش وبصراحة الجيش مش بيتاخر

avokato

11-06-22, 04:10 PM

فيه حمله اليومين دول الشرطه والجيش بيلموهم فعلا وحصل من كام يوم اقتحام لقسم العر يش تقريبا او مديريه الامن وفي قوه كبيره هناك دلوقتي

avokato

11-06-22, 04:11 PM

مصر كلها رجاله

متشكرين يا جميل منا مبقاش راجل لو مكنتش نزلت وفتشت العربيات وكنت ببات في الشارع في الاحداث

man.man115

11-06-22, 04:17 PM

تسلم يمينك موقف فى منتهى الرجولة والايجابية تحية تقدير واعجاب بجد ربنا يحميك ويستر طريقك ويحفظك من كل سوء

wknm

11-06-22, 04:19 PM

حمد الله على السلامه
يا رب مصر تنضف بقى من ولاد ال...... بقي
و والله انت راجل 100% و شفاك الله و عفاك

تحياتي

talha

11-06-22, 04:27 PM

جدع والله ورجوله منك انك مسبتهمش

Ahmed_Hegazi

11-06-22, 04:50 PM

والله انا مهما قلت من كلام مش هقدر اعبر عن اللى انا حسيته لما قرات الكلام ده
بس فعلا ربنا يبارك فى عمرك وفى صحتك
معلش انا اتاخرت شويه بس انا لسه شايف الموضوع دلوقت

تاجر جملة

11-06-22, 04:58 PM

ياة

مكونتش اعرف ان المنتدى دة الناس فيه بتحب بعضها كدة وكل اللى كتبتوه خلانى نفسى اشوف بلطجى تانى
عشان اكله بسنانى وبجد بجد انا فخور بيكم وسعيد بكل كلمة كتبتوها
وانا اسف مش بدخل كتير عشان لسة تعبان شوية ومش عارف اخرج وانا شعرى مقصوص كدة مكان الخياطة
وربنا يخلينا لبعض ويحرق قلب البلطجى وربنا يصلح حال مصر بلدنا وحبيبتنا كلنا ونكيد الاعادى

mrasool

11-06-22, 05:07 PM

الف حمدلله على سلامتك
ودايما رجولة كدا
ربنا يباركلك

Ahmed914

11-06-22, 05:21 PM

فيه حمله اليومين دول الشرطه والجيش بيلموهم فعلا وحصل من كام يوم اقتحام لقسم العر يش تقريبا او مديريه الامن وفي قوه كبيره هناك دلوقتي

بصراحة أنا عايز أقول رأيى فى الشرطة بكل وضوح ..... معدلات الجريمة قبل الثورة هى هى بعد الثورة ... الفرق كان فى إخفاء معدلات الجريمة و اللى كان بيتكلم على أمن الدولة ... وطبعاً مع أحداث يناير سقطت هيبة بذلة الضابط !!! .... وهنا ظهرت المعدلات الحقيقية للجريمة ... وظهر إن 90% من الضباط فعلاً مجرد هباء يملاْ الملبس الرسمى الموحد لإثبات أنهم قوة قاهرة .... والحقيقى أنهم يستخدمونها لإغراضهم الشخصية والعائلية .... دا كفاية إن قبل الثورة كانت الخناقة الجامدة تحصل محدش يتدخل الإ بعد ما تنفض ويكون فيه إثنين أو ثلاثة مجروحين .... دلوقتى البلد كلها عبارة عن خناقة كبيرة ... مش كفاية العار اللى هما فيه ؟!! .... بيستعينوا بالجيش - خلى بالكم من موضوع الجيش اللى أصلاً أغلبه مجندين لمدة سنة أو ثلاث سنين على الأكثر - بينما كفاءات الضباط المفترضة لا تستطيع أصلاً السيطرة على المرور ..... برجاء الإطلاع على عدد اليوم من جريدة المصرى اليوم صفحة 2 ... ويا ريت تقولوا رأيكم بعد كده ....

Abo Yousof

11-06-22, 06:06 PM

ما شاء الله تبارك الله ربنا يبارك فيك شهامة ورجولة وشجاعة تحسد عليها

وابشر بقول النبي صلى الله عليه وسلم ( من فرج عن مسلم كربه من كرب الدنيا فرج الله عنه كربة من كرب يوم

القيامة )

ولا شك انهم كانوا في كربة عظيمة .... وما ادراك ما كرب يوم القيامة

الف حمد لله على سلامتك يا بطل

Abo Yousof

11-06-22, 06:10 PM

انا عايز اسئل سؤال معليش

ايه حكاية عصاية اكسلنس دي ومين هو اكسلنس ده كان بيجي في الافلام القديمة الابيض واسود

أبو مهند

11-06-22, 07:17 PM

موقف رجولي بجد وربنا يجازيك علي اللي عملته

braveheart

11-06-22, 07:24 PM

تحياتي لك يا سيدي علي الموقف البطولي الذي قمت به ... و فعلا أنا مقدر موقفك ... و خاصة عندما شعرت بأن الطفل المعرض للخطر أحد أطفالك ... فأنا كثيرا ما أشعر بهذا الشعور و خاصة بعدما رزقني الله بالأطفال ... و تحيه لشجعاتك و سرعة أتخاذك للقرار ,, و أؤكد لك أن البلطجية هم حفنة من الجبناء ... و أنهم في هذا الموقف لا يقلون رعبا عن هذه الأسرة ... صدقني.

و في النهاية حمدا لله علي سلامتك و سلامة الأسرة الأخري .. و ربنا يحفظكم و يحفظ مصرنا من كل شر.

تحياتي للجمـــيع.

البطل

11-06-22, 07:28 PM

الراجل بجد اللى يسد وقت المحن وقت الشدائد والظروف الطارئة..... لو حد تاني كان خاف وقال هوه أنا مستغني عن حياتي ويكبر ويمشى وهوه مش عارف ان القدر مكتوب حتى لو بين الجيش ........ .... وجزاك الله خير

elexlns1

11-06-22, 07:37 PM

انا عايز اسئل سؤال معليش

ايه حكاية عصاية اكسلنس دي ومين هو اكسلنس ده كان بيجي في الافلام القديمة الابيض واسود

http://www.egypthunt.net/showthread.php?t=9919

sniper-2

11-06-22, 08:10 PM

طبعا الحل الوحيد أن الناس تواجه البلطجية وما تضعفش أمامهم بس دا هيكون فيه خسائر واصابات ..وربنا يستر

Ahmed914

11-06-22, 08:23 PM

طبعا الحل الوحيد أن الناس تواجه البلطجية وما تضعفش أمامهم بس دا هيكون فيه خسائر واصابات ..وربنا يستر

الناس هتواجه البلطجية !! ..... وطب الشرطة ... مش لازم نوفر ليهم مقاعد للمتفرجين ؟!!!

smsmn8888

11-06-22, 08:38 PM

[QUOTE=Ahmed914;129708][b][font="verdana"][color="darkred"]بصراحة أنا عايز أقول رأيى فى الشرطة بكل وضوح ..... معدلات الجريمة قبل الثورة هى هى بعد الثورة ... الفرق كان فى إخفاء معدلات الجريمة و اللى كان بيتكلم على أمن الدولة ... وطبعاً مع أحداث يناير سقطت هيبة ب

[SIZE="5"]توضيح بسيط المعدل لا ذاد بشدة كبيرة اتني المجندين وللاسف وتا من داخل الجيش في منهم بقالو اقل من شهر تدريب يعني الذي يدخل الان ويضرب نار صح بينزل الشارع تاني يوم مش بتضرب نار وعارف تشيل سلاح خلاص انول وتا للاسف في راي البسيط خطاا فادححح

smsmn8888

11-06-22, 08:40 PM

الناس هتواجه البلطجية !! ..... وطب الشرطة ... مش لازم نوفر ليهم مقاعد للمتفرجين ؟!!!

حلوةةة بس مين هيلم النقطة طيب

Ahmed914

11-06-22, 08:42 PM

توضيح بسيط المعدل لا ذاد بشدة كبيرة اتني المجندين وللاسف وتا من داخل الجيش في منهم بقالو اقل من شهر تدريب يعني الذي يدخل الان ويضرب نار صح بينزل الشارع تاني يوم مش بتضرب نار وعارف تشيل سلاح خلاص انول وتا للاسف في راي البسيط خطاا فادححح [/quote]

توضيحاً وإستكمال لكلام حضرتك فترة التدريب للمجندين الجدد عقب أحداث 25 يناير لمدة خمسة عشر يوماً , ولكن المشكلة إن بهوات اشرطة لا عايزين يشتغلوا ولا يرخصوا سلاح لأى حد ... يعنى من الآخر تواطؤ صريح مع البلطجية والحرامية !!!!! .... وأنا أقصد نسبة الـ 90% وليس جميع ضباط الشرطة !!

Ahmed914

11-06-22, 08:43 PM

قال يعنى الـ 10% الباقين عارفين يعملوا حاجة !!!!!!!!!!!!!

elexlns1

11-06-22, 09:13 PM

هههههههههههههههههههههه والله حاجة تكسف

BooGY

11-06-22, 11:15 PM

الف حمد لله على سلامتك يا بطل والحمد لله جت سليمة

solom1

11-06-22, 11:18 PM

ألف مليون حمدا لله على السلامة. وربنا يجازيك خير على اللي عملته إن شاء الله.

elexlns1

11-06-23, 04:44 PM

ان شاء الله البلطجية يتلموا فى السجون

sniper-2

11-06-23, 10:16 PM

الف سلامة ليك وتحياتى على رجولتك

elexlns1

11-06-24, 12:31 AM

بس هو فعلا ليه الظابط ماخدش الصاعق لما هو ممنوع

hema777h

11-06-24, 12:35 AM

بس هو فعلا ليه الظابط ماخدش الصاعق لما هو ممنوع

هي الفكرة الحاجة دي كانت مع واحد محترم ولا مع واحد بيستعملها في الايذاء للناس وهل لو مكنتش معاة حاجة زي كدااا كان ممكن يحصل ما لا يحمد عقباة والحمد للة انها جات علي قد كداااا

elexlns1

11-06-24, 12:40 AM

كلامك معقول طبعا

hema777h

11-06-24, 12:44 AM

علي فكرة انا لسة قاري موضوع خبر بمليون جنية حالا يعني انا كتبت الرد قبل ما اعرف الموضوع يعني لو واحد صايغ دهب ومعاة سلاح وحد وقفة في لجنة ورخم واتعرض علي النيابة 90 % وكيل النيابة هيديلو افراج بكفالة علي اصعب الظروف

bravehro1

11-06-24, 01:16 AM

تحياتي لك ولكل المصريين الشهماء وجزاك الله خير والف حمدالله على السلامه

bravehro1

11-06-24, 01:19 AM

تسلم يابو الشهامه ادي المصري الاصيل وتحيه لك والف حمدالله على السلامه

حسن حلمى مندور

11-06-24, 02:34 PM

تسلم ايد كل مصرى شريف ابن اصول ويغيت المحتاج هى دي شهامة ولاد البلد بجد حمدا لله على سلامتك

ابو صهيب

11-06-25, 02:54 PM

ربنا يباركلك في صحتك
و يوسع عليك من فضله
و يباركلك في أهلك و مالك

تاجر جملة

11-06-25, 05:45 PM

اشكر جميع الأخوة على السؤال
والحمد لله كل شىء بخير وأشكر الأخوة الذين اتصلوا بى
وأشكر كل من ارسل لى على الخاص
وأشكركم جميعا بشدة

Zero

11-06-25, 07:01 PM

و أنا ساعات بقول أنه مالوش لزمه المسدس يبقى بلى أو حى و الكلام دة دا أنا طلعت مغفل
المهم الثقافة فى أستخدام السلاح زى ماحضرتك عملت بالظبط أنا بجد فرحان برد فعل حضرتك
دا أنا عايز أقول لحضرتك أن الظابط لو قالك عايز الأليكتريك و الكلام دة فكك منه و متسمعش كلامه
و لا عمرك تفرط فى حاجة تدافع بيها عن نفسك سواء أليكتريك أو مسدس أو سيلف ديفينس أو أمريكان ستيك أى حاجة تلاقيها تقدر تدافع بيها عن نفسك خليها على جثتك
فى حقوق الإنسان فيه مادة بتتكلم عن حق الدفاع عن النفس حتى لو إلى ادامك مات يعنى من النهايه لو كنت قتلت واحد فيهم و مسكت راسة وبقيت تدشها فى الأرض مكانش هيبقى له ديه و بالتوفيق يا باشا و أوعى تزعل على الأربع غرز دول انت بالأربع غرز دول أثبت للناس كلها إنك فعلا تستحق لقب ذكر إلى مكتوب فى البطاقة الشخصيه لأن ناس كتيره أوى مكتوب فى بطاقتها كدة و هيا أصلا مش كدة و إن شاء الله ربنا يكرمك و أجرك و ثوابك عند الله طبعا و يوقفلك ولاد الحلال و عمرك ماتشوف كدة فى نفسك أو فى حد تعرفه ولا فى أى إنسان جوة مصر قولوا يا رب

تاجر جملة

11-06-25, 07:09 PM

احمد حسن ادريس

11-06-25, 08:09 PM

الف حمد الله على السلامة وانت عملت عمل بطولى والله العظيم واثبت ان المصريين دول نعم الشهامة والله العظيم اثناء مشاهدتى للموضوع انا كنت اتمنى ان اكون معاك على الاقل كنت فاديتك وجات فية الاربع غرز دول وعلى فكرة فى سلاح جميل بالنسبالى انا بمشى بية ورائع عارفين اية هوة الفرمنش جميل والحمد لله متضرب علية كويس

elexlns1

11-06-25, 10:47 PM

احمد حسن ادريس

11-06-26, 12:10 AM

الله يخليكى يا استاذ اكسلنس تسلم ويسلم كلامك الجميل

ayman_mahran

11-06-26, 01:20 AM

تسلم ايديك وربنا يباركلك ويجعله في ميزان حسناتك

elexlns1

11-06-27, 12:25 AM

الله يخليكى يا استاذ اكسلنس تسلم ويسلم كلامك الجميل

انت اللى كلامك اجمل

ahmed-hashem

11-06-27, 03:34 PM

أنت رجل بمعنى الكلمه
ربنا يحميك و يجزيك خير

بس عندى سؤال
يعنى ايه عصاية اكسلنس ؟؟؟؟؟؟؟؟؟

ادهم محمود محمد

11-06-27, 03:43 PM

اسمح لى احنى قامتى لرجل اقل ما يوصف به انه رجل على حق فارس شهم

الله يكرمك

اغاثة المسلم فرض واجب

رقم الحديث: 143
(حديث مرفوع) حَدَّثَنَاهُ مُحَمَّدُ بْنُ عُمَرَ الْبُحَيْرِيُّ ، قَالَ . ح أَبُو مُسْلِمٍ الْكَجِّيُّ ، قَالَ . ح سَعِيدُ بْنُ سُلَيْمَانَ الْعَطَّارُ ، قَالَ . ح مُوسَى بْنُ عُبَيْدَةَ الرَّبَذِيُّ ، عَنْ مُحَمَّدِ بْنِ ثَابِتٍ ، عَنْ أَبِي هُرَيْرَةَ رَضِيَ اللَّهُ عَنْهُ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " إِذَا قَالَ الرَّجُلُ لأَخِيهِ : جَزَاكَ اللَّهُ خَيْرًا ، فَقَدْ بَالَغَ فِي الثَّنَاءِ وَقَوْلُهُ مَنْ سَأَلَكُمْ بِاللَّهِ فَأَعْطُوهُ " ، إِجْلالا لِلَّهِ تَعَالَى ، وَتَعْظِيمًا لَهُ ، وَإِيجَابًا لِحَقِّهِ ، قَالَ الشَّيْخُ الزَّاهِدُ الْمُصَنِّفُ رَحِمَهُ اللَّهُ : فَيَجُوزُ أَنْ يُحْمَلَ مَعْنَاهُ عَلَى مَعْنَى : مَنْ سَأَلَكُمْ فِي اللَّهِ فَأَعْطُوهُ ، فَيَكُونُ الْبَاءُ بِمَعْنَى فِي ، أَيْ مَنْ سَأَلَكُمْ فِي طَاعَةِ اللَّهِ ، وَفِي إِقَامَةِ أَمْرِهِ ، وَفِي إِظْهَارِ مَنَارِ الدِّينِ ، وَسُبُلِ الْخَيْرِ ، فَأَعْطُوهُ ، وَلَيْسَ يَجِبُ إِعْطَاءُ السَّائِلِ إِذَا كَانَ فِي مَعْصِيَةٍ ، أَوْ فُضُولٍ . فَمَنْ سَأَلَ بِاللَّهِ فِيمَا لَيْسَ عَلَيْهِ وَلا عَلَيْكَ فَرِيضَةٌ ، فَأَعْطَاكَ إِيَّاهُ لإِجْلالِ حَقِّ اللَّهِ ، وَتَعْظِيمِهِ ، وَلَيْسَ عَلَيْكَ بِفَرْضٍ وَلا حَتْمٍ مَنْ سَأَلَ فِيمَا وَجَبَ عَلَيْكَ ، وَعَلَى السَّائِلِ فَرْضٌ ، فَإِعْطَاؤُكَ إِيَّاهُ فَرْضٌ عَلَيْكَ ، وَلازِمٌ لَكَ لا يَجُوزُ مَنْعُهُ . وَقَوْلُهُ : " وَمَنِ اسْتَعَاذَكُمْ بِاللَّهِ " عِنْدَ ضَرُورَةٍ حَلَّتْ بِهِ ، أَوْ ظُلْمٍ لَحِقَهُ ، فَأَعِيذُوهُ ، فَإِنَّ إِغَاثَةَ الْمَلْهُوفِ فَرْضٌ وَاجِبٌ ، وَالإِعَاذَةُ ، وَإِعْطَاءُ السَّائِلِ مِنْ فُرُوضِ الْكِفَايَةِ الَّتِي يَسْقُطُ عَنْكَ إِذَا قَامَ بِهَا غَيْرُكَ . وَقَوْلُهُ : " وَمَنْ دَعَاكُمْ فَأَجِيبُوهُ " ، يَجُوزُ أَنْ يَكُونَ مَعْنَاهُ : مَنْ دَعَاكُمْ لِلاسْتِعَانَةِ بِكُمْ يَجُوزُ إِعَانَتُهُ فَأَجِيبُوهُ ، كَمَا قَالَ تَعَالَى : وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الإِثْمِ وَالْعُدْوَانِ وَيَجُوزُ أَنْ يَكُونَ مَعْنَاهُ : مَنْ دَعَاكُمْ إِلَى طَعَامٍ ، فَأَجِيبُوهُ كَمَا .

elexlns1

11-06-27, 06:10 PM

أنت رجل بمعنى الكلمه
ربنا يحميك و يجزيك خير

بس عندى سؤال
يعنى ايه عصاية اكسلنس ؟؟؟؟؟؟؟؟؟

شاهد الموضوع

http://www.egypthunt.net/showthread.php?t=9919

Biso007

11-06-27, 06:50 PM

اعتذار واجب للرد المتأخر ...

ألف سلامة عليك يا بطل و ان شاء الله الاربع غرز دول تلاقيهم اربع نخلات فى الجنة ... أمين.

كلمة واجبة و تحذير عملا بقول الله (و لا تلقوا بايديكم الى التهلكة) ... اخونا البطل كان من قوة الملاحظة انه رأى المطاوى فقط و بالرغم من خطورة الموقف و المطواه هى اداة قاتله برضه و لكن النصر و التثبيت من عند الله اهم ... و لكن ... اذا كان الموقف مختلف مثل وجود سلاح نارى (بندقية الى مثلا) او وجود عدد اشخاص أكبر فالامر يجب ان نأخذه بالعقل ... أى كمية من الذهب لا تساوى سقوط قتيل حتى و لو كان شهيد و حتى سرقة السيارة تولع بجاز فى مقابل خسارة حياة فرد ... طبعا هذا ليس تحريض على الجبن و ترك الناس فى المصائب و لكن الروح غالية عند الله و لا يجب التضحية بها الا فى ما تساويه ... انا شخصيا لن اجازف بحياتى فى مقابل موقف سرقة و لكن اذا كان هناك نية اغتصاب انثى او قتل فلا اختيار سوى تلاوة الشهادتين و التوكل على الله و الدخول فى المعركة ... و ربنا يكفينا شر الابتلاء و نسأله الصبر اذا وقع.

كلمة اخيرة و هى ان بجاحة و اجرام البلطجية زاد جدا خاصة مع طول غياب هيبة الشرطة و ان عادت باعداد قليلة و الحوادث التى نسمع عنها الان كلها تتضمن اسلحة الية و نية مباشرة للقتل و ليس فقط للتهديد .. دعوة لكل من تضطره الظروف للسير فى مناطق او ظروف خطرة ان يسلح نفسه بسلاح بجد و الابتعاد تماما عن التهويش بمسدس صوت لان العواقب قد تكون وخيمة .... و يارب عدى الايام دى على خير و احفظ اولادنا و بيوتنا من كل شر.

تاجر جملة

11-07-02, 11:02 PM

الحمد لله كل شىء بخير وشكرا لكم جميعا

mazenger

11-07-03, 09:11 PM

اهنئك على شجاعتك وحسن تصرفك وربنا يجعل عملك هذا خالصا لوجهة عز وجل وهو القادر على الجزاء ارجو ان تتقبل منى هذا القب ((( قلب الاسد )) وشكرا لفعلك الكريم

elexlns1

11-07-04, 12:05 AM

اهنئك على شجاعتك وحسن تصرفك وربنا يجعل عملك هذا خالصا لوجهة عز وجل وهو القادر على الجزاء ارجو ان تتقبل منى هذا القب ((( قلب الاسد )) وشكرا لفعلك الكريم

عندك حق طبعا

hema777h

11-07-04, 12:07 AM

في موضوع ليك امبار ح يا كسلنس وانا مش لاقية دلوقتي

elexlns1

11-07-04, 12:35 AM

انهى موضوع

hema777h

11-07-04, 12:55 AM

الي كاااان في الفيديو بتاع ظابط الامن المركزي الي بيرقص بسيف او سنجة

ezz

11-07-07, 12:08 AM

هما دول المصريين الجدعان أوى ربنا يزيد من أمثالك

akmels

11-07-07, 11:09 AM

ربنا يحميك على شهامتك , و يا ريت كلنا نكون ايجابيين و نتصدى للبلطجة بدون خوف فكن على يقين ان الموت دفاعا عن النفس او دفاعا عن احد ضد البلطجة له اجرة عند الله

هيثم محمد مصطفى

11-07-07, 12:39 PM

اللة يصلح حالك ويبركلك فى كل متملك يداك انشاء اللة اخى

يجزيك اللة كل خير

ahmadkhalaf

11-07-07, 03:57 PM